Kapinga Siohwa Ni Atail Kalohk Ahnsou Sohte Lipilipil
1 Sapwellimen Siohwa ladu lelepek kan kin rapahki ahnsou mwahu kan rahn koaros en kapinga Ih. (Melkahka 96:2, 3; Ipru 13:15) Ehu ahl me kitail kak wia met iei en kalohk ni ahnsou sohte lipilipil. Me tohto en irail kan me kin papah Siohwa rahnwet kin inenen kalahnganki arail pil iangehr rong Rongamwahu en Wehio pwehki emen e kalohk ong irail ni ahnsou sohte lipilipil.
2 Kalohk ong aramas emen ni ahnsou sohte lipilipil kakete pil kahrehong meteikan en pil rong duwen Wehio. Karasepe ieu, pwehki Sises koasoiong lihen Sameriao ni pwarer en Seikop kahrehda aramas tohto pil rong oh mwekidki Rongamwahuwo. (Sohn 4:6-30, 39-42) Ni ahnsou me Pohl oh Sailas selidi nan Pilipai, ira kalohk ong ohl men me wia silepen imwetengo, oh ohlo oh eh peneinei pwon alehdi padahk mehlel.—Wiewia 16:25-34.
3 Ahnsou Mwahu kan: Soangen ahnsou mwahu kan me ke ahneki pwehn kalohk ni ahnsou sohte lipilipil? Ekei kin kalohk ni ahnsou me irail kin netinet, ni arail iang taxi de bus, de ni ahnsou me irail awiawih arail pahn tuhwong toahkte. Ekei kin kalohk ni ahnsou me irail kin kommoal nan wasahn doadoahk de ni imwen sukuhl. Ma ke kin kihdi sawaspen Paipel kan wasa kan me aramas teikan pahn kak en kilang oh kak ale oh wadek oh met pahn kak elehda irail en kak peidek rehtail duwen dahme kitail kin kamehlele.—1 Piter 3:15.
4 Iaduwen Ke Kak Kalohk Ni Ahnsou Sohte Lipilipil: Emen kisin serepein me sounpahr isuh oh kin wia soangen aramas me kin kalap namenek ahpw rongada nan mihding ehu duwen kesempwalpen koaros en kalohk. Ehu rahn, mwohn ih oh ah nohno kohla netinet, e kihong nan eh kopwou brochure riau. Ni ahnsou me ah nohno wie pwapwain soahng kan me ira alehda, kisin serepeino kihong lih emen brochure ehu, oh liho perenki ale nah brochure. Ni ahnsou me emen idek rehn kisin serepeino dahme kamwekid ih en eimah oh tuhwong liho, serepein menet me kin nameneko sapeng: “Ihte me I nda: ‘Ready, Set, Go!’ oh mwurin mwo, I kin tangala oh koasoiong aramas oko!”
5 Pwehn kalohk ni ahnsou sohte lipilipil, kitail anahne ahneki soangen ngoang duwehte kisin serepeino. Dahme pahn kak sewese kitail? Kitail anahne kapakap pwehn kak ahneki soangen ngoango pwe kitail en kak en eimah oh koasoiong aramas teikan. (1 Deselonika 2:2) Kaunopada peidek de koasoi me pid duwen oaralapo me ke lemeleme me aramaso pahn perenki rong. Mwurin mwo, ken likih me Siohwa pahn ketin kapaiada ahmw kin nannanti.—Luk 12:11, 12.
6 Kalohk ni ahnsou sohte lipilipil ong aramas akan ehu ehu rahn kin wahdo kaping ong Siohwa oh pil kihong kitail peren. E pahn kak sewesehla aramaso en kak keid nan ahl me pahn kahluwalahng mour soutuk.