Dahme Kahrehda Ken Onopki Paipel?

Mie pak ke kin idek peidek pwukat? Ma ei, kaidehn kowe kelehpw me kin wia met. Aramas nin sampah pwon kin medemedewe duwen peidek kesempwal kan nan arail mour. Ke kak diarada pasapengpen peidek pwukat?

Aramas rar rar kei nda, “Ei uhdahn!” Dahme kahrehda? Pwehki re diaradahr nan Paipel pasapeng mwahu kan ong arail peidek kan. Ke men ese dahme Paipel mahsanih? Eri ele ke pahn men paiekihda koasoandi en onop Paipel ni soh isepe me Sounkadehdehn Siohwa kan kin kihda.a

Mehlel, me pid kasawih Paipel, ekei kin nda: “I nohn kedirepw.” “E nohn apwal.” “I perki wiahda inou.” Ahpw meteikan ahneki madamadau me weksang met. Re kin men isaneki ahnsou mwahu en sukuhlki dahme Paipel padahngki. Kitail tehkpene ekeite karasepe kan.

• “I iangehr towehda sarawien Kadolik, Prohs, Sikh, Buddha, oh pil sukuhlki duwen Koht oh pelien lamalam kan ahnsou me I iang sukuhl laud. Ahpw tohtohn ei peidek kan duwen Koht sohte pasapengla. Mwuhr emen Sounkadehdehn Siohwa kalohkdo rehi. I uhdahn pwuriamweikihla pasapeng kan me poahsoankihda Paipel me e kasalehiong ie, I pwungkihda en onopki Paipel reh.”​—Gill, England.

• “Mie ei peidek tohto me pid duwen mour, ahpw kaun en ei pelien lamalamo sohte kak sapengala mwahu ei peidek ko. Ahpw, emen Sounkadehdehn Siohwa doadoahngkihte Paipel pwehn sapengala ei peidek ko. Ahnsou me e idek rehi ma I men kalaudehla ei sukuhlki Paipel, I uhdahn pwungki.”​—Koffi, Benin.

• “I kin men ese duwen irair en me melahr akan. I kamehlele me me melahr akan kak kamedekihala aramas, ahpw I men ese dahme Paipel mahsanih. Eri I tepida onop Paipel rehn emen kompoakepahi me wia emen Sounkadehdehn Siohwa.”​—José, Brazil.

• “I song en wadek Paipel ahpw I sohte kak wehwehki. Ahpw mwuhr Sounkadehdehn Siohwa kan kalohkdo rehi oh ni sansal kawehwehda ekei kokohp en Paipel kan. I men ese dahme I pil kak sukuhlki.”​—Dennize, Mexico.

• “I kin men ese ma Koht uhdahn ketin nsenohkin ie. Eri I pilada en kapakap ong Kohto me kileldi nan Paipel. Rahno mwuri Sounkadehde kan letelet ni ei wenihmwo, oh I pwungkihda en onop Paipel rehrail.”​—Anju, Nepal.

Dahme wiawiong irail pwukat katamankihong kitail duwen dahme Sises mahsanih: “Meid pai me koapworopworki Koht.” (Madiu 5:3) Ei, aramas akan ipwikihdi anahn ehu en men esehla Koht. Koht kelehpw me kak ketin kaitarala anahn wet, oh e kin ketin wia met sang sapwellime Mahsen, Paipel.

Eri, dahme kin pidada nan koasoandi en onop Paipel? Ia duwen omw kak paiekihda? Peidek pwukat pahn pasapengla nan iren onop en mwuhr.