Iaduwen Aramas Pahn Sukuhliki en Kasalehda Limpoak Mehlel

“Limpoak iei winiepen mour; limpoak iei ih me mour.”​—sang pwuhk me oaralap koasoia “Living to Purpose” me Joseph Johnson ntingihdi nan pahr 1871.

IADUWEN aramas emen ah pahn kak sukuhliki en kasalehda limpoak? Sang ni ah pahn sukuhliki psychology? De sang pein onop pwuhk kan? De sang ni ah pahn kin kilikilang kasdohn limpoak kan? Uhdahn soh. Aramas kin tepin sukuhliki en kasalehda limpoak sang rehn arail pahpa oh nohno kan. Seri kan pahn sukuhliki wehwehn limpoak ma irail mih nan wasahkis me diren limpoak, oh ma re kilang arail pahpa oh nohno kin kamwenge irail oh pere irail sang apwal akan oh koasoiong irail oh kasalehda me re nsenohki laud arail anahn akan. Irail pil kin sukuhliki en kasalehda limpoak ni ahnsou me arail pahpa oh nohno kin padahkiong irail en wauneki oh kapwaiada koasoandi oh kosonned akan me kasalehda dahme mwahu oh dahme suwed.

Limpoak mehlel kin laud sang ihte mehkan me ke kilang mas liki. E kin sansaliki nsenohki dahme keieu mwahu ong aramas teikan, mehnda ma re sohte uhdahn perenki nsenoh me kohwong irail ahnsowo, oh met kin kalap mehlel ong seri kan ni ahnsou me kaweid limpoak kin kohwong irail. Mehn karasepe mwahu en emen me kin kasalehda limpoak mehlel iei Sounkapikpatail, Siohwa Koht. Wahnpoaron Pohl ntingihdi: “Nei kompoake, ke dehr pohnsehse ni [“Siohwa,” NW] Koht eh kin ketin kapwunguhkala; oh dehr nan kapehd tikitingkihla sapwellime kopwung. Pwe Kauno [“Siohwa,” NW] kin ketin kapwungala me e kin ketin loalloale.”​—Ipru 12:5, 6.

Pahpa/nohno kan, iaduwen kumwail kak kahlemengih Siohwa ong kasalehda limpoak ong amwail peneinei? Oh ia uwen kesempwal ahmw wia mehn kahlemeng mwahu ni ahmw kin kasalehong ahmw pwoud limpoak mehlel?

Padahkih Limpoak Sang Ni Mehn Kahlemeng

Ma kowe ohl pwopwoud men, ke kin wia me kansenamwahu ong ahmw pwoud lih, kesempwaliki ih, kapinga ih, oh wauneki ih? Ma kowe lih pwopwoud men, ke kin poakohng ahmw pwoud ohl oh utungada ah koasoandi kan? Paipel mahsanih me ohl pwopwoud oh lih pwopwoud en uhdahn limpoak ong oh wauneki emenemen. (Episos 5:28; Taitus 2:4) Ni ara pahn kin wia met, neira seri kan pahn kilangada mehn kahlemeng mwahu en limpoak en Kristian. Ia uwen met ah pahn wia mehn kasukuhl kesempwal oh kehlail!

Pahpa/nohno pil kak kasalehda limpoak nan imwara ni ahnsou me ira kin mehleliong kapwaiada ara kesempwaliki ara peneinei ni mehkan me pid mehn kamweit, tiahk mwakelekel, dahme kesempwal nan mour oh mehn akadei kan en mour. Wasa koaros nan sampah, aramas kin diarada me Paipel kin sewese irail ong koasoanehdi koasoandi en peneinei oh kin kasalehda mwahu me Paipel uhdahn “pwilisang rehn Koht oh e mwahu ong atail doadoahk en padahkiong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16) Ni mehlel, kaweidpen mour mwakelekel oh mehn kaweid en mour me kohda nan Kapahrek en Pohn Dohl​—⁠pil Kapahrek wet kelepw​—⁠sohte aramas kak kihda kaweid me kak mwahu sang.​—Madiu irelaud 5 lel 7.

Ni ahnsou me peneinei ehu pwon kin kilangwong Koht pwehn ale kaweid oh tengediong sapwellime koasoandi kan, emen emen kak pehm me re ahneki nsenamwahu oh seri kan pahn kak kekeirada oh ahneki limpoak oh wauneki arail pahpa/nohno kan. Ni pali teio, nan ihmw akan me aramas akan kin mour riau oh sohte kesempwaliki tiahk mwahu, seri kan pahn kin kalap pwunod, sapeik oh kelingeringer.​—Rom 2:21; Kolose 3:21.

Ahpw, iaduwen pahpa de nohno me kiripw kan? Arail irair kin wia mehkot inenen apwal en kasukuhlih duwen limpoak ong neirail seri kan? Soh. Edetehn e mehlel me sohte mehkot mwahu sang ehupenehn pahpa oh nohno, ahpw e pil mehlel me pak tohto ehupene mwahu en emen emen nan soangen peneinei wet kak kasalongehla anahnpen pahpa oh nohno koaros en mihmi nan peneinei. Ma komwi sohte ahmw werek, nannanti en kapwaiada koasoandi en Paipel nan ahmw peneinei. Ei, ehu lepin padahk mahsanih: “Likih Kauno [“Siohwa,” NW] ni mohngiong unsek. Dehr koapworopworki mehkan me ke pein lemeleme me ke ese. Tamanda Kauno [“Siohwa,” NW] ni omw wiewia kan koaros, oh e pahn ketin kasalehiong uhk ahl me pwung”​—met pil kin wehwehki elen wia pahpa oh nohno mwahu men.​—Lepin Padahk 3:5, 6; Seims 1:5.

Aramas pwulopwul mwahu tohto kin tikida nan peneinei me sohte arail pahpa de sohte arail nohno oh irail wiahlahr sounpapah lelepek kei nan mwomwohdiso en Kristian kid kei nan sampah pwon. Met wia kasalepen me pahpa oh nohno kiripw akan pil kak wiahla peneinei pweida kei ni arail padahkiong neirail seri kan duwen limpoak.

Iaduwen Koaros Ahr Kak Kakairada Limpoak

Paipel kohpadahr me “imwin rahn akan” pahn sansalki “sempoak” me wehwehki sohla pahn mie kerenpenehn pepehm me kin uhdahn mie nanpwungen tohnpeneinei kan. (2 Timoty 3:1, 3) Ahpw, mendahki met, irail akan me keirida nan wasa me sohte limpoak kin mie pahn kak kakairada limpoak nan loalerail. Iaduwen? Ni arail pahn ale kasukuhl sang rehn Siohwa, Koht mehlel me wia poahsoanpen limpoak oh me kin ketikihda limpoak ong koaros me kin mohngiong mehlel ong Ih. (1 Sohn 4:7, 8) Sounmelkahkao mahsanih: “Semei oh inei pil kak keseiehla, ahpw Kauno [“Siohwa,” NW] pahn ketin apwahpwahlih ie.”​—Melkahka 27:10.

Siohwa kin ketin kasalehda sapwellime limpoak ong kitail ni soangen ahl tohto. Met pil kin pid kaweid nin duwen papah men ni ah kin ketikihda Paipel, oh E pil kin ketin sawaski ngehn sarawi, oh pil sang ni utuht limpoak en riatail Kristian akan. (Melkahka 119:97-105; Luk 11:13; Ipru 10:24, 25) Tehk iaduwen soangen elen kisakis siluh pwukat a kin sewese kitail en kakairada atail limpoak ong Koht oh mehn mpatail.

Kaweid Sarawi me Kohsang Pahpa men

Pwe en kairada limpoak ong aramas emen, kitail uhdahn pahn esehla mwahu aramaso. Sang ni Siohwa ah kin kasalehda duwen pein Ih sang nan Paipel, Siohwa kin luhke kitail en karanih Ih. Ahpw, wadewadekete Paipel sohte itar. Kitail anahne doadoahngki audepen padahk kan pwe kitail en pein pehm kamwahupe kan. (Melkahka 19:7-​10) Aiseia 48:17 (NW) mahsanih: “Ngehi, Siohwa, ngehi amwail Koht, Ih me kupwurki padahkihiuk pwe en wia kamwahu ehu ong uhk, oh Ih me kin kahluwa kumwail en keid nan ahlo me kumwail uhdahn pahn keid ie.” Ei, Siohwa, me iei Ih me kin wia kasalepen limpoak mehlel, iei Ih me kin kaweid kitail ong dahme pahn keieu mwahu ong kitail​—kaidehn pwehki E kupwurki en irehdi atail saledek ki kosonned soh katepe kan.

Wehwehkihla mwahu audepen Pwuhk Sarawi pil kin sewese kitail en kakairada atail limpoak ong aramas teikan. Met kin wiawi pwehki padahk mehlel en Paipel kin padahkiong kitail duwen kupwuren Koht ong aramas akan oh pil kasalehiong kitail elen kaweid akan me pahn kaweid atail wiewia kan ong aramas teikan. Sang ni soangen mehn padahk pwukat, e kin wia mehn kaweid kehlail ehu en kakairada atail limpoak ong mehn mpatail. Wahnpoaron Pohl mahsanih: “I kin kapakap pwe amwail limpoak en lalaudla pwe kumwail en marainkihla loalokong mehlel oh wia kadeik pwung.”​—Pilipai 1:9.

Pwehn karasahda iaduwen limpoak ah kak kaweid mwahu ki “loalokong mehlel,” kitail tehk poahsoanpen padahk mehlel me ntingihdi nan Wiewia 10:34, 35 me mahsanih: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” Ma Koht kin ketin poahsoankihda sapwellime elen kasawih aramas ki arail wiewia pwung oh lahn Koht, a kaidehn ki mehnia sahpw me aramas kohsang ie de soangen aramas en wasa dah men ih, e soh konehng kitail en pil kasawih aramas ni soangen ahlohte?​—Wiewia 17:26, 27; 1 Sohn 4:7-​11, 20, 21.

Limpoak​—Kisehn Wahn Ngehn en Koht

Duwehte keteu me kin mweredi ni ahnsou me keieu anahn ong tuhke kan ah kin kahrehda en wa mwahu, pil sapwellimen Koht ngehn sarawi kin wiahiong kapehden aramas mwahu men en ahneki irair akan me Paipel mahsanih me iei “wahn ngehn akan.” (Kalesia 5:22, 23) Me keieu kesempwal nanpwungen wah pwukat iei limpoak. (1 Korint 13:13) Ahpw, iaduwen atail kak alehdi sawas en sapwellimen Koht ngehn sarawi? Ahl keieu kesempwal iei sang ni kapakap. Ma kitail pahn kin kapakapki sapwellimen Koht ngehn sarawi, E pahn ketikihong kitail. (Luk 11:9-​13) Ke kin poaden kapakapki ngehn sarawi? Ma iei, eri wahn ngehn sarawi iei me iangahki limpoak pahn inenen sansal nan ahmw mour.

Ahpw, pil mie ehu soangen ngehn me kin pelianda sapwellimen Koht ngehn sarawi. Paipel kahdaneki met: “ngenen sampah.” (1 Korint 2:12; Episos 2:2) Met kin kihong emen en ahneki madamadau suwed, oh poasoanepe kin kohsang rehn Sehdan me Tepil, “kaun en sampah wet” me iei aramas akan me kin dohsang Koht. (Sohn 12:31) Me duwehte kisinieng me kin ipirada pwelipar oh kadipwidipw, “ngenen sampah” kin “ipirada” ineng kamedek kan me kin kauwehla limpoak oh kin elehiong luwet en uduk kan en pwarada.​—Kalesia 5:19-​21.

Aramas kin alehda ngehn suwed wet ni ahnsou me irail kin kamengeiong irail en lelohng irair en noahrok, roporop ong pein irail, madamadau oh tiahk lemei, oh ahnekihda madamadau sapwung duwen mwomwen limpoak me rek nan sampah. Ma ke men kekeirada ni ahmw pahn kasalehda limpoak mehlel, ke pahn anahne pelianda kehlail ngenen sampah. (Seims 4:7) Ke dehr likih pein ahmw kehl; ahpw ken likweriong Siohwa en ketin sewese iuk. Sapwellime ngehn sarawi​—kehl ieu me keieu kehlail nan wehwe​—kak kakehlailihiukala oh ketikihong uhk ken pweida mwahu nan ahmw mour.​—Melkahka 121:2.

Sukuhliki Limpoak Sang ni Pirienpenehn Kristian kan

Duwehte seri kan arail kak sukuhliki kasalehda limpoak sang dahme re ahn sang nan pein arail peneinei, kitail koaros​—sohte lipilipil ma kitail pwulopwul de mah​—kak kakairada irair en limpoak sang ni atail pahn werekiong Kristian teikan. (Sohn 13:34, 35) Ni mehlel, kahrepe ehu me kitail en wia kisehn mwomwohdiso en Kristian kan iei pwehki met kin wia wasa ieu me aramas akan en kak “kamwekid kitail en kak kasalehda limpoak oh wiewia mwahu kan ong emen emen.”​—Ipru 10:24, New International Version.

Soangen limpoak wet kin inenen kesempwal pahn irail oko me kin “wiakaula” nan sampah sempoak wet me kitail mihmi loale. (Madiu 9:36) E dehde mwahu me limpoak me aramas kin alehdi ahnsou me e wia aramas laud kak sewese powehdi kahpwal tohto me kin kohsang ni aramaso ah sohte ale limpoak ni ah tikitik. Eri, e inenen kesempwal me Kristian akan koaros me inoukihong Koht arail mour en kin kasalehda limpoak oh kasalehda me irail perenki aramas akan me kin tepida sukuhliki padahk mehlel oh met kin patehng irail!

“Limpoak Kin Pweida Ahnsou Koaros”

Paipel mahsanih me “limpoak kin pweida ahnsou koaros.” (1 Korint 13:8) Iaduwen? Wahnpoaron Pohl mahsanih: “Limpoak me kanengamah oh kadek; e sohte kin peirin de aklapalap de pohnmwahso; limpoak sohte kin aklemei, e sohte kin mehwo, de kin mwadang lingeringerda; limpoak sohte kin inaptihnmwomw.” (1 Korint 13:4, 5) E sansal mwahu me soangen limpoak duwehte met kaidehn mih ni mwohmwete. Ahpw, irail akan me kin kasalehda soangen limpoak wet kin wehwehki me mie arail kansensuwed oh kamedek kan nan mour wet, ahpw irail sohte kin mweidohng mepwukat en kauwehla arail limpoak ong meteikan. Soangen limpoak duwehte met ni mehlel iei “sahl unsek en ehupene.”​—Kolose 3:12-​14.

Tehk mehn kahlemeng mwahu en serepein men me sounpahr 17 me kin mihmi Korea. Ni ah tepida papah Siohwa Koht, ah peneinei sapwungki oh kausasang ih sang imwarail. Ahpw, e sohte lingeringeriong irail, ahpw me e wia​—⁠e kapakapki irairo, oh mweidohng Mahsen en Koht en kahluwa ah wiewia oh madamadau. Mwurin mwo, e kin kalap ntinglahng ah peneinei, oh ah koasoi kan kin audaudki ah poakpoake irail. Pwehki met, rie pwutak laud riemen tepida onop Paipel oh met ira wiahla Kristian kan me inoukihong Siohwa ara mour oh papidaislahr. Ah nohno oh rie pwutak tikitik pil alehda padahk mehlel. Mwurin mwo, ah pahpa me kin keieu uhwong ih pil wekidala mohngiongi. Serepein Sounkadehde menet ntingihdi: “Kiht koaros pwoudkihda Kristian, oh aht peneinei me miniminpene nan kaudok en Siohwa​—⁠kiht meh 23.” Ia uwen limpoak ah powehdi mehkan koaros!

Ke men kakairada limpoak mehlel oh sewese meteikan en pil wia duwehte? Eri, sohpeiong Siohwa me iei poahsoanpen irair kesempwal wet. Ei, alehda sapwellime Mahsen ni mehlel, kapakap peki sapwellime ngehn sarawi, oh kaukaule werekiong riomw Kristian kan. (Aiseia 11:9; Madiu 5:5) Ia uwen met a kaperen en ese me ahnsou keren me suwed koaros pahn sohlahr, oh irail kante me kin kasalehda limpoak mehlel en Kristian me pahn luwehdi! E mehlel, me limpoak iei poahsoan en mour nsenamwahu oh peren mehlel.​—Melkahka 37:10, 11; 1 Sohn 3:14.

[Kilels nan Pali 6]

Kapakap oh onop Mahsen en Koht pahn sewese kitail en kakairada limpoak mehlel