PEIDEK KAN EN PAIPEL PASAPENGLA

Dahme kahrehda e apwal en diar popohl nin sampah?

Paipel kasalehda kahrepe riau. Keieu, mendahki aramas wiahdahr soahng mwahu tohto, re sohte kepikipikihda koahiek en pein kaweid irail. Keriau, koasoandi kan en aramas sohte kak pweida pwehki “sampah unsek mi pahn manaman en Me Suwedo,” Sehdan me Tepil. Eri, ahn aramas nannanti en wahdo popohl nin sampah sohte kak pweida.​—Wadek Seremaia 10:23; 1 Sohn 5:19.

Roporop oh men siksang meteikan pil kahrehiong eh apwal en diar popohl nan sampah. Ihte koperment en sampah ehu me kak padahkihong aramas akan en poakohng dahme pwung oh nsenohki emenemen iei me pahn wahdo popohl nin sampah.​—Wadek Aiseia 32:17; 48:18, 22.

Ihs me pahn wahdo popohl nin sampah?

Koht Wasa Lapalahpie ketin inoukihda en wiahda koperment ehu pwehn kaunda tohnsampah. Koperment wet pahn wiliandi koperment kan en aramas. (Daniel 2:44) Sapwellimen Koht Ohl, Sises, pahn ketin kaunda nin duwen Nanmwarki en Popohl. E pahn ketin kasohrehla soahng suwed koaros nan sampah oh pahn ketin padahkihong aramas akan elen popohl.​—Wadek Aiseia 9:6, 7; 11:4, 9.

Met, pahn sapwellimen Sises kaweid, aramas rar kei nan sampah pwon kin doadoahngki Mahsen en Koht, Paipel, pwehn padahkihong aramas akan duwen ar pahn ahneki popohl rehn meteikan. Ahnsou keren, popohl nin sampah pahn uhdahn pweida.​—Wadek Aiseia 2:3, 4; 54:13.