“En Ketikihong . . . Omwi Koasoandi kan Koaros en Pweida”

1. Dahme me pwulopwul kan anahne koasoanehdi ong ahnsou kohkohdo? Dahme kak sewese irail pwe ren dehr nohn pwunod? (Menlau kilang tepin kilel.)

KUMWAIL me pwulopwul kan ele pahn pwungki me mwohn amwail pahn seiloak, e wia elen loalokong en koasoanehdi wasa me kumwail pahn kohla ie. Atail mour duwehte atail wia seiloak ehu, oh ahnsou en koasoanehdi wasa me ke pahn kohla ie iei ahnsou me ke pwulopwul. Ni mehlel, ele e sohte mengei en wiahda soangen koasoandi pwukat. Emen serepein me adaneki Heather nda: “I perki wia met. Ke anahne pilada dahme ke pahn wia erein omw mour.” Ma ke ahneki soangen pepehm wet, tamataman me Siohwa ketin mahsanih: “Dehr perki mehkot, pwe ngehi me amwail Koht. I pahn kin kakehlakei kumwail oh sewesei kumwail.”​—Ais. 41:10.

2. Ia duwen omw ese me Siohwa ketin kupwurki ken wiahda koasoandi kan pwe ken nsenamwahu ni ahnsou kohkohdo?

² Siohwa ketin kangoange iuk en wiahda ni loalokong koasoandi kan ong ahnsou kohkohdo. (Ekl. 12:1; Mad. 6:20) E kupwurki ken nsenamwahu. Met sansal sang ni omw kin kilang, rong, oh neme soahng kan me e ketin kapikada. Siohwa pil kin ketin nsenohki kitail ni ahl teikan. E kin ketikihong kitail kaweid oh ketin padahkihong kitail ahl me keieu mwahu pwehn mour. Eri e sohte ketin kupwurperenki ni aramas akan ar kin soikala sapwellime kaweid me erpit. E ketin mahsanihong irail kan me sohte kin idawehn sapwellime kaweid: “Kumwail pilada en sapeikiong ie . . . I mahsanihong kumwail me irail kan me kin pwongih ie oh peikiong ie . . . pahn pereperen, a kumwail pahn sarohdi. Re pahn kokoulki ar peren.” (Ais. 65:12-14) Ni atail wiahda pilipil loalokong kan nan atail mour, kitail kin wahdo kaping ong Siohwa.​—Lep. Pad. 27:11.

KOASOANDI KAN ME PAHN KAHREHIONG KEN NSENAMWAHU

3. Dahme Siohwa ketin kupwurki ong uhk?

³ Koasoandi dah kan me Siohwa ketin kupwurki ong uhk? Pwe kitail en peren, kitail anahne esehla Siohwa oh papah ih. Siohwa ketin kapikada kitail ni ahl wet. (Mel. 128:1; Mad. 5:3) Mahn akan kin ihte mwenge, nimpil, oh naineki seri. Ahpw Siohwa kupwurki ken koasoanehdi omw mour ni ahl ehu me pahn nsenamwahu oh katapan. Sounkapikpomw iei “Koht en limpoak,” “Koht en peren,” me ketin kapikada aramas “rasehng ih.” (2 Kor. 13:11; 1 Tim. 1:11, NW; Sen. 1:27) Ke pahn nsenamwahu ni omw kahlemengih atail Koht me limpoak. Paipel mahsanih: “Kihwei kaperen sang ale.” (Wiewia 20:35) Ia duwe, ke kin ahneki soangen pepehm wet? Met wia ire mehlel ehu me pid mour. Eri Siohwa ketin kupwurki ken wiahda koasoandi kan ong ahnsou kohkohdo me poahsoankihda omw poakohng ih oh meteikan.​—Wadek Madiu 22:36-39.

4, 5. Dahme kin kaperenda Sises?

⁴ Sises Krais ketin wia mehn kahlemeng unsek ong me pwulopwul kan. Ni ahnsou me e tikitik, ele e kin iang mwadong oh pil peren. Nin duwen me Paipel mahsanih, mie “ahnsoun peren” oh “ahnsoun kahlek.” (Ekl. 3:4) Sises pil patohwan karanihala Siohwa sang ni eh kin onopki Paipel. Ni eh sounpar 12, sounpadahk kan nan tehnpas sarawio uhdahn pwuriamweikihla “sapwellime kupwurokong me pwarada ni sapwellime pasapeng kan.”​—Luk 2:42, 46, 47.

⁵ Ni Sises eh laudla, en wia dahme Koht kupwurki kin kaperenda ih. Karasepe, Koht kupwurki “en kapahrengkihong me semwehmwe kan rongamwahu” oh ong “me maskun kan ar kakehr kilangada wasa.” (Luk 4:18) Melkahka 40:8 kawehwehda duwen sapwellimen Sises pepehm kan: “Maing ei Koht, ia uwen ei kin ngoangki kapwaiada kupwuromwien!” Sises kupwurperenki padahkihong aramas akan duwen Semeo. (Wadek Luk 10:21.) Ehu pak, mwurin eh mahseniong lih emen duwen kaudok mehlel, Sises ketin mahsanihong sapwellime tohnpadahk kan: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.” (Sohn 4:31-34) Sises kupwurperenki eh ketin kasalehda limpoak ong Koht oh meteikan. Ma ke wia soahngohte, ke pahn pil peren.

6. Dahme kahrehda e mwahu en koasoiaiong meteikan duwen omw koasoandi kan ong ahnsou kohkohdo?

⁶ Kristian tohto kin tepida pioneer ni arail pwulopwul, oh met kin kaperenda irail. Ia duwe, ke kak koasoiaiong ekei irail duwen omw koasoandi kan? “Ale kaweid koaros uwen me ke kak, ke ahpw pahn pweida, pwe ma soh, ke pahn pwupwudi.” (Lep. Pad. 15:22) Riatail pwukat ele pahn ndaiong uhk me doadoahk en pioneer kin wia kasukuhl ehu me pahn seweseiuk erein omw mour. Sises patohwan sukuhlki soahng tohto sang Semeo ni ahnsou me e patopato nanleng. Mwuhr, erein eh ketiket sampah, e ketin pousehlahte sukuhlki soahng kan. E kupwurperenkihda eh ketin ehukihong meteikan rongamwahwo oh kolokolte eh lelepek nan irair apwal kan. (Wadek Aiseia 50:4; Ipru 5:8; 12:2) Kitail pahn kilang dahme kahrehda en doadoahngki pali laud en atail ahnsou ong papah Siohwa kak kahrehda nsenamwahu.

DAHME KAHREHDA KATOHNPADAHK WIA DOADOAHK ME KEIEU MWAHU

7. Dahme kahrehda me pwulopwul tohto perenki doadoahk en katohnpadahk?

⁷ Sises ketin mahsanihong kitail en ‘padahkihong tohn wehi kan koaros; pwe re en wiahla sapwellime tohnpadahk.’ (Mad. 28:19, 20) Ma ke koasoanehdi en wiahkihla pioneer omw doadoahk, ke pahn ahneki mour nsenamwahu me kin kawauwih Koht. Duwehte doadoahk koaros, ke anahne ahnsou pwe ken koahiekla. Brother men me adaneki Timothy me tepida pioneer ni ahnsou me e pwulopwul nda: “I perenki doadoahngki pali laud en ei ahnsou ong papah Siohwa pwehki ih ahl wet me kin kasalehda me I poakohng ih. Nin tapio, I sohte kak tapiada onop Paipel rehn aramas akan, ahpw mwuhr I keseula nan ehu wasahn kalohk, oh erein sounpwong ehu I tepida onop Paipel rehn ekei. Emen tohnsukuhl en Paipel ko tepida kohdo ni Wasahn Kaudok. Mwurin ei iang Sukuhl en Paipel ong Brother Kiripw kan erein sounpwong riau, I alehdi ehu pwukoa tohrohr me kahrehiong ien tepida onop rehn aramas pahmen.a I perenki padahki aramas akan, pwehki I kak kilang me sapwellimen Koht manaman kin wekidala arail mour.”​—1 Des. 2:19.

8. Dahme ekei me pwulopwul wia pwe ren kalohk ong aramas tohto?

⁸ Ekei me pwulopwul kan sukuhlkiher ehu lokaia tohrohr. Karasepe, Jacob, sang Amerika, nda: “Ni ahnsou me I sounpar isuh, tohto iengei tohnsukuhl ko mehn Vietnam. I men padahkihong irail duwen Siohwa, eri mwurin ahnsou ehu I wiahda koasoandi kan pwehn sukuhlki arail lokaiao. Pali laud en ahnsou, I sukuhlki lokaia wet ni ei kin kapahrekihpene Kahn Iroir en lokaiahn wai ong lokaiahn Vietnam. I pil kompoakepahnkihla ekei nan mwomwohdiso ehu me kin doadoahngki lokaiahn Vietnam. Ni ahnsou me I sounpar 18, I tepida pioneer. Mwuhr, I iang Sukuhl en Paipel ong Brother Kiripw kan. Met sewese ie nan ei doadoahk en pioneer ahnsou wet pwehki ngehi kelehpw me wia elder men nan pwihn en kalohk me kin doadoahngki lokaiahn Vietnam. Mehn Vietnam tohto pwuriamweikihla me I esehla arail lokaia. Re kin kasamwolong ie nan imwarail, oh pak tohto I kin kak onop Paipel rehrail. Ekei kekeirda lao re papidaisla.”​—Pil kilang Wiewia 2:7, 8.

9. Dahme doadoahk en katohnpadahk padahkihong kitail?

⁹ Doadoahk en katohnpadahk wia kasukuhl mwahu ehu. Karasepe, ke kin sukuhlki en wia doadoahk mwahu, kapehse mwahu, sohla masepwehk oh koasoi ni elen loalokong. (Lep. Pad. 21:5; 2 Tim. 2:24) Ahpw doadoahk wet kin uhdahn kaperen pwe ke kin sukuhlki ia duwen omw pahn kadehdehda dahme ke kamehlele sang nan Paipel. Ke pil sukuhlki duwen omw pahn iang Siohwa ketin doadoahk.​—1 Kor. 3:9.

10. Ia duwen omw kak diar peren nan doadoahk en katohnpadahk mehnda ma omw wasahn kalohk apwal?

¹⁰ Ke kak diar peren nan doadoahk en katohnpadahk mendahki ekeite aramas nan omw wasahn kalohk men onop Paipel. Pwehn katohnpadahk, mwomwohdiso pwon kin doadoahkpene nin duwen pwihn ehu. Mehnda ma emente brother de sister diarada emen me wiahla tohnpadahk, kitail koaros kin peren pwehki koaros kin ehupene wia doadoahk wet. Karasepe, Brandon, me wia pioneer men erein sounpar duwau wasa ehu me aramas malaulau keite kin onop Paipel, nda: “I perenki kalohki rongamwahwo pwehki iei met me Siohwa ketin mahsanihong kitail en wia. I tepida pioneer mwurinte ei neksang sukuhl. I kin perenki kangoange brother pwulopwul kan nan at mwomwohdiso oh kilang arail kekeirda. Mwurin ei iang Sukuhl en Paipel ong Brother Kiripw kan, I alehdi pwukoa tohrohr ehu nan ei wia pioneer. Mehlel me I sohte diar emen nan ei wasahn kalohk me kekeirda lao e papidaisla, ahpw riei teikan wia met. I perenki ei koasoanehdi en doadoahngki pali laud en ei ahnsou nan doadoahk en katohnpadahk.”​—Ekl. 11:6.

DAHME OMW KOASOANDI KAN KIN IMWIKIHLA

11. Ia ehu ahl en papah Siohwa me me pwulopwul tohto perenki wia?

¹¹ Mie soahng tohto me kitail kak wia pwehn papah Siohwa. Karasepe, me pwulopwul tohto kin iang sawas en kauwada ihmw kan. Mie anahnepen kauwada Wasahn Kaudok kapw tohto. Wasa pwukat kin kawauwih Siohwa, eri omw sewese kauwada ihmw pwukat kak kahrehiong uhk peren. Ke pil kak peren ni omw iang riomw Kristian kan doadoahk. Oh ke kak sukuhlki soahng tohto, duwehte ia duwen omw pahn wia doadoahk ehu ni ahl me sohte keper oh sewese utung sounapwalih doadoahko.

12. Ia duwen doadoahk en pioneer eh kak imwikihla omw wia doadoahk teikan?

¹² Emen brother me adaneki Kevin nda: “Sangete ei tikitik, I men doadoahngki pali laud en ei ahnsou ong papah Siohwa ehu rahn. I tepida pioneer ni ei sounpar 19. I kin apwalih pein ngehi ni ei doadoahk lepin ahnsou ong brother men me kin kauwada ihmw. I sukuhlki en kihong oahs mete, wenihmwtok, oh wenihmw kan ni ihmw kan. Mwuhr, erein sounpar riau I iang pwihn ehu sewese wasa kan me ohkihla melimel, onehda sapahl Wasahn Kaudok kan oh imwen riatail Kristian kan. Ni ei rongada duwen anahn en kauwada ihmw nan South Africa, I audehda doaropwe oh mwuhr ale luhk en iang kohla wasao. Nan Aperika, I kin iang kauwada Wasahn Kaudok nan ehuehu wasa wihk keite. Pwihn me I kin iang irail kauwada ihmw kin duwehte peneinei ehu. Se kin kousoanpene, ehupene onop Paipel, oh doadoahkpene. I pil perenki iang brother kan en wasao kalohk ehuehu wihk. Koasoandi kan me I wiahda ni ahnsou me I tikitik kahrehiong ie en peren ni ahl kan me I sohte kasik.”

13. Dahme kahrehda me pwulopwul tohto perenki papah Siohwa nan Pedel?

¹³ Ekei me wia pioneer mahso kin papah nan Pedel ahnsou wet. Doadoahk nan Pedel wia elen mour ehu me kaperen pwehki soahng koaros me ke wia wasao kin ong Siohwa. Peneinei en Pedel kin iang sewese wiahda Paipel oh sawasepen Paipel kan me kin sewese aramas akan en sukuhlki padahk mehlel. Emen tohn Pedel me adaneki Dustin nda: “I wiahkihla ei mehn akadei en iang doadoahngki pali laud en ei ahnsou ong papah Siohwa ni ahnsou me I sounpar 9 oh I tepida pioneer mwurin ei neksang sukuhl. Mwurin sounpar ehu elep, I ale luhk en iang kohla Pedel, wasa I sukuhlki en iang katanga misihn en wiahda pwuhk kan oh mwuhr wiahda computer kan. Nan Pedel, I kin perenki iang tepin rong rohng kan me pid kekeirdahn doadoahk en katohnpadahk nan sampah pwon. I perenki papah wasao pwehki dahme se wia kin sewese aramas akan en karanihala Siohwa.”

KOASOANDI DAH KEI KE PAHN WIAHDA ONG AHNSOU KOHKOHDO?

14. Dahme ke kak wia ahnsou wet pwehn kaunopada ong doadoahngki pali laud en omw ahnsou ong papah Siohwa?

¹⁴ Ia duwen omw kak kaunopada pein uhk ong doadoahngki pali laud en omw ahnsou ong papah Siohwa? Pwe ken papah Siohwa ni ahl me keieu mwahu, ke anahne kakairada irair kaselel kan en Kristian. Kaukaule onopki Mahsen en Koht, doudouloale laud soahng pwukat, oh song en kasalehda omw pwoson nan mihting en mwomwohdiso kan. Erein omw iang sukuhl, ke kak kamwahwihala omw koahiek en koasoiaiong meteikan duwen rongamwahwo. Sukuhlki ken kasalehda me ke nsenohki aramas akan sang ni omw kin ni kadek idek rehrail arail madamadau oh rong kanahieng arail pasapeng kan. Ke pil kak wia soahng kan nan mwomwohdiso, duwehte sewese kamwakele oh kamwahwihala soahng kan nan Wasahn Kaudok. Siohwa kin ketin kupwurperenki doadoahngki irail kan me kin aktikitik oh men iang sawas. (Wadek Melkahka 110:3; Wiewia 6:1-3) Wahnpoaron Pohl luke Timoty en iang ih papah nin duwen misineri men pwehki e “keniken rehn me pwoson akan koaros.”​—Wiewia 16:1-5.

15. Ia duwen omw kak kaunopada pwehn ale doadoahk mwahu ehu?

¹⁵ Pail laud en irail kan me kin doadoahngki pali laud en arail ahnsou ong papah Siohwa anahne ahneki doadoahk ehu. (Wiewia 18:2, 3) Ele ke kak koasoanehdi pwehn iang ehu kasukuhl mwotomwot me pahn kak seweseiuk en ale ehu doadoahk ong lepin ahnsou me mie nan omw wasa. Koasoiong sounapwalih me kin seiloak oh pioneer teikan duwen omw koasoandi kan, oh peki arail kaweid. Eri nin duwen me Paipel mahsanih, “peki rehn KAUN-O en ketin kupwuramwahwihala omw koasoandi kan, ke ahpw pahn pweida ni mehkoaros me ke koasoanehdi.”​—Lep. Pad. 16:3; 20:18.

16. Ia duwen omw kin doadoahngki pali laud en omw ahnsou ong papah Siohwa eh kaunopada iuk ong pwukoa teikan ong ahnsou kohkohdo?

¹⁶ Ke kak kamehlele me Siohwa ketin kupwurki ken “lelohng” mour nsenamwahu ni ahnsou kohkohdo. (Wadek 1 Timoty 6:18, 19.) Doadoahngki pali laud en omw ahnsou ong papah Siohwa kin seweseiuk en wiahla Kristian koahiek men ni omw iang meteikan me kin wia soangen doadoahk wette. Me tohto pil diarada me arail kin doadoahngki pali laud en arail ahnsou ong papah Siohwa ni arail pwulopwul kin sewese arail mouren pwopwoud mwuhr. Irail kan me kin pioneer mwohn ar pwopwoudida kin pousehlahte pioneer mwurin arail pwopwoudida. Met kin kalapw wiawi.​—Rom 16:3, 4.

17, 18. Ia duwen omw wiahda omw koasoandi kan eh pidada dahme ke kin inengieng?

¹⁷ Melkahka 20:4 mahsaniheki duwen Siohwa: “En ketikihong komwi dahme komw kin inengieng oh kupwure pwe omwi koasoandi kan koaros en pweida.” Ni omw wiahda omw koasoandi kan ong ahnsou kohkohdo, medemedewe duwen dahme ke uhdahn men wia nan omw mour. Medemedewe dahme Siohwa ketin wiewia nan atail ahnsou oh dahme ke kak wia nan sapwellime doadoahk. Eri koasoanehdi ken wia dahme kin kaperenda ih.

¹⁸ Doadoahngki omw mour pwehn papah Siohwa ni unsek oh ke pahn uhdahn peren ni omw kawauwih ih. Ei, “rapahki omw peren rehn KAUN-O; oh e ahpw pahn ketikihong uhk dahme ke keieu inengieng.”​—Mel. 37:4.