Dahme Kahrehda Kitail en Kapinga Siohwa?

1-3. (a) Iahd me Melkahka 147 ele ntingdi? (b) Dahme kitail kak sukuhlkihsang atail onopki Melkahka 147?

KITAIL kin kalapw kapinga emen ni atail perenkihda dahme e nda de wia. Ia uwen laud kitail en kapinga Siohwa Koht! Kitail kin kapingahki ih sapwellime kehl lapalap me kitail kilang nan sapwellime kapikipik kaselel kan. Kitail pil kin kapingahki ih sapwellime limpoak laud ong kitail sang ni eh ketin tounmeteikihla sapwellime Ohlo nin duwen pweinen pweipwei sapahl ehu.

² Ni atail wadek Melkahka 147, e sansal me sounntingo uhdahn men kapinga Siohwa. E pil kangoange meteikan en iang ih kapinga Koht.​—Wadek Melkahka 147:1, 7, 12.

³ Kitail sohte ese ihs me ntingihedi Melkahka 147. Ahpw ele sounntingo momour erein ahnsou me mehn Israel ko pwurala Serusalem mwurin Siohwa ketin kasaledekirailla sang Papilon. (Mel. 147:2) Sounmelkahkao kapinga Siohwa pwehki sapwellime aramas akan kakehr pwurehng kaudok nan pein sapwarailo. Pil mie kahrepe tohto me sounmelkahkao en kapingahki Siohwa. Kahrepe dah kei mwo? Oh kahrepe dah kan ken nda “Aleluia!” de ‘Kapinga Siohwa!’?​—Mel. 147:1.

SIOHWA KETIN KAMWAHWIHALA ME MWORUSALAHR KAN

4. Ni Nanmwarki Sairus eh kasaledekihala mehn Israel ko, ia arail pepehm, oh dahme kahrehda?

⁴ Medewehla pepehm en mehn Israel ko ni arail sensel nan Papilon. Irail ko me wairaillahng wasao kemenkouruhrki irail oh nda: “Kumwail koulkihong kiht apwoat koulen duwen Saion.” Ahpw mehn Suhs ko sohte men koul. Dahme kin keieu kahrehiong irail peren iei Serusalem, ahpw e ohlahr. (Mel. 137:1-3, 6) Re uhdahn mworusala, oh re anahne kamweitparail. Ahpw nin duwen me Mahsen en Koht kohpadahr, Siohwa ketin sewese sapwellime aramas akan. Ia duwen? Nanmwarki en Persia, Sairus, kalowehdi Papilon oh nda met duwen Siohwa: “Koht . . . ketikihong ie pwukoahn kauwada ehu tehnpese nan Serusalem.” Sairus pil ndaiong mehn Israel ko: “Kumwail koaros me wia sapwellimen Koht aramas, en patohla wasao, oh KAUN-O, amwail Koht en ketin ieiang kumwail.” (2 Kron. 36:23) Ia uwen met eh kansenamwahwihala mehn Israel ko nan Papilon!

5. Dahme sounmelkahkao koasoiahki duwen sapwellimen Siohwa manaman en kamwahwihala kitail?

⁵ Siohwa sohte ihte ketin kansenamwahwihala wehin Israel ahpw e ketin kansenamwahwihala emenemen irail. Siohwa pil kin ketin wia met ong kitail rahnwet. Sounmelkahkao ntingihedi me Koht kin “ketin kamwahwihalahr me nan kapehd ohlahr akan oh ketin kidimpenehr ar ohla kan.” (Mel. 147:3) Ni atail kin soumwahu de mworusala, kitail kak kamehlele me Siohwa ketin nsenohkin kitail. Siohwa ketin kupwurki kansenamwahwihala kitail oh kamwahwihala atail pepehm en nsensuwed laud. (Mel. 34:18; Ais. 57:15) E ketikihong kitail erpit oh kehl pwe kitail en kak dadaur pahn kahpwal koaros me kitail ahneki.​—Seims 1:5.

6. Ia duwen atail kak paiekihda dahme sounmelkahkao koasoia nan Melkahka 147:4? (Menlau kilang tepin kilel.)

⁶ Mwuhr sounmelkahkao kilengdahla pahnlahng oh nda me Siohwa kin “ketin koasoanehdi tohtohn usu kan oh ketikihong eden ehuehu usu.” (Mel. 147:4) Sounmelkahkao kak kilang usu kan, ahpw e uhdahn sehse meh depe. Rahnwet, saintis kan ese me mie usu lik lik kei nan ehu mwutumwut en usu. Oh mie mwutumwut en usu kan me inenen tohto (trillion kei) nanleng! Aramas akan sohte kak wadekedi usu kan koaros, ahpw Sounkapikpatailo kak ketin wia met. Ni mehlel, e uhdahn ketin mwahngih ehuehu usu kan oh ketikihong adarail. (1 Kor. 15:41) Kohto me ketin mwahngih wasa me ehuehu usu pwukat mi ie pil ketin mwahngih duwen uhk. E kin ahnsou koaros ketin mwahngih wasa ke mi ie, omw pepehm kan, oh dahme ke anahne!

7, 8. (a) Dahme Siohwa ketin mwahngih duwen kitail? (b) Menlau kihda ehu karasaras me kasalehda duwen Siohwa eh ketin poakohng kitail.

⁷ Siohwa ketin mwahngih dahme ke kin lelohng oh e sapwellimanki manaman en seweseiuk nan omw kahpwal kan. (Wadek Melkahka 147:5.) Ele ke kin pehm me omw irairo uhdahn apwal oh ke sohte kak powehdi. Koht mwahngih dahme kitail sohte kakohng, oh e ketin “tamataman me kitail uhdahn pwehl.” (Mel. 103:14) Kitail sohte unsek, eri kitail kin pwurepwurehng wiahda soangen sapwung kohte me kitail kin wia oh kitail kin mworuskihla. Ia uwen atail kin koluhkihla dahme kitail ndahla, pepehm sapwung kan me kitail ahneki, de pepehm en luwak me kitail ahneki! Siohwa sohte sapwellimanki luwet kan, ahpw e uhdahn ketin mwahngih atail pepehm kan.​—Ais. 40:28.

⁸ Ia duwe, ke kak pehm Siohwa eh kin ketin seweseiuk kamwahwihala omw kahpwal kan? (Ais. 41:10, 13) Met wiawihong emen pioneer me adaneki Kyoko. Mwurin eh keseulahng ehu wasahn kalohk tohrohr, e uhdahn mworusala. Ahpw ia duwen Kyoko eh ese me Siohwa ketin mwahngih duwen eh kahpwal kan? Nan mwomwohdiso kapw me e keseula ie, me tohto wasao kak wehwehki eh pepehm kan. E pehm me Siohwa mahsanihong ih: “I poakohng uhk, kaidehn pwehki ke wia pioneer men, ahpw pwehki kowe nei serepein me inoukihong ie omw mour. I men ken perenki omw mour nin duwen emen nei Sounkadehde!” Ia duwen Siohwa eh ketin kasalehiong uhk me “sapwellime kupwurokong sohte kak sosohngdi”?

SIOHWA KIN KETIKIHDA DAHME KITAIL ANAHNE

9, 10. Dahme keieu kesempwal me Siohwa kin ketin sewesekin kitail? Menlau kihda ehu karasaras.

⁹ Kitail koaros anahne soahng kan duwehte mwenge, likou, oh ihmw. Ele ke kin pwunodki me e sohte pahn itar konomw mwenge. Ahpw Siohwa ketin kapikada sampah pwehn kawosehda mwenge me itar ong koaros, pil ong kisin menpihr kan me kin sengisengki ar men mwenge. (Wadek Melkahka 147:8, 9.) Ma Siohwa ketin kamwenge menpihr ko, kitail kak kamehlele me e pil pahn ketikihong kitail atail anahn akan.​—Mel. 37:25.

¹⁰ Keieu kesempwal, Siohwa ketikihda dahme kitail anahne pwe atail pwoson en kehlail, oh e ketikihong kitail ‘sapwellime popohl, me inenen laudsang uwen atail dehdehki.’ (Pil. 4:6, 7) Mutsuo oh eh pwoudo kilang duwen Siohwa eh ketin sewese ira. Ni ilok laud ehu eh wiawi Sapan nan pahr 2011, ira pitsang mehla ni ara doudahla pohn koadoken imwarao. Rahno, kereniong soahng koaros me ira ahneki salongala. Pwongo ira meir nan pere rotorot oh kopou ehu me mi nan poasoake keriau en imwarao. Mandahn rahno, ira rapahki dahme ira kak wadek pwehn kangoange ira. Ihte me ira kak diar iei pwuhken pahr (2006 Yearbook of Jehovah’s Witnesses). Ni Mutsuo eh papahk pwuhko, e diarada oaralapo “Iloak Laud kan me Keieu Keper me Wiawi.” Wasao koasoia duwen rerrer en sahpw nan Sumatra pahr 2004 me kahrehda iloak laud kan me keieu keper en wiawi. Mutsuo oh eh pwoudo sengiseng ni ara wadek dahme wiawihong riatail Kristian ko wasao. Ira pehm me Siohwa ketikihong ira mehn kangoang me ira uhdahn anahne. Siohwa pil ketin apwalih ira ni ahl teikan. Riara Kristian kan nan ekei wasa nan Sapan pil sewesehki ira mwenge oh likou. Ahpw dahme keieu kakehlakahda ira iei ni brother kan sang sapwellimen Koht pwihn arail kin mwemweitla nan ara mwomwohdiso. Mutsuo nda: “I pehm me Siohwa kin ketiket limwahn emenemen kiht oh pil apwahpwalih kiht. Ia uwen eh kansenamwahu!” Keieu, Koht kin ketikihda dahme kitail anahne pwe atail pwoson en kehlail, oh mwuhr e kin ketin apwalihala atail anahn en war.

PAIEKIHDA SAPWELLIMEN KOHT SAWAS

11. Dahme kitail anahne wia pwehn paiekihda sapwellimen Koht sawas?

¹¹ Siohwa ketin “kasapwilada me aktikitik kan.” E ketin poakohng kitail oh ahnsou koaros kupwurki sewese kitail. (Mel. 147:6a) Ia duwen atail kak paiekihda sapwellime sawas? Kitail anahne ahneki nanpwungmwahu kehlail reh. Pwe kitail en ahneki met, kitail anahne aktikitik. (Sep. 2:3) Me aktikitik kan kin likih Siohwa pwehn ketin kapwungala wiewia sapahrek koaros oh kauhdi arail lokolok. Siohwa kin ketin kupwurperenki irail pwukat.

12, 13. (a) Pwe kitail en paiekihda sapwellimen Koht sawas, dahme kitail anahne soikala? (b) Ihs me Siohwa kin kupwurperenki?

¹² Weksang met, Koht kin “ketin tiakdiong aramas suwed akan nanpwel.” (Mel. 147:6b) Kitail sohte men met en wiawihong kitail! Kitail mwahuki Koht en ketin kasalehiong kitail sapwellime limpoak poatopoat. Eri kitail anahne tateki dahme e kin ketin kalahdeki. (Mel. 97:10) Karasepe, kitail anahne tateki tiahk samin me pid wia nsenen pwopwoud. Met wehwehki me kitail anahne soikala soahng koaros me kak kahrehiong kitail en wia met, pil iangahki kilang kilel de kasdo suwed kan. (Mel. 119:37; Mad. 5:28) Ele met kak wia mehkot apwal en pelianda, ahpw mie katepen atail wia met pwehki e kin wahdohng kitail sapwellimen Siohwa kapai.

¹³ Kitail sohte kak kelehpw pelianda met. Kitail anahne likih Siohwa. Ia duwe, e pahn ketin kupwurki ma kitail likih pein atail kehl de ahn meteikan? Siohwa “sohte kin kupwurperenki kehlail en oahs akan, de kommwad en sounpei kan.” (Mel. 147:10) Ahpw kitail anahne pousehlahte kapakapki sapwellimen Siohwa sawas oh peki en ketin sewese kitail en powehdi atail luwet akan. Siohwa sohte pahn ketin pwangahkihda karonge atail kapakap kan. “E kin kupwurperenki irail kan me kin wauneki, irail kan me kin koapworopworki sapwellime limpoak poatopoat.” (Mel. 147:11) Pwehki e kin ketin loalopwoat oh poakohng kitail, kitail ese me e pahn ketin pousehlahte sewese kitail en powehdi atail ineng sapwung kan.

14. Dahme sounmelkahkao kamehlele?

¹⁴ Siohwa kin ketin kamehlelehiong kitail me e pahn ketin sewese kitail ni ahnsou me kitail kin ahneki kahpwal kan. Ni ahnsou me mehn Israel ko pwurala Serusalem, sounmelkahkao kin medemedewe ia duwen Siohwa eh kin ketin sewese irail. Sounmelkahkao koulki: “E kin ketin silehdi mwahu omw ewen kehl kan; e kin ketin kupwuramwahwih noumw aramas akan. E kin ketin sinsile irepen omw wehi.” (Mel. 147:13, 14) Ire mehlelo me kasalehda Siohwa eh ketin silehdi mwahu ewen kehl kan en kahnimwo kahrehiong sounmelkahkao en sohte perki mehkot. Met kamehlelehiong ih me Siohwa pahn ketin doarehla sapwellime aramas akan.

15-17. (a) Ia atail pepehm ong atail kahpwal kan ekei pak, ahpw ia duwen Siohwa eh ketin doadoahngki sapwellime Mahsen pwehn sewese kitail? (b) Menlau kihda ehu karasaras me kasalehda ia duwen sapwellime Koht mahsen eh kin “mwadangete pweida” pwehn sewese kitail.

¹⁵ Ele ke kin pwunod pwehki omw kahpwal kan, ahpw Siohwa kak ketikihong uhk erpit pwe ken dadaur. Sounmelkahkao nda me ni Koht eh “kin ketin koasoanediong sampah mehkot, koasoandio kin mwadangete pweida.” Sounmelkahkao pil koasoia duwen sinoh, pwoaik me rasehng pwelpar, oh keteu aihs takai oh nda: “Sohte me kakohng kopou me e kin ketin kadarodo!” E pil nda me Siohwa “kin ketin mahsente, a ais kin peipeseng.” (Mel. 147:15-18) Atail Koht me ketin mwahngih soahng koaros oh kak ketin wia soahng sohte lipilipil, me kin kamwakid keteu aihs takai oh sinoh, uhdahn kak ketin seweseiuk powehdi omw kahpwal koaros.

¹⁶ Rahnwet, Siohwa kin ketin doadoahngki sapwellime Mahsen, Paipel, pwehn kaweid kitail. Sounmelkahkao nda me sapwellimen Siohwa mahsen kin “mwadangete pweida” pwehn sewese kitail. Koht kin ketin kaweid kitail ni ahl me pwung oh ahnsou me konehng. Medewehla duwen omw pahn paiekihda sang Paipel, sawasepen Paipel kan sang “ladu lelepek oh loalokongo,” JW Broadcasting, jw.org, elder kan, oh riomw Kristian kan. (Mad. 24:45, NW) Ia duwe, ke kin kilang met nan omw mour me Siohwa kin ketin mwadang en ketikihong uhk kaweid?

¹⁷ Simone kin kehn Mahsen en Koht eh kin sewese ih. E kin pehm me pein ih sohte katepe, oh e kin medewe me Siohwa sohte kin kupwurperenki ih. Ahpw ni ahnsou me e kin mworusala, e kin pwurepwurehng kapakap ong Siohwa pwehn sewese ih. E pil kin pousehlahte onopki Paipel. Simone nda, “Sohte pak ehu I kehn me Siohwa sohte ketikihong ie kehl oh sapwellime kaweid.” Met sewese ih en ahneki madamadau pwung.

18. Dahme kahrehda ke pehm me Siohwa kin ketin karanih iuk, oh kahrepe dah kan me ke ahneki pwehn ‘Kapinga Siohwa!’?

¹⁸ Sounmelkahkao ese me nanpwungen wehi kan koaros, Siohwa ketin pilada wehin Israel pwehn wia sapwellime aramas. Irail kelehpw me ale sapwellime “kaweid oh kosonned.” (Wadek Melkahka 147:19, 20.) Rahnwet, kitail ahneki pai laud en weuwa mwaren Koht. Kitail kalahnganki atail ese duwen ih, sapwellime Mahsen en kaweid kitail, oh me kitail kak ahneki nanpwungmwahu keren reh. Duwehte sounmelkahkao me ntingihedi Melkahka 147, ke ahneki kahrepe mwahu tohto en ‘Kapinga Siohwa!’ oh kangoange meteikan en wia duwehte.