Limpoak Kin Inenen Kesempwal
SOHTE LIPILIPIL soangen sounpahr dah, soangen tiahk dah, soangen lokaia dah, de soangen aramas dah, aramas koaros kin men ale limpoak. Ma aramas teikan sohte kin kaitarala anahn wet ong aramas emen, aramaso kin inenen pahtou. Ohl emen me kin doadoahk palien wini wia roporop oh eri ntingihdi: “Limpoak oh ehupene keren en aramas iei me kin poahsoanehda ma aramas pahn soumwahu de e pahn kehlail, ma e pahn pahtou de e pahn peren, de pahn ahneki pwunod de e pahn maiauda. Ma mie wini kapw ieu me pahn kak kihda soangen kamwahu pwukat, eri toahkte koaros pahn ndaiong neirail soumwahu kan en kang. E pahn wia doadoahk sapwung ieu ma re sohte pahn doadoahngki winio.”
Ahpw, aramas en nan mwehi wet, mehlel palien nuhs oh irail aramas ndand akan, kin kalap men aramas akan en kesempwaliki kepwehpwe, lapalap, ndand oh peren en uduk sang arail kesempwaliki ahn aramas anahne limpoak oh ehupene keren en aramas. Sounpadahk tohto kin kangoange aramas en kesempwaliki oh akadeiong doadoahk pweilaud, oh kin nda me aramas pweida men iei ih me kin lapalap nan ah wasahn doadoahk. Mehlel, sukuhl oh kalaudehla ahn emen koahiek mehkan me kesempwal, ahpw, aramas en mwohneki mehpwukat lao lel irair me aramaso en sohla ah ahnsou ong eh peneinei oh kompoakepah kan? Emen soun nting loalokong en mahsie me kin tetehk kanahieng mwekid en aramas kin karasaiong aramas loalokong ahpw sempoak kin rasehng “ngilen pehl ehu me sekesek mwahl.” (1 Korint 13:1) Soangen aramas pwukat kak kepwehpwehla, oh pil kak ndandla, ahpw irail sohte kak uhdahn diar peren.
Sises Krais, me kin wehwehki oh inenen poakepoake aramas, kasalehda me limpoak ong Koht oh mehn mpatail kan me iei utupen sapwellime padahk kan. E mahsanih: “Ke pahn poakohng Kauno [“Siohwa,” New World Translation] omw Koht sang nan kapehdomw unsek, sang ni ngenomw unsek, sang ni omw lamalam koaros unsek. . . . Ke pahn poakohng mehn mpomw duwen omw kin poakohng pein uhk.” (Madiu 22:37-39) Irail kante me kin peikiong mahsen oko me pahn kak wia sapwellimen Sises tohnpadahk mehlel akan. Ihme kahrehda, e pil mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”—Sohn 13:35.
Eri, iaduwen aramas emen ah pahn kasalehda limpoak nan sampah rahnwet? Oh iaduwen pahpa/nohno kan kak padahkiong neirail seri kan duwen limpoak? Oaralap en artikel mwurin met pahn kawehwehda mwahu duwen peidek pwukat.
[Kilels nan Pali 3]
E wia mehkot apwal aramas en kasalehda limpoak nan sampah wet me pali laud en aramas kin roporop ong pein irail