Wiahda Koasoandi kan Met Pwehn Kalaudehla Omw Doadoahk en Kalohk
1. Soangen ahnsou mwahu dah me kitail ahneki erein ahnsou kan en Kataman? Ia duwen atail kak kaunopada?
1 Nan ehuehu pahr, sounpwong kan mwowe oh mwurin ahnsoun Kataman kin wia ahnsou mwahu kitail en “kapingkalahngan ni ngihl laud ong KAUN-O.” (Mel. 109:30) Ke pahn kalaudehla omw ahnsoun kalohk erein sounpwong en March pwehn kasalehda omw kalahngan ong Ih me ketikihda meirong en Sises? Met iei ahnsoun ken tepida wiahda omw koasoandi kan.—Lep. Pad. 21:5.
2. Ia duwen kowe oh meteikan amwail mwekidki koasoandi en iang sawaspen pioneer oh wiahda awahte 30 nan sounpwong en April me nekiero?
2 Wia Emen Sounsawaspen Pioneer: Nan pahr me ahpwtehn neko, mwomwohdiso kan perenkihda arail esehda me re kak wia sawaspen pioneer oh wiahda awa malaulaute nan April. Emen brother koasoia: “I kin iang sukuhl (pwihn 9-12), oh e uhdahn apwal ong ie ien iang pioneer. Ahpw I pahn audehda nei doaropwehn sawaspen pioneer ong awa 30, oh nantihong wiahda awa 50 nan sounpwong en April.” Emen sister me kin doadoahk en mwohni mpen awa 40 nan wihk ehu koasoia: “Awa silihsek? Met uhdahn kak wiawi!” Ahnsou me pakairo wiawi me kitail kak wiahda awahte 30, emen sister me kin iang pioneer mahs, me met sounparehr 80 samwa, koasoia: “I kin uhdahn kasikasik soangen ahnsou duwe met! Siohwa ketin mwahngih me doadoahk en pioneer iei me I keieu perenki nan ei mour!” Irail kan me sohte kak iang sawaspen pioneer kak wiahda mehn akadei kan en kalaudehla arail doadoahk en kalohk.
3. Dahme kahrehda kitail en medemedewe iang sawaspen pioneer nan sounpwong en March, April, oh May?
3 Sounpwong en March pahn wia ahnsou mwahu kitail en iang sawaspen pioneer. Met pwehki ihte nan sounpwong wet me kitail pahn pwurehng pilada ma kitail pahn wiahda awa 30 de 50. Patehng met, tepida sang Rahn Kaunop, March 17, kitail pahn iang doadoahk en kalohk tohrohr ehu pwehn luke meteikan ren iang kitail kasarawih rahn en Kataman nan April 5. Me tohto pahn perenkihda arail kak kalaudehla arail pwais en kalohk oh re pahn kakete iang sawaspen pioneer nan sounpwong en April oh May oh wiahda awa 50.
4. Ia duwen atail kak kalaudehla atail pwais en kalohk? Dahme met kin imwikihla?
4 Ahnsou me kumwail pahn pwurehng wia amwail Kaudok en Peneinei en ni soutik, dahme kumwail sou koasoiapene ia duwen emenemen sang nan amwail peneinei eh kak kalaudehla eh doadoahk en kalohk nan sounpwong kan erein ahnsoun Kataman? (Lep. Pad. 15:22) Peki rehn Siohwa en ketin kapaiada omw nannanti. (1 Sohn 3:22) Ni omw pahn kalaudehla omw pwais en kalohk, kaidehn ihte ke pahn kalaudehla omw kin kapinga Siohwa ahpw ke pil pahn kalaudehla omw peren.—2 Kor. 9:6.