Manaman Suwed Kin Wie Doadoahk Rahnwet?
“Sampah me inenen direki mehkan me kapwonopwon oh kasaliel likamwete manaman tohrohr kei me kin nannantihong perehla wasahn pwediei koaros.”—Jean-Claude Souléry, journalist.
‘Pepehm en emenemen me pid sohla koapworopwor kin elehda pepehm me likamwete suwed kin lepehla.’—Josef Barton, historian.
KAMASEPWEHK karerrero me wiawi ni September 11, 2001 kahrehong aramas tohto ahr kin medemedewe laud duwen pein arail mour oh dahme re keieu kesempwaliki nan arail mour. Michael Prowse ntingihdi nan nuhs en England me ede Financial Times oh koasoia me: “Sohte mahn pahn wia de pil kak wia soangen mwekid en aramas duwehte met.” New York Times kawehwehda me likin pilahnepen kamwekido, “e inenen kesempwal kitail en kupwurkupwure mahs duwen uwen kailok lap me mie me kak elehda aramas en wia mwekid weid wet. Met kailok ieu me daulihala dahme mwekid en mahwin akan mweidada en kak wiawi oh met sohte irepen soangen kailok wet oh sohte kak daur soangen pwung penehieu.”
Aramas sang ni soangsoangen pelien lamalam akan medemedewe me mwekid pwukat tepidohsang ni soangen kehl en nan wehwe de manaman me duwehte soumwahu lusulus iei me wie doadoahk. Sounpisnis men sang Sarajevo me pein kadehde duwen wiewiahn lemei kamasepwehk kan oh kailok me wiawi nan Bosnia koasoia: “Pahr ehu mwurin mahwen me wiawi nan Bosnia, I kamehlelehier met me Sehdan me kamwekid soahng koaros me wiawi. Met uhdahn wiewiahn sahliel douluhl.”
Ni aramas akan ahr idek rehn soupoad Jean Delumeau ma e kamehlele Tepil, e sapengki: “Ia mwomwen ahi pahn kalikamwe manaman en wiewia suwed ni ahi kilang dahme wiewiawi met oh dahme wiewiawiher kohdo mwowe kan sangehr ahnsou me I ipwidi kohdo: nan Mahwen Keriau en Sampah, aramas daulih million pak 40 me paiohla; wasahn kaloke oh kemehla aramas nan Auschwitz oh wasa teikan; kamalahn oh kasohr keinek nan Cambodia; mwekid en ur nan nta me wiawi pahn kaunda en Ceauşescu; oh kalokolok suwed me wia koasoandi en koperment nan wasa tohto nan sampah. Mwekid keper oh kamasepwehk pwukat kak ireirekidi oh sohte imwi. . . . Kahrehda I kamehlele me mie kahrepe kitail en kahdaneki wiewia pwukat ‘wiewiahn Tepil,’ kaidehn pwehki wiewia pwukat poahsoanda sang rehn Tepil me mie kode oh nehn pwihk me kesenge riau, ahpw sang Tepil me kin kihda kehl suwed oh manaman suwed me mihmi nan sampah rahnwet.”
Aramas tohto me arail lamalam duwehte ahn Jean Delumeau, me kilang me soahng suwed akan me wiewiawi ong kousoan en aramas nan ahnsou wet, me sangete nan peneinei kan lellahng irail me lapalap en wehin sampah kan, kin wia “wiewiahn Tepil.” Ahpw, ia wehwehn met? Iaduwen—soangen wiewia kamasepwehk pwukat kin poasoankihda manaman de kehl soh sansal en me suwedo, de mie soangen peirin suwed me kin kamwekid aramas en kahrehda wiewiahn loallap akan arail kin pwarodo rehn aramas me daulihala dahme kin wiawi? Soangen manaman suwed pwukat kin poahsoanda sang rehn Soupeidi en Suwedo—Sehdan me iei Tepil?
[Kilel Credit Line nan Pali 3]
Kilel en seri kan sang U.S. Coast Guard