Koahiek en Doadoahngki Paipel
1. Dahme kahrehda Paipel kin kesempwal?
1 Koahiek en doadoahngki Mahsen en Koht kak kahrehda kitail en kalohki oh padahngki ni sansal duwen me mehlelo. Oh met pil kin sewese kitail en kak kasalehda padahk likamw oh tiahk sapwung kan en aramas.—2 Tim. 2:15; 1 Pit. 3:15, 16.
2. Dahme pahn sewese kitail en kak koahiek ong diarada iren Paipel kan?
2 Kalaudehla Omw Wehwehki Paipel: Duwehte dipwisou en doadoahk teikan, omw koahiekla pahn kohsang omw wehwehkihla laud. Omw wadekala Paipel pwon pahn sewese iuk en esehla oaralap en Paipel. Met pahn sewese iuk en tamataman iren Paipel kan oh pil mengei en diarada. Ni omw wehwehkihla Paipel eh kin wie lalaudla, ke pahn ahneki ngoang oh koapworopwor kehlail ni omw kin kalohk ong meteikan ni ahnsou sohte lipilipil oh pil ni ahnsoun kalohk.—1 Des. 1:5.
3, 4. (a) Ia ekei wiepe kan me pahn kalaudehla atail wehwehkihla neitail Paipel? (b) Mie pak me ke doadoahngki ekei wiepe tohrohr pwehn kalaudehla omw wehwehkihla Paipel?
3 Kaiahnehkin uhk en kin iang pahkalahng iren Paipel nan mihting kan en mwomwohdiso. Ni omw kin pein onop oh pil kaunopada ong mihting en mwomwohdiso, wadek iren Paipel kan koaros oh doudouloale ia duwen omw pahn doadoahngki. Me tohto kin diarada me en pein wadek ire kan sang nan Paipel kin mwahu sang en wadek sang nan computer de pil neitail sawasepen Paipel kan.—Sohn 14:26.
4 Ekei peneinei kan koasoanehdi en wadlikiala iren Paipel kan. Re kin wia met sang ni arail kin doadoahngki kisin doaropwe kan me re ntingihdi iren Paipel kan loale. Re kin ntingihdi ong apali doaropweo eden pwuhken nan Paipelo, irelaud oh iretikitik, oh ni apali re ntingihdi audepen ireo. Re kin wia met pwehn kilang ma re kak tamanda eden pwuhko, irelaudo oh iretikitiko de pil audepen iren Paipelo. En kamwomwada padahk me ke kaunopada en doadoahngki nan kalohk oh sapengla peidek me aramas akan kin idek ni omw doadoahngki iren Paipel kan pahn kalaudehla omw koahiek.
5. Dahme kahrehda kitail men kalaudehla atail koahiek en doadoahngki Paipel?
5 Sohte pwuhk me kesempwal duwehte Paipel. E kin audaudki mahsen kan me kak kihong aramas akan ‘erpit me kak kahluwairailahng nan mour soutuk.’ (2 Tim. 3:15) Pwehki aramas tohto sohte wehwehki ire kesempwal akan me rasehng takai kesempwal kan me kin dierek nan Paipel, iei me kahrehda kitail ahneki kahrepe mwahu en kalaudehla atail koahiek en kasalehiong irail dahme Paipel uhdahn kak kihong irail.—Lep. Pad. 2:1-5.