Kapokon kan​—Ahnsou kan me Kitail Kak Peren!

¹ Kapokon kan en Sounkadehdehn Siohwa kan kin wia ahnsou mwahu en peren laud. Erein sounpahr epwiki samwa, kapokon pwukat kin sewese kekeirada me wiawi nan sapwellimen Siohwa pwihn sansal. Sang ni tepio, sapwellimen Siohwa aramas akan me malaulau, ahpw mwuri, kitail kilang me Siohwa kapaiada atail doadoahk en kalohk me wiawi wasa koaros nan sampah. Nan tepin kapokon me wiawi nan ahnsou ker­en­do kan: nan Chicago, Illinois, nan 1893, irail me 70 sang meh 360 me iang towehda kapokono me papidaisla pwehn kasalehda me re inou­kihongehr Siohwa arail mour. Nan pahr me ahpwtehn nek, nan Kapokon en District me oaralap koasoia “Aramas akan me Kin Kapwaiada Mahsen en Koht” me wiawi wasa koaros nan sampah​—⁠aramas 9,454,055 iang towehda oh irail meh 129,367 papidaisla. Met kin wia kahrepe mwahu en peren!

² Sangete ahnsoun Paipel ntingdi, ahnsou me sapwellimen Siohwa aramas akan kin kohpene ong kapokon kan, ahnsou pwukat kin wia ahnsou mwahu kan en kihda kaweid kesempwal sang Siohwa. Ni mwehin Esra oh Nehmaia, aramas akan kin rongorong wadawad en Ko­so­nnedo “sang ni menseng lel nin souwas.” (Neh. 8:​2, 3) Pwehki arail kalaudehla arail wehwehkihla Kosonnedo ahnsowo, sapwellimen Siohwa aramas akan ahneki “peren kowahlap.” (Neh. 8:​8, 12) Kitail pil kak perenki kapokon kan pwehki ahnsou pwukat kin wia ahnsou mwahu en ale kaweid mwahu oh mwengehn ngehn “ni ahnsou konehng” sang Siohwa ni E kin doadoahngki “ladu lelepek oh loalokong.” (Madiu 24:45) Pweh­ki Sises mahsanih me aramas akan pahn mourki “mahsen koaros me kin pwilipwilsang nan doauesen Koht,” iang towehda kapokon kan kin wia mehkot kesempwal ong atail pali ngehn.​—Madiu 4:4.

³ Mendahki E Kin Wia Doadoahk Laud, E Kesempwal Kitail en Iang Towehda: Emen emen kitail kak wiahda pein atail mehn akadei en iang towehda rahn koaros en Kapokon en District en pahr wet me oar­a­lap koasoia: “Sounpadahk kan en Mahsen en Koht.” E pahn mwahu ma kitail pahn koasoanehdi atail koasoandi kan pwehn lel wasahn ka­po­kon mwadang oh mihmi mwo lao lel brother me wia kaimwiseklahn kapa­kap pahn nda “Amen.” Pwehn wia met, kitail anahne koasoanehdi atail koasoandi. Ekei pak, e pahn apwal ahnsou me kitail pahn pekihda en kommoal sang doadoahk rahn kan me kapokon pahn wiawi. Kitail anahne kasalehda me kitail uhdahn pahn iang kapokon oh kitail pahn koa­soan­ehdi pwe kitail sohte pahn mweidong soahng tikitik en kauwehla atail iang towehda kapokono. Ma kitail anahne wasahn pweidi de mehn peidaid de kitail anahne koaros, kitail en mwadang koasoaneh­di soahng pwukat. Mendahki atail koasoanehdi soahng pwukat koaros kin wia doadoahk laud ong kitail, kitail en koasoanehdi soahng pwukat pwe kitail pahn paiekihda laud kapokon wet!

⁴ Sapwellimen Siohwa aramas akan sohte kin nda me kapokon kin pweida ma aramas pahn kihda mwohni laud ong sawas. Tehk duwen ekei karasepe kan en irail me nannanti pwehn iang towehda Kapokon en International me oaralap koasoia “Kupwuren Koht” me wiawi nan pahr 1958 nan New York City. Emen brother me ahneki pein ah pisnis en wia ihmw padahkiong nah tohndoadoahk kan me re pahn kommoal wihk riau pwe e kak kohla sewese irail en kaunopada ong kapokon oh pil iang towehda kapokon. Emen brother me kin mihmi nan deke me adaneki “Virgin Islands” netikihla eiker limau en sapwe pwe eh peneinei pwon​—⁠irail me wenemen​—⁠en kak iang towehda kapokono. Ehu pwopwoud pwulo­pwul netikihla wararail pwoht pwe ira koaros iangahki neira seri kan​—⁠seri kan: irail meh silimen, me keieu tikitik: sounpwong riau oh me keieu laud: sounpahr isuh​—⁠pwe irail koaros en kak iang towehda kapokono. En pwutak silimen me uhdahn pirien me kohsang California​—⁠arail kaun en doadoahk padahkiong irail me: ma re pahn kommoal sang arail doa­doahk pwehn iang towehda kapokon, ahnsou me re pahn pwurodo sang kapokon, re sohla pahn kak doadoahk. Ahpw, met sohte kamasepwehkih irail pwe re iang kapokon oh re inenen perenki arail iang towehda oh met re soh­te kak manokehla kapokono.

⁵ Siohwa Kin Kapaiada Atail Doadoahk Laud en Iang Towehda Kapokon kan: Siohwa kin mwahngih ia uwen doadoahk laud en sa­pwe­lli­me aramas ong iang towehda kapokon kan oh E kin kapaiada irail. (Ipru 6:​10) Karasepe ehu, nan Kapokon me oaralap koasoia: “Theo­cracy’s Increase” (“Kekeirada Wiawi Pahnangin Kaundahn Siohwa Koht”) me wiawi nan 1950, irail me iang towehda rong padahk me inenen kesempwal me oaralap koasoia “New Systems of Things” (“Koa­soandi Kapw”). Brother Frederick Franz kamwekid irail soun­rongo­rong kan ahnsou me e wia peidek wet: “Ke soh pahn perenki rong ni sou­tik wet, me nanpwungatail mie irail me pahn wia soupeidi kan nan sampah kapwo?” Met, sounpahr 50 mwurin kapokon, kitail kak peren pwe met kitail wehwehki duwen wehwehn Melkahka 45:16.

⁶ Mwurin arail iang towehda Kapokon en District pahr me ahpw­tehn nek, emen tapwin peneinei, me kin kalahnganki kapokon kan, nting­ihdi: “Brother kan, ke sehse me kapokon wet doarehla aht mour. Ahi peneinei kosoula nan kahnimw ehu pwehki doadoahk en mwohni me mwahu wasao, ahpw aht pali ngehn tepida luwetla. . . . Mwurin aht kosoula, se solahr kin wia soahng kan me kin kakehlaila aht pali ngehn. Se solahr kin iang towehda mihding kan oh se pil solahr douluhl iang kalohk. . . . Kapokon wet kakehlailih kiht, oh met se pwurehng wiahda aht mehn akadei en pali ngehn oh koasoanehdi aht koasoandi kan pwehn lel mehn akadei pwukat.”

⁷ Siohwa kin ketikihong kitail mwengehn ngehn me kitail uh­dahn anahne. E kin kaunopada ong kitail diren mwengehn ngehn nan kapokon kan. Atail kalahnganki koasoandi en kapokon kan pahn ka­mwe­kid kitail en nda dahme Kornilius nda ahnsou me e mwemweitala rehn wahnpoaron Piter: “Kiht koaros patohier mwohn silangin Koht awi­awih se en rong mehkan me Kauno [“Siohwa,” New World Translation] ketin mahsanihong komwi en padahkiong kiht.” (Wiewia 10:33) Kitail en wiahda atail mehn akadei en “patohier mwohn silangin Koht” ni atail pahn iang towehda rahn koaros en Kapokon en District en pahr wet me oaralap koasoia: “Sounpadahk kan en Mahsen en Koht” oh kitail pahn ahneki peren!