“Ahneki Limpoak ong Pwihn Minimin en Riamwail kan Pwon”
Mahsen pwukat ntingdi sounpar kereniong riekid samwalahro. (1 Pit. 2:17, NW) Ahpw kitail anahne kapwaiada met laudsang mahs. Ia duwen atail kak poakohng pwihn en pirien laud ehu nan sampah pwon? Oh nan sampah sempoak wet, ia duwen atail kak kanahieng pwe atail limpoak en dehr tikitikla? (Mad. 24:12) Kilang ma ke kak sapengala peidek kan pah ni omw kilang kasdo me adaneki Our Whole Association of Brothers.
(1) Iahd me kitail uhdahn wiahla kisehn pirien en Kristian ehu? (2) Wiewia siluh dah kan me riatail Kristian koaros nan sampah kin iang wia? (3) Ia duwen riatail kan ar kin kasalehda arail koasoanehdi teng en kalohk (a) nan wasa doh kan en Alaska, (b) nan wasahn peidi en sohp kan en Iurop, oh (c) nan wel en Peru? (4) Dahme kahrehda atail doadoahk en kalohk wia doadoahk inenen kesempwal ehu? (5) Kihda karasepe kan duwen Sounkadehdehn Siohwa kan ar kin kansenamwahwih oh sewese emenemen (a) mwurin rerrer en sahpw, (b) mwurin melimel ehu, oh (c) erein mahwen me wiawi nanpwungen tohnwehi ehu? (6) Ahl mwahu dah kan kitail koaros kak kasalehda kilel en pirien en Kristian kan? (Sohn 13:35) (7) Ia kamwahu kan en doadoahkpene kauwada pein atail Wasahn Kaudok kan? (8) Ia duwen riatail kan nan palimesehn Iurop oh Russia arail kolokolete nanpwungmwahu rehn Siohwa ni arail doadoahk kin keinapwidi? (9) Soangen nanti laud dah me Sounkadehde tohto wia pwe ren towehda kapokon kan oh dahme kahrehda? (10) Ia duwen kasdo wet eh kakehlakahda omw koasoanehdi teng (a) en kaudokiong Siohwa ni mihting kan oh miniminiong riomw Kristian akan, (b) en sewese meteikan ni ahnsou me re anahne, oh (c) en kalohk ni lelepek mendahki soangen ahnsou de wiepe dah? (11) Ia mwomwen oh iahd kitail kak doadoahngki kasdo wet nan kalohk?
Kahrepe keieu kitail kin wia kisehn pwihn en Kristian pirien ehu iei atail limpoak ong Siohwa. Eri kitail kin perenki sukuhlki duwen ih oh padahkihong meteikan. Oh kitail pil kin poakohng aramas akan me Siohwa kin ketin poakohng. Ni atail kin sewese irail ni ahnsou kan me re anahne, kitail sohte kin kasik me Koht en ketin kalahngankihong kitail. Ahpw kitail kin kalahngankihong Koht pwe kitail wiahki riatail kan nin duwen kisakis kesempwal ehu sang reh. Ni imwin rahn en koasoandi sempoak wet eh kin kohkohlahng imwisekla, kitail en pousehlahte kasalehda limpoak ong riatail kan nan sampah pwon!