Ke Kin Kalahnganki Soahng Ngehnin kan?

¹ Ma emen pahn idek rehmw ma ke kin kalahnganki soahng ngehnin kan, ke pahn mwadang sapeng “ei!” Kisehn sapwellimen Koht kisakis kan me kitail kin kalahnganki iei diren mwengehn ngehn me kitail kin ale sang ladu lelepek oh loalokong. Met pahn sansalda nan Kapokon en District “Irail me Kin Kapwaiada Mahsen en Koht” me pahn wiawi pahret. Nan kapokon wet, kitail pahn perenki sukuhliki ire kesempwal kan oh werekiong aramas mwahu kan oh soahng pwukat koaros kitail kin uhdahn anahne. Iaduwen kitail kak kasalehda me kitail kin kalahnganki kapai pwukat?

² Nehmaia kaweidki irail me doadoahk laud pwehn onehda sapahl kehlen Serusalem en dehr ‘sohpeisang anahn akan en tehnpesen Koht.’ (Neh. 10:39) Rahnwet, “Tehnpas” en Siohwa kin wehwehki sapwellimen Siohwa koasoandi en kaudok. Atail Kapokon en District kan kin wia kisehn koasoandio. Kitail sohte pahn sohpeisang koasoandi wet ma kitail pahn iang towehda rahn en kapokon koaros oh rong kanahieng prokramo oh met pahn kasalehiong Siohwa me kitail kin kalahnganki sapwellime kisakis kan. (Ipru 10:24, 25) Dahme kitail anahne koasoanehdi ahnsou wet ma kitail men kasalehda me kitail kalahnganki kapokon wet?

³ Iang Towehda Rahn Koaros en Kapokono: Emen emen kitail anahne koasoanehdi atail koasoandi kan pwehn iang towehda rahn koaros en kapokono. Ke pahn mwadang lel wasahn kapokon oh rong audepen prokram pwon lao kaimwisekihla kapakap Rahn Sarawi? Ma iei, ke pahn ale kapai tohto. Ekei pak, iang towehda kapokon sohte pahn mengei. Mwein ke pahn anahne kawikila ahmw koasoandi en doadoahk en mwohni pwehn iang towehda kapokono oh met sohte pahn mengei. Mehn peidaid mwein sohte pahn mengei en koasoanehdi. Ahpw, ke dehr mweidohng soahng pwukat en kerempwa ahmw nantihong koasoanehdi ahmw koasoandi kan pwehn iang towehda kapokono. Ma ke anahne kawikila ahmw koasoandi kan, mweidohng Siohwa en kaweidkin uhk pwe kitail wehwehki me e pahn kapaiada ahmw nantihong iang rahn koaros en kapokono.

⁴ Likou oh Kapwat Konehng ni Kapokono: Sohte lipilipil iawasa kitail mi ie, atail tiahk, likou oh kapwat kin kasansalehda duwen ihs kitail oh mehnia Koht me kitail kin kaudokiong. Mehpwukat kin sansal nan kapokon laud kan pwehki aramas tohto kin kilang kitail. Ni ahnsou me kitail kin wia mehn kahlemeng mwahu kan, aramas kin kapinga mwaren Siohwa. (1 Pit. 2:​12) Ahpw, ma ekei kin tiahk suwed de wia soahng kan me sohte konehng, e kin kakete kauwehla mwaren Koht oh sapwellime aramas akan. (Ekl. 9:​18b) Ma kitail pahn tamataman me aramas kin kak kilang atail tiahk oh uhd kapinga de kauwehla mwaren Koht, kitail men tamataman me ‘mehkoaros me [kitail] kin wia . . . [kitail] wia ong ni kalinganpen Koht.’​—1 Kor. 10:31.

⁵ Likou oh kapwat me konehng ong Kristian kan pahn sansal ahnsoun kapokon wiawi oh pil mwurin rahn en kapokon nek ehu ehu rahn. Brother oh sister kan anahne liksang doadoahngki likou de kapwat kan me sohte konehng ong Kristian kan de soahng kan me kin kasalehda ngehn en sampah pwehki aramas teikan pahn anahne kilang me kitail weksang sampah. Sister kan anahne kanahieng me arail likou sohte pahn mwotomwot de sidail en arail likou sohte duwehte sidail en sampah oh likou kan koaros me re pahn doadoahngki anahne en konehng ong Kristian kan. (1 Tim. 2:​9, 10) Sohte lipilipil iawasa kitail mihmi ie: ni wasahn kapokon, de wasahn mwenge, de nan sidohwa, kitail anahne tamataman me kitail kin papah Koht, oh kitail sohte men kihong aramas akan kahrepe pwe ren kak kahdsuwedih mwaren Koht de sapwellime aramas akan.​—2 Kor. 6:3.

⁶ Pahn mie ahnsoun papidais ni kapokono, oh Watchtower (lokaiahn wai) en April 1, 1995, pali 30, kin kasalehda duwen irair en ahnsowo. E koasoia me kitail “anahne tamataman me ahnsoun papidais kin wia ahnsou kesempwal ehu. Kitail sohte pahn sengiseng ngihl laud de weriwer ngihl laud de kouruhr ngihl laud oh kitail sohte pahn lemeleme me met ahnsoun kamadipw laud. Ahpw, ni mehlel, e sohte wehwehki me met ahnsoun nsensuwed.” E pil sohte pahn konehng irail me papidais, ohl de lih, en doadoahngki likou menipinip de soangen likou me kin kasalehda paliwar. Koaros me kin iang towehda papidais, iangahki irail me papidais, anahne kasalehda kesempwalpen papidais oh pil me re perenki kilang irail me papidais.

⁷ Piter kin katamankin kitail duwen ‘soangen mour dah me konehng [kitail] en weweidki.’ (2 Pit. 3:11) Kitail koapworopworki me atail lokaia mwahu oh tiahk mwahu nan kapokono pahn kak sewese irail me mohngiong mehlel en men ese oh kaudokiong atail Koht me kin warohng wahu oh lingan koaros.​—⁠1 Kor. 14:​24, 25.

⁸ Paiekihda Kapai kan: Kitail kin ngoangkihte Mahsen en Koht, pwe kitail wehwehki me kitail anahne wehwehki oh kapwaiada Mahsen en Koht ma kitail men kekeirada ni pali ngehn oh ale komourpatail. (1 Pit. 2:2) Atail iang towehda Kapokon en District oh rong kanahieng prokramo pahn sewese emen emen kitail en kalaudehla atail pwoson Mahsen en Koht oh pil sewese kitail en powehdi kasongosong kan sang Sehdan. Ni atail pahn wia met, kitail pahn kasalehong Siohwa oh aramas koaros me kitail kalahnganki soahng ngehnin kan oh “kaidehk kitail kisehn irail kan me kin kesehla ar pwoson . . . pwe mie atail pwoson oh kitail aleier komourpatail.”​—Ipru 10:39; 12:16; Lepin Padahk 27:11.

⁹ Kitail kin kasikasik me Siohwa Koht pahn ritingadahng kitail dipwisou kesempwal en nanleng oh kamwerehdiong kitail soangen kamwahu en ngehn kan ni uwe ieu me laud. (Mal. 3:​10) Nantihong iang towehda Kapokon en District “Irail me Kin Kapwaiada Mahsen en Koht” sang ni tepin prokram lao lel kapakap en kaimwiseklahn prokram! Ke pahn perenki me ke iang towehda!