Siohwa Kin Kalahdeki Salelepek
‘Dehr salelepek ong emenemen.’—MALAKAI 2:10, NW.
1. Ma kitail men ale mour soutuk, dahme Koht kin kupwurki kitail en wia?
KE MEN mour kohkohlahte? Ma ke kamehlele koapworopwor me Paipel inoukihdahr, ele mwein ke pahn sapeng, ‘Ei, uhdahn.’ Ahpw, ma ke men Koht en ketikihong uhk mour kohkohlahte nan sapwellime sampah kapw, ke anahne kapwaiada sapwellime kupwur kan. (Eklesiasdes 12:13; Sohn 17:3) E sapwung me Koht en kupwurki aramas soh-unsek akan en wia met? Soh, e inenen pwung pwe Siohwa kin kangoange kitail en wia met ni E mahsanih: “I anahne amwail limpoak poatopoat, kaidehn amwail meirong en mahn akan. I anahne nei aramas akan en wehwehkin ie sang ar pahn wiahiong ie meirong isihs kan.” (Oseia 6:6) Eri, aramas soh-unsek kan pil kak kapwaiada sapwellimen Koht kosonned akan.
2. Iaduwen mehn Israel tohto kin salelepek ong Siohwa?
2 Ahpw, aramas koaros sohte men wia kupwuren Koht. Oseia kawehwehda me mehn Israel tohto sohte men kapwaiada kupwuren Koht. Nin duwen wehi ehu, irail kin wiahda arail inou en kapwaiada sapwellimen Koht kosonned akan. (Eksodus 24:1-8) Ahpw, sohte pwand sang met, irail ‘kauwehla inouwo.’ Eri, Siohwa mahsanih me irail mehn Israel pwukat kin “salelepek.” (Oseia 6:7) Sang ni ahnsowo lel atail ahnsou, aramas tohto me kin wia met. Ahpw, tamataman me Siohwa kin kalahdeki aramas me kin widing oh salelepek, sohte lipilipil ma irail kin salelepek ong Ih de irail kin salelepek ong irail akan me kin poakohng Siohwa oh papah Ih.
3. Dahme kitail pahn kasawihada nan onop wet?
3 Kaidehn soukohp Oseia kelepwte me kin kawehwehda mwahu duwen kupwuren Koht ong aramas salelepek kan, oh kitail pil anahne ahneki madamadau wet ma kitail men pil paiekihda mour peren ieu. Nan artikel en mwowe, kitail tepida kasawihada ni oaretik kokohp en Malakai, tepida sang ni irelaud ehu. Ni ahnsouwet, kitail kak pakalahng Malakai irelaud riau oh kitail pahn sukuhliki duwen sapwellimen Koht kupwur kan ong irail aramas salelepek kan. Edetehn Malakai kin koasoia duwen irair akan me kin wiawi nanpwungen sapwellimen Koht aramas akan sounpar tohto mwurin irail pitsang selidi nan Papilon, kitail kak paiekihda sang irelaud riau nan rahnpwukat.
Samworo kan Me Kin Anahne Ale Kadeik
4. Kaweid kehlail dahieu me Siohwa ketikihong samworo kan?
4 Malakai irelaud 2 kin tepikihda mahsan kan duwen sapwellimen Siohwa kadeik ong irail samworo kan en mehn Suhs pwehki irail sohpeisang sapwellimen Koht pwung kan. Ma irail sohte kapwaiada sapwellime kaweid oh kapwungala arail wiewia kan, irail pahn lelohng kahpwal akan. Menlau wadek iretikitik ehu oh riau: “ ‘Iet kosonned ehu ong kumwail [samworo kan]: Amwail wiewia kan en kasalehda amwail waunekin ie. Ma kumwail sohte pahn rong duwen me I padahkihong kumwail, eri, I pahn kerieikumwailla. I pahn ketikihong riah ieu pohn soahng kan me kumwail kin ale nin duwen samworo. Ei, ni mehlel I kerieiraillahr, pwehki amwail sohte kin kesempwalki ei kosonned kan.’ ” Ma samworo kan kin padahkiong aramas akan duwen sapwellimen Koht kosonned akan oh kapwaiada, irail pahn ale kapai kan. Ahpw, pwehki re kin pohnsehsehla kupwuren Koht, irail pahn riahla. Pil kapai kan me samworo kan kin koasoia pahn wekila wiahla keria kan.
5, 6. (a) Dahme kahrehda e konehng irail samworo kan en ale kadeik? (b) Iaduwen Siohwa kasalehda me e kin kalahdeki samworo kan?
5 Dahme kahrehda konehng en irail samworo kan en ale kadeik? Ire tikitik 7 kin ni sansal kawehwehda met: “Iei met pwukoahn samworo kan: re en padahkihong meteikan pwe re en wehwehki mehlel Koht. Aramas akan uhdahn pahn pwarala rehrail pwe re en padahngki duwen kupwurei, pwehki iei irail me meninkeder en Kauno, Wasa Lapalap.” Sounpar kid samwa samwalahro, sapwellimen Koht kosonned akan me kohwong mehn Israel akan sang rehn Moses, koasoia duwen pwukoa en irail samworo kan iei en “padahkihong mehn Israel koaros kosonned koaros me Kauno ketikihong Moses pwehn padahkihong kumwail.” (Lipai 10:11) E kin kansensuwed pwe ni ahnsou mwuhr, sounnting en pwuhken 2 Kronikel 15:3 koasoia: “Ahnsou reirei Israel sohte ahneki Koht mehlelo, sohte samworo me pahn padahkih irail, oh sohte kosonned ehu.”
6 Ni mwehin Malakai, nan senturi kalimau B.C.E., wiewia kan en irail samworo kan kin duduhwehte. Irail sohte kin padahkiong aramas akan duwen sapwellimen Koht Kosonnedo. Eri, e konehng samworo pwukat en ale kadeik. Kilang mahsen kehlail kan me Siohwa kin doadoahngki ong irail. Malakai 2:3 mahsanih: “I pahn iriski masamwail pwisehn mahn en amwail meirong kan—oh I pahn keseikumwailla wasa me pwise kan kin lekdekla ie.” Kadeik wet me inenen kehlail! Aramas akan kin wisikla likin kahnimpwalo pwisehn mahn en meirong kan pwehn isihsla. (Lipai 16:27) Ahpw, ni ahnsou me Siohwa padahkiong irail me E pahn iriski masarail pwisehn mahn kan, met kin kasansalehda me E kin ketin kalahdeki aramas pwukat oh arail meirong kan.
7. Dahme kahrehda Siohwa kin engiengiada rehn irail sounpadahk kan en Kosonnedo?
7 Sounpar epwiki kei mwohn mwehin Malakai, Siohwa ketin pilada mehn Lipai kan en apwalih Impwal Sarawio oh mwuri Tehnpas Sarawio oh pil doadoahk sarawio. Irail me kin wia sounpadahk kan en nan wehin Israel. Ma irail kin kapwaiada arail pwukoa, e pahn imwikihla mour oh popohl ong irail oh pil ong wehio pwon. (Nempe 3:5-8) Ahpw, mehn Lipai kan sohlahr lemmwiki Koht duwehte irail kin wia mahs. Ih kahrepe Siohwa mahsanihong irail: “A kumwail samworo kan, kumwail salongasangehr ahl pwungo. Amwail padahk kan kahrehiongehr me tohto re en wia me sapwung. Kumwail kasapwungelahr inou en [Lipai] . . . Kumwail sohte peikiong kupwurei.” (Malakai 2:8, 9) Pwehki irail samworo kan sohte kin wia padahk mehlel iangahki ahr wiewia sapwung kan, mehn Israel tohto salongalahr, eri, met kin kahrehong Siohwa en engiengiada pahrail.
Kolokolete Sapwellimen Koht Kosonned akan
8. E kin sohte konehng en kasikasik me aramas akan pahn kak kapwaiada sapwellimen Koht kosonned akan? Kawehwe.
8 Kitail en dehr medemedewe me e konehng irail samworo pwukat en ale mahkpen diparail kan pwehki irail aramas soh-unsek akan oh re sohte kak kolokolete sapwellimen Koht kosonned akan. Ahpw, ni mehlel, aramas akan kak kapwaiada sapwellimen Koht kosonned akan, pwe Siohwa sohte kin kupwurki irail en wia mehkot laudsang dahme re kak wia. E sansal me ekei samworo kan ahnsowo kin kolokolete sapwellimen Koht kosonned akan, oh mie emen me uhdahn wia met ni ahnsou mwuhr—iei Sises, “samworo lapalapo.” (Ipru 3:1) Mahsen wet kin konehng ih: “E kin padahkihong meteikan duwen me pwung, kaidehn me sapwung. Ah wiewia mwohi me mwahu; oh e kin sewese aramas tohto pwe re en tokedihsang wia me suwed.”—Malakai 2:6, NW.
9. Ihs me kin ni lelepek kalohkiseli padahk mehlel kan en Paipel nan atail ahnsou?
9 Rahnwet, sounpar epwiki mwuri, irail rien Krais me keidi kan me kin ahneki koapworopwor en mour nanleng kin papah nin duwen “pwihn samworo ehu me kin patohwandahng Koht meirong kan . . . me Koht pahn kin kupwurperenki.” (1 Piter 2:5) Irail kin tiengala mwowe en kalohk ong aramas oh padahkiong irail duwen padahk kan en Paipel. Ni ahnsou me ke sukuhliki padahk mehlel kan sang irail, ke soh diarada me irail kin koasoiada duwen padahk mehlel kan? Re kin sewese aramas tohto en soikala kaudok likamw, oh met imwikihla aramas rar kei nin sampah pwon me kin sukuhliki padahk mehlel kan en Paipel oh met irail kin ahneki koapworopwor en mour soutuk. Aramas pwukat kin uhd ahneki pwais kaselel en padahkiong aramas rar teikan duwen kosonned en padahk mehlel.—Sohn 10:16; Kaudiahl 7:9.
Kahrepe kan en Tehk Kanahieng Atail Wiewia Kan
10. Dahme kahrehda kitail kin ahneki kahrepe mwahu kan en tehk kanahieng atail lokaia kan??
10 Ahpw, kitail kin ahneki kahrepe mwahu kan en kanahieng atail wiewia kan. Pwe ma kitail sohte pahn kanahieng, kitail pahn kakete sohte wehwehki mouren padahk kan me ntingihdi nan pwuhken Malakai 2:1-9. Eri, pein kitail kin tehk mwahu pwe kitail sohte pahn wia koasoia sohlikilik kan? Karasepe ieu, kisetail kan nan atail peneinei kak uhdahn likih atail koasoia kan? Riatail brother oh sister kan ni pali ngehn nan mwomwohdiso pil kak likih kitail? Pwe e mengei ong kitail en ahnla wia koasoia ieu ni mwomw ieu me pahn kahrehong aramas teikan en kamehlele ahpw likamw. De me kin pid pisnes, emen ele kin kalaudehla eh koasoia duwen mehkot pwen kamwahuihala mehkot de ekihla mehkot. Iaduwen—Siohwa sohte mwahngih duwen wiewia pwukat? Oh pil, ma kitail kin wiewia soahng pwukat, E pahn kupwurki atail meirong en kaping kan me kin kohsang nan auatail kan?
11. Ihs irail akan me keieu anahne en kanahieng arail padahk kan?
11 Rahnwet, ong irail akan me kin ahneki pwukoa en padahk nan mwomwohdiso kan duwen Mahsen en Koht, pwuhken Malakai 2:7 kin wia kaweid mwahu ong irail. E mahsanih me “re en padahkihong meteikan pwe re en wehwehki mehlel Koht. Aramas akan uhdahn pahn pwarala rehrail pwe re en padahngki duwen kupwurei.” Pwukoa laud kan kin kohwong irail sounpadahk kan, pwe pwuhken Seims 3:1 mahsanih me re pahn “ale kadeik laudsang meteikan.” Irail anahne wia padahk ni ngoang, ahpw ni ahnsowohte arail padahk kan anahne poahsonda pohn sapwellimen Koht Mahsen me ntingihdi nan Paipel oh kaweid kan me kin kohsang rehn sapwellimen Siohwa pwihn. Ma re pahn wia met, irail pahn “wiahla sounpadahk koahiek kan oh konehng en padahkiong aramas teikan.” Ihme kahrehda irail kin ale kaweid wet: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.”—2 Timoty 2:2, 15.
12. Dahme irail akan me kin padahk pahn anahne kanahieng en dehr wia?
12 Ma kitail sohte kin kanahieng, kitail kak lohdi pahn kasongosong en kihda pein atail madamadau kan nan atail padahk kan. Met pahn wia mehkot inenen keper ma emen kin kalapw likih pein eh madamadau kan edetehn ah madamadau kin uhwong dahme sapwellimen Siohwa pwihn kin padahk. Ahpw, Malakai irelaud 2 kin kasalehda me kitail anahne kasik me irail sounpadahk kan en mwomwohdiso pahn poahsoankihda loalokong me kohsang rehn Koht a kaidehn pein arail madamadau kan, pwe met pahn kak kahrehong sihpw kan en dipekelekelki arail padahk me sohte poahsoankihda Pwuhk Sarawi. Sises mahsanih: “Mehmen me pahn kahrehiong en emen me tikitik pwukat me pwoson ie eh pahn dipada, e pahn mwahuwong ma lapalahn peitehl ehu pahn pirapiriong nin tepinwere e ahpw kekihrlahng nan kepin madau.”—Madiu 18:6.
Pwoudiki Aramas Soh-Pwoson Men
13, 14. Ia elen soaloalopwoat ieu me Malakai kasansalehdahr?
13 Nan Malakai irelaud 2—sang iretikitik 10 kohdi, e kin kawehwehda ni oaretik duwen lepin lokaia wet, soaloalopwoat. Malakai kin kalapw doadoahngki lepin lokaia wet “soaloalopwoat” ni ahnsou e kawehwehda duwen irair riau. Keieu, kilang me Malakai kin tepiada wia ah kaweid ni e doadoahngki peidek pwukat: “Ia duwe, kitail koaros soh samanki metehmen, me wehwehki Koht tehmen me ketin kapikada kitail koaros? Eri, dahme kitail kin kauwehkihla atail inou kan nanpwungatail? Oh dahme kahrehda kitail kin mwamwahlkihki inowo me Koht ketin wiadahr ong samatail ko?” Mwurin met, nan iretikitik 11 kin kawehwehda duwen soaloalopwoat en wehin Israel kin kasaminehla “sarawien Siohwa.” Sapwung laud dahieu re kin wiewia? Iretikitik wet kin kasansalehda duwen wiewia sapwung ieu me irail kin wia: Irail “pwoudikidahr lih akan me kin pwongih koht en liki kan.”
14 Met kin wehwehki me ekei mehn Israel akan me iang wehi ieu me inoukihdahr arail mour ong Siohwa, kin pwoudkihdahr lih akan me sohte kin kaudokiong Siohwa. Irelaudo pwon kin sewese kitail en kilang dahme kahrehda wiewia wet me inenen suwed. Malakai 2:10 kin kasalehda me irail koaros kin samanki metehmen. Met sohte kin wehwehki me samarail iei Seikop (uhd adanekihla Israel) de Eipram, de Adam. Malakai 1:6 kin kasansalehda me Siohwa iei “sahm metehmen.” Wehin Israel kin mihlahr nan koasondi en miniminiong Siohwa, irail kin kisehn inou ieu me arail pahpa kalap ko wiadahr rehn Siohwa. Ehu kosonned me mih nan inou wet iei: “Kumwail dehpa pwoudikihda emen irail de mweidohng noumwail seri kan en pwoudikinirail.”—Deuderonomi 7:3.
15. (a) Iaduwen ekei aramas kin song en kadehde me e pwung en pwoudkihda aramas soh-pwoson men? (b) Ia kupwuren Siohwa ong pwopwoud?
15 Rahnwet, ekei aramas ele mwein kin ahneki madamadau wet: ‘Aramas menet me I mwahuki, me inenen kadek. Ehu rahn, e pahn iangala kaudok mehlel.’ Soangen madamadau wet kin kamehlelehong kitail me kaweid wet me kohsang rehn Koht me uhdahn mehlel: “Mongiong en aramas me kin keieu widing.” (Seremaia 17:9, NW) Kupwuren Koht duwen aramas akan me kin pwoudikihdahr aramas soh-pwoson akan kin ntingidier nan pwuhken Malakai 2:12 (NW): “Siohwa pahn ketin kemehla emen me kin wia met.” Eri, Kristian akan kin ale kangoang en pwoudikihda “pil emen Kristian.” (1 Korint 7:39) Nan koasondi en Kristian, emen me kin iang pwoson mehlel sohte pahn “mehla” ma e pahn pwoudiki emen me soh-pwoson. Ahpw, ma aramaso sohte pahn iangada padahk mehlel, dahme pahn wiawiong ih ni ahnsou me Koht pahn kasorehla koasoandi wet?—Melkahka 37:37, 38.
Lemei ong Ahmw Pwoud
16, 17. Elen salelepek dahieu ekei aramas kin wia?
16 Malakai koasoia duwen ahl keriau en arail kin soaloalopwoat: irail kin lemei ong arail pwoud oh mwamwahleki ih, keieu, irail kin mweisang arail pwoud ni kahrepe kan me sohte poasoanda pohn Kosonnedo. Malakai 2:14 mahsanih: “Pwehki eh mwahngih duwen amwail kauwehlahr amwail inou ong lih me kumwail pwoudikidahr ni amwail pwulopwul. Lih menet wialahr kisehn paliwaramwail, oh kumwail kauwelahr amwail inou, mehnda ma kumwail inoukihong Koht me kumwail pahn loalopwoatohng liho.” Pwehki ohl pwopwoud en mehn Suhs akan kin salelepek ong arail pwoud lih akan, met kin kahrehong ‘pilen masarail kin pwaindi’ sapwellimen Siohwa pei sarawi. (Malakai 2:13) Ohl pwukat kin ale kisinlikou en mweipeseng me sohte kin poahsoanda pohn kosonnedo, oh ni ahl me sohte konehng oh pwung irail kin kesehla lih me irail pwoudikidahr ahnsou me re pwulopwul, oh re uhd pwoudkihda lih pwulopwul kan de lih akan me kin kaudokiong koht likamw akan. Oh pil, irail samworo suwed akan kin mweidong irail en wia met! Ahpw, pwuhken Malakai 2:16 mahsanih: “ Kauno, Koht en Israel, ahpw mahsanih, ‘I kin kalahdeki mweipeseng en pwopwoud.’ ” Mwuri, Sises kasalehda me dipen kamwahl iei ihte kahrepe aramas akan pahn kak mweisang eh pwoud oh aramas me sohte wiahda dihpo kin ale mweimwei en pwurehng pwoudiki emen tohrohr.—Madiu 19:9.
17 Medemedewe laud duwen mahsen kan en Malakai, oh kilang iaduwen re kin kamwekidada mohngiongitail kan oh atail pepehm akan duwen kadek. E koasoia duwen “iengomw oh inou ong lih me ke pwoudikidahr.” Ohl pwukat koaros pwoudikidahr lih akan me iang arail kaudok, lihen Israel kan, oh irail kin pein pilada lih pwukat en wiahla iengerail erein arail mour. Ele mwein pwopwoud pwukat kin wiawi ni ahnsou me irail pwulopwul, ahpw re anahne tamataman me mendahki arail pwoud mahlahr, met sohte kin wehwehki me arail inou en pwopwoud sohlahr manaman.
18. Ni ahl dah kei kaweid en Malakai me kin pid salelepek kin pil konehng ong atail ahnsou?
18 Kaweid pwukat kin pil konehng ong atail ahnsou. E kin kansensuwed en kilang ekei aramas me kin mwamwahleki sapwellimen Koht kaweid duwen pwoudikihda emen Kristian. Oh e pil kansensuwed en kilang me ekei aramas sohte kin nantihong kakehlailda arail pwopwoud. Ahpw irail kin uhd kihda kahrepe mwahl akan oh wiewia mehkot me Koht kin kalahdeki ni arail kin wiahda kisinlikou en mweipeseng me sohte kin poahsoanda pohn kosonned en Paipel pwe irail pahn kak pwoudiki emen tohrohr. Pwehki irail kin wia met, re kin kahrehong “Siohwa ngirekilahr arail wiewia kan.” Ni mwehin Malakai, aramas akan me kin pohnsehsehla sapwellimen Koht kaweid kin pil ni kommwad ahneki madamadau ieu me kupwuren Siohwa me sapwung. Mwomwen re kin nda met: “Ia Koht me uhdahn pwungen?” E inenen suwed arail madamadau! Kitail en dehpa pwupwudi nan soangen lidip wet.—Malakai 2:17.
19. Iaduwen ohl oh lih pwopwoud kan kak alehdi sapwellimen Koht ngehn sarawi?
19 Ahpw, Malakai kin pil kawehwehda me mie ekei ohl pwopwoud kan me sohte kin salelepek ong arail pwoud lih kan. Irail ‘alehier sawas sang sapwellimen Koht ngehn sarawi.’ (Malakai 2:15) E inenen kaperen pwe, rahnwet—sapwellimen Koht pwihn kin dirkihla soangen ohl akan me kin ‘waunekin arail pwoud lih kan.’ (1 Piter 3:7, NW) Irail sohte kin keme de doadoahngki lokaia kamedek kan ong arail pwoud lih, oh re pil sohte kin wia wiewiahn nsenen pwopwoud me sohte konehng kan, oh irail pil sohte kin mwamwahleki ahr pwoud lih pwe irail sohte kin mwomwehda me re mwahuki lih teikan oh re pil sohte kin kilikilang pwuhk de kasdo suwed kan. Sapwellimen Siohwa pwihn kin pil paiekihda irail lih pwopwoud Kristian tohto me kin lelepek ong Koht oh sapwellime kosonned akan. Ohl oh lih pwukat koaros kin wehwehkihla duwen dahme Koht kin kalahdeki, oh re kin kapwaiada ni arail wiewia oh madamadau kan. Nantihong alasang irail, ‘peikiong Koht’ oh paiekihda sapwellimen Koht ngehn sarawi.—Wiewia 5:29.
20. Ahnsou dah kin kerkerendohr ong aramas koaros?
20 Ni ahnsou keren, Siohwa pahn kadeikada sampah pwon. Aramas koaros pahn wehkada dahme irail kin kamehlele oh arail wiewia kan. “Eri, emenemen kitail uhdahn pahn wehkohng Koht duwen pein ih.” (Rom 14:12) Peidek kesempwal ieu kin kohda met: Ihs me pahn pitsang Rahn en Siohwa? Artikel me mwurin met pahn koasoia duwen met.
Ke Kak Kawehwe?
• Ia kahrepe keieu kesempwal Siohwa kadeikada irail samworo kan en wehin Israel?
• Dahme kahrehda sapwellimen Koht kosonned akan sohte uhdahn apwal ong aramas akan en kapwaiada?
• Dahme kahrehda kitail anahne en kanahieng ni atail kin wia atail padahk?
• Wiewia riau dah kei me Siohwa kin keieu kalahdeki?
[Kilel nan Pali 11]
Ni mwehin Malakai irail samworo kan kin ale kadeik pwe irail sohte kin kapwaiada sapwellimen Siohwa ahl akan
[Kilel nan Pali 12]
Kitail anahne en kanahieng en padahkiong aramas teikan duwen sapwellimen Siohwa ahl akan, oh en dehr utungada pein atail madamadau kan oh pilipil kan
[Kilels nan Pali 14]
Siohwa kin kadeikada mehn Israel akan me kin mweisang arail pwoud lih akan pwehki kahrepe soh katepe kan oh irail uhd pwoudikihdahr lih akan me kin kaudokiong koht likamw akan
[Kilel nan Pali 14]
Rahnwet Kristian akan kin wauneki arail inou en kapwopwoud