Karanih Koht
Dahme Siohwa Ketin Kupwurki Kitail en Wia?
DAHME Siohwa ketin kasik sang irail kan me men kaudokiong ih ni pwung? Ia duwe, e ketin kasik kitail en kaudokiong ih ni unsek, kahrehda kitail aramas soh unsek en sohte kak kaperenda ih? De e ketin kasik ihte uwen atail kak? Pasapengpen peidek pwuko kesempwal ma kitail men diar peren nan atail papah Koht. Kitail tehkpene ia duwen soukohp Maika eh kasalehda ia kupwuren Koht kan.—Wadek Maika 6:8.
“KAUN-O ketin padahkihongkitailehr dahme mwahu.” Kitail sohte anahne kasarki dahme Koht ketin kasik sang kitail. E ketin padahkihongkitailehr ni eh ketin kasalehda ni sansal kupwure kan nan Paipel. Dahme Koht ketin kupwurki sang kitail kin “mwahu.” E sohte ketin kupwurki mehkot suwed. “Koht iei limpoak” oh e ketin mwahngih dahme keieu mwahu ong kitail. (1 Sohn 4:8; 5:3) Atail en peikiong kupwure kan sohte kin ihte kaperenda ih ahpw e pil wia kamwahu ong kitail.—Deuderonomi 10:12, 13.
“Iet me KAUN-O kin ketin kupwurki kitail en wia.” Ia duwe, Koht sapwellimanki pwuhng en ketin kasik mehkot sang kitail? Ei, uhdahn. Pwehki ih me Utupen atail mour, e ketin warohng atail peik. (Melkahka 36:9) Eri dahme e ketin kasik sang kitail? Maika oaralapihada ia kupwuren Koht kan ni ahl siluh. Ahl keieu oh keriau kin pidada atail wiewia ong aramas akan, oh ahl kesiluh kin pidada atail nanpwungmwahu rehn Koht.
“Kitail en wiahda me pwung.” Lepin lokaiahn Ipru me kawehwehdi “pwung,” nin duwen me ehu pwuhk koasoia, “kin pid wiewia pwung oh pahrek ong aramas akan nan wasahn kousoan.” Koht ketin kupwurki atail wiewia ong aramas akan en pahrekiong sapwellime koasoandi ong dahme pwung oh pahrek. Kitail kin wia dahme pwung oh pahrek ni atail sohte kin lipilipilki aramas, oh atail wiewia ong meteikan kin mwahu oh mehlel. (Lipai 19:15; Aiseia 1:17; Ipru 13:18, NW) Ni atail wiahda dahme pwung ong meteikan, ele re pahn mwekidki oh pil wia dahme mwahu ong kitail.—Madiu 7:12.
“Kitail en kin kasalehda atail limpoak poatopoat.” Me pid lepin lokaia wet “limpoak poatopoat,” emen me samanih Paipel koasoia: “Limpoak, kalahngan oh kadek sohte nohn kawehwehda mwahu lepin lokaia wet . . . kaidehn ehute nanpwungen lepin lokaia pwukat, ahpw e kin oaroapene koaros. Koht ketin kupwurki kitail en kasalehda limpoak poatopoat. Kitail anahne perenki kasalehda irair wet oh perenki sewese irail me anahne sawas. Imwilahn met, kitail kin ahneki peren me kohsang atail kin kihkihwei.—Wiewia 20:35.
“Peikiong atail Koht ni karakarahk.” Kitail kin peikiong Koht ni atail kin idawehn elen mour me e ketin kilelehdi nan Paipel. Kitail anahne wia met “ni karakarahk” ni atail kin idawehn elen mour wet. Ia duwen? Ni atail kin karakarahk mwohn Koht, kitail kin pohnese ni mehlel uwen atail tikitik oh dipan mwohn silangi oh pohnese dahme kitail kak oh sohte kak wia. Kahrehda, en peikiong Koht ni karakarahk kin wehwehki en ahneki madamadau pwung ong dahme e ketin kupwurki oh dahme kitail kak patohwanohng ih.
E wia kalahngan ehu me Siohwa sohte ketin kupwurki sang kitail laudsang dahme kitail kak patohwanohng. E ketin kupwurperenki atail nannanti papah ih ni uwen atail kak. (Kolose 3:23) E ketin mwahngih dahme kitail kak oh sohte kak wia. (Melkahka 103:14) Ma ni karakarahk kitail sukuhlki en pohnese atail sapwung kan, kitail kak ahneki peren ni atail kin peikiong Koht. Dahme ke sou sukuhlki ia duwen omw kak tepida peikiong Koht? Elen mour wet kin wahdo kapai laud sang reh.—Lepin Padahk 10:22.