Ke Kin Kasalehda Sapwellimen Siohwa Lingan?

“Kitail koaros wia sansal en lingan en Kaun-o.”​—2 KOR. 3:18.

IA DUWEN OMW PAHN SAPENG?

Dahme kahrehda kitail kak kasalehda sapwellimen Siohwa lingan mendahki atail dipan?

Ia duwen atail kapakap kan oh mihting kan ar kin sewese kitail en kasalehda sapwellimen Koht lingan?

Ia duwen atail kak doulahte kalinganahla Siohwa?

1, 2. Dahme kahrehda aramas akan kak alasang sapwellimen Siohwa irair kaselel kan?

NI SOANGSOANGEN ahl akan, kitail koaros duwehte atail pahpa oh nohno. Mwein kitail kin rong aramas kin ndaiong emen pwutak, ‘Ke duwehte ahmw pahpao.’ De re kin ndaiong serepein men, ‘Ke katamankihong ie ahmw nohno.’ Oh seri kan kin kalapw alasang arail pahpa oh nohno. Ahpw ia duwen kitail? Kitail kak kahlemengih Samatail nanleng Siohwa? Mendahki sohte me kilangehr Koht, kitail kak sukuhlki sapwellime irair kaselel kan me kitail kin kilang nan sapwellime kapikipik. Kitail pil kak sukuhlki sapwellimen Koht irair kan sang ni atail pahn onopki Paipel oh doudouloale dahme kitail wadek, ahpw mehlel dahme sapwellime Ohlo Sises ketin mahsanih oh wia. (Sohn 1:18; Rom 1:20) Eri, kitail kak kahlemengih sapwellimen Siohwa irair kaselel kan, oh ni ahl wet kitail kak kasalehda sapwellime lingan.

² Mwohn Koht eh ketin kapikada aramas, e ketin mwahngih me aramas pahn kak kapwaiada kupwure, alasang sapwellime irair kaselel kan oh kalinganahla. (Wadek Senesis 1:26, 27.) Nin duwen Kristian akan, kitail men alasang sapwellimen Koht irair kaselel kan. Ma kitail kin wia met, kitail ahneki pwais kaselel en kasalehda sapwellime lingan. Kitail kak kasalehda sapwellime lingan sohte lipilipil soangen tiahk de keinek dah kitail tikida loale, de uwen laud en sukuhl me kitail alehdi. Dahme kahrehda? Pwe “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”​—Wiewia 10:34, 35.

3. Ia mwomwen atail pepehm ni atail kin papah Siohwa?

³ Kristian keidi kan kin kasalehda sapwellimen Siohwa lingan. Wahnpoaron Pohl me pil wia emen me keidi ntingihedi: “Eri, kitail koaros wia sansal en lingan en Kaun-o ni sohte perehpen masatail kan; oh linganohte me kin kohsang rehn Kaun-o . . . me kin kawekiong kitail ni uhdahn mwomwen Kaun-o, ni lingan ehu me wie lalaudla.” (2 Kor. 3:18) Pohl koasokoasoia ahnsou me Moses wa Kosonned Eiseko oh kohdihdo sang pohn Nahna Sainai. Mesen Moseso linganla pwehki eh patohong Siohwa. (Eks. 34:29, 30) Kristian kan saik lelohng dahme Moses lelohng oh ni aramas akan ar kin kilang masarail, re sohte kin kilang eh linglingan. Ahpw re kak kilang peren me Kristian ahneki ni arail kin koasoia duwen Siohwa, sapwellime irair kaselel kan, oh kupwure ong tohnsampah. Eri sohte lipilipil ma kitail me keidi de wia sihpw teikan, kitail kak kasalehda sapwellimen Siohwa lingan nan atail mour oh kalohk. (2 Kor. 4:1) Ia duwe, ke kin kasalehda sapwellimen Siohwa lingan sang ni omw kin mour ni ahl ehu me kin kaperenda ih oh kaukaule iang doadoahk en kalohk?

KITAIL KIN MEN KASALEHDA LINGAN EN SIOHWA

4, 5. (a) Duwehte Pohl, soangen pei dahieu mi loalatail? (b) Dahme dihp kin wiahiong kitail?

⁴ Nin duwen sapwellimen Siohwa ladu kan, kitail men kasalehda sapwellime lingan ni soahng koaros me kitail wia. Ahpw kitail kin kalapw sohte wia dahme kitail inengieng men wia. Pohl pil ahneki kahpwal wet. (Wadek Rom 7:21-25.) E kasalehda ni sansal dahme kahrehda kitail koaros anahne peiong atail ineng suwed kan: “Aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.” (Rom 3:23) Pwehki Adam eh dipada, aramas koaros ipwidihte wia lidu en dihp, met duwehte nanmwarki lemei men me kin kaunirailda.​—Rom 5:12; 6:12.

⁵ Dahkot dihp? Dihp iei mehkot me pelien sapwellimen Siohwa irair kaselel kan, dahme e ketin kupwurperenki, oh dahme e ketin kupwurki kitail en wia. Dihp kin kauwehla ahn emen nanpwungmwahu rehn Koht. E kin ireikitaildihsang kasalehda sapwellimen Koht lingan, duwehte mehkot me kin irehdi sounkesik men eh kin kasikihdi dahme e kaikainene en kasikih. Ekei pak kitail kin wiahda dihp pwehki kitail kin pein pilada. Ekei pak kitail kin dipada pwehki kitail sapwungala. (Nemp. 15:27-31) Dihp ahneki manaman kehlail en kamwakid aramas oh kin katohreirailsang Sounkapikparailo. (Mel. 51:5; Ais. 59:2; Kol. 1:21) Pali laud en aramas akan kin mour ni ahl ehu me kin katohre irail douluhl sang Koht, kahrehda re sohte ahneki ahnsou mwahu en kasalehda sapwellime lingan. Sohte mehkot me kahrehiong aramas imwila suwed laud sang dahme dihp kin kahrehda.

6. Dahme kahrehda kitail kak kasalehda sapwellimen Siohwa lingan mendahki kitail dipan?

⁶ Mendahki kitail ipwidihte dipan, Siohwa ketikihong kitail koapworopwor. (Rom 15:13) Ni eh ketikihda Sises nin duwen meirong en dipatail, Siohwa ketikihda ahl ehu pwe kitail en maiaudahsang dihp. Pwehki atail kin pwoson meirong wet, kitail solahr “liduwih dihp,” oh kitail kak kasalehda sapwellimen Siohwa lingan oh wia kompoakepah kan. (Rom 5:19; 6:6; Sohn 3:16) Ma kitail kin doulahte wia kompoakepahn Koht, kitail kakehr kamehlele me e pahn ketin kapaiada kitail. Oh ni ahnsou kohkohdo, e pahn ketin kahrehda kitail en unsekla oh ketikihong kitail mour soutuk. E uhdahn wia pwais kaselel ehu me Koht ketin medewe me kitail kak kasalehda sapwellime lingan mendahki kitail dipan.

DAHME KIN SEWESE KITAIL EN KASALEHDA LINGAN EN KOHT?

7. Dahme kitail anahne pohnese ma kitail men kasalehda sapwellimen Koht lingan?

⁷ Ma kitail me kasalehda sapwellimen Koht lingan, kitail anahne ni mehlel pohnese me kitail aramas dipan kei. (2 Kron. 6:36) Kitail anahne pohnese me mie atail luwet kan oh pelianda pwe kitail en kak kalinganahla Koht. Karasepe, ma atail luwet iei en kilang kilel suwed, kitail anahne pohnese me kitail anahne elder kan en sewese kitail oh peki arail sawas. (Seims 5:14, 15) Met iei tepin kahk me kitail anahne wia ma kitail uhdahn men kasalehda sapwellimen Koht lingan. Ahnsou koaros, kitail anahne tehk mwahu ma kitail mour ni ahl ehu me Siohwa ketin kupwurki. (Lep. Pad. 28:18; 1 Kor. 10:12) Sohte lipilipil soangen luwet dah me kitail ahneki, kitail anahne dehr uhdi peiong pwe kitail en kak kasalehda sapwellimen Koht lingan.

8. Mendahki kitail sohte unsek, dahme kitail anahne wia?

⁸ Sohte aramas men likin Sises me kin ahnsou koaros wia dahme kin kaperenda Koht, oh ni unsek kasalehda sapwellimen Koht lingan. Mendahki kitail sohte duwehte Sises me unsek, kitail anahne song nantihong en alasang sapwellime mehn kahlemeng kan. (1 Pit. 2:21) Siohwa kin ketin mwahngih atail kin kamwakamwahwihala pein kitail oh pil atail kin nantihong men kalinganahla ih, oh e pahn ketin kapaiada soangen nanti pwukat.

9. Ia duwen Paipel eh kin sewese kitail en kalaudehla atail kasalehda sapwellimen Koht lingan?

⁹ Paipel kak sewese kitail en wehwehki ia duwen atail kak kalaudehla atail kasalehda sapwellimen Koht lingan. Kitail anahne onopki mwahu Paipel oh doudouloale dahme e mahsanih. (Mel. 1:1-3) Ni atail kin wadek Paipel rahn koaros, kitail kin esehda soangen wekidekla kan me kitail anahne wia pwehn wiahla Kristian mwahu kei. (Wadek Seims 1:22-25.) Dahme kitail kin sukuhlki sang Paipel kin kakehlaka atail pwoson. E pil kin kakehlaka atail ineng en soikala wia dihp laud oh kakehlaka atail men kaperenda Siohwa.​—Mel. 119:11, 47, 48.

10. Ia duwen kapakap eh kak kamwahwihala atail papah Siohwa?

¹⁰ Ma kitail men kasalehda sapwellimen Koht lingan, kitail pil anahne “poadidiong kapakap ahnsou koaros.” (Rom 12:12) Kitail anahne kapakapki sapwellimen Siohwa sawas pwehn papah ih ni ahl ehu me e ketin kupwurki. Kitail kak peki sapwellime manaman, kakehlepen atail pwoson oh pil kehl en pelianda kasongosong kan. Kitail pil kak peki en ketin sewese kitail en wiahla sounpadahk en Paipel mwahu kan. (Mad. 6:13; Luk 11:13; 17:5; 2 Tim. 2:15) Kitail anahne likih sawas me Samatail Siohwa kin ketikihda duwehte seri men eh kin likih semeo. Ma kitail peki Siohwa en ketin sewese kitail en kamwahwihala atail kin papah ih, kitail kak likih me e kak ketin sewesei kitail. Kitail en dehr medewe me atail kapakap kan kakete kedirepwa Siohwa. Eri kitail en kapakap oh kapinga ih, kasalehiong kalahngan oh peki en kaweid kitail, ahpw mehlel ni atail mihla nan irair apwal akan. Kitail pil kak peki Siohwa en ketin sewese kitail en kalinganahla ih ni atail kin papah.​—Mel. 86:12; Seims 1:5-7.

11. Ia duwen atail mihting kan ar kin sewese kitail en kasalehda sapwellimen Koht lingan?

¹¹ Koht ketikihong “ladu lelepek oh loalokong” pwukoa en apwalih sapwellime pelin sihpw. (Luk 12:45-45; Mel. 100:3) Ladu lelepeko men sewese kitail koaros en kasalehda sapwellimen Siohwa lingan. Ehu ahl me laduwo kin wia met iei sang ni atail mihting kan. Atail mihting kan kin sewese kitail en wiahda wekidekla kan nan atail mour oh kamwahwihala atail irair en Kristian kan, duwehte sounwia likou men eh kin kamwahwihala atail likou pwe kitail en mwomw mwahu. (Ipru 10:24, 25) Ihme kahrehda kitail en lella ni mihting kan mwohn ar pahn tepida. Ma kitail kin kalapw pwand, kitail sohte pahn paiekihda sawas koaros me kitail kak alehdi sang mihting kan.

KITAIL EN KAHLEMENGIH KOHT

12. Ia duwen atail kak kahlemengih Koht?

¹² Kitail kak kasalehda sapwellimen Siohwa lingan ihte ma kitail kin “kahlemengih ih.” (Ep. 5:1) Ehu ahl me kitail en kahlemengih Siohwa iei en nantihong ahneki sapwellime madamadau kan. Ni atail kin song en wia soahng kan ni pein atail madamadau a kaidehn sapwellimen Koht, kitail sohte kin wauneki Koht oh pein kahrehiong kitail kahpwal akan. Pwehki kitail mi nan ahn Sehdan sampah, kitail anahne nantihong kailongki dahme Siohwa ketin kalahdeki oh poakohng dahme Siohwa ketin poakohng. (Mel. 97:10; 1 Sohn 5:19) Kitail anahne uhdahn kamehlele me ahl tehieu en papah Siohwa iei en wia mehkoaros ong ni kalinganpe.​—Wadek 1 Korint 10:31.

13. Dahme kahrehda kitail anahne kailongki dihp? Eri dahme kitail pahn wia?

¹³ Kitail anahne kailongki dihp pwehki Siohwa ketin kalahdeki. Ma kitail kin kailongki dihp, kitail pahn kadohwaneweisang kitail soahng koaros me kakete kahrehiong kitail en wiahda dihp. Karasepe, kitail anahne dohweisang irail kan me uhwongala oh kesehla kaudok mehlel. Soangen aramas pwukat solahr kin kalingana Koht. (Deud. 13:6-9) Eri, kitail anahne soikala douluhl soangen aramas pwukat de emen me nda ih riatail ahpw kin kasohwahwih Koht. Kitail anahne soikala irail mehnda ma irail atail peneinei. (1 Kor. 5:11) E sohte pahn wia kamwahupatail en song kadehdehda me irail pwukat de meteikan me kin kauwe sapwellimen Siohwa pwihn me sapwung. Ni mehlel, kitail en dehr men ese dahme re nda, sohte lipilipil ma e mi nan neirail pwuhk kan de nan Internet, pwehki met pahn kak kauwehla atail nanpwungmwahu rehn Siohwa.​—Wadek Aiseia 5:20; Madiu 7:6.

14. Ia ahl me keieu kesempwal kitail en kahlemengih Siohwa? Dahme kahrehda?

¹⁴ Ehu ahl me keieu kesempwal en kahlemengih Siohwa iei en kasalehda limpoak. (1 Sohn 4:16-19) Ni mehlel, limpoak me kitail kin ahneki nanpwungatail kin kadehdehda me kitail sapwellimen Sises tohnpadahk kan oh sapwellimen Siohwa ladu kan. (Sohn 13:34, 35) Pwehki atail soh unsek, ele ekei pak e kin apwal en kasalehda limpoak. Ahpw, kitail anahne song en kasalehda limpoak ahnsou koaros. Atail kin nantihong kasalehda limpoak oh irair en Kristian teikan pahn sewese kitail en soikala wiahda dihp oh wiewia soh kadek kan.​—2 Pit. 1:5-7.

15. Ma kitail kin poakohng meteikan, ia pahn mwomwen atail wiewia ong irail?

¹⁵ Limpoak kin kahrehiong kitail en men wia soahng mwahu kan ong meteikan. (Rom 13:8-10) Karasepe, ma pwopwoud ehu kin limpoakpene, ira pahn loalopwoatpene ahnsou koaros. Ma kitail poakohng elder kan oh wauneki arail doadoahk, met pahn kak sewese kitail en peikiong oh uhpahiong irail. Seri kan me kin poakohng arail pahpa oh nohno kin peik oh wauneki irail oh sohte kin nda mehkot suwed duwen irail. Ma kitail poakohng meteikan, kitail sohte pahn medewe me kitail kesempwal sang irail de sohte kin kasalehda wahu ni atail kin koasoiong irail. (Seims 3:9) Oh elder kan me kin poakohng sapwellimen Koht pelin sihpw kin apwalih irail ni keneinei.​—Wiewia 20:28, 29.

16. Ia duwen limpoak eh kin sewese kitail nan doadoahk en kalohk?

¹⁶ Limpoak pil anahne sansalda nan atail doadoahk en kalohk. Pwehki atail limpoak laud ong Siohwa, kitail sohte pahn mwoarosala ni aramas akan ar sohte kin men rong kitail. Ahpw, kitail pahn kin kalokalohkihte rongamwahwo. Kitail pahn kaunopada mwahu ong kalohk oh song en wiahla sounpadahk mwahu kan en Mahsen en Koht. Ma kitail uhdahn poakohng Koht oh aramas akan, kitail sohte pahn kin kalohkte pwehki kitail anahne wia met. Ahpw kitail pahn medewe me doadoahk en kalohk iei pwais kaselel ehu oh kitail pahn perenki wia met.​—Mad. 10:7.

POUSEHLAHTE KALINGANAHDA SIOHWA

17. Pwehki atail wehwehki me dihp kin ireikitaildihsang kasalehda sapwellimen Koht lingan, dahme kitail anahne wia?

¹⁷ Aramas tohto sohte kin medewe ia uwen suwed en dihp. Ahpw kitail, kitail ese. Pwehki kahrepe wet, kitail ese me kitail anahne pelianda atail ineng en wiahda dihp. Kitail ese me kitail anahne kaiahnehda kadeikpen loalatail pwe en kak sewese kitail en wia me pwung ni ahnsou me kitail tepida inangih mehkot suwed. (Rom 7:22, 23) Nin duwen aramas ekei, kitail me luwet ahpw Koht kak ketikihong kitail kehl en wia dahme pwung nan irair sohte lipilipil.​—2 Kor. 12:10.

18, 19. (a) Dahme kak sewese kitail en kana ni atail kin peiong Sehdan oh nah ngehn saut ko? (b) Dahme kitail anahne uhdahn men wia?

¹⁸ Pwehki kitail men kasalehda sapwellimen Siohwa lingan, kitail anahne peiong Sehdan oh nah ngehn saut akan. Kitail pahn kak kana ma kitail doadoahngki “tehtehn mahwen” me Koht ketikihong kitail. (Ep. 6:11-13) Sehdan kin wia mehkoaros me e kak pwehn kihsang Siohwa lingan me Siohwa kelehpw warohng sapwellimanki. Sehdan pil kin nantihong kauwehla atail nanpwungmwahu rehn Koht. Sehdan uhdahn kin pehrdi ni ahnsou me kitail iangahki ohl, lih oh seri rar kei kin kolokol atail lelepek oh kalinganahla Koht. Eri kitail en pousehlahte kapinga Siohwa duwehte tohnleng kan me nda: “Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.”​—Kaud. 4:11.

¹⁹ Kitail anahne uhdahn men doulahte kalinganahla Siohwa. E uhdahn ketin kupwurperenki ni eh ketin mwahngih sapwellime ladu tohto arail wia uwen arail kak en kahlemengih oh kasalehda sapwellime lingan. (Lep. Pad. 27:11) Kitail anahne ahneki pepehm duwehte Depit me kapinga Siohwa ni mohngiong unsek oh koulki: “I pahn kin kalohki [“kalinganahla,” NW] sapwellimomwi roson lapalap kohkohlahte.” (Mel. 86:12) Aramas peik kan pahn kak kasalehda sapwellimen Siohwa lingan ni unsek oh kapinga ih kohkohlahte. E pahn uhdahn kaperen en mour nan soangen ahnsowo. Ia duwe, ke kin kasalehda sapwellimen Siohwa Koht lingan met, oh koapworopworki me ke pahn doulahte wia met kohkohlahte?

[Kilel nan pali 31]

Ke kin kasalehda sapwellimen Siohwa lingan ni omw kin wia mepwukat?