Kalaudehla Atail Koahiek nan Doadoahk en Kalohk​—Kaunop Tohnihmwo en Kasik Atail Pahn Pwurehng Pwurala

Dahme Kahrehda E Kesempwal: Ni atail kin diar emen me perenki rong, kitail pahn men pwurala ni ahnsou me e mi ni imweo pwe kitail en kak kalamwurehki weren padahk mehlel me kitail padokedi. (1 Kor. 3:6) Met wehwehki me mwohn atail pahn kohkohlahsang rehn tohnihmwo, kitail anahne kaunopada tohnihmwo en kasikasik atail pahn pwurala ni atail diarada iahd me kitail kak pwurala. Patehng met, e mwahu en kihdi ehu peidek me kitail pahn pwurodo oh koasoiapene. Met pahn kahrehiong tohnihmwo en kasik atail pahn pwurala reh, oh ma peideko pasapengla nan pwuhk me kitail kihong, e pahn kahrehiong en men wadek. Atail kaunopada tohnihmwo en kasik dahme kitail pahn koasoiapene mwuhr, kin kamengeila atail pahn pwurala. Met pwehki kitail koasoanehdier oaralap me kitail pahn koasoiapene oh tohnihmwo pahn eseier dahme e pahn kasik. Ni atail pahn pwurehng tuhwong, kitail kak kawehwehiong me kitail pwurodohng sapengala peideko me kitail kasalehiong ih rahn me kitail tuhwongo oh eri doula.