Siohwa Kin Likikihong Kitail Pwukoahn Wah Rongamwahu
1 Kitail ahneki pwais kaselel pwehki Siohwa kin likikihong kitail Rongamwahu me pid duwen Koht! (1 Deselonika 2:4) Mendahki ekei sohte men rong duwen Rongamwahu wet me pahn kak kamwekid arail mour, irail me mohngiong mehlel kan kin perenki rong duwehte irail me kin perenki ned lehn wai me pwohmwahu. (2 Kor. 2:14-16) Ong irail me kin rong oh peikiong Rongamwahuwo, e pahn kak wehwehki me irail kak ale komourparail. (Rom 1:16) Dahme kitail pahn wia ni atail pwukoahki Rongamwahu me Siohwa likikihong kitail?
2 Sises oh Sapwellime Wahnpoaron akan: Sapwellimen Sises pwukoa en kalohki Rongamwahu me keieu kesempwal nan eh mour. (Luk 4:18, 43) Mendahki mie ahnsou me e kin pwangada oh men mwengehda, sapwellime limpoak ong aramas oh sapwellime kalahngan me e kin kasalehda ong Rongamwahuwo kin kamwekid ih en ehukihong meteikan. (Mark 6:30-34) Sapwellime mahsen oh mehn kahlemeng mwahu kin kamwekid sapwellime tohnpadahk kan en kesempwaliki doadoahk en kalohki duwen Wehio.—Madiu 28:18-20; Mark 13:10.
3 Sapwellimen Sises wahnpoaron kan kin kahlemengih ih ni arail kin ngoangki kalohki Rongamwahu en Wehin Koht. Mendahki irail ale kalokolok oh aramas akan padahkiong irail en uhdi sang arail doadoahk en kalohk, “irail kin wonoweite ni padahk oh kawehwe Rongamwahu.” (Wiewia 5:40-42) Wahnpoaron Pohl kin doadoahk laud nan doadoahk wet. (1 Kor. 15:9, 10; Kolose 1:29) E karasaiong pwukoahn kalohki Rongamwahu duwehte pweipwand me aramas emen anahne pwain ong ienge men, oh e kakete mendahkihla pein ih oh soahng kan me e mwahuki pwehn kak pwainla pweipwando.—Wiewia 20:24; Rom 1:14-16.
4 Atail Pwukoa Rahnwet: Kalahnganki atail pwukoa sarawi me Siohwa likikihong kitail pahn kamwekid kitail en rapahki soangsoangen ahl oh wiepe kan en kalaudehla atail ahnsoun kalohk. (Rom 15:16) Emen ohl adaneki Edward, me kin mihmi nan wheelchair ahnsou koaros, kin mwomwohd ni wenihmwen hotel ehu oh kin koasoakoasoiaiong aramas me mihmi nan hotelo duwen eh pwoson. Ahpw, pwehki e men kalaudehla eh ahnsoun kalohk, e wiahda kisin pere ni were pickup truck, oh e kin seiloak mwail kid kid kei oh kalohki Rongamwahu nin duwen Regular Pioneer men. Duwehte Edward, aramas tohto rahnwet kin wekidala arail koasoandi kan pwehn kalaudehla arail ahnsoun kalohkiseli Rongamwahu.
5 Duwehte Sises oh sapwellime wahnpoaron kan, kitail en kihong doadoahk en kalohk en wia mehkot me keieu kesempwal nan atail mour. Ni atail pahn wia met, kitail kak kasalehda atail limpoak ong aramas oh pil kasalehda me kitail kalahnganki Rongamwahu me Siohwa likikihong kitail.