Iaduwen Kitail Kak Kamwekid Aramas akan en Kamehlele
1 Aramas akan kin ese me wahnpoaron Pohl kin wia soangen sounkalohk oh sounpadahk me kin kahrehong aramas akan en kamehlele. (Wiewia 19:26) Nanmwarki Akripa pil mahsanih ong Pohl: “Nan erein ahnsou mwotomwot kiset I medemedewe me ke kak kahrehda ei wiahla Kristian.” (Wiewia 26:28, New World Translation) Dahme kahrehda ahnsou me Pohl kin kalohk, e kin kamwekid aramas akan en kamehlele? E kawehwe sang Pwuhk Sarawi oh e kin medemedewe dahme keieu pahn kamwekid irail me kin rong ih oh ihme e kin koasoiaiong irail.—Wiewia 28:23.
2 Pwehki kitail men kahlemengih Pohl, kitail pil anahne kamwekid aramas akan en kamehlele kitail ahnsou me kitail kalohk ong irail. Iaduwen? Ni atail pahn doadoahngki atail loalokong ahnsou me kitail koasoiong oh rong dahme re nda. (Lepin Padahk 16:23) Mie soahng siluh me kitail kak wia pwehn sewese aramas akan en kamehlele ahnsou me kitail kalohk ong irail.
3 Rong Kanahieng: Ahnsou me aramaso kin koasoi, rong kanahieng pwe ken kak diar mehkot me kumwa koaros pwungkipene. Ma e nda mehkot me kin mwomwen kauhdi amwa koasoipene, song en wehwehki dahme kahrehda e wia soangen koasoio. E pahn sewese kitail ma kitail pahn wehwehki dahme aramaso kin kamehlele, dahme kahrehda e kin kamehlele padahk ehu oh ma mie soahng kei me wiawi me kahrehong ih en uhdahn kamehlele padahko. (Lepin Padahk 18:13) Ni ahmw wia soangen koasoi oh peidek kan ni kadek, ke pahn song en wehwehki dahme mihmi nan eh madamadau.
4 Wia Peidek kan: Ma aramas emen kin kasalehda me e kin kamehlele padahk en Trinity, ke kak nda: “Sangete mahs ke kin kamehlele padahk en Trinity?” Mwurin e sapeng, ke kak nda: “Mwohn ke pilada me ke pahn kamehlele padahk en Trinity, ke kasawihada iren Paipel kan koaros me pid ire wet?” Ke kak pil nda: “Ma Koht kin kisehn Trinity, ke soh lemeleme me Paipel pahn kasalehda ni sansal padahk wet?” Sang dahme aramaso pahn nda, ke kak sewese ih en wehwehki dahme iren Paipel kan kin kasalehda duwen ire wet.
5 Kawehwe Mwahu: Emen Sounkadehde idek rehn emen lih me kin kamehlele me Sises iei Koht: ‘Ma ke men wia karasaras ieu pwehn kasalehda iaduwen aramas riemen kin duwehpenehte, mehnia karasaras me pid peneinei ke pahn doadoahngki?’ Liho nda: “I pahn doadoahngki pirien ehu.” Brothero nda: “Mwein ke pahn pil doadoahngki karasaras duwen mpwer ehu. Ahpw, sang dahme Sises mahsanih, e kin padahkiong aramas me Koht kin wia Samatail oh duwen pein ih: e kin kasalehda me e kin wia Sapwellimen Koht Ohl, sang mehpwukat: dahme Sises men kasalehong kitail?” Ih ahnsou me liho wehwehki me emen kin laud sang oh manaman sang mehteio. (Madiu 20:23; Sohn 14:28; 20:17) E sansal me sang kawehwe kan me brothero wia ong ih, e tepida kamehlele sang eh madamadau oh mohngiong duwen padahk mehlel me pid padahk en Trinity.
6 Ahpw, ni mehlel, kaidehn koaros pahn rong padahk mehlel, mendahki kitail kawehwe mwahu oh kasalehda dahme mehlel me mihmi nan Pwuhk Sarawi. Ahpw, duwehte Pohl, kitail en nantihong rapahki aramas akan me mohngiong mehlel nan atail wasahn kalohk, oh sewese irail pwe ren kak mwekidki oh kamehlele padahk en Paipel iangahki Rongamwahu en Wehin Koht.—Wiewia 19:8.