Sapwellimen Koht Manaman Kin Ehuong Irair en Loalatail

1-3. Mwekid dahkei me kahrehda Pendekos wia rahn kesempwal ehu, oh ia duwen mwekid pwukat ar kapwaiada dahme Pwuhk Sarawi kohpadahr? (Menlau kilang tepin kilel.)

RAHNO iei ni menseng en Rahn Sarawi nan Serusalem. Rahno rahn kesempwal oh kaperen ehu. Aramas akan kasarawih rahn en Pendekos, me wia kamadipw sarawi ehu ni ahnsoun tepin dondol en wahn wihd. Samworo lapalapo wiewia meirong kan ni mensengo ni tehnpas sarawio. Mwuhr, mpen kuloak duwau, e wia meirong en lopwon en pilawa riau me doal ihs me wiawihdahsang tepin wahn wihd en ahnsoun rahko. Samworo lapalapo kin koledi lopwon en pilawa ko oh kaudahla peh ko kamwakamwakid sang elep lel elep pwehn patohwanohng Siohwa. Rahno iei Pendekos en pahr 33.​—Lip. 23:15-20.

² Sounpar koaros, erein sounpar epwiki kei, samworo lapalapo kin wia meirong wet. Meirong wet kin karasaraskihong mehkot me uhdahn kesempwal me wiawi nan Pendekos en pahr 33. Oh e wiawihong sapwellimen Sises tohnpadahk 120 me wie kapakap nan pere ehu powe nan Serusalem. (Wiewia 1:13-15) Sounpar 800 mwoweo, soukohp Soel ntingihedi duwen mwekid wet. (Soel 2:28-32; Wiewia 2:16-21) Dahme wiawi me inenen kesempwal?

³ Wadek Wiewia 2:2-4. Ni rahno, Koht ketikihong Kristian ko sapwellime manaman oh re wiahla me keidi kei. (Wiewia 1:8) Mwurin mwo, pokon ehu tepida pokondohng irail, oh tohnpadahk ko tepida koasoia duwen soahng kaselel kan me re ahpwtehn kilang oh rong. Wahnpoaron Piter kawehwehda dahme ahpwtehn wiawi oh dahme kahrehda e uhdahn kesempwal. Ih eri ndaiong pokono: “Emenemen kumwail en koluhla oh wiliakapwala, oh pil papidaisla ni mwaren Sises Krais, pwe dipamwail kan en lapwada; kumwail ahpw pahn ale [“sapwellimen Koht manaman,” NW], iei kalahngan ehu sang rehn Koht.” Mpen aramas 3,000 papidaisla rahno oh pil alehdi sapwellimen Koht manaman.​—Wiewia 2:37, 38, 41.

4. (a) Dahme kahrehda kitail en men ese dahme wiawi ni Pendekos? (b) Mwekid kesempwal dahieu me pil ele wiawi rahno sounpar tohto mwowe? (Menlau kilang ire kan mwuri.)

⁴ Dahme samworo lapalapo oh pil meirong me e kin wia ni rahn en Pendekos koaros kin karasaraskihong? Samworo lapalapo kin karasaraskihong Sises. Lopwon en pilawa ko kin karasaraskihong tohnpadahk en Sises ko me keikihdi sapwellimen Koht manaman. Tohnpadahk ko oh me keidi tohto teikan mwurin irail pilipildahsangehr nanpwungen aramas dipan kan oh adaneki “mesenih en sapwellime kan.” (Seims 1:18) Koht ketin wiahkin irail pwukat nin duwen sapwellime seri kei oh ketin pilirailda pwe ren iang Sises kaunda nin duwen nanmwarki kei en Wehin Koht nanleng. (1 Pit. 2:9) Siohwa pahn ketin doadoahngki sapwellime Wehi pwehn kapaiahda aramas peik koaros. Eri sohte lipilipil ma kitail pahn iang Sises mi nanleng de mi nan paradais nin sampah, Pendekos en pahr 33 uhdahn kesempwal ong kitail.^[1] (Menlau kilang ire kan mwuri.)

DAHME KIN WIAWI NI EMEN EH WIAHLA ME KEIDI MEN?

5. Ia duwen atail ese me kaidehn koaros me keidi kan kin keikihdi sapwellimen Koht manaman ni soangen mwohmw tehieu?

⁵ Tohnpadahk ko nan pereo powe sohte pahn manokehla rahno. Mie mehkot me likamwete mpwulen kisiniei pohn moangen emenemen irail. Siohwa ketikihong irail koahiek en lokaiahki ehu lokaia tohrohr. Irail sohte peikasalki me re keikihdi sapwellimen Koht manaman. (Wiewia 2:6-12) Ahpw soahng kapwuriamwei pwukat sohte kin wiawihong Kristian koaros ni arail wiahla me keidi kei. Karasepe, Paipel sohte mahsanih me mie mehkot likamwete mpwul en kisiniei pohn moangen me kid kid kei nan Serusalem me keikihdi sapwellimen Koht manaman mwurin rahno. Irail wiahla me keidi kei ni ahnsou me re papidaisla. (Wiewia 2:38) Pil ehu, kaidehn Kristian koaros kin keikihdi sapwellimen Koht manaman ni ahnsou me re papidaisla. Mehn Sameria ko wiahla me keidi kei mwurin arail papidaisla. (Wiewia 8:14-17) Oh weksang met, Kornilius oh irail kan me mi ni imweo keikihdi sapwellimen Koht manaman mwohn re papidaisla.​—Wiewia 10:44-48.

6. Dahme me keidi koaros kin alehdi, oh ia duwen met eh kin kamwakid irail?

⁶ E sansal me Kristian kan kin pohnese me re kin keikihdi sapwellimen Koht manaman ni soangsoangen ahl akan. Ekei ele mwadang en pohnese me Siohwa ketin keiehdi irail. Ekei kin esehda met erein ahnsou ehu. Ahpw wahnpoaron Pohl kawehwehda dahme kin wiawihong emenemen irail. E nda: “Kumwail pwosonlahr Krais, oh iangehr kilelkihdi kilel en [“sapwellimen Koht manaman,” NW] me Koht ketin inoukidahr.” Manamano iei “kadehdepen atail pahn sohsohki soahng teikan koaros me Koht ketin inoukihong sapwellime kan.” (Ep. 1:13, 14) Eri Siohwa kin ketin doadoahngki sapwellime manaman en kasalehda ni sansal me iei Kristian pwukat me e ketin pilada en kohdahla nanleng. Ni ahl wet, sapwellimen Koht manaman kin wia “kadehdepen” arail pahn mour kohkohlahte nanleng ni ahnsou kohkohdo a kaidehn nin sampah.​—Wadek 2 Korint 1:21, 22; 5:5.

7. Dahme emenemen Kristian keidi anahne wia pwehn ale ketingpeo nanleng?

⁷ Ia duwe, ni Kristian men eh wiahla me keidi men, met wehwehki me e pahn uhdahn alehdi ketingpeo? Soh. E kamehlele me e aleier luhk en kohdahla nanleng. Ahpw e pahn ale ketingpeo ihte ma e kolokol eh lelepek ong Siohwa. Piter kawehwehda ni ahl wet: “Eri, riei ko, kumwail nantihong laudsang mahs pwe sapwellimen Koht luhk oh pilipil ong kumwail en wiahla momour poatopoat ehu: pwe ma kumwail pahn wia met, kumwail sohte pahn kesehla amwail pwoson. Pwe ih duwen met amwail pahn ahnekihla pwung unsek en pedolong nan wehi soutuk en atail Kaun oh Sounkomour Sises Krais.” (2 Pit. 1:10, 11) Eri emenemen Kristian keidi en dehr mweidohng mehkot en kauhdi ih sang eh papah Siohwa. Mehnda ma e ale luhk en kohdahla nanleng, ma e sohte kolokol eh lelepek, e sohte pahn ale ketingpeo.​—Ipru 3:1; Kaud. 2:10.

IA DUWEN EMEN EH ESE?

8, 9. (a) Dahme kahrehda e apwal ong pali laud en aramas en wehwehki dahme wiawihong emen ni ahnsou me Koht ketin keiehdi? (b) Ia duwen emen eh ese me e ale luhk en kohdahla nanleng?

⁸ Pali laud en sapwellimen Koht ladu kan rahnwet ele kin apwalki en wehwehki dahme kin wiawihong emen ni Koht eh ketin keiehdi. Met sohte kapwuriamwei, pwehki pein irail sohte kin lelohng met. Koht ketin kapikada aramas en mour kohkohlahte nin sampah, kaidehn nanleng. (Sen. 1:28; Mel. 37:29) Ahpw Siohwa ketin pilada ekei pwe ren wia nanmwarki oh samworo nanleng. Eri ni eh ketin keiehdi irail, arail koapworopwor oh mwomwen arail madamadau oh pepehm kin wekila, kahrehda re kin kasikasik en mour nanleng.​—Wadek Episos 1:18.

⁹ Ahpw ia duwen emen eh ese me e ale luhk en kohdahla nanleng? Tehk dahme Pohl ndaiong rie me keidi kan nan Rom, me ‘Koht kin ketin . . . malipe pwe irail en wiahla sapwellime.’ Pohl nda: “Kumwail sohte ale irair en lidu me kahrehiong kumwail en pwurehng masak, ahpw kumwail ale irair en seri pwekipwekda kei, ni irair wet kitail kin likwer nda: ‘Abba, Semei!’ Sapwellimen Koht manaman kin ehuong irair en loalatail oh atail madamadau me kitail sapwellimen Koht seri kei.” (Rom 1:7; 8:15, 16, NW) Koht ketin doadoahngki sapwellime manaman pwehn ketin kasalehiong emen ni sansal me e alehier luhk en iang Sises kaunda nin duwen nanmwarki men nanleng.​—1 Des. 2:12.

10. Ia wehwehn 1 Sohn 2:27 (NW) ni eh mahsanih me Kristian keidi men sohte anahne emen en padahki ih?

¹⁰ Irail kan me ale luhk wet sang rehn Koht sohte anahne emen en padahkihong irail me Koht ketin keiehdi irail. Siohwa ketin kahrehiong irail en uhdahn kamehlele met. Wahnpoaron Sohn ndaiong Kristian keidi kan: “Kumwail keidier sang me sarawio, oh kumwail koaros kin ahneki loalokong.” E pil nda: “Ahpw duwen kumwail, Koht eh ketin keiehdi kumwail en mi loalamwail, oh kumwail sohte anahne emen en padahkihong kumwail, ahpw eh ketin keiehdi kumwail kin padahkihong kumwail soahng koaros oh iei me mehlel oh sohte likamw. Nin duwen eh padahkihong kumwail, kumwail en miniminiong ih.” (1 Sohn 2:20, 27, NW) Kristian keidi kan anahne Siohwa en ketin padahkih irail duwehte eh ketin padahki meteikan koaros. Ahpw re sohte anahne emen en kamehlelehiong irail me re wia me keidi kei. Siohwa ketin doadoahngki manaman me keieu kehlail, me iei sapwellime manaman, pwehn kamehlelehiong irail ni sansal me irail me keidi kei!

RE “IPWSAPAHL”

11, 12. Dahme Kristian keidi men ele kin medewe, ahpw dahme e sohte kin peikasalki?

¹¹ Ni Kristian kan ar keikihdi sapwellimen Koht manaman, re kin uhdahn wekila me kahrehda Sises en mahsanih me re “ipwsapahl.” (Sohn 3:3, 5) Ih eri ketin kawehwehda: “Ke dehr pwuriamweikihla ei ndaiong uhk me kumwail koaros uhdahn pahn ipwsapahl. Kisinieng kin ipila wasa me e anahne, oh ke kin rong ngile, ahpw ke sehse wasa me e ipido sang ie, de wasa me e kin ipilang ie. Eri, iei duwen emenemen me ipwikihdi [“sapwellimen Koht manaman,” NW].” (Sohn 3:7, 8) Eri e sansal me kitail sohte kak uhdahn kawehwehiong emen me sohte iang keidi duwen pepehm en emen me keikihdi sapwellimen Koht manaman.

¹² Emen me keidi ele medewe, ‘Dahme kahrehda Siohwa ketin pilada ie a kaidehn emen tohrohr?’ Mwein e pil medewe ma e warohng pwukoa wet. Ahpw e sohte peikasalki me Siohwa ketin piladahr ih. E inenen peren oh uhdahn kalahnganki kisakis wet. Me keidi kan ahneki pepehmohte me Piter ahneki ni eh nda: “Kitail kapingkalahngan ong Koht, Semen atail Kaun Sises Krais, pwehki sapwellime kalahngan lapalap en mour kapw me e ketikihong kitail ni eh ketin kaiasada Sises Krais sang me melahr akan. Met kadirehkinkitaillahr koapworopwor laud ehu, iei me kitail kasikasingkiher me kitail pahn iang paieki kapai laud me Koht ketin nekinekidohng sapwellime kan. Ei, e ketin nekinekidohng kumwail kapai pwukat nanleng, wasa me re sohte kak ohla, de mwerpeseng, de sohrala ie.” (1 Pit. 1:3, 4) Ni me keidi kan ar wadek lepin lokaia pwukat, re ese oh sohte peikasalki me Samarailo kin ketin mahmahsaniong pein irail.

13. Ia duwen madamadau en emen eh kin wekila ni ahnsou me e keikihdi sapwellimen Koht manaman, oh dahme kin kahrehda wekidekla wet?

¹³ Mwohn Siohwa ketin luke Kristian pwukat en kohdahla nanleng, re ahneki koapworopwor en mour kohkohlahte nin sampah. Re kin kasik ahnsowo me Siohwa pahn ketin kaparadaisihala sampah oh ketikihsang me suwed koaros. Ele re medewehla arail iang kasamwohdo emen arail peneinei de kompoakparail men me mehla. Oh re kasik en mi nan imwarail kan me re kauwada oh kang wahn tuhke kan me re padokedi. (Ais. 65:21-23) Ahpw dahme kahrehda arail madamadau tepida wekila? Ia duwe, re wekila pwehki re ahneki nsensuwed laud de lelohng lokolok laud? Re medewehdahte me e pahn kasangat en mour kohkohlahte nin sampah oh me re sohte pahn peren? De re men ese ia pahn mwomwen mour nanleng? Soh. Ahpw Koht iei me ketin pilada met ong irail. Ni eh ketin luke irail, e ketin doadoahngki sapwellime manaman en wekidala mwomwen arail madamadau oh pil ketingparail kan me re kasik.

14. Ia pepehm en me keidi kan duwen arail mour nin sampah?

¹⁴ Eri ia duwe, met wehwehki me me keidi kan kin men mehla? Pohl kawehwehda arail pepehm. E karasahiong paliwararailo “impwal” ehu oh nda: “Nindokon atail kin mihmi nan impwal en sampah wet, kitail kin weirengkihla atail pwunod, kaidehkin pwehki atail men kesehla paliwaratail mehn sampah wet, ahpw pwehki atail ngoangki alehdi paliwaratail mehn nanleng, pwe mehla en lohdiong pahn mour.” (2 Kor. 5:4) Kristian pwukat sohte men mehla. Re perenki arail mour oh men doadoahngki ehuehu rahn en iang arail peneinei oh kompoakparail kan papah Siohwa. Ahpw sohte lipilipil dahme irail wiewia, re tamataman dahme Koht ketin inoukihong irail ong ahnsou kohkohdo.​—1 Kor. 15:53; 2 Pit. 1:4; 1 Sohn 3:2, 3; Kaud. 20:6.

SIOHWA KETIN LUKE IUK?

15. Dahme sohte kin kadehdehda me emen iang keikihdi sapwellimen Koht manaman?

¹⁵ Ele ke kin medemedewe ma Siohwa ketin luke iuk en iang kohdahla nanleng. Ma ke pehm me e ketin luke iuk, medewehla peidek kesempwal pwukat: Ke pehm me ke kin uhdahn ngoangki kalohk? Ke kin uhdahn perenki onopki Paipel oh sukuhlki “wasa rir kan en kupwur en Koht”? (1 Kor. 2:10) Ke pehm me Siohwa ketikihong uhk kapai kaselel kan nan doadoahk en kalohk? Ke men wia dahme Siohwa kin ketin kupwurki laudsang soahng teikan koaros? Ke ahneki limpoak laud ong meteikan oh pehm me ke uhdahn pwukoahki en sewese irail papah Siohwa? Mie mehn kadehde me ke kilang me Siohwa ketin sewese iuk ni soangen ahl tohto nan omw mour? Ma ke sapeng ei ong peidek pwukat koaros, met wehwehki me ke alehier luhk en kohdahla nanleng? Soh. Dahme kahrehda? Pwehki sapwellimen Koht ladu kan koaros kak ahneki soangen pepehm pwukat, sohte lipilipil ma re wia emen me keidi de soh. Oh ni Siohwa eh ketin doadoahngki sapwellime manaman, e kak ketikihong sapwellime ladu kan koaros soangen manamanohte, sohte lipilipil soangen keting dah me re pahn ahneki. Ni mehlel, ma ke kin medemedewe ma ke pahn uhdahn kohdahla nanleng de soh, met wehwehki me ke sohte alehdi luhk wet. Irail kan me Siohwa ketin pilada sohte kin medemedewe duwen met! Irail eseier!

16. Ia duwen atail ese me kaidehn koaros me kin alehdi sapwellimen Koht manaman iang ale luhk en kohdahla nanleng?

¹⁶ Nan Paipel, mie mehn kahlemeng tohto en me lelepek kan me alehdi sapwellimen Siohwa manaman ahpw sohte kohdahla nanleng. Ehu karasepe iei Sohn Sounpapidais. Sises mahsanih me sohte aramas emen me lapalap sang Sohn, ahpw e pil mahsanih me Sohn sohte pahn iang kaunda nin duwen nanmwarki men nanleng. (Mad. 11:10, 11) Depit pil ale kaweid sang sapwellimen Koht manaman. (1 Sam. 16:13) Sapwellimen Koht manaman sewese ih en wehwehki soahng rir kan duwen Siohwa oh pil kaweid ih en ntingihada ekei wasa nan Paipel. (Mark 12:36) Mendahki met, wahnpoaron Piter nda me Depit “sohte kohdahla nanleng.” (Wiewia 2:34) Siohwa ketin doadoahngki sapwellime manaman pwehn ketikihong irail pwukat manaman en wia soahng kapwuriamwei kan, ahpw e sohte ketin doadoahngki manaman wet en luke irail en iang mi nanleng. Ia duwe, met wehwehki me arail lelepek sohte itar de re sohte warohng iang kaunda sang nanleng? Soh. Ihte me met wehwehki iei me Siohwa pahn ketin kaiasada irail pwe ren mour nan Paradais nin sampah.​—Sohn 5:28, 29; Wiewia 24:15.

17, 18. (a) Keting dahieu me pali laud en sapwellimen Koht ladu kan rahnwet kin kasikasik? (b) Peidek dah kan me kitail pahn koasoiapene nan iren onop en mwuhr?

¹⁷ Pali laud en sapwellimen Koht ladu kan rahnwet sohte pahn kohdahla nanleng. Re duwehte Eipraam, Depit, Sohn Sounpapidais, oh ohl oh lih tohto teikan nan Paipel me kin kilangwohng en mour nin sampah ni ahnsou me irail pahn mi pahn kaundahn sapwellimen Koht koperment. (Ipru 11:10) Irail meh 144,000 kan pahn iang Sises kaunda sang nanleng. Ahpw Paipel pil mahsanih duwen “luhwen” me keidi kan me mihmihte sampah erein imwin ahnsou wet. (Kaud. 12:17) Eri pali laud en irail 144,000 ko melahr oh miehier nanleng.

¹⁸ Ahpw ma emen nda me e iang wia emen me keidi, ia duwen irail kan me ahneki koapworopwor en mour nin sampah ar mwekidki met? Ma emen nan omw mwomwohdiso tepida tungoale pilawa oh nim wain ni Katamano, ia pahn mwomwen omw wiewia ong ih? Oh ia duwen ma nempehn irail kan me nda me re iang keidi wie tohtohla? Ke anahne pwunodki? Kitail pahn sapengala peidek pwukat nan iren onop en mwuhr.