“Iang Sengiseng Rehn me Kin Sengiseng kan”
“Kumwail kakehlakahda emenemen kumwail, oh sawaspene.”—1 DES. 5:11.
1, 2. Dahme kahrehda kitail anahne koasoiapene ia duwen atail en kansenamwahwih me pahtou kan? (Menlau kilang tepin kilel.)
SUSI nda: “Kereniong sounpar ehu mwurin nait pwutako mehla me se kin pehm medek me inenen laud.” Mwurin eh pwoudo mehla ni soh kasikpe, emen brother nda me e kin ahneki “soangen medek me e sohte kak kawehwehda.” E kansensuwed me aramas tohto kin lelohng soangen medeko. Nan mwomwohdisohn Kristian kan rahnwet, riatail me tohto sohte kin kasik me irail kan me re poakohng pahn mehla mwohn Armakedon. Ele mie emen me ke poakohng me mehla, de mwein ke ese emen me nsensuwed oh pahtou. Ma ei, ele ke kin peidengki, ‘Ia duwen me pahtou men eh kak diar nsenamwahu?’
2 Ekei kin nda me ke anahne ahnsou pwehn kak kamwahwihala soangen ohla koaros. Ahpw ia duwe, met kin mehlel ahnsou koaros? Emen liohdi nda, “I diarada me e pwung en nda me dahme emen kin wiahiong eh ahnsou iei me kin sewese kamwahwihala eh nsensuwed.” Ohla ehu kin anahne ahnsou oh epwel mwahu pwehn mwahula. Pil duwehte met, kitail anahne ahnsou oh epwel mwahu pwehn kamwahwihala atail nsensuwed laud. Dahme kak uhdahn sewese me pahtoula kan en katikala arail nsensuwed?
SIOHWA IEI KOHT EN “KANSENAMWAHU KOAROS”
3, 4. Dahme kahrehda kitail kak kamehlele me Siohwa ketin mwahngih duwen atail kin pahtoula?
3 Samatail limpoak, Siohwa, iei me kin keieu ketikihda nsenamwahu me kitail anahne. (Wadek 2 Korint 1:3, 4.) E ketin wia mehn kahlemeng me keieu mwahu duwen emen me kin wehwehki pepehm en meteikan, oh e ketin inoukihong sapwellime kan: “Iei ngehi me kakehleikumwailda.”—Ais. 51:12; Mel. 119:50, 52, 76.
4 Samatail limpoak pil ketin mwahngih uwen kamedek ni emen me e ketin poakohng mehla, duwehte sapwellime ladu ko Eipraam, Aisek, Seikop, Moses oh Nanmwarki Depit. (Nemp. 12:6-8; Mad. 22:31, 32; Wiewia 13:22) Paipel kasalehiong kitail me Siohwa uhdahn ketin kasikasik rahno me e pahn ketin kaiasada ohl lelepek pwukat. (Sohp 14:14, 15) Ni ahnsowo, irail pahn peren oh ahneki roson unsek. Sapwellimen Siohwa Meseniho pil pwoula. Paipel mahsanih me Sises iei me kin “kapakaparanih” Koht. (Lep. Pad. 8:22, 30) Kitail sohte kak pil medewehla uwen Siohwa eh kupwurtoutoukihla eh mahsanih duwen weirek laud me sapwellime Ohlo ahneki ni eh pwoula.—Sohn 5:20; 10:17.
5, 6. Ia duwen Siohwa eh kin ketin kansenamwahwihala kitail?
5 Kitail kak uhdahn kamehlele me Siohwa pahn ketin sewese kitail. Eri kitail en kin ahnsou koaros saledek en kapakap ong ih oh kasalehda atail nsensuwed laud oh pahtou. Ia uwen eh kansenamwahu en ese me Siohwa kin ketin mwahngih atail pepehm kan oh kin ketikihong kitail nsenamwahu me kitail anahne! Ahpw ia duwen eh kin ketin wia met?
6 Mie ahl tohto me Siohwa kin ketin kansenamwahwih kitail, ahpw ehu iei sang ni eh kin ketin doadoahngki sapwellime manaman. (Wiewia 9:31) Sises inoukihda me Samatailo pahn ketikihda sapwellime manaman me inenen kehlail ong koaros me kin peki. (Luk 11:13) Susi, me kitail koasoia mwoweo, nda: “Mie pak tohto me se kin kelepwikihdi oh kapakap ni ngidingid ong Siohwa en ketin kansenamwahwihala kiht. Ahnsou koaros, sapwellimen Koht popohl kin uhdahn pere at mohngiong oh pil lamalam.”—Wadek Pilipai 4:6, 7.
SISES PIL KETIN MWAHNGIH DUWEN ATAIL PEPEHM
7, 8. Dahme kahrehda kitail kak kamehlele me Sises pahn ketin kansenamwahwihala kitail?
7 Ni Sises eh ketiket sampah, e ketin kahlemengih ni unsek irair kaselel kan en Semeo sang ni dahme e mahsanih oh pil wia. (Sohn 5:19) Siohwa ketin poaronedohng sampah Sises pwehn kansenamwahwihala “me nan kapehd toutoulahr akan” oh “koaros me kin pahtou.” (Ais. 61:1, 2; Luk 4:17-21) Aramas akan ese me Sises ketin mwahngih duwen ar lokolok oh uhdahn kupwurki sewese irail.—Ipru 2:17.
8 Ni ahnsou me Sises pwulopwul, ele mie kompoakepah keren kan de tohn eh peneinei me mehla. Karasepe, e mwomwen me semeo, Sosep, mehla ni ahnsou me Sises pwulopwulte.a Medewehla uwen apwal me pwutak pwulopwul menet ahneki ni eh dadaur pahn eh pahtou laud oh pil pohnese nsensuwed me eh nohno oh rie ko ahneki.
9. Ia duwen Sises eh ketin kasalehda me e mwahngih pepehm en aramas ako ni ahnsou me Lasarus mehla?
9 Erein Sises ketin kalokalohk, e ketin kasalehda me e uhdahn mwahngih oh kehn ahn aramas ako ar lokolok. Karasepe, ni ahnsou me kompoakepaho Lasarus mehla, Sises pil mwahngih pahtou laud me Mery oh Marda ahneki. E uhdahn ketin wehwehki ara pepehm, oh mendahte eh mwahngih me e pahn ketin kaiasada Lasarus, e ketin tepida tentenihr.—Sohn 11:33-36.
10. Ia duwen atail kak kamehlele me Sises kin ketin mwahngih atail pepehm rahnwet?
10 Ia duwen sapwellimen Sises mahsen kansenamwahu kan mahso ar kak sewese kitail rahnwet? Paipel kasalehda ni sansal me Sises sohte ketin wekila. E mahsanih: “Sises Krais ketin duweduwehte, ahio, rahnwet, oh pil kohkohlahte.” (Ipru 13:8) Paipel kamwarenki Sises “Sounkomouro” pwehki e ketin kahrehda kitail en kak mour kohkohlahte. Pein Sises pil mwahngih ia pepehm en pahtou oh “kakehr ketin sewese irail kan me kin ale songosong.” (Wiewia 3:15; Ipru 2:10, 18) Eri kitail kak kamehlele me Sises kin ketin mwekidkihte ni meteikan ar kin pahtou laud. E mwahngih arail pahtou oh e kak ketin kansenamwahwihirailla ‘ni ahnsoun arail anahn laud kan,’ de ahnsou me konehng.—Wadek Ipru 4:15, 16.
“KAKEHLEPEN LOALATAIL ME PWUHK SARAWI KIN KETIKIHONG KITAIL”
11. Mehnia iren Paipel me kin keieu kamweituhkala?
11 Koasoipen Sises eh ketin kasalehda pahtou laud ni ahnsou me Lasarus mehla wia ehu rehn iren Paipel tohto me kin kansenamwahu. Kitail sohte anahne pwuriamweikihla met, pwehki “mehkoaros me ntingdier nan Pwuhk Sarawi e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.” (Rom 15:4) Ma ke ahneki pahtou laud, ke pil kak diar kakehlepen loalomw sang nan iren Paipel pwukat me kileldi pah:
“KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.”—Mel. 34:18, 19.
“Ni ahnsou me I kin pwunodada oh pahtoula, komw [Siohwa] kin ketin kansenamwahwihiehla oh kapereniehda.”—Mel. 94:19.
“Pein atail Kaun Sises Krais, oh Koht Samatail, me kin ketin loalloalei kitail, oh pwehki sapwellime kalahngan e ketikidohng kitail roson soutuk oh koapworopwor kehlail, en ketin audehkihda mohngiongimwail sapwellime roson, oh en ketin kakehlaikumwailda.”—2 Des. 2:16, 17.b
MWOMWOHDISO KIN KANSENAMWAHWIHALA KITAIL
12. Ia duwen atail kak kansenamwahwihala meteikan?
12 Me pahtoula kan pil kak diar nsenamwahu nan mwomwohdiso en Kristian kan. (Wadek 1 Deselonika 5:11.) Ia duwen omw kak kakehlaka oh kansenamwahwih irail kan me “nsensuwed”? (Lep. Pad. 17:22) Tamataman me mie “ahnsoun nennenla oh ahnsoun mwoarongada,” de koasoi. (Ekl. 3:7) Liohdi men me ede Dalene koasoia me irail me pahtoula kan kin anahne kasalehda arail madamadau oh pepehm. Eri, dahme keieu kesempwal me ke kak wia iei en rong mwahu oh dehr sopuk. Junia, me rie pwutako kemehla pein ih, nda: “Mehnda ma ke pil sohte kak uhdahn wehwehki arail pahtou, dahme kesempwal iei me ke men wehwehki ia arail pepehm.”
13. Dahme kitail anahne tamataman duwen pepehm en pahtou?
13 Kitail anahne tamataman me atail pepehm en pahtou oh mwomwen atail kasalehda met kin wekpeseng. Ekei pak kitail sohte kak uhdahn kasalehda ia uwen laud en atail pahtou. Paipel mahsanih: “Omw nsensuwed iei pil pein ahmw. Sohte emen pahn iang ahneki omw peren de omw nsensuwed.” (Lep. Pad. 14:10) Pil ni emen eh kasalehda eh pepehm, kaidehn ahnsou koaros e kin mengei ong meteikan en wehwehki dahme e songosong en nda.
14. Dahme kitail kak nda pwehn kansenamwahwihala me pahtou kan?
14 E kak pil apwal en ese dahme ke pahn ndaiong emen me pahtou. Ahpw Paipel mahsanih me “lokaiahn loalokong kin kamwahwihala wasa.” (Lep. Pad. 12:18) Me tohto diarada lokaia kansenamwahu kan sang kisin pwuhk me oaralape Ahnsou me Emen me Ke Poakohng Mehla pwehn ehukihong meteikan.c Ahpw dahme keieu sawas iei en “sengiseng rehn me kin sengiseng kan.” (Rom 12:15) Gaby, me eh pwoudo mehla, nda me ekei pak, ihte ahl en kasalehda eh pepehm iei sang ni eh kin sengiseng. E pil nda: “Ihme kahrehda I kin ekis nsenamwahula ni kompoakepahi ko ar iang ie sengiseng. Ni ahnsou ko, I pehm me I sohte kin kelehpwki ei nsensuwed.”
15. Ia duwen atail kak kansenamwahwih meteikan ma kitail apwalki en pein koasoiong aramaso? (Pil kilang koakon me oaralape “Lokaia me Kin Kamweitala Emen.”)
15 Ma ke kin apwalki nda mehkot me kak kansenamwahwihala emen, ele e pahn mengei en kadarala reh card, e-mail, text de kisinlikou. Ke kak ntingihedi iren Paipel ehu me kak kamweitala ih, duwen irair tohrohr ehu me ke tamanki me mehlao, de ehukihong ih ahnsou kaperen ehu me ke tamataman. Junia nda: “En alehdi kisinlikou mwotomwot ehu me kangoange ie de ale luhk en iang mwemweit rehn ekei riei Kristian kan kin uhdahn sewese ie laudsang ei kak kawehwehda. Soahng pwukat kin kahrehiong ie en pehm me mie me poakohng oh nsenohkin ie.”
16. Ia pil ehu ahl me uhdahn mwahu en kansenamwahwihala meteikan?
16 Atail kapakap kan pil kak sewese riatail Kristian men me pahtoula. Kitail kak kapakapkin ih de pil iang ih kapakap. Mehnda ma e apwal en wia met pwehki ke pehm me ke kakete sengiseng, omw kapakap me kohsang nan omw mohngiong kak uhdahn kansenamwahwihala ih. Dalene nda: “Ekei pak ni sister kan ar kohdo pwehn kansenamwahwih ie, I kin peki ma re pahn kak kapakap. Re kin tepida kapakap, oh kalapw apwalki lokaia nin tapio, ahpw ahnsou koaros, mwurin ahnsou kis, ngilarail ko kin kehlailla oh re kin nda soahng kan me uhdahn kohsang nan mohngiongirail. Arail pwoson laud, arail limpoak, oh pil arail nsenoh kin uhdahn kalaudehla ei pwoson.”
DOULAHTE KIHDA KAMWEIT
17-19. Dahme kahrehda kitail anahne doulahte kihda kamweit?
17 Kitail sohte kak uhdahn ese ia uwen laud en ahnsou me emen anahne pwehn pahtou. Ni emen eh mehla, tohto en kompoakepah oh kiseh kan kin kohla pwehn kansenamwahwih peneinei en me mehlao. Ahpw mwurin koaros pwuralahng dahme re kin wiewia, me pahtoula kan kin anahnehte kamweit. Eri onopada pwehn sawas. “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” (Lep. Pad. 17:17) Kitail anahne kansenamwahwih me pahtou kan lao re mwahula.—Wadek 1 Deselonika 3:7.
18 Tamataman me emen kakete tepida nsensuwed laud ni soh kasikpe. Met kak wiawi pwehki rahnen kataman ehu, ngilen koul ehu, kilel kan, wiewia ehu, de pil pwohn de ngilen mehkot, de soangen ahnsou ehu erein sounparo. Ni emen me eh pwoudo mehla eh tepida kelehpwla oh wia mehkot, duwehte iang towehda mihting tohrohr, de Kataman, met kak uhdahn kansensuwed. Emen brother nda: “Mwurin ei pwoudo mehla, I medewe me tepin ei pahn kelehpw wia kataman en rahnen at kapwopwoudo pahn uhdahn kansensuwed, oh e apwal. Ahpw ekei riei Kristian ko koasoanehdi me ngehi oh ekei kompoakepahi keren kan sen kohpene oh mwengepene pwe ien dehr kelekelehpw.”
19 Tamataman me irail kan me pahtoula kin anahne kangoang kaidehn ihte ahnsou kei. Junia nda: “Meteikan ar kin kalapw kihda sawas oh kihong ie arail ahnsou, mehnda ma kaidehn rahnen kataman tohrohr ehu, kak sawas laud. Soangen ahnsou pwukat me kin wiawi ni soh kasikpe kin uhdahn kesempwal oh kahrehda nsenamwahu laud.” Ei mehlel, kitail sohte kak kihsang douluhl arail nsensuwed de loaloid, ahpw kitail kak kansenamwahwihala irail sang ni atail wiahda soahng kan ong irail. (1 Sohn 3:18) Gaby nda: “I inenen kalahngankihong Siohwa elder kan me kin kasalehda limpoak ni arail sewese ie nan ei kahpwal ko koaros. Re uhdahn kahrehiong ie en pehm sapwellimen Siohwa limpoak.”
20. Dahme kahrehda sapwellimen Siohwa inou kan wia utupen kansenamwahu koaros?
20 E kansenamwahu en ese me Siohwa, Koht en kansenamwahu koaros, pahn ketikihsang douluhl pahtou koaros ni ahnsoun kaiasadao. (Sohn 5:28, 29) Koht ketin inoukihda me e “pahn ketin kamwomwala mehla kohkohlahte! E pahn ketikihsang pilenmesen aramas koaros.” (Ais. 25:8) Eri, koaros nin sampah sohte pahn “iang sengiseng rehn me kin sengiseng kan,” ahpw re pahn “iang peren rehn me kin pereperen kan.”—Rom 12:15.
a Paipel kasalehda me Sosep wie momour ni ahnsou me Sises sounpar 12. Ahpw Paipel sohte kasalehda me Sosep mihmiseli ahnsowo me Sises ketin wiahda tepin sapwellime manaman, me iei en kawekila pihl ong ni wain, de pil ni ahnsou kan mwuri. Met kak wehwehki me Sosep melahr ahnsowo. Patehng met, ni Sises eh ketin langalang ni tuhkehn kalokoloko, e ketin mahsanihong wahnpoaron Sohn en apwalih ineo. Sises sohte pahn ketin wia met ma Sosep wie momourte.—Sohn 19:26, 27.
b Ekei iren Paipel me me tohto diarada me pil kansenamwahu iei Melkahka 20:1, 2; 31:7; 38:8, 9, 15; 55:22; 121:1, 2; Aiseia 57:15; 66:13; oh 1 Piter 5:7.
c Pil menlau kilang oaralap pwukat “Kansenamwahwihala me Pahtou kan, Duwehte me Sises Ketin Wia” nan Kahn Iroir (lokaiahn wai) en November 1, 2010, oh pil “Ni Ahnsou me Emen me Ke Poakohng Mehla,” nan Kahn Iroir 2016, No. 3.