Kasalehong Mehteikan Pwuhken Wiaiong Mour En Ahmw Peneinei Nsenamwahu
1 Peneinei iei poahsoan en koasoandi en aramas, oh pwehki koasoandi wet ihme kahrehda mie kousapw kan, kahnihmw kan, state kan oh wehi kan. Rahnwet, soahng soangen kahpwal kin lelong koasoandi en peneinei laud sang mahs. Mie manaman kehlail kan me kin uhwong oh men kauwehla koasoandi en peneinei. Kitail kak kalahnganki kaweid sang Siohwa, Sounwiahda koasoandi en peneinei, me ketikihda kaweid me kak kahrehda nsenamwahu en peneinei! Irail me kin idawehn kaweid wet kin diarada me arail kahpwal kan tikitikla oh arail peneinei kin nsenamwahula. Nan October, kitail ahneki pwais en kasalehong mehteikan pwuhken Wiaiong Mour En Ahmw Peneinei Nsenamwahu. Koasoiaiong aramas duwen mour en peneinei. Koasoi ni kadek, lamalam en ehi, oh wehwe. Dahme ke pahn nda?
2 Ke kak tepida ni ahmw wia peidek wet:
◼ “Ke kin kilang me peneinei tohto apwalki powehdi kahpwal en mour kan? [Mweidong en sapeng.] Ripoht kan kasalehda me aramas tohto kin lelong kahpwal nan pein imwarail kan. Dahme ke lemeleme pahn sewese peneinei kan en diarada nsenamwahu oh peren? [Mweidong en sapeng.] Pwehki Koht me wiahda koasoandi en peneinei, e soh pahn mwahu ma kitail pahn kasawihada kaweid me e ketikihong kitail? [Wadek 2 Timoty 3:16, 17.] Kaweid kaselel pwukat kin mihmi nan pwuhken Wiaiong Mour En Ahmw Peneinei Nsenamwahu.” Mwurin mwo, idek rehn tohnihmwo mehnia kahpwal kin kalap kauwehla mour en peneinei rahn pwukat, oh kasalehda mehnia irelaud me kin pid kahpwalo, oh kihla pwuhko.
3 Ni ahmw pahn pwurehng pwurala rehn tohnihmwo, ke kak nantiong en tepida onop en Paipel reh ni ahmw pahn nda:
◼ “I medemedewe dahme ke nda rahn teio me pid mouren peneinei, oh I wahdo mehkot me I lemeleme ke pahn perenki. [Kasalehda brochure Kupwurki, pakalahng pali 16, oh wadek peidek weneu me mihmi powe.] Mehlel, emen emen tohnpeneinei anahne kapwaiada eh pwukoah pwe peneinei pwon en nsenamwahu. Ma mie ahmw ahnsou—minit kei—I men kamwomwada iaduwen ke kak paiekihda brochure wet.” Mwurin mwo, tepiada onop nan iren mehn kasukuhl 8.
4 Pil ehu ahl me ke kak tepiada ahmw koasoiong tohnihmwo iei en koasoia duwen kahpwal ehu oh nda:
◼ “Mendahki koaros men nsenamwahu oh peren, pali laud en ahnsou peneinei tohto saikinte kin kak nsenamwahu. Dahme ke lemeleme pahn sewese irail pwehn diarada peren mehlel? [Mweidong en sapeng.] Mahs mahsie, Pwuhk Sarawi kasalehdahr soangen kahpwal kan me kin lelong peneinei kan rahn pwukat. [Wadek 2 Timoty 3:1-3.] Oh pil, Pwuhk Sarawi kin sewese peneinei kan en doadoahngki kaweid wet pwehn kamwahuiala kahpwal kan oh nsenamwahu kohkohlahte. Kaweid pwukat kin mihmi nan pwuhken Wiaiong Mour En Ahmw Peneinei Nsenamwahu.” Mwurin mwo, pakalahng irelaud me tohnihmwo pahn perenki, oh kihla pwuhko.
5 Ahnsou me ke pwurehng pwurala rehn tohnihmwo, doadoahngki brochure “Kupwurki” pwehn tepiada onop en Paipel rehn tohnihmwo. Ke kak nda:
◼ “I perenki kilang me ke men kasawihada kaweid kan me mihmi nan Pwuhki Sarawi me kin pid duwen mour en peneinei. E sansal sangete mahs me ma aramas pahn doadoahngki kaweid en Pwuhk Sarawi arail mour en peneinei pahn pweida. E sansal sang dahme ntingihdi wasaht.” Wadek keieun parakrap nan iren mehn kasukuhl 1 nan brochure Kupwurki, iangahki wadek Melkahka 1:1-3 de Aiseia 48:17, 18. Ma ke kak, koasoiada luwen iren mehn kasukuhl 1. Idek rehn tohnihmwo ma kumwa kak koasoiada iren mehn kasukuhl 2 ehu rahn.
6 Duwen Neitail Pwuhk kan: Pwehki kitail kin wehwehki me neitail pwuhk kan inenen kesempwal oh kitail pil kin wehwehki me mwohni kin pwainda soahng kan (doaropwe, ink, oh soahng kan) pwehn wiahda pwuhk kan, kitail kin pweiek kihla makasihn kan, brochure kan, oh pwuhk kan ong aramas me kitail kin tuhwong? Kitail kin tehk me kitail sohte pahn kihong aramas me sohte pahn kalahnganki soahng pwukat? Ehu ahl me kitail kak tehk iei en idek rehn tohnihmwo ma e uhdahn pahn wadek dahme kitail men kihong irail.
7 Ahnsou me ke men kihla pwuhken “Mour En Ahmw Peneinei,” ke kak nda:
◼ “Ma ke inoukihong ie me ke uhdahn pahn wadek pwuhk wet, I pahn kihong uhk noumw pwuhk wet ni sohte isepe. [Mweidong en sapeng.] Mwein ke kin medemedewe dahme kahrehda se kak kihdi pwuhk kan rehn aramas ni soh isepe. Pwehki re kin kak pwurehng wiahda pwuhk kan sang sawas me aramas kin kihda. Ma ke men kihdo ahmw kisin sawas, I pahn perenki ale.” Emen brother sohte kin kalap ale sawas lao e kawukila soahng riau. Keieu, e kapataiong lepin lokaia ehu, oh nda: “Ma ke men kihdo ahmw kisin sawas rahnwet ong aht doadoahk, I pahn perenki ale.” Keriau, e awih ekis pwehn kihong tohnihmw ahnsou en medemedewe ma mie eh sawas e men kihda. Mwurin mwo, brothero pehm me ahnsou me e kin kihdi neitail pwuhk kan, aramas kin kalahnganki oh me tohnihmwo uhdahn pahn wadek dahme e kin kihdi.
8 Kitail anahne nannanti ehukihong aramas dahme kin wahdohng nsenamwahu mour en peneinei—idawehn kaweid me kohsang sapwellimen Koht Mahsen.—Melkahka 19:7-10.