Ke Kak Likih Pelien Lamalam me Pid Mahwen?

Alberto iang sounpei kereniong sounpar 10. E kin tamanda: “At kaun en sarawio nan at wasahn sounpei kin kapakapkin kiht oh nda, ‘Koht en ieiang kumwail.’ Ahpw I kin medewe, ‘I pahn kohla kemehla aramas, ahpw Paipel mahsanih, “Kumwail sohte pahn kemehla aramas.”’”

Ray iang sounpei en nansed erein Mahwen Keriau en Sampah. Ehu pak e idek rehn kaun en sarawi en eh wasahn sounpeio: “Ke douda pohn sohp wet en kapakapki sounpei kan oh pwe kitail en kana. Ia duwe, atail imwintihtio sou pil ahneki soangen koasoandi wette?” Kaunen sarawio sapengki me sohte me kak wehwehki kupwuren Kauno.

Ma ke sohte itarki pasapeng me kaunen sarawio kihda, eri kaidehn kowe kelehpw me ahneki madamadau wet.

DAHME PAIPEL PADAHNGKI?

Sises mahsanih me ehu rehn sapwellimen Koht kosonned kan me inenen kesempwal iei en “poakohng mehn mpomw duwen omw kin poakohng pein uhk.” (Mark 12:31) Ia duwe, Sises ketin irehdi atail poakohng mehn mpatail kan en poahsoankihda wasa re kousoan ie de wehi re kohsang ie? Soh. E ketin padahkihong sapwellime tohnpadahk kan: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Arail limpoakpene pahn uhdahn sikla mehlel me kahrehda e pahn wia kilelparail. Re pahn kin men tounmeteikihla arail mour ong emenemen, a kaidehn kemehla emenemen.

Tepin Kristian kan kin mour pahrekiong mahsen en Sises. Ehu dikseneri en pelien lamalam kasalehda: “Pahpa en mwomwohdiso kan mahs me iangahki Tertullian oh Origen, kadehdehda me Kristian kan kin kaleke irail sang kemehla aramas, kaweid ehu me irehdi arail pahn iang sounpei en Rom.”​—The Encyclopedia of Religion

DAHME SOUNKADEHDEHN SIOHWA KAN KIN WIA?

Pwehki Sounkadehdehn Siohwa kan ar kousoan kereniong nan wehi koaros, mie ekei nanpwungarail me kousoan nan wehi kan me kin uhpene. Ahpw re kin nantihong kolokol limpoak me wia kilelparail.

Karasepe, erein pahr 1994me kamalahn keinek kan wiawi nanpwungen mehn Hutu oh Tutsi nan Rwanda, Sounkadehdehn Siohwa kan kin kolokol arail soupoupali. Sounkadehde kan nan ehu keinek kin ekihla nan imwarail Sounkadehde teikan sang ehu keinek, mehnda ma arail mour kalapw mihla nan keper. Ni polis (Interahamwe) en mehn Hutu kan arail parokedi Sounkadehde riemen mehn Hutu pwehki ara ekihla riara Kristian mehn Tutsi kei, re ndaiong ira: “Kumwa anahne kamakamla pwehki kumwa kapitala mehn Tutsi.” E kansensuwed pwe Sounkadehde mehn Hutu riemen pwukat kamakamla.​—Sohn 15:13.

Ia omw madamadau: Ahn Sounkadehdehn Siohwa kan arail wiewia kan kin pahrekiong mahsen en Sises duwen tounmeteikihla mour pwehki limpoak?