Ke Anahne Pwurehng Pwurala!
1 “Uhdahn mwahu aht koasoipene! I anahne tamataman en pwurehng pwurala reh.” Mie pak me ke nda soangen lokaia pwukat oh mwuhr ke manokehla iawasa aramaso mih ie? Ma iei, ke pil tamataman me ihte ahl me ke kak tamanda en pwurehng pwurala reh iei ma ke pahn ntingihdi soahng koaros me ke anahne tamanda duwen ahnsou me ke tuhwong tohnihmwo.
2 Ntingihdi: Pwehki ke ahpwtehn koasoiong tohnihmwo oh ke tamatamante dahme kumwa koasoipene, uhdi mahs oh ntingihdi soahng koaros me ke anahne tamanda duwen ahnsou me ke tuhwong tohnihmwo. Ntingihdi eden tohnihmwo oh iaduwen ke pahn tamanda ih. Ntingihdi pwung iawasa e kin mihmi ie. Ntingihdi oaralap me kumwa koasoia oh iren Paipel kan me ke doadoahngki oh mehnia pwuhk de brochure de makisihn de tract me ke kihong ih.
3 Ma ke kasalehong tohnihmwo peidek me ke pahn sapengla ahnsou me ke pahn pwurehng pwurala reh ehu rahn, ntingihdi peideko. Ke sukuhliki mehkot duwen tohnihmwo, eh peneinei, de ah pelien lamalam? Ma iei, pil ntingihdi met. Mwurin mwo, ahnsou me ke pahn pwurehng pwurala reh, ahmw kasalehda me ke tamanda soahng pwukat pahn kasalehda me ke nsenohki tohnihmwo. Ntingihdi rahn oh ahnsou me ke tepin tuhwong ih oh mehnia rahn oh ahnsou me ke ndaiong ih me ke pahn pwurehng pwurala reh. Ni ahmw pahn ntingihdi pwung soahng pwukat, mehpwukat pahn wia mehn kataman sansal kan oh mehn kataman kan pahn sewese iuk en tamanda ahnsou me pahn pwurala rehn tohnihmwo.—1 Tim. 1:12.
4 Ahnsou me ke ntingihdi soahng pwukat koaros, ke pahn kihdi noumw pwuhk me ke ntingihdi loale nan wasa me ahmw dipwisou en kalohk mih ie—nan ahmw ehd en kalohk iangahki noumw Paipel oh noumw pwuhken Reasoning oh noumw pwuhk en kihla kan—pwe ahnsou koaros me ke pahn kalohk, ke pahn kak kolokol noumw pwuhk me ke ntingihdi duwen aramas me kin perenki rong. E pahn mwahu en katohrepeseng noumw doaropwe me ke kin ntingihdi duwen ihmw kan me sohte towe oh doaropwe kan me ke pahn ntingihdi duwen aramas me kin perenki rong me ke men pwurehng pwurala rehrail. Ahpw, ni mehlel, mendahki ke pahn nantihong ntingihdi dahme ke men tamanda duwen tohnihmw kan me kin perenki rong, dahme keieu kesempwal: ken pwurehng pwurala rehrail!
5 Medemedewe Duwen Aramaso: Ni ahmw pahn kaunopada ong kalohk, kousapahlih dahme ke ntingihdi duwen aramas akan me ke men pwurehng pwurala rehrail. Medemedewe duwen emen emen irail oh dahme ke pahn nda ahnsou me ke pahn pwurehng pwurala rehrail pwehn kahrehong irail en men rong. Ke pahn pil medemedewe dahme ke kak nda pwehn kahrehong aramas en men onop Pwuhk Sarawi. Ma ke pahn wia soangen kaunopada wet, ke pahn kilang me aramas me ke kin pwurehng pwurala rehrail pahn kekeirada oh ahmw peren nin duwen emen me kin kalohki Rongamwahu pahn laudla.—Lepin Padahk 21:5a.
6 Eri, ehu rahn ahnsou ke pahn tuhwong emen me uhdahn perenki rong, ke dehr lemeleme me ke pahn tamatamante aramaso. Ken ntingihdi dahme ke men tamanda duwen aramaso, ke pahn kousapahlih dahme ke ntingihdi oh ke pahn medemedewe duwen aramaso oh keieu, ke pahn nantihong en pwurehng pwurala reh!