Mwengehn Ngehn Ni Ahnsou me Konehng
1. Iaduwen kokohp en Esekiel 36:29 kin wie pweipweida rahnwet?
1 Siohwa Koht, Wasa Lapalahpie mahsanih: “I pahn koasoanehdi pwe wahn pilawa kan en ngederla, pwe lehk lapalap en dehr pwurehng lelohng kumwail.” (Esekiel 36:29) Mahsen en kokohp wet wie pweipweida rehn sapwellimen Koht aramas akan rahnwet. Ni lokaiahn karasaras, Siohwa kin kahrehong wahn pilawa kan, me karasaraski ketihnain en mour, en ngederla ong sapwellime aramas akan. Mwengehn ngehn me kin kohda ni atail kapokon kan kin kasalehda me mwengehn ngehn kin kohda ni ahnsou me konehng.
2. Iaduwen Siohwa kin doadoahngki Kapokon en District kan pwehn kihseli mwengehn ngehn ni ahnsou me konehng?
2 Ni kapokon me wiawi nan Columbus, Ohio, nan 1931, Siohwa ketin padahkiong sapwellime tohnkaudok kan en alehdi ahd kapw—Sounkadehdehn Siohwa kan. (Aiseia 43:10-12) Nan pahr 1935, re kasalehda ni sansal duwen ihs me kisehn “pokon kalaimwun” me Kaudiahl 7:9-17 kin koasoia. Nan pahr 1942, Brother Knorr wia kapahrek me oaralap koasoia “Meleilei—E Pahn Wiawihte?” (“Peace—Can It Last?”) Kapahrek wet kamwekid meh tohto en kalohk wasa koaros nan sampah oh pil brother kan wiahda Watchtower Bible School of Gilead me iei sukuhl en misineri kan. Mehlel, ekei kapokon kan me kitail kin tamatamante, ahpw mehlel kapokon koaros kin kihong kitail mwengehn ngehn ni ahnsou me konehng.—Melkahka 23:5; Madiu 24:45.
3. Dahme kitail anahne wia pwehn paiekihda mwengehn ngehn me kin kohda nan Kapokon en District?
3 Ke Kin Mwenge Lao Ke Med? E kin kak wiawi me emen pahn mihmi wasa ieu me mwenge me kapilpene ih oh e kakete men mwengedahr ma e sohte pahn mwenge. (Lepin Padahk 26:15) Met kakete pil wiawi ni pali ngehn. Se kin kilang me ekei me kin iang towehda kapokon kan kin aluseli mwahl oh koasoakoasoiong meteikan ni ahnsou me padahk kan wiwiawi. Mehlel me e kesempwal en koasoiong meteikan oh kangoange irail, ahpw ahnsou konehng en wia met iei mwohn oh mwurin padahk kan. (Ekl. 3:1, 7) Ma kitail sohte mihmi nan deuetail oh rong kanahieng, kitail kakete sohte koledi ire kesempwal kan. Mehlel, ekei pak irail brother kan me apwalih pali kan nan kapokon kin anahne koasoiapene ire kan me pid duwen kapokon ni ahnsou me padahk kan wiwiawihte. Ahpw, ma irail sohte anahne koasoakoasoipene ni ahnsou me padahk kan wiwiawi, e pahn mwahu ma irail pahn kasalehda mehn kahlemeng mwahu ong meteikan ni arail pahn rong kanahieng padahk kan. Sohte emen rehtail konehng en katiasang mwengehn ngehn me kesempwal ong kitail koaros.—1 Kor. 10:12; Pilipai 2:12.
4. Iaduwen kitail kak kasalehda me kitail kin kalahnganki mwengehn ngehn me Siohwa kin ketikihda?
4 Kitail kin inenen perenki padahk mehlel kan me Siohwa kin ketikihda, oh padahk pwukat kin weksang padahk likamw kan me Kristendom kin padahkih! (Aiseia 65:13, 14) Ehu ahl me kitail kin ‘kasalehda atail kalahngan’ iei ni atail en kilangwong kapokon kan nin duwen ahnsou ehu me Siohwa kak kasukuhlih kitail. (Kolose 3:15) Ken dehr medemedewe duwen brothero me wia padahk, ahpw ken tamatamante me padahko kohsang atail “Sounpadahk Lapalap.” (Aiseia 30:20, 21; 54:13) Menlau rong kanahieng. Ntingihdi ire kesempwal kan me ke sukuhliki. Ni soutik kan, kousapahlih ire kan me ke sukuhliki rahno. Doadoahngki nan ahmw mour dahme ke sukuhliki.
5. Soangen kahrepe dah kan me kitail ahneki en peren me kin kohsang Kapokon en District kan?
5 Kapokon koaros me kin wiawi mwohn Armakedon, sohte lipilipil ma e kin wiawi nan wasa kan me aramas me lipadahsang nan pein sapwarail, de nan sahpw ieu me mahwen wiwiawi, de nan wasa kan me meleilei mie, kapokon pwukat koaros kin wia “kana kei” nan atail “mahwen” ong Sehdan! Nin duwen pirien me kin miniminpene, kitail kin kesempwaliki atail ahnsou kan en pokonpene nan kapokon kan. (Esekiel 36:38) Kitail kak likih me Siohwa pahn ketikihong kitail “mwengehn ngehn ni ahnsou me konehng.”—Luk 12:42.
[Kaokon nan Pali 3]
Kasalehda Ahmw Kalahnganki Sapwellimen Siohwa Tehpel
◼ Rong kanahieng
◼ Ntingihdi ire kesempwal kan
◼ Kousapahlih ire kesempwal kan ni soutik koaros
◼ Doadoahngki nan ahmw mour dahme ke sukuhliki