Ewen Kahk Keriau

Pelianda Ineng en Kapahreki Iuk ong Meteikan

DAHME PAIPEL PADAHNGKI? “Emenemen en pein kasakasawih pein eh wiewia kan. Ma eh wiewia kan me mwahu, eri, e kak pohnmwahsohki; a ieremen e kapahrekiong en meteikan ar wiewia kan.”​—Kalesia 6:4.

IA KAHPWAL EN? Kitail kin men kapahrekiong kitail meteikan. Ekei pak ong irail kan me sohte arail mehkot oh pali laud en ahnsou, ong irail kan me kehlail, kepwehpwe de koahiek sang kitail. Sohte lipilipil mehnia me kitail kin wia, e kin imwila suwed. E sapwung ni atail kin medewe me uwen kesempwal en emen kin kohsang dahme e ahneki de dahme e kak wia. Kitail pil kak ahnekihda pepehm en peirin oh madamadau en siaipene.​—Eklesiasdes 4:4.

DAHME KE KAK WIA? Song en kilang pein kowe duwehte Koht eh kin ketin wia. Mweidohng sapwellime madamadau en kamwakid omw pepehm ong ia uwen omw kesempwal. Koht mahsanih: “Aramas kin kasawih mwomwen aramas, ahpw ngehi, I kin kasawih nan mohngiong en aramas akan.” (1 Samuel 16:7) Siohwa sohte kin ketin sohng uwen omw kesempwal sang ni eh kin ketin kapahreki iuk ong meteikan. Ahpw sang ni eh kin ketin kasawih omw mohngiong, omw madamadau, omw pepehm oh ineng kan. (Ipru 4:12, 13) Siohwaa mwahngih omw soh itar akan oh kangoange iuk en pohnese duwen met. Ma ke kin song ia uwen omw kesempwal ni omw kin kapahreki iuk ong meteikan, ke pahn aklapalapala de ahnsou koaros sohte kin nsenamwahu. Eri, ken kin pohnese me ke sohte kak pweida ni soahng koaros me ke pahn nantihong en wia.​—Lepin Padahk 11:2.

Dahme ke anahne wia pwe ken kesempwal mwohn silangin Koht? Koht ketin kamwakid soukohp Maika en ntingihedi met: “KAUN-O ketin padahkihongkitailehr dahme mwahu. Eri, iet me KAUN-O kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat, oh peikiong atail Koht ni karakarahk.” (Maika 6:8) Ma ke pahn idawehn kaweid wet, Koht pahn ketin apwalih iuk. (1 Piter 5:6, 7) Met sou wia kahrepe keieu laud kitail en kin nsenamwahu?

[Nting tikitik me mi pah]

[Kilel nan pali 5]

Siohwa kin ketin sohng uwen atail kesempwal sang dahme kin mi nan atail mohngiong