E Pahn Kalaudehla Ah Kasalehda Paipel!
1. Nin tepio, The Watchtower makisihn wiawihda ong ihs, oh The Golden Age makisihn wiawihda ong ihs?
1 Nan October 1, 1919, tepin makisihn en The Golden Age wiawihda. Makisihn wet wia mehn doadoahk kesempwal ehu nan kalohk. Pwekihda? Pwehki makisihn wet kin kasalehda oaralap kan me pali laud en aramas kin perenki wadek. Makisihn wet weksang The Watchtower makisihn pwe nin tepio, The Watchtower makisihn wiawihda ongete “pwihn tikitik.” (Luk 12:32) Sounkalohk kan en Wehio inenen perenkihda makisihn kapwo me kahrehda kohpeseng en The Golden Age tohtohsang kohpeseng en The Watchtower.
2. Ia eden The Golden Age makisihn rahnwet, oh ia kahrepen makisihn wet wiawihda sang nin tepio?
2 The Golden Age makisihn wiawihda pwehn kasalehiong aramas me Kaundahn Krais erein pahr kid pahn kak kamwahuwihala kahpwal tohto en aramas akan, oh sang pahr kido kohla, aramas akan pahn perenki mour kohkohlahte nin sampah. Sounpahr kei mwuri, mie wekidekla kan me wiawi ong The Golden Age makisihn pwehn sewese aramas akan oh arail anahn me wekiwekila pwehki irair en ahnsou kan. Nan pahr 1937, eden makisihn wekila oh makisihn wet adanekihla Consolation. Nan pahr 1946, makisihn wet uhd adanekihla Awake!, ahd me kitail koaros kin doadoahngki rahnwet.
3. Awake! makisihn kin wia dipwisou kesempwal ehu ong pweidahn mehnia kokohp?
3 Sangete nin tepio, makisihn wet kin sewese aramas tohto nan kalohk me tepida nan pahr 1919. (Madiu 24:14) Ahpw, pwehki imwin rahn akan me kitail mihmi loale, e pahn kesempwal en wia wekidekla kan ong Awake! makisihn.
4. (a) Dahme aramas emen anahne wia ma e men pitsang “rahn en sapwellimen Siohwa engieng”? (b) Nin duwen dahme Kaudiahl 14:6, 7 kin kasalehda, dahme “tohnleng me pipihr nan wehwe” padahkiong kitail koaros en wia?
4 Aramas rar rar kei kin perenki wadek Awake! makisihn pwehki e kin audaudki soangsoangen oaralap kan oh e kin kasalehda duwen oaralap kan ni ahl me aramas kin perenki wadek. E sansal me pali laud en aramas me kin iang towehda Kataman nan pahr koaros kin kalap wadek Awake! makisihn. Ahpw, ni mehlel, ma emen men pitsang “rahn en sapwellimen Siohwa engieng,” e pahn anahne wia laud sang ihte kaukaule wadek neitail makisihn kan.—Sepanaia 2:3, New World Translation; Kaudiahl 14:6, 7.
5. (a) Tepida sang Awake! makisihn en January 2006, dahme e pahn kasalehda? (b) Iaduwen aramas tohto pahn kak mwekidki met, oh met pahn pidada pweidahn mehnia kokohp?
5 Ihme kahrehda, sang January 2006, Awake! makisihn pahn koasoia laud duwen Wehin Koht. E pahn kangoange sounwadawad kan en rapahki nan Paipel ia mwomwen kaweid sang Paipel pahn kamwahuwihala arail kahpwal kan oh makisihn wet pil pahn kasalehda iaduwen Paipel kin kawehwehda duwen irair en sampah rahnwet. Ni ahl wet, sounwadawad kan pahn wehwehki mwahu duwen dahme wiawi nan sampah rahnpwukat oh met pahn kak kamwekid irail en sukuhliki duwen Siohwa.—Sekaraia 8:23.
6, 7. (a) Iaduwen Awake! makisihn pahn sewese aramas en doadoahngki kaweid en 1 Deselonika 2:13? (b) Pak depe nan sounpwong ehu me Society pahn wiahda Awake! makisihn kan, oh wekidekla wet pahn wiawiong persent depe en lokaia kan?
6 Awake! makisihn kin kaukaule kasalehda duwen oaralap kan me aramas kin perenki. Ahpw, e pahn kalaudehla ah kasalehda duwen Paipel. (1 Dese. 2:13) Pwehki The Watchtower makisihn kin audaudki ire loal kan en Paipel oh Awake! makisihn pahn kalaudehla ah kasalehda ire kan me kohsang nan Paipel, Awake! makisihn sohte pahn anahne wiawihda pak riau nan sounpwong ehu. Kahrehda, tepida sang sounpwong en January 2006, Awake! makisihn pahn wiawihda pak ehu nan sounpwong ehu. Met pahn kamengeila doadoahk en kaunopada, kawehwe oh kadarala makisihn wet.
7 Wekidekla wet pahn pidada persent 40 en lokaia kan me Awake! makisihn wiawihda. Nan pali laud en lokaia kan, Awake! kin wiawihda pak ehu nan sounpwong ehu de pak 4 nan pahr ehu. Sohte wekidekla pahn wiawi ong The Watchtower (Kahn Iroir) makisihn.
8. Iaduwen sounkalohk kan pahn kihla Awake! makisihn iangahki The Watchtower (Kahn Iroir) makisihn?
8 Sounkalohk kan kak kihla Awake! makisihn iangahki sohte lipilipil Watchtower (Kahn Iroir). Ni ahnsou me kitail pahn kihla Awake! makisihn nan sounpwong ehu, kitail sohte anahne wekidala atail padahk erein sounpwongo pwon.
9. Soangen sawas dahieu me Awake! makisihn pahn wiewia nan kalohk?
9 Sangete ahnsou me e tepin wiawihda nan pahr 1919, makisihn wet me mahs adaneki The Golden Age, Consolation, oh met adaneki Awake! kin wia sawas kesempwal nan doadoahk en kalohk. Se kapakapki me Siohwa pahn kaukaule kapaiada kihkihlahn makisihn wet ni ahnsou me wekidekla kapw wet pahn wiawi oh e pahn sewese aramas tohto me “kohsang nan wehi koaros, ni kadaudok koaros, nan sahpw koaros, oh lokaia koaros” pwe ren kak sohweiong Wehin Koht nin duwen arail koapworopwor.—Kaudiahl 7:9.