Anahn Ong—100,000 Auxiliary Pioneer kan Ke Kak Auxiliary Pioneer nan March? April? May?
1 “Anahn Ong—1,000 Sounkalohk” iei daidel en artikel me pwarada nan April 1881 Watch Tower. E kangoange koaros ohl oh lih me inoukihdahr arail mour ong Koht, “me Kauno ketikihong irail en loalokongkihla duwen padahk mehlel,” en doadoahngki arail ahnsou en kalohkihseli padahk mehlel sang nan Pwuhk Sarawi. Kangoang kohwong irail me kak tohnmeteikihla arail ahnsou en kalohki Mahsen en Kauno en iang doadoahk en colporteur evangelizer—eden pioneer kan mahs.
2 Mendahki atail ahnsou weksang pahr kan 1800 lel 1900, mie mehkot me pil duwehte ahnsouo—irail me inoukihdahr arail mour ong Koht anahne doadoahngki arail ahnsou uwen me irail kak en kalohki rongamwahu. Ahnsou me emen sounkalohk kin iang doadoahk en auxiliary pioneer, e kak en koahiekla ni doadoahk en kalohk pwehki e kalaudehla eh ahnsou en iang kalohk.—Kol. 4:17; 2 Tim. 4:5.
3 Sangete ahnsou me irail koasoanehdi koasoandi en auxiliary pioneer, brother oh sister kid kid kei perenki iang doadoahk wet. Pwehki tohto kin perenki doadoahk wet, irail me kin iang auxiliary pioneer wia tohtohla oh ahnsou me auxiliary pioneer daulih 100,000 wiawi nan branch en United States nan April 1985! Pak siluh sang ahnsouo, auxiliary pioneer kan pil daulih 100,000 nan sounpwong en April—nan 1988, 1989, oh 1992. Mie koapwoaroapwoar me e kak pil wiawi nan 1997!
4 Kangoang kohwong uhk en akedeiong iang doadoahk en auxiliary pioneer nan sounpwong en March, April oh May koaros de ehu sounpwong sang nanpwungen sounpwong pwukat. Dahme kahrehda e mwahu en pilada March ma ke sohte kak iang auxiliary pioneer nan koaros? Pwehki sounpahr wet, Katamanpen Kamatalahn Krais pahn wiawi Rahn Sarawi, March 23. Sohte pil ehu doadoahk me kitail kak wia nan wihk kan mwohn Kataman me pahn mwahu sang iang ngoangki doadoahk en kalohk me atail Kaun oh Sounkomour, Sises Krais, tepida wia. Pwehki tohto me pahn kalaudehla arail kalohk nan sounpwong en March, kitail kin luhke aramas me kin perenki rong en iang towehda Katamanpen Kamatalahn Krais. March pil wia sounpwong tohrohr pwehki kitail pahn doadoahngki brochure kapwo, Dahme Koht Kupwurki Kitail en Wia?. Oh pil ehu, nan sounpwong en March, mie Rahn Kaunop me limau oh Rahn Sarawi me limau, met kin kihda ahnsou mwahu en kalaudehla atail kalohk nan Rahn Kaunop oh Rahn Sarawi kan. Nan sounpwong en April oh May, kitail kak ngoangki pwurala rehn aramas me kin perenki rong oh tepida onop Paipel rehrail oh doadoahngki Kupwurki brochure. Kitail pahn nantiong en lel aramas koaruhsie, keieu nan Rahn Kaunop oh Rahn Sarawi, oh doadoahngki neitail makasihn kan The Watchtower oh Awake!
5 Ihs Me Kak Iang Doadoahk en Auxiliary Pioneer?: Pwuhken Organized to Accomplish Our Ministry ni pali 114 koasoia: “Sohte lipilipil ahmw irair kan, ahpw ma ke pepdaislahr, ke kin tiahk mwahu, ke kak koasoanehdi ahmw ahnsou en kalohk pwehn lel awa 60 nan sounpwong ehu oh ke men en iang doadoahk wet sounpwong ehu de tohto sang, elder kan nan mwomwohdiso pahn perenki ale noumw doaropwe me ke kin kasalehda me ke men iang doadoahk wet. Ke kak iang doadoahk en auxiliary pioneer nan March? April? May?
6 Ma koaros pahn anehki lamalam en ehi—elder kan oh iangahki sounkalohk koaros—mwein kitail pahn lel atail mehn akadei en daulih 100,000 sounkalohk kan me pahn iang doadoahk en auxiliary pioneer. (Ipru 13:7) Irail kan me wia tapwin peneinei pahn medemedewe ihs me pahn kak iang doadoahk en auxiliary pioneer nan ehu sounpwong sang nanpwungen March, April oh May de sounpwong pwukat koaros.—Melkahka 148:12, 13; pil kilang Wiewia 21:8, 9.
7 Ke dehr medemedewe me ke sohte kak iang doadoahk en auxiliary pioneer pwehki ke kin doadoahk en mwohni full-time, de ke kin iang sukuhl, de ahmw pwukoah ong peneinei kin tohto, de mie mehkot tohrohr me ke kin pwukoahki nin duwen Pwuhk Sarawi kin kasalehda. Ong ekei, e sohte pahn mengei en iang doadoahk wet; ahpw, ma irail koasoanehdi mwahu arail ahnsou oh peki Siohwa en sewese irail, arail inou en iang auxiliary pioneer pahn pweida. (Mel. 37:5; Lepin Padahk 16:3) Mweidong ahmw ineng en auxiliary pioneer en kamwekid uhk en koasoanehdi ahmw irair kan, kaidehn ahmw irair kan en kamwekid ahmw ineng en auxiliary pioneer. (Lepin Padahk 13:19a) Eri, pwehki arail limpoak kehlail ong Siohwa oh mehteikan, tohto kin koasoanehdi arail ahnsou pwehn kalaudehla arail ahnsou kalohk. (Luk 10:27, 28) Kapai tohto pahn kohwong irail me kin nantiong en kalaudehla arail ansoun kalohk.—1 Tim. 4:10.
8 Auxiliary Pioneering Pahn Kahrehda Soahng Dah Kan: Ahnsou me sapwellimen Koht ladu kan kin ngoangki iang doadoahk en auxiliary pioneer, met kin kahrehda kaping laud kin kohwong Siohwa. Ahnsou me sounkalohk en Wehio kin ngoangki doadoahk en kalohki rongamwahu, irail pahn karanih Siohwa pwehki irail kin mweidong Ih en kihong irail sapwellime ngehn sarawi oh kapaiada arail doadoahk.
9 Ahnsou me sounkalohk kin ngoangki iang doadoahk en auxiliary, regular oh special pioneer, met kin kahrehda mwomwohdiso en kehlail ni pali ngehn. Arail ngoang kin kahrehda tohnmwomwohdiso teikan kin uhd pil ngoangki kalohk pwehki irail kin koasoi duwen arail ekspiriens mwahu kan nan kalohk. Met kin kahrehda sounkalohk teikan pahn medemedewe oh koasoanehdi arail ahnsou pwehn kalaudehla arail iang doadoahk kesempwal wet. Emen sister me pepdais ahnsou me e sounpahr 70 tepida auxiliary pioneer kaukaule (continuous auxiliary pioneer) mwurinte eh pepdais. Sounpahr kei mwuhr, emen idek rehn sistero dahme kahrehda e kin ngoangki kalohki mehnda me ih sounpahr 70, e koasoia me e pehmada me ah mour mwohn sounpahr 70 me sohte katepe pwe e sohte papah Siohwa ahnsou, oh ihme kahrehda e men doadoahngki eh mour met en papah Siohwa pwehn kak kaperenda mongiong en Siohwa mendahki eh lih laudlahr!
10 Ahnsou me emen kin iang doadoahk en auxiliary pioneer, doadoahk wet kin sewese emen en koahiekla nin duwen eh kin sewese aramas nan doadoahk en kalohk. Emen sounkadehde pwulopwul wehkada: ‘Ahnsou me I tikitik, I kin iang ahi pahpa/nohno kalohk. I perenki kalohk ansouo. Ahpw, mwuhr I pehmada me I kin weksang mehteikan. Ni ahnsou me I tepiada pehm soahng pwukat, I kin apwalki koasoi ong ienge tohnsukuhl kan duwen padahk mehlel. Ahnsou me kiht kin kalohk ihmw-lel-ihmw, I masak me I pahn tuhwong ienge tohnsukuhl kan. Ansouo, I kak nda me I kin masak aramas. [Lepin Padahk 29:25] Ahnsou me I nek sang sukuhl, I men song doadoahk en temporary pioneer (ih eden auxiliary pioneer mahs). Ih ahnsou me I inenen perenki kalohk laud sang ahnsou kan koaros mwowe. I solahr kin medemedewe ong kalohk duwehte ahnsou me I tikitik, de I solahr kin nda me e wia doadoahk kapwang. Ahpw, ahnsou me I kin kilang aramas me I kin onop Paipel rehrail wia kekeirada ni pali ngehn, ih ahnsou me I inenen perenki mehlel me Siohwa Koht kin sewese ie.’ Mwuhr, sounkalohk pwulupwul menet tepida regular pioneer.
11 Mehlel, ahnsou me tohto kin iang doadoahk en auxiliary pioneer, met kin kahrehda kitail pahn lel tohnihmw kan koaros nan atail wasahn kalohk. Brothero me kin kihpeseng pwihn en kalohk kak idek rehn auxiliary pioneer kan ma irail kak sewese wia wasahn kalohk kan me kitail sohte kin kalap wia. Kitail kak wahda kenatail mwengen souwas oh kalohk rahn pwon pwehn kak lel wasa doh kan.
12 Elder kan Anahne Koasoanehdi Mwowe: Nan sounpwong kan en March, April oh May, elder kan anahne koasoanehdi soangsoangen kalohk ahnsou tohto nan ehu ehu wihk, iangahki kalohk en ni soutik, pwe sounkalohk koaros kak en iang. Elder kan anahne koasoanehdi kalohk en naniahl, sidohwa-lel-sidohwa, ihmw kan me sohte towe ahnsou kalohk en ihmw-lel-ihmw (not-at-homes), iangahki kalohk en ihmw-lel-ihmw. Ni ahl wet, elder kan kak sewese irail me iang doadoahk en pioneer en kak iang tohnmwomwohdiso teikan en kalohk ahnsou me mwahu ong irail. Elder kan pahn kehsehki mwomwohdiso duwen koasoandi en kalohk koaros. Brothero me pahn kihpeseng pwihn en kalohk pahn soandi mwahu nin duwen eh wia kihpeseng. Oh pil, brothero pahn kihong sounkalohk koaros wasahn kalohk laud pwe irail en kak lel arail awa kan. Brother me kin apwalih makasihn oh pwuhk kan pahn mwadang oaht makasihn oh pwuhk kan pwehn itar ong sounpwong kan en March, April oh May.
13 Koasoanehdi Pein Ahmw Koasoandi Ong Kalohk: Emen brother, me nin tepio masak iang auxiliary pioneer, koasoia: “E mengei sang dahme I lemeleme. Ihte ke anahne koasoanehdi mwahu ahmw ahnsou.” Ni pali 6, ke kilang me mie koasoandi kei me mwein ehu pahn mwahu ong uhk? Ihte ke pahn koasoanehdi en iang kalohk awa 15 nan wihk ehu ma ke auxiliary pioneer.
14 Ma lih pwopwoud kan me kin mihmi nan ihmw (housewives) oh irail me kin doadoahk mwurin souwas men en iang doadoahk en auxiliary pioneer, irail kak iang kalohk ni menseng kan. Irail me kin iang sukuhl oh irail me kin doadoahk ni pwong kak iang kalohk mwurin souwas oh ni soutik kan. Irail me kin doadoahk rahn pwon (full-time) kakete iang doadoahk en auxiliary pioneer ma irail kommoal ekei rahn en doadoahk kan pwehn kalohk de irail kak kalohk Rahn Kaunop rahn pwon oh Rahn Sarawi awa kan mwurin mihding oh iangahki ni soutik kan me irail kak kalohk (ni soutik kan me sohte mihding). Ong irail kan me ihte kak kalohk Rahn Kaunop kan oh Rahn Sarawi kan kin pilada sounpwong kan me mie Rahn Kaunop kan me limau oh Rahn Sarawi kan me limau. Nan March, April oh November 1997, mie Rahn Kaunop kan me limau oh Rahn Sarawi kan me limau. Doadoahngki wasao ni pali 6 pwehn ntingihdi dahme pein ahmw koasoandi ong kalohk. Medemedewe oh kapakap duwen koasoandi ehu me pahn keieu mwahu ong pein kowe.
15 Ehu kamwahupen auxiliary pioneer iei ke kak pilada mehnia sounpwong kan me ke mwahuki iang auxiliary pioneer. Ke kak auxiliary pioneer pak tohto nan sounpahr ehu ma ke mwahuki. Ma ke men auxiliary pioneer sounpwong koaros (continuous auxiliary pioneer), ahpw sohte kak, dahme ke soh pahn wia soangen koasoandi duwehte met: auxiliary pioneer sounpwong ehu, kommoal sang auxiliary pioneer sounpwong ehu, auxiliary pioneer sounpwong ehu oh wia soangen koasoandi nan sounpahr kan (auxiliary pioneer every other month throughout the year)? Ahpw, ekei kin auxiliary pioneer kaukaule (continuous auxiliary pioneer) sounpahr koaros.
16 Doadoahk Ehu Pwehn Kaunopada Ong Wiahki Emen Regular Pioneer: Tohto me kin ngoangki doadoahk en pioneer men en wiahla regular pioneer men, ahpw irail kin medemedewe ma irail kak ong nin duwen arail ahnsou, arail irair kan oh arail kehl. Ei, mehlel, mwein tohto me iang doadoahk en regular pioneer met tepida iang doadoahk en auxiliary pioneer pwehn kaunopada ong regular pioneer. Ma emen auxiliary pioneer pahn kalaudehla eh awa ong kalohk awa ehute, de pil rahn ehu pwon, e kak wiahla emen regular pioneer. Pwehn kak kilang ma ke kakong koasoandi wet, dahme ke soh song en wia awa 90 nan sounpwong ehu de sounpwong tohto sang ehu? Ni ahnsou me ke wia met, ke pahn tuhwong aramas tohto sang mahs oh ke kakete pwurala rehn irail oh tepida onop Paipel rehrail, oh ni ahl wet ke pahn perenki ahmw iang doadoahk en pioneer.
17 Emen sister perenki sounpahr weneu me e iang doadoahk en auxiliary pioneer. Ni ahnsou me e kin iang doadoahk en auxiliary pioneer, e kin akedeiong iang doadoahk en regular pioneer. Pwehki eh mehn akedei, e song soangen doadoahk en mwohni pahieu pwehn kilang mehnia me pahn mwahu ong eh koasoandi en regular pioneer. Ahpw ahnsou me e kasawiada doadoahk en mwohni pahieu pwukat, e medemedewe me mwein e sohte kak iang doadoahk en regular pioneer. Ahpw, e kin nannanti peki sawas sang Siohwa. Ehu rahn, ahnsou me eh wia kaunopada ong mihding, e wadek artikel ehu nan September 1991 Atail Doadoahk Ong Wehio me koasoia: “Dahme ke soh kainenehong ahmw madamadau ong pwais en iang doadoahk en kahrehdo sihpw ah kaidehn medemedewe laud wiahda ahmw awa kan? (Sohn 4:35, 36)” Sistero koasoia: “I wadek wasao pak limau de weneu, oh I pehmada me Siohwa sapengki ahi pekipek. Ni ansouo, I koasoanehdi me I pahn iang doadoahk en regular pioneer.” Mendahki eh doadoahk en mwohni (part-time) me sohte uhdahn mwahu ong ahi koasoandi en regular pioneer, e wiahda nah doaropwe me e men iang doadoahk en regular pioneer. Ehu wihk mwuri, irail kawukila eh koasoandi ong eh doadoahk en mwohni oh koasoandio mwahu ong eh koasoandi en regular pioneer. E kaimwsekla oh nda: “E soh sansal me Siohwa sewese ie ni ahl wet?” oh e kapataiong: “Ahnsou me ke peki sawas sang Siohwa en kaweidkin uhk oh E sapengki ahmw pekipek, ke dehr teng sang ih—ke pahn anahne rong kanaieng kaweid wet oh kapwaiada.” Ma ahmw ineng en regular pioneer kin laud, mwein ni imwin ahmw iang auxiliary pioneer nan March, April oh May, ke pahn ese me ke kak pweida ma ke iang doadoahk en regular pioneer ehu rahn.
18 Kitail koaros wehwehkihlahr me Siohwa pahn kapaiada atail ngoangki wia doadoahk en kalohk oh e pahn sewese sapwellime aramas nin duwen irail kin nantiong kalohki rongamwahu en kamour nan sounpwong en March, April oh May. (Aiseia 52:7; Rom 10:15) Ke pahn kak mwekidki pakair me mie anahn ong 100,000 auxiliary pioneer nin duwen ahmw pahn iang doadoahk en auxiliary pioneer nan March? April? May?
[Koakon nan pali 3]
Iaduwen Ke Pahn Pweida Nin Duwen Emen Auxiliary Pioneer
■ Anehki lamalam en ehi me ke pahn pweida
■ Kapakap ong Siohwa me e pahn kapaiada ahmw nannanti
■ Luhke pil emen sounkalohk en iang uhk
■ Koasoanehdi ahmw ahnsou en kalohk me mwahu
■ Oaht makasihn kan me pahn itar
■ Utungada koasoandi ong mwomwohdiso ong kalohk
■ Rapahkihda ahnsou me ke kak kalohk ahnsou soh lipilipil