Koakon en Peidek
◼ Ia duwen koaros kak sawas pwe mihting kan en mwomwohdiso kak wia wasahn kasukuhl mwahu? (Deud. 31:12)
Pwehki atail wauneki Siohwa oh sapwellime koasoandi en mihting kan, kitail koaros en mwadang lel Wasahn Kaudok oh onopada pwehn ale kasukuhl sang reh. E pahn mwahu en mwohndi nan sehr kan en mwowe pwe sehr kan en mwuri en kohwohng irail kan me naineki kisin seri kan oh ong irail kan me ekei pak pwand. Mwohn mihting eh pahn tepida, kitail anahne kakunla soahng kan me duwehte cellphone pwehn dehr kedirepwe meteikan. E pahn kak katikihala mehn kerempwa kan ma koaros kin kasalehda wahu erein ahnsoun mihting.—Ekl. 5:1; Pil. 2:4.
Ma me kapw kan tepida iang towehda mihting kan, emen tohnmwomwohdiso me ese irail kak mwohndi rehrail. Met pahn sawas laud ma mie neirail kisin seri kan. En iang towehda mihting kan kak wia mehkot kapw ong peneineio. Ma ih duwen, re pahn men mwohd mwuri pwe re sohte pahn nohn kauwehla en meteikan ar rongorong ma re anahne kohla liki pwehn apwalihala anahn en neirail kisin seri kan. (Lep. Pad. 22:6, 15) Peneinei kan me naineki kisin seri kan en dehr mi nan ehu pere tohrohr me pahn kahrehiong neirail seri kan en medewe me re kak katairong. E pahn keieu mwahu ma pahpa oh nohno kan en kihong kaweid de apwalih anahn teikan en neirail seri likin Wasahn Kaudok.
Brother kan me kin sewese irail me towehda mihting (attendant kan) kin pwukoahki Wasahn Kaudok en soandi mwahu. Irail kin sewese peneinei kan oh irail kan me kin ekei pak pwand en rapahkihda dewerail. Brother pwukat anahne kanaiehng ni ahnsou me re sewese irail en mwohndi pwe irail en kak soandi mwahu oh dehr kauwehla en meteikan ar rongorong. Irail kin doadoahngki arail koahiek en madamadau pwehn apwalihala kahpwal kan me kakete pwarada. Ma en seri men eh wiewia kin kedirepwe meteikan, brother pwukat kak sawas ni elen kadek.
Koaros me kin iang towehda mihting kan ong kaudok kak sawas pwe mihting kan en kak wia wasahn kasukuhl mwahu. Met pahn sewese kitail en sukuhlki duwen Siohwa oh kupwure ong sampah kapw meleilei ehu.—Ipru 10:24, 25.