Siohwa Ketin Kapokonepene Sapwellime Aramas Peren kan

“Kapokonepene aramas akan koaros, ohl, lih, seri, oh pil mehn liki kan koaros.”​—DEUD. 31:12.

IA OMW PASAPENG?

Karasaras dah kan me kasalehda me mihting tohrohr kan kin ahnsou koaros kesempwal ong sapwellimen Siohwa aramas akan?

Soangen tounmetei dah kan me mehn Israel tohto wiahda pwehn towehda kasarawi kan nan Serusalem?

Dahme kahrehda ke anahne towehda mihting tohrohr koaros?

1, 2. Dahme kitail pahn sukuhlki duwen mihting tohrohr kan nan iren onop wet?

EREIN sounpar tohto, Sounkadehdehn Siohwa kan kin pokonpene ni mihting tohrohr kan (district conventions). Mwein tohto rehtail iangehr towehda mihting tohrohr pwukat pak tohto erein sounpar tohto.

² Sounpar kid kei samwalahro, sapwellimen Koht aramas akan pil kin pokonpene. Met kitail pahn sukuhlki duwen kapokon kan me sapwellimen Koht aramas akan kin wia me kileldi nan Paipel oh ia duwen ar duwehte atail mihting tohrohr kan rahnpwukat. Kitail pahn pil sukuhlki dahme kahrehda e mwahu kitail en towehda.​—Mel. 44:1; Rom 15:4.

MIHTING TOHROHR KESEMPWAL KAN NAN PAIPEL OH PIL ATAIL AHNSOU

3. (a) Dahme wiawi ni tepin kapokon en sapwellimen Siohwa aramas akan me kileldi nan Paipel? (b) Ia duwen mehn Israel kan ar ese iahd me re pahn tuhpene?

³ Tepin kapokon laud me kileldi nan Paipel iei me wiawi ni ahnsou me mehn Israel kan pokonpene pahn nahna Sainai pwehn ale kaweid kan sang Siohwa. Kapokon wet wia ahnsou tohrohr ehu nan poadopoad en kaudok min. Siohwa ketin kasalehiong mehn Israel kan sapwellime manaman oh ketikihong irail sapwellime Kosonned. Rahno wia rahn ehu me re sohte kak manokehla. (Eks. 19:2-9, 16-19; wadek Eksodus 20:18; Deuderonomi 4:9, 10.) Rahno, nanpwungen mehn Israel kan oh Siohwa wekidekla. Mwurinte kapokon me wiawi pahn Nahna Sainai, Siohwa ketin mahsanihong Moses ia duwen eh pahn kapokonepene aramas akan. E ketin mahsanihong Moses en wiahda sowi silper riau. Ni ahnsou me sowi riau ko pahn pepeuk, mehn Israel kan ese me re anahne kohla ni ‘wenihmwen Impwalo.’ (Nemp. 10:1-4) Song medewehla ia uwen aramas ako ar perenkihda kapokon pwukat.

4, 5. Dahme kahrehda kapokon kan me Moses oh Sosua koasoanehdi kesempwal?

⁴ Ni ahnsou me mehn Israel ko mihmi nan sapwtehno mpen sounpar 40, Moses koasoanehdi kapokon ehu ong wehio pwon. Met wiawi ni ahnsou ehu me uhdahn kesempwal nan poadopoad en wehin Israel. Re pahn kereniongehr pedolong nan Sapwen Inowo, kahrehda e wia ahnsou mwahu ong Moses en katamanki rie ko soahng koaros me Siohwa ketin wiahiong irailehr oh pil soahng kan me e pil pahn ketin wia.​—Deud. 29:1-15; 30:15-20; 31:30.

⁵ Ele ih pil ahnsowo me Moses padahkihong aramas ko me kapokon tohrohr ehu pahn wiawi. Nan sounpar isuh koaros, ni ahnsou en Kasarawi en Impwal kan, ohl, lih, seri koaros oh pil mehn liki kan me kin kousoan rehrail anahne pokonpene wasa me Siohwa ketin pilada. Re pahn sukuhlki wasao sapwellimen Siohwa Kosonned pwe ren lemmwiki oh peikiong ih. (Wadek Deuderonomi 31:1, 10-12.) E sansal me Siohwa ketin kupwurki sapwellime aramas akan en pokonpene oh sukuhlki duwen sapwellime kosonned kan oh kupwure. Mwuhr, mwurin mehn Israel ko kalowehdi Sapwen Inowo, Sosua padahkihong irail ren pokonpene. Ni ahnsowo, wehi kan me sohte kin kaudokiong Koht kapilirailpene, eri e ese me mehn Israel ko anahne kangoang pwe ren kolokolte arail lelepek ong Siohwa. Rahno, aramas ko wiahda inou kesempwal ehu me ren papah Koht.​—Sos. 23:1, 2; 24:1, 15, 21-24.

6, 7. Mihting tohrohr kesempwal dah kan me wiawi nan ahnsou samwalahr ko?

⁶ Nan ahnsou keren kan, pil mie mihting tohrohr kesempwal kan. Nan mihting tohrohr pwukat, wekidekla kan kin pakairda ong mwomwen koasoandi kan ar kin wiawi nan sapwellimen Koht pwihn oh pil atail kin wehwehkihla iren Paipel kan. (Lep. Pad. 4:18) Nan pahr 1919, Tohn Sukuhl kan en Paipel wia tepin arail mihting tohrohr laud mwurin Mahwen Keieu en Sampah. E wiawi nan Cedar Point, Ohio, nan Amerika oh meh 7,000 me towehda. Nan mihting tohrohr wet, pakair wiawi me sapwellimen Koht aramas akan pahn nantihong kalaudehla arail doadoahk en kalohk nan sampah pwon. Nan pahr 1922 nan wasaote, nan mihting tohrohr ehu me reireiki rahn duwau, Joseph F. Rutherford wia padahk kesempwal ehu oh kangoange soun rongorong ko ren pousehlahte kalohk wasa koaros lao Papilon Lapalap pahn kasohrala. E nda: “Sampah wet anahne ese me Siohwa iei Koht oh me Sises Krais iei Nanmwarki en nanmwarki kan oh Kaun en kaun akan. Ih rahno met me keieu kesempwal. Kilang, Nanmwarkio kaundahr! Kumwail iei sapwellime sounkair kan. Eri, pakairki, pakairki, pakairki Nanmwarkio oh sapwellime wehi.” Imwilahn met, irail kan me iang mihting tohrohro oh pil sapwellimen Koht aramas akan nan sampah pwon tepida ngoangki kalohk laudsang mahs.

⁷ Nan pahr 1931, ni mihting tohrohr ehu nan Columbus, Ohio, Tohn Sukuhl en Paipel ko inenen perenkihda arail alehdi ahd wet Sounkadehdehn Siohwa kan. Nan pahr 1935, nan Washington, D.C., Brother Rutherford kawehwehda ihs ‘pokon kalaimwun’ me Kaudiahl koasoiahki me “uh mwohn mwoahlo oh mwohn Sihmpwulo.” (Kaud. 7:9-17) Nan pahr 1942, nan Mahwen Keriau en Sampah, Nathan H. Knorr wia padahk kaselel ehu me oaralap koasoia “Popohl—E Kak Mihmi Kohkohlahte?” E kawehwehda ihs ‘mahn weitahta kamasepwehko’ me mi nan Kaudiahl irelaud 17 oh nda me e pahn miehte doadoahk en kalohk laud mwurin mahweno.

8, 9. Dahme kahrehda ekei mihting tohrohr kan wia ahnsou kaperen kei ong sapwellimen Koht aramas akan?

⁸ Nan mihting tohrohr me oaralap “Wehi Peren kan” nan pahr 1946, Brother Knorr wia padahk kaselel ehu me oaralap koasoia “Kahpwal kan en Pwurehng Kauwada oh Kalaudehla.” Emen brother me mihmi ni wasahn padahko erein padahko eh wiewiawi ntingihedi mwomwen sounrongorong ko ar mwekidki met. E nda me ni ahnsou me Brother Knorr koasoia duwen koasoandi kan en kalaudehla ihmw kan oh wasahn doadoahk kan nan Brooklyn Pedel, sounrongorong ko kin pwurepwurehng lopwolopw. Mehnda ma ke dohsang irail, e mengei en kilang me koaros uhdahn perenkihda met. Nan pahr 1950, nan mihting tohrohr laud ehu me wiawi nan New York City, sounrongorong ko perenkihda arail alehdi Paipel kapw me adaneki New World Translation of the Christian Greek Scriptures (lokaiahn wai). Met e wiahla kisehn Paipel ehu ni lokaiahn wai me kapwurehiong mwaren Koht nan sapwellime Mahsen, wasa me mwar wet uhdahn anahne mi ie.​—Ser. 16:21.

⁹ Koasoandi en mihting tohrohr kan pil kin wiawihda nan ekei sahpw me Sounkadehdehn Siohwa kan mahs kin lelohng kalokolok de sohla mweimwei ren kalohk erein ahnsou ehu. Ahnsoun mihting tohrohr pwuko wia ahnsou kaperen kei ong irail kan me mihmi wasao. Karasepe, Adolf Hitler nda me e pahn kasohrehla Sounkadehdehn Siohwa kan nan Sehmen. Ahpw nan pahr 1955 nan Nuremberg, Sounkadehde 107,000 wia mihting tohrohr ehu nan wasaote me Hitler oh irail kan me utung ih kin pokonpene ie. Me tohto rehrail sengiseng pwehki re inenen peren. Nan pahr 1989, brother oh sister meh 166,518 kohla Poland pwehn iang mihting tohrohr siluh me oaralap “Poadidiong Koht.” Me tohto kohsang wasa me mahso adaneki Soviet Union oh Czechoslovakia oh wasa teikan me mi Palimese en Iurop. Ong ekei, met wia keieu en arail towehda pokon en sapwellimen Koht aramas akan me tohtohsang meh 15 de 20. Oh nan pahr 1993, nan mihting tohrohr laud me oaralap “Padahk Sang Powe” nan Kiev, Ukraine, medewehla uwen kaperen en kilang meh 7,02 papidaisla. Ele met wia me keieu tohto en Sounkadehdehn Siohwa kan me papidaisla nan rahn ehu.​—Ais. 60:22; Ak. 2:7.

10. Mehnia mihting tohrohr kan me kesempwal ong uhk? Dahme kahrehda?

¹⁰ Mwein mie mihting tohrohr kan me kin wia mehkot tohrohr ong uhk. Ke taman tepin mihting tohrohr me ke iang de ni me ke papidaislao? Mepwukat wia mwekid kesempwal kei nan omw kaudok ong Siohwa oh ke sohte pahn manokehla. Re wia mehn kataman kesempwal kei.​—Mel. 42:4.

AHNSOU KAPEREN KAN ME KIN KALAPW WIAWI

11. Kasarawi dah kan me Koht ketin kupwurki mehn Israel ko ren towehda pahr koaros?

¹¹ Siohwa ketin kupwurki mehn Israel ko ren pokonpene nan Serusalem ong kasarawi siluh nan pahr koaros. Kasarawi pwukat iei Sarawi en Pilawa Sohte Dol Ihs, Sarawi en Wihk kan (me mwuhr adanekihla Pendekos) oh Sarawi en Impwal kan. Koht ketin mahsanihong mehn Israel ko: “Nan sounpar koaros ni ahnsoun sarawi siluh lapalap pwukat, ohl koaros rehmwail pahn kin pwarodo pwehn wia kaudok ong ie, amwail Koht oh amwail Kaun.” (Eks. 23:14-17) Ohl tohto ese ia uwen kesempwal en kasarawi pwukat ong arail kaudok ong Siohwa, eri irail oh arail peneinei pwon kin towehda.​—1 Sam. 1:1-7; Luk 2:41, 42.

12, 13. Dahme mehn Israel tohto anahne wia pwehn towehda kasarawi kan nan pahr koaros?

¹² Medewehla ia wehwehn met ong peneinei en Israel ehu en wia seiloak wet. Karasepe, Sosep oh Mery anahne aluhki mpen mwail 60 sang Nasaret kohla Serusalem. Ke leme ia uwen werei ma kowe me wia seiloak wet oh kahre kisin seri kan? Ni atail wadek duwen Sises eh kohla Serusalem ni ahnsou me e wia kisin pwutak kis, kitail esehda me peneinei kan oh kompoakparail kan kin ekei pak seiloakpene. Medewehla duwen arail kin seiloak, sawaspene kaunopada mwenge oh sewese koaros rapahkihda wasa me re kak meir ie. Kitail ese me seiloako sohte keper pwehki en Sises pahpa nohno mweidohng ih en kak kelehpw mendahki e sounparte 12. Medewehla ia uwen kasarawi pwukat ar kin wia ahnsou kei me sohte kak manokonokla, ahpw mehlel ong me pwulopwul ko ahnsowo.​—Luk 2:44-46.

¹³ Mwurin mehn Israel ko kousoanla nan sahpw teikan, irail kan me towehda kasarawi kan kin kohdo sang wehi tohto. Nan Pendekos en pahr 33, mehn Suhs kan oh pil tohnkaudok en Siohwa teikan kasalehda me re kesempwalki kasarawi pwukat sang ni arail kin seiloakla Serusalem sang wasa kan duwehte Italy, Lipia, Krihd, wasa kan me met adaneki Turkey, oh pil Mesopodamia.​—Wiewia 2:5-11; 20:16.

14. Ia pepehm en mehn Israel kan ni arail kin towehda kasarawi kan nan pahr koaros?

¹⁴ Ong mehn Israel lelepek kan, dahme keieu kesempwal oh kaperen duwen seiloak pwuko iei arail kin iang meh kid teikan me kin poakohng Siohwa oh kaudokiong ih. Ia pepehm en irail kan me towehda? Ahnsou me Siohwa ketin mahsanihong sapwellime aramas akan duwen Sarawi en Impwal, e mahsanih: “Kumwail en pereperenki sarawi wet iangahki noumwail seri kan, amwail ladu kan, mehn Lipai kan, mehn liki kan, me sepwoupwou kan, oh lihodi kan me kin koukousoan nan amwail kahnimw kan. Kumwail kawauwihala KAUN-O, amwail Koht, ni amwail pahn kin wiewia sarawi wet erein rahn isuh ni wasahn kaudokteieuo. Kumwail pereperen, pwehki KAUN-O eh ketin kupwuramwahwihkin kumwail wahnsapwamwail kan oh amwail doadoahk.”​—Deud. 16:14, 15; wadek Luk 11:28.

DAHME KAHREHDA KITAIL EN KESEMPWALKI ATAIL MIHTING TOHROHR KAN RAHNWET?

15, 16. Soangen tounmetei dah kan me ke anahne wiahda pwe ken iang towehda mihting tohrohr kan? Dahme kahrehda ke perenki wiahda tounmetei pwukat?

¹⁵ Kasarawi ko me wiawi nan Serusalem kin wia karasaras mwahu kei ong sapwellimen Koht aramas akan rahnwet. Ni ahl tohto, atail mihting tohrohr kan kin duwehte kasarawi ko mahs. Duwehte sapwellimen Koht aramas kan nan Paipel, me tohto rehtail anahne wiahda tounmetei kan pwehn iang towehda. Ahpw kitail kin perenki wia met pwehki kitail ese ia uwen laud atail kin paiekihda mihting tohrohr pwukat. Re kin uhdahn kesempwal ong atail kaudok. Kitail anahne kaweid kan oh wehwehki padahk kan me kitail alehdi wasao pwehn sewese kolokolte atail nanpwungmwahu rehn Koht en kehlail. Mihting tohrohr kan kin kamwakid kitail en doadoahngki dahme kitail sukuhlki sang Paipel oh sewese kitail en soikala kahpwal kan. Re pil kin kangoange kitail en soikala soahng kan me kak kahrehiong kitail pwunod oh pil kamwakid kitail en mwohneki mahs nan atail mour mehkan me kin kaperenih kitail.​—Mel. 122:1-4.

¹⁶ Mihting tohrohr kan kin ahnsou koaros wahdo peren ong irail kan me towehda. Ehu ripoht duwen mihting tohrohr laud ehu me wiawi nan pahr 1946 koasoia me e kaperen en kilang Sounkadehde peren kid kei ar kin pokonpene wasa ieu. E kaperen en rong pwihn en kesengo kesekeseng oh pil irail me iang towehda wie kokoulki koul en kaping kaselel kan ong Siohwa. Ripohto kapataiong me me tohto toukihda arail ahnsou pwehn iang soangsoangen doadoahk ni wasahn mihting tohrohro. Re kin uhdahn perenki papah riarail Kristian kan. Ke iangehr pehm soangen peren wet ni mihting tohrohr kan?​—Mel. 110:3; Ais. 42:10-12.

17. Dahme wekila ong mwomwen koasoandi en mihting tohrohr kan?

¹⁷ Mie wekidekla kei me wiawi ong mwomwen koasoandi en mihting tohrohr kan. Karasepe, ekei taman ahnsou kan me mihting tohrohr kan kin reireiki rahn waluh. E kin mie prokram en ni menseng, mwurin souwas oh nin soutik. Kalohk pil kin ahnsou koaros wia kisehn prokramo. Ekei pak, prokramo kin tepida kuloak 9 ni menseng oh imwisekla kuloak 9 ni pwong. Irail kan me toukihda arail sawas kin doadoahk laud awa tohto pwehn kaunopada mwengehn menseng, souwas, oh soutik ong koaros. Ahnsou wet, mihting tohrohr kan solahr duwehte mahs. Pali laud en riatail Kristian kan kakehr ahneki ahnsou laud pwehn rong kanahieng prokramo pwehki koaros kin wahda pein kenerail mwenge.

18, 19. Dahme ke kin keieu perenki nan mihting tohrohr kan? Dahme kahrehda?

¹⁸ Mie soahng kei nan prokram en mihting tohrohr kan me kitail kin ahnsou koaros kasik oh me kin wia kisehn atail mihting tohrohr kan erein ahnsou reirei. Karasepe, kitail kin alehdi kaweid kan me rasehng “kisin mwenge ahnsou me konehng” sang padahk kan oh sawaspen Paipel kapw kan me sewese kitail wehwehki mwahu kokohp oh padahk kan en Paipel. (Mad. 24:45) Tohto pwuhk pwukat kitail kak doadoahngki pwehn sewese aramas akan ren wehwehkihla padahk mehlel en Paipel. Sipai kan me kin poahsoankihda Paipel sewese kitail koaros, me pwulopwul oh me mah, en tehk mwahu me kitail kin papahki Siohwa kahrepe mwahu oh pere kitail sang madamadau en sampah wet. Padahk en papidais kin sewese kitail koaros en medemedewe dahme keieu kesempwal nan atail mour. Oh kitail kin perenki kilang ekei ar inoukihong Siohwa arail mour sang ni arail kin papidaisla.

¹⁹ Mihting tohrohr kan kin wia kisehn kaudok min erein pahr kid kei. Re kin sewese kitail en peren oh kolokol atail lelepek ong Siohwa ni ahnsou apwal akan oh kangoange kitail en kalaudehla atail papah ih. Re kin kihong kitail ahnsou mwahu en tuhwong kompoakpatail kapw kan oh sewese kitail en ese wehwehn en wia kisehn peneinei laud ehu nan sampah pwon. Mihting tohrohr kan iei ehu ahl kesempwal me Siohwa kin ketin kapaiada oh apwalih sapwellime aramas akan. Emenemen kitail men tehk mwahu pwe kitail en dehr katihasang ehu prokram nan ehuehu mihting tohrohr kan.​—Lep. Pad. 10:22.

[Kilel nan pali 30]

Mihting tohrohr laud ehu nan New York City, 1950

[Kilel nan pali 32]

MOZAMBIQUE

[Kilel nan pali 32]

SOUTH KOREA