Ia Duwen Atail Kak Doadoahngki Pwuhken “Limpoak en Koht” Pwehn Wia Onop en Paipel kan
1. Ia kahrepen pwuhken “Limpoak en Koht” eh wiawihda?
1 Ia uwen kaperen en atail alehdi pwuhken “Dadaurete ni Limpoak en Koht”! Pwuhket sohte wiawihda pwehn padahkihong kitail tepin padahk kan en Paipel. E wiawihda pwehn sewese kitail en ese oh poakohng sapwellimen Siohwa koasoandi kan ong atail wiewia kan. Kitail sohte pahn kihla pwuhket nan kalohk en ihmw lel ihmw.
2. Ia duwen atail kak doadoahngki pwuhket, oh rehn ihs?
2 Pwuhket pahn wia keriaun pwuhk me tohnsukuhl en Paipel kan pahn onopki mwurin arail kanekehla pwuhken Paipel Padahngki. Tamataman me mwomwen aramas kan ar kekeirda en sukuhlki oh kapwaiada padahk mehlel kin wekpeseng. Ia uwen atail kin onop ehuehu ahnsou anahne konehng emenemen tohnsukuhl. Tehk kanahieng pwe tohnsukuhlo en uhdahn wehwehki ire kan. Pali laud en ahnsou, e sohte konehng kitail en doadoahngki pwuhket pwehn tapiada onop en Paipel rehn irail kan me onopkier ekei pwuhk kan mahs ahpw sohte kin iang towehda mihting kan en mwomwohdiso oh kin kasalehda ni sansal me re sohte men kapwaiada padahk mehlel en Paipel me re sukuhlkier nan arail mour. Duwehte pwuhken Paipel Padahngki, sounkalohko pahn pein koasoanehdi ma ira pahn koasoiapene oaritik kan ni imwin pwuhko.
3. Dahme kitail anahne wia ma neitail tohnsukuhlo papidaisla mwohn eh kanekehla pwuhken Paipel Padahngki oh “Limpoak en Koht”?
3 Ma tohnsukuhlo papidaisla mwohn eh kanekehla pwuhk riau pwukat koaros, ke anahne pousehla onop reh lao e pahn kanekehla pwuhken “Limpoak en Koht.” Mendahki tohnsukuhlo papidaislahr, ke kak ripohtki awa, pwurehng pwurala reh (return visit) oh onop. Sounkalohk me iang uhk onopo pil kak wadek awa.
4. Ia duwen atail kak doadoahngki pwuhken “Limpoak en Koht” pwehn sewese sounkalohk kan me wereila sohla kalohk?
4 Ma Wiliepen Pwihn en Elder kan koasoanehdi ken wia onop en Paipel rehn emen me wereila sohla kalohk, ele re pahn padahkihong uhk en onopki reh ekei irelaud kan nan pwuhken “Limpoak en Koht.” Soangen onop wet sohte anahne wiawi ahnsou reirei. Ia uwen kapai kaselel kitail ahneki nan pwuhk kapw wet me wiawihda pwehn sewese kitail en dadaurete “ni limpoak en Koht”!—Sud 21.