Mweidohng Mahsen En Koht En Kahluwa Ahmw Kahk Kan
“Sapwellimomwi mahsen, iei serepei, mehn kaweid ie, oh kamarainpen elei kan.”—MELKAHKA 119:105.
1, 2. Dahme kahrehda pali tohto en aramas akan sohte kin pweida ni arail kin rapahki meleilei oh peren mehlel?
KE KAK tamanda ahnsou ehu me ke anahne en idek rehn emen kaweid kan pwehn lella wasa me ke men kohla ie? Mwehin ke kerenlahngehr wasa me ke pahn lel ahpw ke sohte nohn ese mehnia ewen ahl sop kan me ke anahne doadoahngki. De ele mwehin ke uhdahn salongala oh anahne wekidala ahmw ahl en tangatang. Sohte lipilipil mehnia rehra, e sou pahn wia elen loalokong en idawehn kaweid en emen me esehlahr duwen wasao? Soangen aramaso kak en seweseiuk en lella wasa me ke men lel ie.
2 Erein sounpar kid kei, aramas akan kin song en kahluwa arail mour ni sohte sawas sang Sounkapikada, Siohwa Koht. Ahpw, ni aramas soh unsek akan kin uhtohrda sang Koht, e kin solahr arail koapworopwor en pweida. Irail uhdahn sohte kak diarada ahl me pahn kak kahluwalahng irail ong meleilei oh peren mehlel. Dahme kahrehda irail sohte kak en diarada meleilei oh peren mehlel? Tohto sang sounpar 2,500 samwalahro, soukohp Seremaia koasoia: “I ese me sohte mehmen me kaunda pein imwilahn eh mour; sohte aramas emen me kaunda pein eh mour.” (Seremaia 10:23) Mehmen me kin song en kaweidih ah kahk kan oh sohte men ale kaweid sang emen me koahieklahr pahn lelohng kapwunod laud. Mehlel, aramas koaros kin uhdahn anahne kaweid!
3. Dahme kahrehda Siohwa Koht me keieu warohng en ketikihda kaweid ohng aramas akan, oh dahme e ketin inoukihda?
3 Siohwa Koht iei me keieu warohng en ketikihda soangen kaweid wet. Dahme kahrehda? Pwehki sohte emen likin ih me inenen wehwehki duwen wiawihdahn aramas akan. Oh E pil inenen wehwehki iaduwen kadaudok en aramas akan sohla keid nan ahl pwung eri salongala. E pil ese dahme anahn pwe aramas akan en kak pil pwurehng keid nan ahl pwung. Oh pil nin duwen Sounkapikada men, Siohwa kin ahnsou koaros ese dahme keieu mwahu ong kitail. (Aiseia 48:17) Eri, kitail kak likih ni unsek sapwellime inou me kileledi nan Melkahka 32:8: “I pahn padahkihong uhk ahl me ke pahn weid ie; I pahn kaweid uhk oh panawihiuk.” Kitail sohte kak peikasalki met: Siohwa kin ketikihda kaweid kan me keieu mwahu. Ahpw iaduwen e kin ketin kaweidih kitail?
4, 5. Iaduwen sapwellimen Koht mahsen kan kak kaweidih kitail?
4 Sounmelkahka men koasoia nan ah kapakap ong Siohwa: “Sapwellimomwi mahsen, iei serepei, mehn kaweid ie, oh kamarainpen elei kan.” (Melkahka 119:105) Sapwellimen Koht mahsen kan oh mehn kataman kan kin dierek nan Paipel, oh re kak sewese kitail en powehdi mehn kerempwa kan me kitail kak ele lelohng nan atail elen mour. Mehlel, ni atail kin wadek Paipel oh mweidohng en kaweidih kitail, kitail kin pehmada dahme Aiseia 30:21 kawehwehda: “Kumwail pahn rong kapitie sang mwurimwail me mahsanih, ‘Iet ahlo, kumwail idawehn.’”
5 Ahpw kitail en tehk me nan Melkahka 119:105 kin dokedoke ahl riau me Mahsen en Koht kin kadoadoahk ong. Keieu, e kin kadoadoahk nin duwen mehn serepetail. Ni atail kin lelohng kahpwal kan en ehu ehu rahn, mour en kaweid kan me dierek nan Paipel anahne en kaweidih atail kahk kan pwe kitail en wiahda pilipil mwahu kan oh soikala lidip kan de nsar kan en sampah. Keriau, sapwellimen Koht mehn kataman kan kin kamarainih eletail, sewesewese kitail en wiahda pilipil kan me pahn ahnsou koaros pahrekiong atail koapworopwor en mour kohkohlahte nan Paradais me Koht inoukidahr. Ni atail ahl en mwowe kin marainla, kitail kakehr en kasawihada imwila kan—mwahu de suwed—en ahl me kitail kin kekeid ie. (Rom 14:21; 1 Timoty 6:9; Kaudiahl 22:12) Kitail pahn kilang ni oaritik iaduwen sapwellimen Koht mahsan kan me dierek nan Paipel kak wia mehn serepetail oh pil kamarainpen eletail kan.
“Sapwellimomwi Mahsen, Iei Serepei”
6. Soangen irair dah kan me sapwellimen Koht mahsen kan kin wia serepetail?
6 Rahn koaros kitail kin wiahda pilipil kan. Ekei pilipil kan kin ele mwomwen tikitik, ahpw mie ahnsou me kitail kin lelohng irair ehu me kakete kasonge atail ineng suwed kan en paliwar, duwen atail pahn kin mehlel, oh pil atail kin poupali. Pwehn pweida ni atail kin lelohng kahpwal pwukat, kitail anahne en “ahnlahr oh eselahr wekpeseng en me mwahu oh me suwed.” (Ipru 5:14) Ni atail alehda loalokong pwung duwen Mahsen en Koht oh kakairada atail wehwehkihla mour en kaweid kan, kitail kin kaiahne kadeikpen loalatail pwe kitail en kak wiahda pilipil kan me pahn kaperenda Siohwa.—Lepin Padahk 3:21.
7. Kawehwehda irair ehu me Kristian men kakete men werekiong ah tohndoadoahk kan me sohte iang ah pwoson.
7 Medewehla duwen karasaras wet. Komwi emen me laud de mah men me uhdahn kin men kaperenda Siohwa? (Lepin Padahk 27:11) Ma ei, ke warohng ale kaping. Ahpw, nna song medewehla ni ahnsou kis ma iengomw tohndoadoahk kan pahn kihong uhk ticket ehu pwehn iang irail kohla ni mwadong laud ehu. Irail kin perenki patehng uhk ni wasahn doadoahk oh pil men werek ong uhk likin amwail wasahn doadoahk. Ke kakete ahneki madamadau ehu me mwein irail pwukat kaidehn aramas suwed kei. Mwein nan arail mour, irail kin ahneki irair mwahu kan oh pil ahneki madamadau pwung kan ong duwen tiahk mwahu. Dahme ke pahn wia? E pahn mie keper ehu ma ke pahn pwungki iang irail? Iaduwen Mahsen en Koht kak sewese iuk en wiahda pilipil pwung kan ong duwen ire wet?
8. Mour en kaweid en Paipel dah kan me kin sewese kitail en medemedewe ire me pid atail werek kan?
8 Medewehla ekei mour en kaweid kan en Paipel. Keieu en kaweid me mwein ke tamanda iei me dierek nan 1 Korint 15:33, me mahsanih: “Werekiong aramas suwed kan e kin kauwehla tiahk mwahu.” Pwehn kolokol mour en kaweid wet, e uhdahn anahne ke en sohte douluhl patehng me seupwoson kan? Pasapeng en Paipel ong peidek wet iei soh. Wahnpoaron Pohl kin kasalehda limpoak oh nsenoh ong “aramas koaros,” pil ong irail kan me seupwoson. (1 Korint 9:22) Mour en Kristian men iei en kin kasalehda nsenohki meteikan—pil irail kan me sohte ehu ong atail pwoson. (Rom 10:13-15) Ni mehlel, iaduwen kitail kak idawehn kaweid en “wia mwahu ong aramas koaros” ma kitail pahn katohrehla kitail sang aramas kan me mwein ele anahne atail sawas?—Kalesia 6:10.
9. Mehnia kaweid en Paipel me pahn sewese kitail en kin toupahrek ni atail kin werekiong iengetail tohndoadoahk kan?
9 Ahpw, mie wekpeseng sansal ehu nanpwungen en kin peren ong iengomw tohndoadoahk oh en wia ah kompoakepah keren men. Iei wasaht me ehu mour en kaweid en Paipel pil kin dokedoke. Wahnpoaron Pohl kin panawih Kristian kan: “Eri, kumwail dehr kapahrek kumwail ong me seupwoson akan.” (2 Korint 6:14) Ia wehwehn lepin lokaia pwukat “dehr kapahrek kumwail ong me seupwoson akan”? E kin wehwehki en dehr karanih de patehng me seupwoson kan ni ahl me sohte konehng. Soangen ahnsou dah me werekiong tohndoadoahk men sohla konehng? Iahd me e daulihala oh kin mwomwen me kitail kapahrekiong kitail ong irail seupwoson kan? Mahsen en Koht, Paipel, kak en kaweidih atail kahk kan nan soangen irair wet.
10. (a) Iaduwen Sises kin pilada ienge kan? (b) Soangen peidek dah kan me kak sewese emen en wia pilipil mwahu kan me pid a werek kan?
10 Medewehla sapwellimen Sises kahlemeng mwahu ni ah kin ahneki limpoak ong aramas akan sangete mahs ahnsou me re tepin kapikipikda. (Lepin Padahk 8:31) Ni ah ketiket sampah, e kahrehda nanpwungen ih oh sapwellimen werek kan en uhdahn kerenpene. (Sohn 13:1) E pil ahneki pepehm en “limpoak” ong emen ohl me ale kaweid sapwung sang ah pelian lamalam. (Mark 10:17-22) Ahpw Sises pil kasalehda ni sansal irepen ah pilipil kan me pid mehnia ienge kan me pahn karanih ih. Ong aramas akan me sohte uhdahn perenki wia kupwuren Semeo, e sohte kin men wia kompoakparail keren men. Ehu ahnsou, Sises mahsanih: “Eri, kumwail iei kompoakepahi, ma kumwail kin wia dahme I padahkihong kumwail.” (Sohn 15:14) Mehlel, mwein ke kin perenki kompoakepahnki emen iengomw tohndoadoahk. Ahpw pein idek rehmw: ‘Aramas menet kin men wia dahme Sises kehkehliki ong kitail en wia? E men esehla de sukuhliki duwen Siohwa, me Sises padahkiong kitail en kin kaudokiong? E kin ahneki tiahk de wiewia kan me ih ahneki nin duwen Kristian men?’ (Madiu 4:10) Pasapengpen peidek pwukat pahn sansalda ni omw kin koasoi ong iengomw tohndoadoahk kan oh nantihong en doadoahngki koasoandi kan en Paipel.
11. Kihda karasaras en ekei irair kan me sapwellimen Koht mahsen kan anahne en kaweidih atail kahk kan.
11 Mie soangen irair tohto teikan me sapwellimen Koht mahsen kan kak wia serepetail. Karasepe ehu, mwein mie doadoahk ehu me ritidahng Kristian men me inenen anahne doadoahk ahnsou karuwaru. Ahpw, ahnsou kan en doadoahk wet pahn kin anahne laud ah ahnsou oh kehl, oh ma e alehda doadoahk wet, e sohte pahn iang towehda ekei mihding kan en Kristian oh pahn katihasang wiewia teikan me pid kaudok mehlel. (Melkahka 37:25) Emen Kristian mwein kin lelohng kasongosong laud en kilang kasdo kan de mwadong kan me kin uhdahn kauwehla mour en kaweid kan en Paipel. (Episos 4:17-19) Pil emen mwein kin mwadang en kaulim pwehki soh unsek en ekei iengetail me mih nan pwoson. (Kolose 3:13) Nan soangen irair pwukat, kitail anahne en mweidohng Mahsen en Koht en wia serepetail. Ni mehlel, kitail kak powehdi soangsoangen kahpwal kan nan atail mour ma kitail kin idawehn mour en kaweid kan en Paipel. Mahsen en Koht kin “mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.”—2 Timoty 3:16.
“Kamarainpen Elei kan”
12. Iaduwen sapwellimen Koht mahsen kan kin wia kamarainpen eletail kan?
12 Nan Melkahka 119:105 pil kin koasoia me sapwellimen Koht mahsen kan kak kamarainih eletail kan, kahrehda en uhdahn marain mwohtail. Kitail sohte kin mih nan rotorot ong me pid dahme pahn wiawi ahnsou kohkohdo, pwehki Paipel kawehwehdahr wehwehpen irair kapwunod akan en sampah oh ia pahn imwilahn mepwukat. Ei, kitail kin pohnese me kitail wie momour “ni imwin rahn akan” en nan koasoandi suwed wet. (2 Timoty 3:1-5) En ese dahme mih mwohtail pahn kamwekid laud kitail ong iaduwen atail pahn kin momour ahnsou wet. Wahnpoaron Piter ntingihdi: “Eri, ma mepwukat pahn ohla nin duwe met, a ia duwen kumwail, soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno.”—2 Piter 3:11, 12.
13. Iaduwen karuwaru en atail ahnsou kin kamwekid atail madamadau oh irair en mour?
13 Atail madamadau oh irair en atail mour anahne kasalehda me kitail uhdahn kamehlele me “sampah wet oh mehkoaros nin sampah me aramas kin inengieng kin sosohrala.” (1 Sohn 2:17) Doadoahngki kaweid kan en Paipel pahn sewese kitail en wiahda pilipil erpit kan me pid atail mehn akadei kan en ahnsou kohkohdo. Ni karasaras, Sises mahsanih: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn ketikihong kumwail.” (Madiu 6:33) E wia kaping laud ehu en kilang me pwulopwul tohto kasalehda arail kin pwoson sapwellimen Sises mahsan kan ni arail kin nannanti iang doadoahk en kalohk kaukaule! Ekei irail—kakete koaros nan peneinei ehu—kin toukihda pein irail oh seiloaklahng sahpw teikan me anahnpen sounkalohk kan kin inenen karuwaru.
14. Iaduwen peneinei en Kristian ehu kin kalaudehla arail doadoahk en kalohk?
14 Medewehla irail me pahmen me wia peneinei en Kristian ehu me keseu sang Wehin Amerika kohlahng nan sahpw en Dominican Republic ong nan kahnihmw ehu me tohtohki aramas 50,000, pwehn sewese mwomwohdiso en wasao. Sounkalohk en nan mwomwohdiso wet tohtohki meh 130. Ahpw, nan April 12, 2006, aramas lella 1,300 me iang towehda Katamanpen kamatalahn Krais! Wasahn kalohk wet uhdahn “mahier oh mwahuwongehr en dondol” pwehki mwurin sounpwong limaute, pahpa menet, nohno, neira pwutak oh pil neira serepeino kin onohnop Paipel rehn me 30. (Sohn 4:35) Pahpa menet kin kawehwehda: “Mie brother oh sister 30 me keseudo nan mwomwohdiso wet pwehn sawas. Me 20 me sang Wehin Amerika, oh irail teiko sang Bahamas, Canada, Italy, New Zealand, oh Spain. Ni arail kin leledo, irail kin inenen ngoangki iang towehda doadoahk en kalohk oh met kin kamwekid laud eimah en irail brother kan en wasao.”
15. Soangen kapai dah kan me ke kin perenki pwehki ahmw kin mwohnki Wehio nan ahmw mour?
15 Kitail kak wehwehki, tohto sohte kak en keseu sang ehu sahpw kolahng ehu pwehn sewese wasa kan me anahne sawas. Ahpw irail ko me kin—de irail kan me kak wekidala arail irair kan pwe re kak kaunopada ong doadoahk wet—pahn inenen perenkihda kapai tohto sang ni arail pahn iang doadoahk kan en kalohkseli. Oh pil sohte lipilipil ia wasa ke kin papah, ke en dehr katihasang peren me kak wiahla pein ahmw ni ahnsou me ke papah Siohwa ki omw kehl unsek. Ma ke kin mwohnki Wehio nan ahmw mour, Siohwa inoukihda en “kamwerehdiong kumwail soangen kamwahu kan ni uwe ieu me laud.”—Malakai 3:10.
Paiekihda Sang Sapwellimen Siohwa Kaweid kan
16. Iaduwen kitail pahn paiekihda ma kitail mweidohng sapwellimen Koht mahsan kan en kaweidih kitail?
16 Sang ni atail wehwehkier, sapwellimen Koht mahsen kan kin kaweidih kitail ni ahl riau. Re kin wia serepetail, sewesewese kitail en mwekidiwei mwowe ni ahl pwung oh kin kaweidih kitail ni ahnsou me kitail kin wia pilipil kan. Oh re kin pil kamarainih eletail kan, kahrehong kitail en kak kilang ni sansal dahme mih mwohtail. Met kin uhd sewese kitail en idawehn sapwellimen Piter kehkehlik: “Eri, kumwail kaunopada oh koasoanehdi mwahu amwail lamalam akan. Kumwail mwasamwasahn oh koapworopworkihte kapai kan me kumwail pahn ale ahnsou me Sises Krais pahn ketin pwarodo.”—1 Piter 1:13.
17. Iaduwen onop en Paipel pahn sewese kitail en idawehn sapwellimen Koht kaweid kan?
17 Sohte peikidpe me Siohwa kin ketikihda kaweid kan. Ahpw peideko iei, Ke kak uhpaiong kaweid pwukat? Pwehn wehwehki kaweid me Siohwa kin ketikihda, ke en wiahkihla ahmw men akadei ehu en wadek wasa kan nan Paipel ehu ehu rahn. Doudouloale dahme ke wadek, song en wehwehki ia sapwellimen Siohwa kupwur kan ong irair kan, oh medewehda soahng soangen ahl akan me ire pwukat kak kadoadoahk ong ahmw mour. (1 Timoty 4:15) Kowe eri doadoahngki ahmw kehl en madamadau ni ahnsou me ke wia ahmw pilipil akan.
18. Ni ahnsou me kitail kin mweidohng Mahsen en Koht en kahluwa kiht, soangen kapai dah kan kitail kin alehdi?
18 Mour en kaweid kan me dierekda nan Mahsen en Koht pahn padahki kitail oh kihong kitail kaweid me anahn ahnsou me kitail wia pilipil kan duwen mehnia ahl pwung me kitail en idawehn, ma kitail mweidohng. Kitail kak en kamehlele me sapwellimen Siohwa mahsen kan me kileledi kin “kaloalokongihala me soaloalokong kan.” (Melkahka 19:7) Ni ahnsou me kitail kin mweidohng Paipel en kaweidih kitail, kitail pahn ahneki nsenmwakelekel oh peren me kin kohsang atail kin kaperenda Siohwa. (1 Timoty 1:18, 19) Ma kitail mweidohng sapwellimen Koht mahsen kan en kahluwa atail kahk kan ehu ehu rahn, Siohwa pahn ketin katingih kitail ki kapai me keieu laud iei mour soutuk.—Sohn 17:3.
Ke Tamataman?
• Dahme kahrehda e kesempwal en mweidohng Siohwa Koht en ketin kahluwa atail kahk kan?
• Ni soangen ahl dah me sapwellimen Koht mahsen kan kin wia serepetail?
• Iaduwen sapwellimen Koht mahsen kan kak wia kamarainpen eletail?
• Iaduwen onop en Paipel pahn sewese kitail en idawehn sapwellimen Koht kaweid?
[Kawehwehpen kilel kan nan ehu ehu pali 15]
Ni ahnsou dah me werekiong me seupwoson men wiahla mehkot soaloalokong?
[Kawehwehpen kilel kan nan ehu ehu pali 16]
Sapwellimen Sises werek kan me karanih ih iei irail me kin kapwaiada kupwur en Siohwa
[Kawehwehpen kilel kan nan ehu ehu pali 17]
Mwomwen atail mour kin kasalehda me kitail kin mwohnki Wehio?