“I Pahn Ieiang Kumwail”

“Akkai eri patohwanohng aramas akan sapwellimen Kauno mahsen: . . . ‘I pahn ieiang kumwail.’”—AKKAI 1:13.

1. Mehnia kokohp me Sises karasahki atail ahnsou?

KITAIL kin momour nan ahnsou kesempwal ieu nan poadoapoad en aramas. Duwen ah dehdehier nan pweidahn kokohp en Paipel, sangete nan 1914 kitail mihier ni “rahnen Kauno.” (Kaudiahl 1:10) Mwein ke sukuhlikier duwen ire wet oh wehwehki me Sises kin karasahiong “rahn en Nein-Aramas” ni ah ketiket nan mwoale nanleng ong ni “rahn en Noha” oh “rahn en Lohd.” (Luk 17:26, 28) Paipel kin kasalehda me kokohp wet kin karasahiong atail ahnsou. Ahpw, kokohp wet pil pweida nan pil ehu ahnsou oh kitail en tehk mwahu duwen met.

2. Soangen pwukoah dah me Siohwa kihong Akkai oh Sekaraia?

² Kitail tehk duwen ehu irair me pwarada nan rahn akan en soukohp en Ipru ko me iei Akkai oh Sekaraia. Soangen rohng dahieu me soukohp lelepek riemenet ketikihda me kasalehda ni sansal me e kin dokedoke sapwellimen Siohwa aramas akan nan rahnwet? Akkai oh Sekaraia iei ‘meninkeder kei en Siohwa’ ong mehn Suhs akan mwurin arail pwurodo sang arail kalipilipala Papilon. Pwukoah kohwong ira en padahkiong mehn Israel kan me Koht pahn utung irail ni arail pahn onehda sapahl Tehnpas Sarawio. (Akkai 1:13; Sekaraia 4:8, 9) Mendahki pwuhk kan me Akkai oh Sekaraia ntingihdi me mwotomwot, pwuhk pwukat wia kisehn “Pwuhk Sarawi unsek me pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.”—2 Timoty 3:16.

Anahn Kitail En Tehk

3, 4. Dahme kahrehda petehkpe anahne kohieng rohng me Akkai oh Sekaraia kin kasalehda?

³ Ni mehlel, rohng me Akkai oh Sekaraia ntingihdi kin uhdahn wia kamwahu ong mehn Suhs akan en arail ahnsou oh ara kokohp kan pweida ahnsowo. Dahme kahrehda kitail kak kamehlele me kitail anahne tehk pwuhk riau pwukat rahnwet? Kitail kak diar mehn kadehde nan Ipru 12:26-29. Wasaht, wahnpoaron Pohl doadoahngki mahsen kan nan Akkai 2:6 me kin kasalehda duwen Koht a kin “itikada nanleng oh sampah.” Itikada wet pahn, ni ahnsou keren, “kauwehla wehi kan oh katokehdi ar manaman.”—Akkai 2:22.

⁴ Mwurin ah kasalehda mahsen kan en Akkai, Pohl kasalehda dahme pahn wiawihiong “wehi kan” oh e pil koasoia duwen Wehio me sohte kak itikekda me Kristian keidi kan pahn sohsohki. (Ipru 12:28) Ke kak kilang sang ni sapwellimen Pohl mahsen kan me kokohp en Akkai oh Sekaraia kin dokedoke ahnsou ieu me pahn kohdo, ni ahnsou me pwuhk en Ipru ntingdi nan keieun senturi nan ahnsoun Kristian akan. Miehte irail Kristian keidi kan me mihmihte nan sampah, me wia kisehn irail kan me pilipilda en iang Sises kaunda nan Wehin Mesaia. Kokohp kan en Akkai oh Sekaraia kin ahneki wehwe kesempwal ong atail ahnsou.

5, 6. Ia poadoapoad en Akkai oh Sekaraia ara doadoahk?

⁵ Pwuhk en Esra kin kasalehda duwen poadoapoad kan. Mwurin irail mehn Suhs akan pwurasang arail kalipilipala nan Papilon nan 537 B.C.E., Kepina Serupapel oh Samworo Lapalap Sosua (de Sesua) iang kaunda wiawihdahn poahsoan en Tehnpas Sarawi kapwo nan 536 B.C.E. (Esra 3:8-13; 5:1) Mendahki wiawihdahn poahsoanen Tehnpas Sarawio, mwurin ahnsou kis, irail mehn Suhs akan tepida masak. Esra 4:4 kasalehda me uhwong sang rehn “aramas ako me koukousoan nan sahpwo kin kamasak oh katikitikihala nan kapehd en mehn Suhs ko pwe re en dehr wia doadoahko.” Irail imwintihti pwukat me pali laud en irail mehn Sameria, wiahda karaun likamw me pid mehn Suhs kan. Irail soun uhwong pwukat kahrehong nanmwarki en Persia en kauhdi kokoudahn Tehnpas Sarawio.—Esra 4:10-21.

⁶ Arail ngoang en kauwada Tehnpas Sarawio nin tepio mwuhr tikitikla. Mehn Suhs ko uhd kilangwohng pein arail peren. Mendahki met, nan 520 B.C.E., sounpar 16 mwurin wiawihdahn poahsoano, Siohwa koasoanehdi Akkai oh Sekaraia en kamwekid aramas ako en pwurehng tepida kokouda Tehnpas Sarawio. (Akkai 1:1; Sekaraia 1:1) Sang kakehl me kohsang meninkeder en Koht oh mehn kadehde laud en sapwellimen Siohwa utuht, mehn Suhs ko pwurehng tepida arail doadoahk en kauwada Tehnpas Sarawio oh kanekehla nan 515 B.C.E.—Esra 6:14, 15.

7. Irair duwehpene dah me pwarada nan mwein soukohp ko oh nan atail ahnsou?

⁷ Ke ese ia wehwehn soahng pwukat koaros ong kitail? Mie atail doadoahk me kin pid doadoahk en kalohki “Rongamwahu en Wehio.” (Madiu 24:14) Kangoang laud kohwong doadoahk en kalohk mwurin Mahwen Keieu en Sampah. Duwehte irail mehn Suhs akan me pwurodo mwurin arail kalipilipala nan Papilon, irail sapwellimen Siohwa aramas akan rahnwet pil pitsang kalipilipala nan Papilon Lapalap me iei minimin en kaudok likamw kan koaros. Sapwellimen Koht aramas me keidi kan kin kihong arail ahnsou ong kalohk, padahk, oh kahluwa aramas akan ohng padahk mehlel. Doadoahk wet pil doulahte nan rahnwet oh pil laudla oh mwein ke kin iang wia doadoahk wet. Met iei ahnsou en kalohk pwe kereniong koasoandi suwed wet pahn imwisekla. Doadoahk wet me Koht ketikihong kitail anahne en wiawi lao Siohwa pahn kahrehiong “Kahn Kamakam Kowahlap” en wiawi. (Madiu 24:21) Met pahn kihsang mwersuwed oh mweidong padahk mehlel en kohpeseng nan sampah.

8. Dahme kahrehda kitail kak likih me Koht pahn utungada atail doadoahk?

⁸ Nin duwen me kokohp en Akkai oh Sekaraia kasalehda, kitail kak likih me sapwellimen Siohwa utuht oh kapai pahn mie ma kitail pahn, ni mohngiong unsek, iang wia doadoahk wet. Mendahki doadoahk en kauhdi sapwellimen Koht ladu kan oh arail doadoahk me kohwong irail, sohte koperment ehu me kak kauhdi pweidahn doadoahk en kalohk. Medewehla duwen utuht me E kin ketikihong sapwellime aramas akan me imwikihla kalaudlahn doadoahk en kalohki Wehio me wiawiher erein sounpar tohto kei mwurin Mahwen Keieu en Sampah oh pil leledo nan atail ahnsou. Ahpw, miehte soahng tohto me anahn en wiawi.

9. Irair dahieu me pwarada mahs me kitail anahne en tehk, oh pwekida?

⁹ Iaduwen, dahme kitail sukuhliki sang rehn Akkai oh Sekaraia me kak kamwekid kitail en kalaudehla atail peikiong sapwellimen Koht kehkehlik en kalohk oh padahk? Eri, kitail tehk ekei mehn kasukuhl me kitail kak alehsang pwuhk riau pwukat. Karasepe, medewe duwen ekei oaritik kan me kin pid doadoahk en kauwada Tehnpas Sarawio me irail mehn Suhs kan anahne kapwaiada. Nin duwen me sansaldahr, irail mehn Suhs akan me pwurodo nan Serusalem mwurin arail kalipilipala nan Papilon sohlahr nantihong arail doadoahk en onehda Tehnpas Sarawio. Mwurin arail wiahda poahsoano, irail sohla ngoangki. Soangen irair en madamadau sapwung dah me pwarada nanpwungarail? Oh pil, dahme kitail kak sukuhliki sang met?

Alehda Elen Madamadau Pwung

10. Ia madamadau sapwung me irail mehn Suhs akan ahnekihda, oh dahme imwikihla met?

¹⁰ Irail mehn Suhs akan me pitla kin nda: “E saikinte lel ahnsou mwahu.” (Akkai 1:2) Ni ahnsou me irail tepida doadoahk en kauwada Tehnpas Sarawio, oh irail wiahda poahsoano nan 536 B.C.E., irail sohte nda me “saikinte lel ahnsou mwahu.” Ahpw, mwuhr, irail mweidohng uhwong sang mehn mparail kan oh koperment en kamwekid irail. Irail mehn Suhs akan uhd nsenohki pein imwarail kan oh pein arail nsenamwahu. Pwehki wekpeseng en imwarail kan me wiawihkihda tuhke kaselel kan, oh Tehnpas Sarawio me saikinte nekla, Siohwa mahsanih: “Dahme kumwail pahn mihmihki nan ihmw kaselel kan, a ei Tehnpas Sarawio ahpw pahn wiewia mohn tehnpas ehu?”—Akkai 1:4.

11. Dahme kahrehda Siohwa anahne kaweidih irail mehn Suhs kan ni mwehin Akkai?

¹¹ Ehi, irail mehn Suhs akan wekidala arail madamadau ong dahme keieu kesempwal. Irail sohte kihong kupwuren Siohwa en pwurehng kauwada Tehnpas Sarawio en keieu nan arail mour ahpw irail uhd mwohneki pein irail oh arail wasahn kousoan kan. Doadoahk en kauwada sapwellimen Koht Tehnpas Sarawio solahr wiawi. Sapwellimen Siohwa mahsen me dierek nan Akkai 1:5 kangoange mehn Suhs kan ‘en pein tehk arail mohngiong kan.’ Siohwa mahsanih ong irail en uhdi oh medemedewe dahme lelohng irail nan arail mour pwehki arail sohte mwohneki doadoahk en kauwada Tehnpas Sarawio.

12, 13. Iaduwen Akkai 1:6 kin kawehwehda duwen irair en mehn Suhs kan, oh ia wehwehn ire wet?

¹² E sansal me en mehn Suhs akan arail mwohneki mehkan me sohte kesempwal e kin kauwehla arail mour. Tehk duwen sapwellimen Siohwa madamadau me pwarada nan Akkai 1:6: “Kumwail padokedi wahnsahpw tohto, ahpw dolung me malaulau. Mie kanamwail mwenge, ahpw kumwail sohte kak medkihla. Mie nimamwail wain, ahpw sohte itar kumwail en sakaukihla! Mie amwail likou, ahpw sohte itar kumwail en karakarkihda. Oh tohndoadoahk men sohte kak ale pweine me itar en mourki.”

¹³ Mehn Suhs kan mihier nan sahpw me Koht ketikihong irail, ahpw sahpwo sohte kin kihda wah kan uwen me irail itarki. Siohwa sohte kapaiada irail ahnsowo nin ah kehkehlikihong irail mwowe. (Deuderonomi 28:38-48) Pwehki sohte utuht sang rehn Siohwa, irail mehn Suhs kan padokedi wahnsahpw akan ahpw dondol malaulau, sohte itar mwenge ohng irail koaros. Pwehki sohte kapai sang rehn Siohwa, irail sohte likouki likou en kakarakar. Likamwete mwohni kan me irail ale kin kohieng nan ehd ehu me lapalahn pwoar mih ie, pwe sohte wihn kin kohieng irail sounetinet kan. Ia wehwehn mahsen wet: “Mie nimamwail wain, ahpw sohte itar, kumwail en sakaukihla”? Met sohte kin wehwehki me sapwellimen Siohwa kapai iei en sakaula pwe e sohte kin ketin kupwurki aramas en kamamsakau. (1 Samuel 25:36; Lepin Padahk 23:29-35) Me weksang met, mahsen pwukat kin kasalehda duwen en Siohwa ah sohte ah kapai ohng irail mehn Suhs kan. Soangen wain koaros me re wiahda pahn sohte itar, pil sohte itar en kahrehda emen en sakaula. Revised Standard Version kin kawehwehda Akkai 1:6: “Ke pahn nim, ahpw ke sohte pahn medila.”

14, 15. Iren mehn kasukuhl dah kitail sukuhliki sang Akkai 1:6?

¹⁴ Iren mehn kasukuhl me kitail sukuhliki sang mepwukat sohte kin pidada imwatail de kalingana imwatail. Pil mwohn arail kalipilipala, soukohp Eimwos kin koasoia ni mwomwen kaweid ohng irail me kepwehpwe kan nan Israel duwen “imwarail kan me wiawihkihda aipori” oh duwen arail kin “mwohd nan sehr kan me wiawihkihda aipori.” (Eimwos 3:15; 6:4) Ihmw kaselel kan oh mehn kapwat en nan ihmw kan sohte pahn mihmi werei. Kepwe pwukat koaros pehdsang irail oh uhd kohieng arail imwintihti kan. Ahpw, sounpar 70 mwurin arail kalipilipala, tohto en irail sapwellimen Koht aramas saikinte sukuhliki sang met. Iaduwen, kitail pahn sukuhliki sang mwekid pwukat? E pahn konehng kitail en pein idek rehtail: ‘Ni mehlel, ia uwen laud en ahi kin kihong ahi ahnsou ong imwei oh kapwat en nan imwei? A iaduwen pilahn ohng kalaudpen sukuhl, me kak kihsang atail ahnsou laud, kahrehda kitail luwetala ni pali ngehn?’—Luk 12:20, 21; 1 Timoty 6:17-19.

¹⁵ Dahme kitail wadek nan Akkai 1:6 kin kasalehiong kitail me kitail anahne sapwellimen Koht kapai nan atail mour. Irail mehn Suhs kan en mahs sohte ale sapwellimen Koht kapai oh pwehki met irail lelohng kahpwal tohto nan arail mour. Mehnda ma tohto atail kepwe de soh, ahpw ma kitail sohte ale sapwellimen Siohwa kapai nan atail mour, e pahn suwediong atail pali ngehn. (Madiu 25:34-40; 2 Korint 9:8-12) Ahpw, iaduwen atail kak ale kapai wet?

Siohwa Kin Ketikihda Sawas Ki Sapwellime Ngehn Sarawi

16-18. Ia wehwehn Sekaraia 4:6 ong irail ni ahnsou mahs?

¹⁶ Iengen Akkai soukohp, Sekaraia, kin mwekidki en kasalehda duwen soahng kei me Siohwa kamwekidki oh kapaiahki irail mehn mahs ako me lelepek. Oh met pahn pil kasalehda iaduwen e pahn pil kapaiaiukada. Kitail kin wadek: “‘Kaidehn sang ni kehlail en sounpei de ni pein omw kehlail ahpw sang ni manaman en ngeni,’ Siohwa me Kaunen Karis mahsanih.” (Sekaraia 4:6) Mwein ke kin kalapw rong mahsen pwukat, ahpw ia wehwehn met ohng irail mehn Suhs kan ni mwehin Akkai oh Sekaraia, oh ia wehwehn met ohng kitail?

¹⁷ Tamanda me mahsen kan en Akkai oh Sekaraia kamwekid irail ni ahl mwahu ahnsowo. Mahsen kan en ira soukohp riemeno kin kangoange irail mehn Suhs kan me lelepek. Akkai tepiada wia kokohp nan keweneu en sounpwong en 520 B.C.E. Sekaraia tepiada wia kokohp kan nan kawaluh en sounpwong nan pahro. (Sekaraia 1:1) Nin duwen me ke kak kilang nan Akkai 2:18, doadoahk ong poahsoan en Tehnpas Sarawio pwurehng tepiada ni ngoang nan keduwau en sounpwong. Eri, irail mehn Suhs kan mwekidki met oh peikiong Siohwa ni arail koapworopworki sapwellimen Siohwa utuht kin ieiang irail. Mahsen kan nan Sekaraia 4:6 kin kasalehda duwen sapwellimen Siohwa utuht.

¹⁸ Ni ahnsou me irail mehn Suhs kan pwurala nan uhdakarail nan 537 B.C.E., sohte neirail sounpei. Mendahki met, Siohwa kahluwa irail oh pere irail ni arail wie seiseiloak sang Papilon. Oh pil, sapwellime ngehn sarawi kin kahluwa doadoahk en kauwada Tehnpas Sarawio ni ahnsou me re ahpwtehn lelahng nan uhdakarail. Ni ahnsou me re pahn pwurehng tepiada doadoahko ni mohngiong unsek, e pahn utung irail ki sapwellime ngehn sarawi.

19. Sapwellimen Koht ngehn sarawi kalowehdi kehl suwed dahieu?

¹⁹ Ni ahnsou me Sekaraia kilang kasansal waluh ko, Siohwa kamehlelehiong ih me E pahn ieiang sapwellime aramas kan ni arail pahn ni lelepek kanekehla doadoahk en kauwada Tehnpas Sarawio. Kapahieu en kasansalo me pwarada nan Sekaraia irelaud 3, oh kasansal wet kin kasalehda me Sehdan kin nannanti ni ah kin kahrehong irail mehn Suhs kan en dehr kanekehla Tehnpas Sarawio. (Sekaraia 3:1) Sehdan sohte perenki kilang Samworo Lapalap Sosua wiliandi aramas ako oh kasarawih Tehnpas Sarawi kapwo. Mendahki Tepilo kin nannanti en kauhdi doadoahk en irail mehn Suhs kan en dehr kanekehla kauwada Tehnpas Sarawio, sapwellimen Siohwa ngehn sarawi kin sewese irail laud ni ah pahn kihsang apwal kan oh kakehle irail mehn Suhs kan en nannanti kohwei lao Tehnpas Sarawio pahn nekla.

20. Iaduwen ngehn sarawi sewese irail mehn Suhs kan en kapwaiada kupwuren Koht?

²⁰ Kahpwal kan me kohsang irail kaun en koperment kan en ahnsowo arail songen kauhdi doadoahko inenen laud likamwete sohte mehkot kak powehdi. Ahpw, Siohwa inoukihda me “nahna” wet pahn kohsang oh wiahla “sahpw patapat ieu.” (Sekaraia 4:7) Oh met pweida! Nanmwarki Darius I wiahda roporop ehu oh diarada me Sairus wiahda doaropwehn inou me kamanahiong irail mehn Suhs kan en onehda sapahl Tehnpas Sarawio. Eri, Darius kihsang manaman me kauhdi doadoahko oh kamanahla sent ohng irail mehn Suhs kan en sewese irail en pwainda dipwisou kan en doadoahko. Ia uwen wekila laud! Iaduwen, sapwellimen Koht ngehn sarawi kin ieiang doadoahk wet? Kitail kak likih me e kin ieiang irail. Tehnpas Sarawio nekla nan 515 B.C.E., ni keweneu en sounpar en kaundahn Nanmwarki Darius I.—Esra 6:1, 15.

21. (a) Ni ahnsou kan en mahs, iaduwen Koht ‘itikada wehi kan’ pwe “mehkan en wehi kan me Koht kupwurperenki” en kohsang? (b) Iaduwen kokohp wet pweida nan atail ahnsou?

²¹ Nan Akkai 2:5, soukohp Akkai katamankihong irail mehn Suhs kan duwen inou me Koht wiahiong irail ni Nahna Sainai ni “ahnsou me nahnao rerda kowahlap.” (Eksodus 19:18) Ni rahn akan en Akkai oh Sekaraia, Siohwa pil pahn wiahda ehu mehkot me inenen laud, me sansalda nan lokaiahn karasaras kan nan iretikitik 6 oh 7. Irair en wehin Persia pahn sohla teng, ahpw doadoahk en Tehnpas Sarawio pahn wonoweite lao e pahn nekla. Irail me kaidehn mehn Suhs akan me wia “mehkan en Wehio me Koht kupwurperenki” pahn iang mehn Suhs kan kalinganahla Koht nan Tehnpas Sarawio. Ni ahl laud ieu nan atail ahnsou, Koht kin ‘itikada wehi kan’ ki doadoahk en kalohk en Kristian kan, oh “sang nan wehi kan, aramas me Koht kupwurperenki” kin iang irail me keidi kan kaudokiong Koht. Ni mehlel, me keidi kan oh sihpw teikan patpene kin ahnsou wet kadirehkihla sapwellimen Siohwa Tehnpas Sarawi lingan. Irail sounkaudok mehlel pwukat kin, ni lelepek, awiawih ahnsou me Siohwa pahn ‘itikada nanleng oh sampah’ ni wehwe tohrohr ehu. Met pahn wiawi pwehn kesepwekehdi oh kauwehla kehl en wehi kan.—Akkai 2:22.

22. Iaduwen wehi kan kin ‘itikada,’ oh dahme met imwikihla, oh dahme pahn wiawi ni ahnsou kohkohdo?

²² Kitail kin ale mehn katamanpen mwekid laud me pwarada ni soangsoangen mwohmw me kin karasaraski duwehte “nanleng oh sampah, sahpw oh sehd.” Ehu mwekid laud iei ahnsou me Sehdan me Tepil oh ienge ngehn saut akan piskendiong sampah. (Kaudiahl 12:7-12) Me pil patehng met, doadoahk en kalohk me irail sapwellimen Koht keidi kan kin tiengki kin, ni mehlel, kamwekid irair kan en ahn aramas kaunda nan koasoandi wet. (Kaudiahl 11:18) Mendahki met, “pokon kalaimwun” me wia mehkan en Wehio me Koht kupwurperenki patehngehr Israel en ngehn ohng papah Siohwa. (Kaudiahl 7:9, 10) Pokon kalaimwun kin iang irail Kristian keidi kan wia doadoahk en kalohk me pakairki me Koht pahn, ni ahnsou keren, doadoahngki Armakedon pwehn itikada wehi kan. Mwekid wet pahn kahrehiong padahk mehlel en lella ni irair en unsek nan sampah pwon.

Ke Tamataman?

• Iahd oh nan soangen irair dah me Akkai oh Sekaraia kin papah Koht?

• Iaduwen ke kak doadoahngki kaweid me Akkai oh Sekaraia ketikihda?

• Dahme kahrehda ke kak nda me Sekaraia 4:6 kin wia mehn kangoang ong kitail?

[Kawehwehpen kilel kan nan ehu ehu pali 22]

Sapwellimen Akkai oh Sekaraia nting kan kin kamehlelehiong kitail sapwellimen Koht utuht

[Kawehwehpen kilel kan nan ehu ehu pali 25]

“Met iei ahnsou kumwail en mihmi nan imwamwail kaselel kan, ni ahnsou me tehnpas wet sohte nekla?”

[Kawehwehpen kilel kan nan ehu ehu pali 26]

Sapwellimen Siohwa aramas kan kin nantihong tuhwong irail koaros ‘me wia mehkan en Wehio me Koht kupwurperenki’