Pelianda Kehlail oh Soikala Ahn Sehdan Lidip kan!

“Pelianda kehlail en Tepil eh widing suwed kan.”​—EP. 6:11.

IA DUWEN OMW PAHN SAPENG?

Ia duwen sapwellimen Siohwa ladu men eh kak soikala lidip en noahrok kepwe?

Dahme kak sewese Kristian pwopwoud men en soikala dipen kamwahl?

Soangen kamwahu dah kan me ke leme kitail kak ahneki ma kitail sohte dukula pahn noahrok kepwe oh tiahk samin?

1, 2. (a) Dahme kahrehda Sehdan kin kailongki me keidi kan oh “sihpw teikan”? (b) Soangen lidip en Sehdan dah me kitail pahn koasoiapene nan iren onop wet?

SEHDAN kin kailongki aramas akan, ahpw mehlel irail kan me kin papah Siohwa. Ni mehlel, Sehdan kin mahmahweniong me keidi kan me mihmihte nin sampah. (Kaud. 12:17) Kristian pwukat kin eimah tiengla mwowe nan doadoahk en kalohk oh re kin kasalehiong aramas akan me Sehdan me kaunen sampah wet. Tepilo pil kin kailongki “sihpw teikan,” me kin utung me keidi kan nan arail doadoahk oh me ahneki koapworopwor en mour kohkohlahte. (Sohn 10:16, NW) Sehdan solahr kak mour kohkohlahte. Ihme kahrehda e inenen lingeringer. Sohte lipilipil ma kitail emen me keidi de sihpw teikan, Sehdan iei atail imwintihti. E men poarokitaildi.​—1 Pit. 5:8.

² Pwehn wia met, Sehdan kin doadoahngki lidip kan. E ‘karotongehla’ aramas akan pwe ren dehr sukuhlki rongamwahwo oh ren sohte kak kilang eh lidip kan. Ahpw, Tepilo pil kin poarokedi irail kan me kin pwungki rongamwahu en Wehio. (2 Kor. 4:3, 4) Iren onop en mwowe kasalehda ia duwen atail kak soikala ahn Sehdan lidip siluh. Met akan iei: (1) nda mehkot suwed duwen riatail kan, (2) masak aramas oh mweidohng irail en idingkihong uhk ken wiahda me sapwung oh (3) nohn nsensuwedkihla me ke wiahda sapwung ehu. Kitail pahn koasoiapene ia duwen atail pahn soikala lidip riau teikan en Sehdan. Me iei noahrok kepwe oh kasongosong en wiahda dipen kamwahl.

NOAHROK KEPWE IEI LIDIP EHU ME KAK POWEKITAILDI

3, 4. Ia duwen pwunodki anahn en sampah kan eh kak kahrehda atail lohdi nan lidip en noahrok kepwe?

³ Nan ehu sapwellime karasaras ko, Sises mahsanih duwen werentuhke me mweredi nanpwungen tuhke tekatek ko. E ketin kawehwehda me aramas ele kin rong rongen Wehio “ahpw anahn en sampah kan oh poakepen dipwisou kan kin kasokehla mahseno rehrail, iei me e sohte kin wahki.” (Mad. 13:22) Noahrok kepwe iei lidip ehu me atail imwintihti Sehdan kin doadoahngki.

⁴ Mie soahng riau me kak “kasokehla mahseno.” Ehu iei pwunodki “anahn en sampah kan.” Nan “ahnsou apwal” pwukat, mie soahng tohto me kitail kin pwunodki. (2 Tim. 3:1) E kak apwal en pwainda dahme ke anahne pwehki pweilaudlahn kepwe kan de ke sohte kin doadoahk en mwohni. Ele ke kin pwunodki dahme pahn wiawi ahnsou kohkohdo oh kin idek, ‘E pahn itar nei mwohni ong ahnsou me I pahn mahla oh sohla kak doadoahk?’ Ekei aramas kin song en kepwehpwehla pwehki re medewe me ma re naineki mwohni laud, re pahn ahneki dahme re anahne ahnsou koaros.

5. Ia duwen “poakepen dipwisou kan” eh kak pitihkitaildi?

⁵ Soahng keriauo me Sises mahsanih duwe iei “poakepen dipwisou kan.” Met oh pil pwunodki anahn en sampah kan kak kahrehiong kitail en lohdi nan lidip en noahrok kepwe. Paipel mahsanih me mwohni kak doarekitailla. (Ekl. 7:12) Met wehwehki me mwohni kak sewese kitail en ahneki soahng kan me kitail anahne. Ahpw e sohte wia elen loalokong en song kepwehpwehla. Aramas tohto eseier me uwen arail kin doadoahk laud pwehn kepwehpwehla, ih uwen laud en arail kin lohdi nan lidip en noahrok kepwe. Ekei kin wiahla liduhn arail kepwe kan.—Mad. 6:24.

6, 7. (a) Dahme kak wiawi ni omw wasahn doadoahk me kak kahrehiong uhk ken ahnekihda ineng en kepwehpwehla? (b) Dahme Kristian men anahne medemedewe ahnsou me emen pahn ndaiong en doadoahk mwurin awahn doadoahk kan?

⁶ Ele ke tepida ahneki ineng en kepwehpwehla ahpw ke sohte ese. Karasepe, medewehla met: Omw kaun en doadoahko ndaiong uhk: “Mie mehkot kaperen me I men ndaiong uhk! Kitail alehdi kontirak laud ehu. Met wehwehki me mwein ke pahn anahne doadoahk mwurin awahn doadoahk kan nan sounpwong kohkohdo kan. Ahpw I inoukihong uhk me ke pahn ale pweipwei laud.” Ia omw pepehm ong met? E kesempwal ken apwalih anahn kan en omw peneinei, ahpw met kaidehn ihte pwukoa me ke ahneki. (1 Tim. 5:8) Mie soahng teikan me ke pil anahne medemedewe duwe. Ia uwen laud en ahnsou me ke pahn doadoahngki mwurin awahn doadoahk kan? Ia duwe, omw doadoahko pahn kahrehda apwal ong uhk ken papah Koht oh kahrehda ken pil katihasang mihting kan oh kaudok en peneinei?

⁷ Medewehla dahme keieu kesempwal ong uhk. Omw naineki mwohni laud de omw nanpwungmwahu rehn Siohwa? Ke pahn uhdihsang omw mwohneki mahs mehkan me pidada Wehin Koht pwehki ke men wiahda mwohni laud? Ke kak kilang ia duwen noahrok kepwe eh pahn kamwakid uhk ma ke sohte kanahieng nanpwungmwahu me kowe oh omw peneinei ahneki rehn Siohwa? Ma ke mi nan irair wet, ia duwen omw kak soikala noahrok kepwe pwe en dehr poweiukedi?​—Wadek 1 Timoty 6:9, 10.

8. Mehn kahlemeng en Paipel dah kan me kak sewesei kitail en kasawih atail mour?

⁸ Ma kitail sohte men noahrok kepwe en poweikitaildi, kitail anahne kaukaule kasawih mwomwen atail mour. Kitail en dehr duwehte Esau me sohte kesempwalki sapwellimen Siohwa inou kan. (Sen. 25:34; Ipru 12:16) Pil ehu, kitail sohte anahne duwehte ohl kepwehpweho me Sises ketin mahsanihong en netikihla mehkoaros me e ahneki, kihong mwohni ko rehn aramas semwehmwe kan, oh idawehnla ih. Ohlo sohte wia met. Ahpw, e nsensuwedla oh kohkohla pwehki eh kepwe kan me tohto. (Mad. 19:21, 22) Ahn ohlo kepwe ko kin duwehte lidip ehu me paroakedier ih. Ohl menet kakete idawehnla Sises, ohl me keieu lapalap nan sampah. Ahpw e sohte ale pwais kaselel wet. Kitail anahne kanahieng en dehr katihasang pwais kaselel en wia emen sapwellimen Sises Krais tohnpadahk.

9, 10. Nin duwen Paipel eh mahsanih, ia mwomwen atail madamadau ong kepwe kan?

⁹ Kitail anahne rong sapwellimen Sises kaweid ma kitail sohte men noahrok kepwe en pitihkitaildi. E mahsanih: “Kumwail dehr kin pwunodki ndinda, ‘Se pahn kihsang ia at tungoal kisin mwenge, de nimat pihl? Se pahn diar ia at likou?’ (Pwe me rotorot akan kin ngoangki rapahki mepwukat koaros.) A Samamwail me ketiket nanleng ketin mwahngih duwen amwail kin anahne mepwukat koaros.”​—Mad. 6:31, 32; Luk 21:34, 35.

¹⁰ Ma kitail sohte men lohdi nan lidip en noahrok kepwe, kitail anahne ahneki madamadau en sounnting en Paipel Akur me koasoia: “I en dehr wiahla aramas kepwehpwe de semwehmwe. Eri, komw ketikihong ie uwen kisin tungoal me I anahne.” (Lep. Pad. 30:8) Akur wehwehki me e kin anahne mwohni pwehn kak mour, ahpw e pil wehwehki me noahrok kepwe kak pitihdi. Kitail anahne pohnese me pwunodki anahn en sampah kan oh poakepen kepwe kan kak kahrehiong kitail en sohla ahneki nanpwungmwahu rehn Siohwa. Ma kitail kin nohn pwunodki kepwe kan, ele kitail sohla pahn ahneki ahnsou, kehl oh ineng en mwohneki mahs nan atail mour mehkan me pidada Wehin Koht. Eri kitail anahne kanahieng en dehr lohdi nan ahn Sehdan lidip en noahrok kepwe.​—Wadek Ipru 13:5.

KAMWAHL DUWEHTE PWOAHR SOH SANSAL EHU

11, 12. Ia duwen Kristian men eh kak lohdi nan lidip en kamwahl nan eh wasahn doadoahk?

¹¹ Soun koledi mahn kan me men paroakedi mahn kehlail men kin ekei pak weirada pwoahr nan ahl me mahno kin alu ie. Re kin ekihla pwoahr wet ni arail kin pwainkihdi lepin tuhke tikitik kan oh pwehl. Ehu kasongosong me Sehdan kin doadoahngki me keieu pweida mwahu kin duwehte lidip wet. Met iei dipen tiahk samin. (Lep. Pad. 22:14; 23:27) Ekei Kristian kan kin lohdiong nan lidip wet pwehki re kin mweidohng ren mihla nan irair kan me kin mengeiong irail en wiahda dipen tiahk samin. Ekei Kristian pwopwoud kan kin wiahda dipen kamwahl mwurin arail mwahukihda oh tepida iang emen me kaidehn arail pwoud.

¹² Met kak tepida wiawi nan omw wasahn doadoahk. Tohto sang elep en lih akan oh pali laud en ohl akan me kin wiahda dipen kamwahl kin wia met rehn emen iengerail tohndoadoahk. Ma kowe ohl emen, ke anahne iang doadoahk rehn lih akan? De ma kowe lih emen, ke anahne iang doadoahk rehn ohl akan? Ma ei, dahme ke koasoanehdier pwe ken dehr mwahukihda emen irail? Karasepe, mwein sister men kin kalapw koasoiong emen ohl me iang ih doadoahk. Mwein ohlo wiahla kompoakepah keren men me e kin likih kahrehda e kin ndaiong kahpwal kan nan eh mouren pwopwoud. De emen brother kompoakepahnkihla lih emen me kin iang ih doadoahk. Ele brothero kin medewe: “E kin pwungki ei madamadau oh kin rong ie ahnsou me I kin koasoiong. Oh e pil waunekin ie. I pil men ei pwoudo en wiahiong ie soahngohte.” Ke kak kilang ia duwen Kristian pwukat ar kak mihla nan keper en wiahda dipen kamwahl?

13. Ia duwen emen eh kak tepida mwahukihda emen me kaidehn eh pwoud nan mwomwohdiso?

¹³ Met pil kak tepida wiawi nan mwomwohdiso. Ih met me wiawiong pwopwoud ehu. Daniel oh eh pwoud, Sarah,a wia pioneer kei. Daniel koasoia me e pil wia emen elder oh e kin ale pwukoa koaros nan mwomwohdiso. E onop Paipel rehn ohl limmen oh meh silimen nanpwungarail papidaisla. Brother pwukat me ahpwtehn papidaisla kin uhdahn anahne emen me kak wehwehki arail pepehm kan. Pwehki Daniel kin inenen kedirepwkihla pwukoa kan nan mwomwohdiso, Sarah kin kalapw sewesehkin irail soangen sawas me re anahne. Ahpw Sarah pil anahne sawas oh e kin ale met sang rehn ohl pwukat. Irairo wiahla lidip keper ehu. Daniel nda: ‘Sounpwong koaros ei pwoudo kin doadoahngkihla eh kehl pwehn sewese meteikan, eri e kin anahne sawas ong eh nanpwungmwahu rehn Koht oh pil eh pepehm kan. Ni ahnsowo I sohte kin tehk ih. Soahng pwukat kahrehda kahpwal laud. Ei pwoudo wiahda dipen kamwahl rehn emen ohl ako me I kin onop Paipel reh. I uhdahn kedirepwla oh sohte tehk me en ei pwoudo eh nanpwungmwahu rehn Siohwa tepida luwetala.’ Ia duwen omw kak soikala soangen kahpwal wet?

14, 15. Dahme kak sewese pwopwoud Kristian kan ren soikala dipen kamwahl?

¹⁴ Pwehn soikala dipen kamwahl, ke anahne medemedewe laud wehwehn omw pahn kin loalopwoat ong omw pwoudo. Sises mahsanih: “Kaleke aramas de kamweidpeseng me Koht ketin kapatapenehr.” (Mad. 19:6) Dehr medewe me omw doadoahk nan mwomwohdiso kin kesempwal sang omw pwoudo. Ma ke sohte kin kalapw mi rehn omw pwoudo pwehki kahrepe kan me sohte kesempwal, omw mouren pwopwoud kakete luwetala. Kowe de omw pwoud kak lelohng kasongosong en wiahda dipen kamwahl.

¹⁵ Ma kowe emen elder, ke anahne apwalih mwomwohdiso. Wahnpoaron Piter koasoia: “Kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu duwen kupwur en Koht. Kumwail wia amwail doadoahk, kaidehk pwehki amwail pahn ale pweipweiki, a pwehki amwail kin uhdahn ngoangki papah.” (1 Pit. 5:2) Dehr pohnsehse tohnmwomwohdiso kan. Ahpw dehr nohn doadoahk laud pwe ken wiahla elder mwahu men kahrehda ke sohte kak wia ohl pwopwoud mwahu men. E pahn sohte katepe ken sewese riomw kan nan mwomwohdiso ahpw sohla nsenohki omw pwoud ni imwomwo. Met pahn kahrehiong omw mouren pwopwoud en mihla nan keper. Daniel (me kitail ahpwtehn koasoiapene) nda, ‘Ke dehr nohn kedirepwkihla pwukoa kan nan mwomwohdiso me kahrehda ken sohla nsenohki pein omw peneinei.’

16, 17. (a) Dahme Kristian kan me pwopwoud kak wia ni wasahn doadoahk pwe koaros en ese me re sohte kak mwahukihda emen? (b) Ia duwen neitail pwuhk kan ar kak sewese Kristian kan ren soikala dipen kamwahl?

¹⁶ Kahn Iroir oh Awake! (lokaiahn wai) kin kihda kaweid mwahu kan pwehn sewese pwopwoud Kristian kan ren soikala dipen kamwahl. Kahn Iroir en December 1, 2006, kihda kaweid ong soangen irair kan nan wasahn doadoahk de wasa teikan me kak kahrehiong uhk en karanihala emen me kaidehn omw pwoud. Karasepe, ma kowe ohl emen oh ke kin iang doadoahk rehn lih emen mwurin awahn doadoahk, ke kak lelohng kasongosong en mwahukihda. Ma ke pwopwoud, ke anahne kasalehda ni sansal sang omw koasoi oh wiewia me ke sohte kak wia met. Dehr kalahiong meteikan de song en kahrehiong irail en kilang uhk pwehki mwomwomw de soangen likou me ke likawih. Kihdi kilel kan en omw pwoudo oh noumw seri kan nan omw wasahn doadoahk. Met pahn katamankihong uhk oh meteikan me omw peneinei uhdahn kesempwal. Dehr kangoange emen en mwahukinuhkada. Ke dehr mweidohng met en wiawi.

¹⁷ Ehu ire nan Awake! (lokaiahn wai) en April 2009 me oaralape koasoia “Ia Uhdahn Wehwehn Lelepek nan Pwopwoud?” kin kaweid kitail en dehr ahneki madamadau samin duwen emen me kaidehn atail pwoud. Ireo pil koasoia me ma ke kin ahneki soangen madamadau pwukat, ke pahn kakete wiahda dipen kamwahl. (Seims 1:14, 15) Ma ke pwopwoud, e pahn wia elen loalokong ma kowe oh omw pwoudo pahn wadek ire pwukat. Siohwa iei me ketin wiahda koasoandi en pwopwoud oh pwopwoud kin wia mehkot sarawi. Kowe oh omw pwoudo anahne ahnsou en koasoiapene amwa mouren pwopwoud. Met pahn kasalehda me soahng kan me sarawi mwohn silangin Koht kin kesempwal ong uhk.​—Sen. 2:21-24.

18, 19. (a) Soangen kahpwal dah kan me kamwahl kin kahrehda? (b) Soangen kamwahu dah kan me mie ong irail me kin lelepek ong arail pwoud?

¹⁸ Ma ke lelohng kasongosong en tepida mwahukihda emen me kaidehn omw pwoud, medewehla kahpwal kan me nenek oh kamwahl kin kahrehda. (Lep. Pad. 7:22, 23; Kal. 6:7) Irail kan me kin wia tiahk samin sohte kin kaperenda Siohwa. Irail kin kamedekihala arail pwoud oh pein irail. (Wadek Malakai 2:13, 14.) Ahpw ken medewe duwen kamwahu kan me ke pahn ale ma ke kolokolte omw wiewia mwakelekel. Ke ahneki koapworopwor en mour soutuk oh ke pil ahneki mour me keieu mwahu ahnsou wet, iangahki nsenmwakelekel.​—Wadek Lepin Padahk 3:1, 2.

¹⁹ Sounmelkahkao koasoia me aramas akan me kin poakohng oh peikiong sapwellimen Koht kosonned kan pahn ahneki popohl oh sohte lidip ehu pahn paroakiraildi. (Mel. 119:165) Eri, poakohng padahk mehlel oh “kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan” ni imwin rahn suwed pwukat. (Ep. 5:15, 16) Rahnwet, Sehdan kin doadoahngki lidip tohto pwehn paroakedi sapwellimen Koht tohnkaudok mehlel kan. Ahpw Siohwa ketikihong kitail mehkoaros me kitail anahne pwehn “pelianda kehlail” oh perekitailla pwe kitail en dehr lohdi nan ahn Sehdan lidip kan.​—Ep. 6:11, 16.

[Nting tikitik me kileldi pah]

[Kilel nan pali 29]

Dehr mweidohng noahrok kepwe en poweiukedi oh kahrehda ken kauwehla omw nanpwungmwahu rehn Siohwa

[Kilel nan pali 32]

Ma ke kin kalahiong emen de mweidohng emen en kalahiong uhk, met kak kahrehiong uhk ken wiahda dipen kamwahl