Dahme Sises Krais Wiahiong Ahmw Mour?

PWEHKI dahme kitail kilangehr sang nan artikel en mwowe, kitail kak kelikemwe dahme sapwellimen Sises padahk kan kamwekidkihier sampah pwon? Peidek kesempwal me kitail en pein idek rehtail iei “Kamwahu dah me sapwellimen Sises padahk kan wiahiong pein ngehi?”

Sapwellimen Sises padahk kan sairada ire tohto. Mehn kasukuhl kesempwal akan me pwarada kak sairada soangen wasa koaros nan omw mour. Kitail tehk kanahieng mahs dahme Sises padahki me pid dahme kesempwal nan atail mour oh kitail eri doadoahngki kaweid wet pwehn karanih Koht.

Koasoanehdi Dahme Keieu Kesempwal Nan Atail Mour

Kedirepw kan en sampahn rahnwet kahrehong aramas tohto en sohte arail ahnsou oh kehl en medemedewe mehkan en pali ngehn. Kitail kak karasahki ohl emen me sounpar 20 samwa me kitail pahn kihong ede Jerry. Jerry kin perenki koasokoasoia mehkan me pid pali ngehn oh kesempwaliki mehkan me e sukuhlkihier, ahpw e kin wehkada: “Sohte ahi ahnsou en iang kaukaule kapwaiada mehpwukat. I kin doadoahk rahn weneu nan wihk koaros. Rahn Sarawi iei ai rahn en kommoal. Oh mwurin ai kin wiahda soahng kan, I kin pwangada.” Ma ke iang ahneki kahpwal wet, dahme Sises mahsanih nan Kapahrek en Pohn Dohlo kak mwahu ong uhk.

Sises mahsanih ong pokon me kohpene pwehn karonge ih: “Kumwail dehr kin pwunodki kisin mwenge oh pihl ong mourimwail kan, dahme kumwail pahn kin kang de dahme kumwail pahn kin nim; de amwail likou, dahme kumwail pahn kin likawih. Pwe ia duwe, mour soh kesempwal sang kisin mwenge, oh paliwar soh kesempwal sang likou? Kumwail tehk mwahu menpihr en pahnlahng kan: re sohte kin padok wahntuhke, re sohte kin dolung, re sohte kin nahkpene nan imwen nekinek kan; a Samamwail me ketiket nanleng kin ketin apwalih irail. A ia duwe, kumwail soh kesempwalsang menpihr kan? . . . ‘Eri, kumwail dehr kin pwunodki ndinda, ‘Se pahn kihsang ia at tungoal kisin mwenge, de nimat pihl? Se pahn diar ia at likou?’ Pwe soang pwukat koaros iei me aramas en wehi kan kin raparapahki. A Samamwail me ketiket nanleng ketin mwahngih duwen amwail kin anahne mepwukat koaros. Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn kin ketikiong kumwail.” (Madiu 6:25-​33) Dahme kitail sukuhliki sang met?

Met sohte wehwehki me Sises mwahuki kitail en mwamwahlikihla apwalih atail anahn en paliwar akan, oh pil anahn akan en tohn atail peneinei. Ahpw, Sises inoukihda me ma kitail pahn mwohneki oh kesempwaliki mehkan en pali ngehn, Koht pahn ketin kupwure pwe anahn teikan kitail en pil ale. Dahme kitail sukuhliki wasaht iei me pid duwen atail en wiahda koasondi pwung oh dahme keieu kesempwal. Ma kitail kapwaiada kaweid wet, e pahn imwikihla peren, pwe “meid pai irail akan me ese arail anahn en ngehn.”​—Madiu 5:3, New World Translation.

Nantihong Kompoakepahnki Koht

Irail akan me kin pehmitikiong arail anahn en ngehn ese kesempwalpen nantiong ehuiong Koht. Iaduwen atail kak wiahda nanpwung mwahu ong aramas emen? Ke kin song en kalaudehla ahmw ese aramaso? Kitail en kihong ahnsou pwe kitail en kak esehla ah madamadau kan, oh dahme e kin mwahuki, ah koahiek kan, ah pweida kan, dahme e pwungki de sapwungki. Met pil kin mehlel, ni ahnsou me emen kin song en kompoakepahnkihla Koht. Loalokongkihla mehlel duwen ih wia mehkot kesempwal. Ni ahnsou me Sises kin kapakapki sapwellime wahnpoaron akan, e mahsanih: “Met iei mour soutuk, irail en loalokongkihla duwen komwi, Koht mehlel tehmen, oh pil ih me komwi ketin kadarohdo, Sises Krais.” (Sohn 17:3, NW) Ei, karanih Koht anahne kitail en esehla Ih. Ihte me pahn kahrehda kitail en esehla Ih iei sapwellime Mahsen, iei Pwuhk Sarawi. (2 Timoty 3:16) Kitail en koasonehdi ahnsou en sukuhliki iren Pwuhk Sarawi kan.

Ahpw loalokongete sohte itar. Nan sapwellime kapakapohte Sises pil mahsanih: “Irail kapwaiadahr sapwellimomwi mahsen.” (Sohn 17:6) Kitail dehpa alehte loalokongkihla duwen Koht ahpw kitail en doadoahngki nan atail mour. Mie pil ehu soangen ahl ong kompoakepahnkihla Koht? Kitail kak kasik me atail kompoakepahnki aramas emen pahn laudla ma kitail kin uhwong dahme e kin kamehlele oh kesempwaliki? Sapwellimen Koht kupwur akan oh elen kaweid akan, iei me en kaweid ewen kahk kan koaros nan atail mour.

Sapwellimen Sises Padahk kan Koaros Kak Katapan Ong Uhk

Sapwellimen Sises padahk kan me kitail tehkpenehr kin lingan, mengei, oh kesempwal. Tohnsampah kak ale kamwahu me irail esehla sapwellime padahk kan oh doadoahkiong arail mour.

Sounkadehdehn Siohwa kan nan ahmw wasa pahn perenki sewese iuk en kak kilang iaduwen ahmw kak ale kapai sang kaweid kan me keieu erpit oh me aramas kalap koasokoasoia. Se luhke kumwail en tuhwong irail.

[Kilel nan Pali 5]

“Samwamwail nanleng kin ketin kamwenge irail”