Ke Kin Kalahnganki Dahme Ke Alehdier?

1. Dahme me tohto kin medewehiong dahme re ahneki?

MIE pak ke rong aramas nda, “Ke sohte kin kalahnganki dahme ke ahneki lao e sohla mie”? Mwein ke pil ahneki soangen pepehmohte. Karasepe, aramas emen me tikida nan peneinei kepwehpwe ehu ele sohte kin kalahnganki dahme e ahneki. Pwehki me pwulopwul men soakoahiek, ele e sohte kin wehwehki dahme uhdahn kesempwal nan eh mour.

2, 3. (a) Soangen madamadau dah me Kristian pwulopwul kan anahne soikala? (b) Dahme kak sewese kitail en kalahnganki dahme kitail ahneki?

² Ma ke pwulopwul, dahme ke kin kesempwalki? Me pwulopwul kan rahnpwukat kin kalapw kesempwalki kepwe kan laudsang arail nanpwungmwahu rehn meteikan. Mwein irail kin men ahneki doadoahk mwahu, ihmw kaselel, de dipwisou kan me keieu kapw. Ma arail mour kin pidadahte soahng pwukat, irail kin katihasang dahme keieu kesempwal, me iei arail nanpwungmwahu rehn Koht. Ma ke tikida rehn pahpa nohno Kristian men, ke ahnekier kisakis kesempwal ehu. (Mad. 5:3) Omw sohte kalahnganki sohso kesempwal wet kak imwila suwed ong uhk erein omw mour.

³ Met sohte anahne wiawihong uhk. Kitail pahn tehk ekei mehn kahlemeng kan sang nan Paipel me pahn sewese iuk en kalahnganki omw sohso. Mehn kahlemeng pwukat pahn sewese kaidehn me pwulopwul kante ahpw e pahn sewese kitail koaros en uhdahn kesempwalki dahme Siohwa ketikihongehr kitail.

EKEI ME SOHTE KASALEHDA KALAHNGAN

4. Dahme 1 Samuel 8:1-5 kasalehda duwen nein Samuel pwutak ko?

⁴ Mie ekei nan Paipel me alehdi sohso kesempwal ehu ahpw sohte kesempwalki. Soukohp Samuel tepida papah Siohwa sangete ahnsou me e tikitik oh kin ahnsou koaros lelepek ong Ih. (1 Sam. 12:1-5) Samuel wia mehn kahlemeng mwahu, ahpw nah pwutak ko, Soel oh Apaisa, sohte kin alasang ih. Ira wiahla aramas mwersuwed kei.​—Wadek 1 Samuel 8:1-5.

5, 6. Dahme wiawihong nein Sosaia pwutak ko oh Sehoiakin?

⁵ Met pil duwehte nein Nanmwarki Sosaia pwutak ko. Sosaia wia nanmwarki lelepek men me kin poakohng Siohwa oh kaudokiong. Ahnsou me pwuhken sapwellimen Koht Kosonnedo dierekda oh wadawad ong Sosaia, e kapwaiada sapwellimen Siohwa kaweid kan. E kihsang nan sahpwo tiahk en pwongih dikedik oh wunahni, oh e kangoange aramas akan ren peikiong Siohwa. (2 Nan. 22:8; 23:2, 3, 12-15, 24, 25) Nah pwutak ko alehdi sohso kesempwal ehu. Ahpw ahnsou me nein Sosaia pwutak silimeno oh emen nein nah ko pwutak mwuhr wiahla nanmwarki, sohte emen rehrail kalahnganki sohso me re alehdi.

⁶ Ni ahnsou me nein Sosaia pwutak Soahas wiahla nanmwarki, e “wiahda dihp ong KAUN-O.” E wia nanmwarki erein sounpwong siluhte ni ahnsou me nanmwarki en Isip men salihdi ih nan imweteng. Mwuhr, e mehla ni eh senselte wasa me dohsang sapweo. (2 Nan. 23:31-34) Mwuri, rie pwutako Sehoiakim wiahla nanmwarki erein sounpar 11. E pil sohte kalahnganki dahme e sohsohki sang eh pahpao. E uhdahn sakanakan kahrehda Seremaia nda me “eh seridi pahn duwehte seridi en ahs emen.” (Ser. 22:17-19) Nein Sosaia pwutak Sedekaia oh nein emen nah ko pwutak, Sehoiakin, pil sakanakan oh sohte idawehn mehn kahlemeng en Sosaia me lelepek.​—2 Nan. 24:8, 9, 18, 19.

7, 8. (a) Ia duwen Solomon eh kesehla eh sohso? (b) Dahme kitail kak sukuhlkihsang mehn kahlemeng en irail kan nan Paipel me kesehla arail sohso?

⁷ Nanmwarki Solomon sukuhlkihsang eh pahpao, Depit, ia duwen eh pahn papah Siohwa, ahpw mwuhr e sohla kalahnganki sohso wet. “Ni ahnsou me e likeilapalahr re [eh pwoud ko] kahrehiong en pwongih koht en liki kan. E sohte loalopwoatohng KAUN-O eh Koht, duwehte seme Depit.” (1 Nan. 11:4) Pwehki met, Solomon sohla keniken rehn Siohwa.

⁸ Ohl pwukat koaros ahneki ahnsou mwahu en esehla Siohwa oh wia dahme pwung. Ahpw, re kesehla arail ahnsou mwahu ko. Kaidehn me pwulopwul koaros kin kesehla arail sohso. Met kitail pahn kilang ekei mehn kahlemeng mwahu en me pwulopwul kan me ke kak alasang.

EKEI ME KALAHNGANKI DAHME RE ALEHDI

9. Ia duwen nein Noha pwutak ko ar wiahda mehn kahlemeng mwahu? (Menlau kilang tepin kilel.)

⁹ Nein Noha pwutak ko wiahda mehn kahlemeng mwahu. Re ahneki pai kaselel en sewese Noha kauwada warihmwo pwehn doarehla aramas akan. Irail ese me re anahne peikiong Siohwa oh re pedolong nan warihmwo mwohn Nohliko tepida. (Sen. 7:1, 7) Ia imwilahn met? Senesis 7:3 mahsanih me re sehrehlong mahn akan nan warihmwo “pwe re en kak pwurehng kaparaparala nin sampah.” Aramas akan pil iang pitila. Pwehki nein Noha pwutak ko kalahnganki arail sohso, re ahneki pai kaselel en sewese doarehla aramas akan oh pwurehng tapiada kaudok mehlel nin sampah.​—Sen. 8:20; 9:18, 19.

10. Ia duwen ohl pwulopwul en Ipru pahmeno ar kasalehda arail kalahnganki arail sohso?

¹⁰ Sounpar tohto mwuri, ohl pwulopwul en Ipru pahmen kasalehda me re sohte men wia kisehn tiahk kan en mehn Papilon. Ananaia, Misael, Asaraia, oh Daniel selidi oh wisiklahng Papilon nan pahr 617 mwohn Krais. Re masamwahu oh loalokong oh re uhdahn kak pweida nan Papilon. Ahpw re sohte manokehla ihs irail oh dahme re sukuhlkihdi. Pwehki met, Siohwa ketin kapaiairailda uhdahn laud.​—Wadek Daniel 1:8, 11-15, 20.

11. Ia duwen meteikan ar paiekihda sapwellimen Sises sohso?

¹¹ Sises ketin wia mehn kahlemeng me keieu mwahu duwen emen me kalahnganki eh sohso. Sises uhdahn poakohng dahme Semeo ketin padahkihong ih. Met sansal ni eh ketin mahsanih: “Ihte me I kin koasoia: mehkan me Sahmo ketin padahkihongieier.” (Sohn 8:28) E ketin kupwurperenki ehukihong meteikan dahme e ketin sukuhlkihdi pwe ren pil kak paiekihda. E mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:18, 43) Sampah wet sohte kin kesempwalki padahk mehlel sang rehn Koht, ihme kahrehda Sises ketin kalekehki sapwellime tohnpadahk ko ren dehr wia “kisehn sampah.”​—Sohn 15:19.

KALAHNGANKI DAHME KE ALEHDIER

12. (a) Ia duwen 2 Timoty 3:14-17 eh kin dokedoke me pwulopwul tohto rahnwet? (b) Dahme Kristian pwulopwul kan anahne pein idek rehrail?

¹² Ma omw pahpa oh nohno kin poakohng Siohwa, ke ahneki sohso kaselel ehu. Dahme Paipel mahsanihki duwen Timoty ele pil kin dokedoke iuk. (Wadek 2 Timoty 3:14-17.) Omw pahpa nohno padahkihongehr uhk duwen Siohwa oh ia duwen omw kak kaperenda ih. Mwein re padahkihong uhk sangete omw pwelel. Met uhdahn sewese iuk en ahneki “erpit me kak kahluweiukalahng nan mour soutuk sang ni omw pwoson Krais Sises” oh uhdahn “koahiekla” ni omw papah Koht. Ahpw ia duwe, ke uhdahn kalahnganki dahme ke ahneki? Pein idek rehmw: ‘Ia ei pepehm duwen sounkadehde lelepek tohto me mour mwohi? I perenki ei wia emen Sounkadehdehn Siohwa kan? Ia ei pepehm en iang wia emen rehn me malaulau kan me Koht ketin kahdaneki kompoakepah? I kin pohnese soangen pai kaselel tohrohr wet me I ahneki?’

13, 14. Kasongosong dah kan me ekei me tikida nan padahk mehlel kakete lelohng, ahpw dahme kahrehda e pweipwei en wia met? Menlau kihda ehu karasaras.

¹³ Ekei me pwulopwul me tikida rehn pahpa nohno Kristian kan ele sohte pohnese ia uwen kaselel en padahk mehlel me kitail ahneki met oh ia uwen suwed en ahn Sehdan sampah. Ekei pil ale kasongosong en kilang ia mwomwen mour en sampah wet. Ahpw ia duwe, ke pahn tangala mwohn sidohsa ieu me wie tangatang ihte pwehn kilang ma ke pahn medekla de mehla? Met wia elen pweipwei! Eri kitail sohte anahne song soahng suwed kan en sampah wet pwehn diarada ia uwen medek me e kak kahrehiong kitail.​—1 Pit. 4:4.

¹⁴ Emen mwahnakapw me adaneki Gener tikida nan padahk mehlel nan Asia. E papidaisla ni eh sounpar 12. Mwurin eh papidaisla, e ale kasongosong en song mour en sampah wet oh kin kasik me e pahn diar saledek. Gener tepida kin likamw ong eh peneineio oh sohte men ndaiong irail dahme e kin wiewia. Ni ahnsou me e sounpar 15, e kin wiewia ekei soahng suwed kan me ienge ko kin wiewia, duwehte niminim sakau oh peined. Gener kin pwand en kohla imweo mwurin eh iang ienge ko damaski oh mwadongki computer game kan me kin kasalehda tiahk lemei. Mwuhr, e wehwehkihda me soahng kan me e wiewia sohte kin kahrehiong ih peren, oh e pehm me mwomwen eh mouro sohte katepe. Met e pwurodo nan padahk mehlel. E nda me mie ahnsou kan me e kin lelohngete kasongosong sang sampah wet, ahpw e kin kesempwalki eh nanpwungmwahu rehn Siohwa laudsang met.

15. Dahme kitail koaros anahne medemedewe, mehnda ma kitail tikida rehn pahpa nohno Kristian kan de soh?

¹⁵ Mehnda ma omw pahpa nohno sohte mi nan padahk mehlel, medewehla duwen pai kaselel me ke ahneki en ese oh pil papah Sounkapikadao! Nanpwungen aramas lik lik kei nin sampah, Siohwa ketin ni kadek padahkihong uhk duwen ih. Uhdahn kapai ehu met! (Sohn 6:44, 45) Mehnda ma kitail sukuhlkihdi padahk mehlel sang atail pahpa nohno kan de soh, kitail kak uhdahn perenki me kitail esehier. (Wadek 1 Korint 2:12, NW.a) Gener nda, “Ihs ngehi pwe Siohwa, me sapwellimanki lahng oh sampah, en ketin mwahngih duwe?” (Mel. 8:4) Emen sister nda: “Tohnsukuhl kan kin uhdahn pohlki ni arail sounpadahko kin pohnese irail. Ia uwen eh wia pai kaselel ehu me atail Sounkaweid Lapalap Siohwa kin ketin mwahngih ihs kitail!”

DAHME KE PAHN WIA?

16. Pilipil loalokong dahieu me Kristian pwulopwul kan ahneki?

¹⁶ Medemedewe duwen omw sohso kesempwalo, oh wiahkihla omw mehn akadei en papah Siohwa. Idawehn mehn kahlemeng en irail me lelepek kan mahso. Dehr duwehte pali laud en me pwulopwul kan en sampah me kauwehla mwahl arail mour oh sohte ahneki koapworopwor ong ahnsou kohkohdo.​—2 Kor. 4:3, 4.

17-19. Dahme kahrehda e wia mehkot loalokong en weksang sampah wet?

¹⁷ Mehlel me kaidehn ahnsou koaros e kin mengei en weksang sampah wet. Ahpw e wia mehkot loalokong en wia met. Medewehla duwen sounmwadong men me pahn mwadong nan Olympic. Pwe en iang mwadong, e anahne weksang ienge kan. E pahn kin soikala soahng tohto me pahn kauwehla eh ahnsou oh nsenoh. E pahn men weksang ienge ko pwe en kak ale kaiahn laud oh lel eh mehn akadeio.

¹⁸ Pali laud en aramas nan sampah sohte kin nohn medewe imwila suwed me arail wiewia kan kak kahrehda, ahpw sapwellimen Siohwa ladu kan kin. Ma kitail weksang sampah wet oh soikala soahng kan duwehte tiahk samin me kak kauwehla atail nanpwungmwahu rehn Siohwa, kitail pahn “lelohng ni mouro me uhdahn mour mehlel.” (1 Tim. 6:19) Sistero me kitail koasoia mwoweo nda: “Ma ke kin uhki dahme ke kamehlele, ke pahn uhdahn nsenamwahu ni imwilahn rahno. E pahn kadehdehda me ke ahneki kehl en pelianda mwekimwekid en ahn Sehdan sampah. Ahpw me keieu kesempwal, e pahn mwomwen me ke kak kilang Siohwa Koht eh ketin kupwurperenkinuhk! Ih ahnsowo me ke kin nsenamwahu pwehki omw weksang sampah wet!”

¹⁹ Dehr kauwehla mwahl omw mour ni omw medemedewehte dahme ke kak ale met. (Ekl. 9:2, 10) Ke wehwehkihier kahrepen omw mour oh me ke ahneki koapworopwor en mour kohkohlahte. Met kin sewese iuk en wiahda pilipil mwahu kan oh soikala “idawehn mouren me rotorot akan.” Omw mour uhdahn mie katepe.—Ep. 4:17; Mal. 3:18.

20, 21. Ma kitail wiahda pilipil mwahu kan, dahme kitail kak ahneki ahnsou kohkohdo? Ahpw dahme Siohwa ketin kupwurki kitail en wia?

²⁰ Ma kitail wiahda pilipil mwahu kan, kitail kak ahneki mour nsenamwahu oh pil mour kohkohlahte nan sapwellimen Koht sampah kapw. Siohwa pahn ketin kapaiahda kitail laudsang atail kak medewe. (Mad. 5:5; 19:29; 25:34) Ahpw kaidehn aramas koaros me e kin ketikihong kapai pwukat. E ketin kupwurki kitail en peikiong ih. (Wadek 1 Sohn 5:3, 4.) Ahpw atail nannanti en papah Siohwa ni lelepek ahnsou wet uhdahn katapan!

²¹ Siohwa ketikihongehr kitail soahng tohtohie. Kitail ahneki loalokong pwung duwen sapwellime Mahsen oh wehwehki mwahu dahme mehlel duwen ih oh kupwure kan. Nin duwen Sounkadehdehn Siohwa kan, kitail ahneki pai kaselel ehu en weuwa mware. Koht ketin inoukihong kitail me e kin ketin ieiang oh pil sewese kitail. (Mel. 118:7) Mehnda ma kitail pwulopwul de mah, kitail koaros en kasalehda me kitail kalahnganki atail sohso oh me kitail men “lingan en kowohng Koht, sang met kohkohlahte.”—Rom 11:33-36; Mel. 33:12.