Kapinga Siohwa Ni Atail Kin Wia Tiahk Mwahu
1 Ma ke mihmi likin ihmw ahnsou me melimel laud pahn wiawi, e inenen kansenamwahu en diar wasa ieu me ke kak rukla ie! Ma e karakar loale oh kansenamwahu nan ihmwo oh pil ma tohnihmwo kin kadek, ke pahn perenki mihmihte mwo. Doadoahk en kalohki Rongamwahu en Wehin Koht kin kahluwalahng aramas ong wasao me kitail kak rukla sang sampah me Sehdan kin wie kakaun. Eri, iaduwen—atail tiahk mwahu kak sewese meteikan en kilang ia uwen kansenamwahu atail wasahn rukuruk? Ei, pwe Sises pil kasalehda me aramas akan pahn ‘kilang amwail wiewia mwahu kan oh kapikapingahki Samamwail me ketiket nanleng.’—Madiu 5:16.
2 Iaduwen kitail kak kasalehda tiahk mwahu pwe meteikan kak mwekidki met oh men karanih Siohwa oh sapwellime pwihn? Kitail kak wia met ni atail pahn mweidohng sapwellimen Sises mahsen kan me ntingdi nan Luk 6:31 oh Luk 10:27 en kamwekid kitail ehu ehu rahn. Mahsen kan me mih nan iren Paipel pwukat pahn kamwekid kitail en kasalehda limpoak ong aramas akan, oh e pahn sansal me kitail weksang aramas teikan me kin mihmi nan sampah wet me dirkihla sempoak.
3 Emen sister me mihmi pohn sohp kilang me emen lih pwulopwul soumwahu en nan madau oh e sohla kak apwalih nah kisin seri men. Sistero peki rehn liho ma e kak sewese ih apwalih nah seri. Ahnsou me liho idek rehn sistero dahme e kak wia pwehn kasalehda ah kalahngan, sister nda: ‘Menlau rong Sounkadehdehn Siohwa kan ahnsou me re pahn lel imwomw ehu rahn.’ Liho wia met oh met ih oh eh pwoudo wiahlahr Sounkahdehdehn Siohwa kan. Wiewia mwahu kan me sistero kasalehda kahrehda liho mwekidki padahk en Wehio.
4 E Pid Atail Mour Pwon: Atail tiahk nan wasa kan me kitail mihmi, atail tiahk nan wasahn doadoahk oh imwen sukuhl, oh pil atail tiahk ahnsou me kitail kin mwadong oh kohla mwemweit kin kahrehong meteikan en pwungki kitail oh atail pelien lamalam de soh. Kahrehda, kitail en idek pein rehtail: ‘Iaduwen aramas teikan kin kilangwong pein ngehi oh ahi peneinei? Iaduwen—mehn mpat kan kin nda me imwat oh likin imwat kin mwakelekel oh soandi? Iengatail tohndoadoahk kan oh tohnsukuhl akan kin nda me kitail kin mwadang lel doadoahk de sukuhl oh kitail pwerisek? Meteikan kin kak nda me atail likou oh kapwat kin konehng Kristian oh kasalehda wahu ong meteikan?’ Atail tiahk mwahu kin kak kahrehong meteikan en men papah Siohwa duwehte kitail.
5 Piter kasalehda me aramas akan pahn kapailoke, uhwong oh lahlahwe Kristian kan. (1 Pit. 4:4) Kitail anahne kanahieng atail tiahk pwe aramas sohte pahn kak kauwe kitail pwe atail tiahk sohte konehng Kristian. (1 Pit. 2:12) Ma atail tiahk kin kahrehong aramas akan en kapinga Siohwa Koht, ih ahnsou me kitail pahn duwehte lamp kan me kin langalang powe, oh likamwete kitail kin peki rehn aramas en kohdo oh rukala nan wasahn rukuruk me Siohwa kin ketikihda.—Madiu 5:14-16.