Mehn Kasukuhl Duwen Aklaplap oh Aktikitik
MIE irair ehu me pwarada nan mour en Nanmwarki Depit me kihda mehn karasepe mwahu duwen wekpeseng en aktikitik mehlel oh aklapalap. Met wiawi ni ahnsou me Depit kalowehdi Serusalem oh wiahkihla wasaht poahsoan kaun. Depit kilangwohng Siohwa nin duwen Nanmwarki mehlel en Israel, kahrehda e koasoanehdi kohpwao, me kin kasalehda me Siohwa kin ketiket rehrail en wisiklahng nan kahnimwo. Koasoandi wet inenen kesempwal ohng Depit me kahrehda e kasalehda ah peren ni sansal ni ah kin idihdawehn Kohpwao. Mehn Serusalem ko kilang ni en nanmwarkio kin “lusuluski eh peren” oh “kahkahlek . . . uwen e kak.”—1 Kronikel 15:15, 16, 29; 2 Samuel 6:11-16.
En Depit pwoud Maikal, ni pali teio, sohte iang perenkihda mwekid wet. E kin kilikilang met sang ni wenihmwtok ehu oh e sohte perenkihda met ahpw e “uhd tepida tateki Depit sang nan ah mohngiong.”(2 Samuel 6:16) Dahme kahrehda Maikal ahneki soangen pepehm wet? E sansal me e nohn medewe duwen me e kesempwal pwehki e wia sapwellimen Sohl, nanmwarki keieu en Israel serepein oh met e uhd wia sapwellimen nanmwarki keriemen pwoud. Ele e medemedewe me ah pwoudo, me wia nanmwarki, sohte konehng en kihdi ih duwehla irail aramas mwahl kan oh iang irail kamadipw. Pepehm en aklapalap duwehte met kin sansalda ni eh tuhwong Depit ahnsou me Depit pwurodo ni imweo. Ni ngilen kapailok en nda: “Rahnwet nanmwarkien Israel ketin kalowediong pein oh mwar lapalap ehu, ni eh ketin kasalehda eh mwomwen iahkalahr mwohn mesen serepein lidu en sapwellime soumas akan.”—2 Samuel 6:20.
Iaduwen Depit mwekidki soangen lokaia en kauwe wet? Depit sapengki Maikal oh nda me Siohwa ketin kasohrehla Sohl en Maikal pahpa pwehki e kin kupwurki Depit. Depit doula kapatahiong: “oh ih pahn kahdsuwedihala pein ngehi. Mwohn mesomwen ele kaidehk ngehi mehkot, ahpw serepein ko me ke ndindahn, re uhdahn pahn kesemwpwalkin ie mehlel.”—2 Samuel 6:21, 22.
Ei, Depit kin koasoanehdi teng en papah Siohwa ni aktikitik. Soangen tiahk duwehte met kin sewese kitail en wehwehki duwen dahme kahrehda Siohwa kin kahdaneki Depit “soangen ohl me ih kin kupwurki.” (Wiewia 13:22; 1 Samuel 13:14) Ni mehlel Depit kin idawehn mehn kahlemeng keieu mwahu en aktikitik—iei sapwellimen Siohwa mehn kahlemeng mwahu. Lokaia me Depit doadoahngki wasaht ohng Maikal, “Ih pahn kihdi pein ngehi” kin kohsang ni lokaia en Ipru me kin kawehwehda iaduwen Siohwa kin kilangwohng aramas akan. Mendahki Siohwa me keieu en lapalap nanleng oh sampah, Melkahka 113:6, 7 kin kawehwehda me e “ketin kihdi ih pwe en mahsendihdo oh ireirong nanleng oh sampah. E kin ketin pwekada me semwehmwe kan sang nanpwel; e kin ketin kasapwilada me paisuwedlahr akan sang ar apwal.”
Pwehki Siohwa aktikitik, e sohte kapwuriamwei dahme kahrehda e kin tateki “irail kan me kin aklapalap.” (Lepin Padahk 6:16, 17) Pwehki Maikal kin ahneki soangen irair suwed wet oh sohte kin wauneki nanmwarkio me Siohwa ketin piladahr, e sohte ale kapai en naineki seri rehn Depit. E mehla sohte nah seri. Ia uwen met wia mehn kasukuhl mwahu ohng kitail! Irail koaros me mwahuki Siohwa en kupwurki ih anahne en kapwaiada mahsen pwukat: “Oh kumwail koaros pwuhriong nan likoun karakarahk oh uhpahpene nanpwungamwail; pwe Pwuhk Sarawi mahsanih, Koht kin ketin pelianda me aklapalap akan, a e ketikihong sapwellime kalahngan me karakarahk kan.”—1 Piter 5:5.