Kupwuren Koht Wiawi Nan Sampah Ahnsouwet?

“Kupwuromwi en wiawi sampah duwehte a kin wiawi nanleng.”​—Madiu 6:10.

JULIO oh Christina ahneki pepehm en masepwehk oh pahtou laud ni ara kilekilang neira seri pahmen mehla nan lullul en kisiniei. Aramas sakau men loiong wararail sidohsa oh kahrehda ah lulida oh pospeseng. Kelimmen en neira seri ko, ede Marcos, re apihiei sang nan kisiniei mwehlo, ahpw lullin kisinieio karongehla paliwere pwon oh paliwere pwon patalla lel met. Marcos sounpahr duau ahnsowo. Ah papah uhdahn medekla nan mohngiongi. Ah e ndahng ah peneinei koasoi pwukat: “Met kupwuren Koht, kitail en wehwehki me mehnda ma mwahu de suwed iei kupwure.”

Ni ahnsou apwal duwehte met, aramas tohto kin wia duwehte dahme wiawi met. Irail kin nda: ‘Ma Koht kin sapwellimaniki roson unsek oh poakohng kitail, eri dahme wiawi uhdahn pahn wia kamwahupatail mehnda ma kitail sohte kak wehwehki kahrepen mwekido.’ Ke iang pwungki met?

Madamadau me dene sohte lipilipil dahme wiawi ma mwahu de suwed kin wia kasalepen kupwuren Koht kin kalap poahsoankihda mahsen kan me kitail kin kahdaneki Kapakap en Samat, me kitail wadekehr mwoweo. Kupwuren Koht soh pweidahr nanleng? Ni atail kin kapakapki ‘Kupwuromwi en wiawi sampah,’ kitail soh kin pwungkihier me mehkan me kin wiawi nin sampah iei kupwuren Koht?

Aramas tohto kin peidekki madamadau duwe met. Ong irail, madamadau wet kin kasalehda me Koht sohte kin nsenohki pepehm en sapwellime aramas. Aramas akan kin peidekki, ‘Iaduwen Koht limpoak emen pwungki mehkot me kamasepwehk en wiawi?’ ‘Ma mie mehkot me kitail pahn sukuhlikihsang met, ia kasukuhlen?’

Me pid ire wet, emen rien Sises oko, wahnpoaron Seims, ntingihdi: “Mehmen me lelohng nan songosong pwehki apwal me kohiengehr en dehr nda me, ‘kasongosong wet sang rehn Koht.’ Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Koht kaidehn ih me ketin wia utupen mehkan me suwed. Kahrehda, ni oaralap, kaidehkin soahng koaros me wiawi nin sampah iei kupwuren Koht. Pwuhk Sarawi pil kin mahsanih, nsenen aramas, nsenen wehi kan, oh pil nsenen Tepil. (Sohn 1:13; 2 Timoty 2:26; 1 Piter 4:3) Ke pwungki me dahme wiawi ong ahn Julio oh Christina ara peneinei kaidehn kupwuren Samatail limpoak en nanleng?

Eri, ia wehwehn Sises ah mahsanih ong sapwellime tohnpadahk kan en kapakapki: ‘Kupwuromwi en wiawi’? Met wia ihte pekipek ieu ong Koht pwe en kak sewese ehu ehu irair akan, de Sises padapadahki kitail en kapakapki mehkot me laudsang met oh mwahusang, wekidekila ieu me kak wahdohng aramas koaros koapworopwor? Kitail en kasawihada dahme Pwuhk Sarawi pahn kasalehda duwen met.

[Kilel nan Pali 3]

Sidohsa: Dominique Faget-STF/AFP/Getty Images; seri: FAO photo/B. Imevbore