Mehnia Pelien Lamalam Me Ke Pahn Pilada?

‘SARAWI KAN kin wia ahl ekei me kin kohlahng wasa tehkis. Ni mehlel, Koht mehtehmen, kaidehn?’ Madamadau wet kin mih rehn aramas tohto me kin lemeleme me mehlel iang wia tohn pelien lamalam wia mehkot kesempwal, ahpw, e sohte lipilipil mehnia pelien sarawi me ke pilada en iangala.

Ni tepin ahmw pahn rong met, e ngoren mehlel pwehki e mehlel me Koht tehmen mie, me Keieu Lapalapo. (Aiseia 44:6; Sohn 17:3; 1 Korint 8:5, 6) Kahrehda, kitail pahn kakete sohla tehk wekpeseng kan me inenen sansal​—mehnia me re uhpene​—me mie nan soangen pelien sarawi kan me kose me re kin kaudokiong Koht mehlelo. Mwomwen arail wia arail kaudok, dahme re kamehlele, arail padahk kan, oh arail kosonned akan inenen wekpeseng. Wekpeseng kan inenen laud me kahrehda irail akan kin iang ehu pelien lamalam kin ahneki ahnsou apwal en wehwehki oh kamehlele padahk kan en sarawi teikan.

Sises mahsanih: “Koht ngehn ehu, oh me kin kaudokiong re en kaudongki ngehn oh mehlel.” (Sohn 4:24) Iaduwen​—⁠kaudokiong Koht ki mehlel pahn kak mweidohng soangsoangen madamadau kan me kin uhpene ong ihs me Koht, ia sapwellime kupwur kan, oh iaduwen e kupwurki aramas en kaudokiong Ih? E pwung kitail en kamehlele me sohte katepe ong Koht ia mwomwen atail en kaudokiong Ih?

Kristian Mehlel kan Mahs oh Ahnsouwet

Kristian akan nan senturi keieu ekei pak kin ahnekihda madamadau wekpeseng kan duwen soahng kei. Karasepe, ni wahnpoaron Pohl padahk ong irail akan nan Korint, e mahsanih: “Pwe I esesangehr rehn ekei kisehn peneinei en Kloe duwen akamai kan nanpwungamwail. Eri, iet me I men ndahn, duwen amwail kin liaktohrohrpene: emen kin akahkpwungki ndinda, “Ngehi iengen Pohl”; a emen, “Ngehi iengen Apolos”; a emen, “Ngehi iengen Piter”; a emen, “Ngehi iengen Krais.’ ”​—1 Korint 1:11, 12.

Iaduwen​—⁠Pohl wiahki wekpeseng pwukat mehkot tikitik? Emen emen en pein pilada ah ahl pwehn ale komour? Uhdahn soh! Pohl kaweidki: “Riei ko, ni mwaren atail Kaun Sises Krais, I peki ni ngidingid rehmwail, kumwail koaros en pwungkipene dahme kumwail kin patohwanda, a ieremen kumwail mweidohng saminimin en kin mie nanpwungamwail; pwe e konehng kumwail en kin ahnekipene lamalamteieu oh kupwurteieu.”​—1 Korint 1:10.

Ei, pahrekpenehn dahme kitail kamehlele sohte kin kohsang dahme aramas iding ong kitail. E kin kohsang ahnsou me emen emen aramas pahn kasawih kanahieng padahk kan oh eri pein diarada oh pwungkipene padahk kan. Eri, pein sukuhliki Mahsen en Koht oh mehlel ong kapwaiada dahme kitail sukuhlikihier wia ewen kahk kesempwal kei pwe kitail en kak ahneki soangen ehupene me Pohl koasoia. Iaduwen soangen ehupene wet kak wiawi? Duwen atail kilangehr, Koht kin ahnsou koaros ehuiong sapwellime kan nin duwen pwihn en aramas. Iaduwen kitail kak kasawihada mehnia pwihn me Koht ketin ehuiong nan rahnwet?

Kamwahu kan Me Kin Kohdo Sang Werek Mwahu

Sounmelkahka Depit mahsanih: “Maing Siohwa, ihs me pahn lukedohng nan omwi impwalo? Ihs me pahn kousoan nan sapwellimomwi nahna sarawio?” Peidek wet kin inenen kamwekid aramas en medemedewe pasapengpe. Depit eri ketikihda pasapengpen peideko: “Ih me kin weweid ni mehlel oh wiewia me pwung oh koasoakoasoia duwen padahk mehlelo nan mohngiongi.” (Melkahka 15:1, 2) Wehwehki pwung Pwuhk Sarawi pahn kahrehiong aramas emen en kasawihada pelien lamalam me pahrekiong kosonned sarawi kan. Eri, sang ni werek mwahu me ke pahn wia ong aramas akan me kin miniminpene ni arail kin kaudokiong Koht oh irail kin kaudokiong Koht ni “ngehn oh mehlel” eri kahpw pahn kehlailkihda.

Sounkadehdehn Siohwa kan kasalehdahr ni mehlel me aramas akan kak ehupene nan pwoson oh wiewia mendahki arail koukousoan nan sampah ieu me aramas akan kin saminiminpene. Nanpwungarail, mie aramas akan me mahs kin wia tohn soangsoangen pelien lamalam epwiki kei me kin wekpeseng oh soangsoangen tohn sahpw. Ekei Sounkadehde kan mahs sohte kin kamehlele Koht. Ah ekei irail mahs sohte kin kesempwaliki pelien sarawi. Sang nan soangsoangen sarawi kan, tiahk kan oh elen madamadau en loalokong kan, irail kohpene oh wiahlahr pwihn en sarawi miniminpene ehu ni soangen irair ieu me sohte kin mih rehn aramas teikan nan sampah.

Poahsoanpen soangen miniminpene wet iei Mahsen en Koht, Pwuhk Sarawi. Ni mehlel, Sounkadehdehn Siohwa kan esehier me irail sohte kak idingki dahme aramas teikan en wia. Ahpw, irail kin kalahnganki ahnsou mwahu me irail ahneki me irail kak kangoange meteikan en pil iang sukuhliki Pwuhk Sarawi, pwe irail en kak wiahda pilipil mwahu me pid duwen kaudok. Ni ahl wet, e pahn kak tohtohla aramas akan me kakehr iang ale kapai kan me kin pwilsang kaudokiong Koht “ni ngehn oh mehlel.”

Ottmar kamehlelehda met. E tikada nan peneinei Kahdolik ieu nan Germany, eri ih sohla kohla sarawi. E kawehwehda: “Ahnsou koaros me I kin towehda sarawi, I kin pwediei sang nan ihmw sarawio sohte mehkot audehda nan loaleiet me laudsang dahme I wah pedelong.” Ahpw, e kin pwosopwosonte Koht. Eri, ih tuhwongada Sounkadehdehn Siohwa kan oh tepidahr kamehlele me irail pwukat iei ladu en Koht kei. E kilangadahr anahnepen en patehng irail. Met e nda: “Ahi kin pwerisek iang wia kisehn pwihn me kin mih wasa koaros nin sampah, I kin ahneki meleilei en madamadau oh mohngiong. I kin kekeirada ni ahi kin ale sawas ong alehda padahk pwung en Pwuhk Sarawi. Met wia mehkot me kesempwal ong ahi mour.”

Luhk Ehu Ong Irail Oko Me Wie Raparapahki

Sounkadehdehn Siohwa kan kin wia onop en Pwuhk Sarawi ni soh isepe pwe en sewese aramas akan en kasalehda arail wehwehki kupwuren Koht. Nan pahr teio, mpen aramas 5,726,509 me wia soangen onop Pwuhk Sarawi wet nan ehu ehu wihk oh e kin wiawihong aramas emen de pwihn en aramas. Koasoandi en onop Pwuhk Sarawi wet sewesehier aramas rar kei en kak katengehdi poahsoan kehlail ieu pwe irail en kak pilada elen arail kaudok. Luhk pil kohwong komwi en pil iang sukuhliki koasoandi sarawi kan me ntingihdi nan Pwuhk Sarawi. Mwurin met, ke kak wiahda ahmw pilipil.​—Episos 4:13; Pilipai 1:9; 1 Timoty 6:20; 2 Piter 3:18.

Ma ke men kaperenda Koht, iang wia tohn pelien sarawi wia mehkot kesempwal​—ahpw kaidehn sarawi sohte lipilipil. Ke anahne wia ahmw pilipil me poahsoanki loalokong pwung en Pwuhk Sarawi, kaidehn dahme ke pein pehm de rong. (Lepin Padahk 16:25) Sukuhliki padahk kan oh koasoandi kan en kaudok mehlel. Ken karasahiong pein dahme ke kin kamehlele. Mwurin mwo, ken wia ahmw pilipil nin duwen dahme ke pein diarada.​—Deuderonomi 30:19.