Kalaudehla Atail Koahiek nan Doadoahk en Kalohk—Ntingihdi Duwen Aramas me Perenki Rong

“Kanakanahieng pein kowe oh pil kanahieng omw padahk kan.” (1 Tim. 4:16) Sapwellimen Koht kaweid wet me wahnpoaron Pohl kihong Timoty kasalehda me mehnda ma kitail kapw de koahiek, kitail anahne nantihong kekeirda. Pwehn sewese kitail wia met, ire kapw ehu me oaralape iei “Kalaudehla Atail Koahiek nan Doadoahk en Kalohk” pahn kin pwurepwurehng kohda nan Atail Doadoahk ong Wehio. Ehuehu ire pwukat pahn koasoia oh kihda iren sawas kan duwen koahiek ehu me kesempwal oh kihda ekei sawas ong kakairada met. Erein sounpwongo, kangoang kohwong koaros en tehk mwahu duwen koahiek wet. Ni imwilahn sounpwongo, ehu padahk nan Mihting en Kalohk pahn kihong kitail ahnsou mwahu en koasoia ia duwen atail paiekihda met ni atail kin medemedewe duwen koahiek wet. Sounpwong wet kitail ale kangoang en ntingihdi ire kan me pid irail kan me perenki rong.

Dahme Kahrehda E Kesempwal: Pwehn kapwaiada atail pwukoa, kitail anahne wia laudsang ihte padahk nan kalohk. Kitail anahne pwurala rehn irail kan me perenki rong oh padahki irail. Kitail anahne kalamwuri weren padahk mehlel kan me kitail padokedi. (Mad. 28:19, 20; 1 Kor. 3:6-9) Met wehwehki en pwurehng rapahkihda aramaso, koasoia duwen dahme e kin nsenohki oh kalaudehla dahme kumwa koasoiahier mwowe. Kahrehda, ni atail kin tuhwong emen me kin perenki rong, kitail anahne ntingihdi ire kan me pid duwen met.