Pwurehng Pwurala rehn Aramas Koaros me Kasalehda Arail Men Rong
1 Pali laud en kitail kin mihmi nan padahk mehlel rahnwet pwehki mie me tehk atail men rong padahk en Wehio oh pwurehng pwurala rehtail ni kanengamah—mwein pak tohto—pwehn kekeirada atail nsenoh wet. Kitail pil anahne nannanti en pwurehng pwurala rehn aramas koaros me kin kasalehda arail men rong. Ni mehlel, en pwurehng pwurala rehrail kin pid atail pwukoa en “katohnpadahk.”—Madiu 28:19, 20.
2 Kasawih Arail Men Rong: Mendahki ma emen sohte ale pwuhk, ahpw mwomwen meseo, ngileo, de ah pilipil en lepin lokaia kan pahn kak kasalehda ah kalahngan. Poahsoankihda met, kitail pahn kak pwurala reh. Emen brother kin pwurepwurehng pwurala rehn emen ohl ki erein wihk limau ahpw e sohte kihdi pwuhk. Ni keweneun ah pwurala reh, ohlo ale pwuhk, oh mwuhr, onop en Paipel tepidahr wiawi.
3 Ma ke diarada emen me kasalehda irair en men rong, ken mwadang pwurala reh, mwein mwurin rahn riau de siluh. Ken dehr kihong “ngehn suwed” ahnsou en adihasang dahme kamweremwerdiong nan kapehdeo. (Madiu 13:19) Kolokol ahmw inou ma ke wiahda koasoandi kan en pwurala reh ni ehu ahnsou me kileledi.—Madiu 5:37.
4 Nan Kalohk Nanial: Ke kin nantiong en kekeirada ahn emen men rong me ke diarada ni ahmw kin iang doadoahk en kalohk nanial de kalohk wasa soh lipilipil? Ni kaimwiseklahn ahmw koasoi, ke kak nda: “I perenki ata koasoipene. Iawasa I kak pwurehng tuhwong komwi pwe kita kak pwurehng koasoipene?” Ni ahnsou me konehng, ekei sounkalohk kan kin pilada en kihong aramas me perenki rong neirail nempehn telephone de pil ale nein aramaso nempe. Ma aramas kan kin kaukaule kilang komwi nan wasa tehieu nan kalohk nanial, mwein irail pahn perenki kihong komwi nempe en neirail telephone de neirail address. Mendahki ma irail sohte men padahkiong komwi iaduwen ke kak pwurehng tuhwong irail, ke kak song en kalaudehla arail men rong ni ahnsou me ke pahn pwurehng tuhwong irail nanial.
5 Ni ahnsou me kitail kilang kisin tuhke kan me kitail kalamwurehki pihl oh apwalih kin pweida, met kin kihong kitail peren. Duwehte met, kitail kak ale peren laud ni atail kin pwurala rehn aramas akan oh sewese irail en kekeirada ni pali ngehn. (1 Korint 3:6) Menlau akadeiong en pwurehng pwurala rehn aramas koaros me kasalehda arail men rong.