Kalaudehla Atail Koahiek nan Doadoahk en Kalohk—Kasalehda Nsenohki Tohnihmwo
Dahme Kahrehda E Kesempwal: Sises kin ketin tehk emenemen aramas, oh e ketin kasalehda me e ketin nsenohki emenemen irail. Karasepe, ehu ahnsou, Sises mwahngih me ohl salengepon men kin namenek, eri ahnsou me e pahn ketin kamwahuiala ohlo, e kahrehla wasakis pwe pokono en dehr kilang. (Mark 7:31-35) E kin ketin kasalehda eh nsenohki sapwellime tohnpadahk kan sang ni eh kin pohnese me mie soahng kan me re sohte kak wia oh e sohte kin ketikihong irail ire kan me laudsang dahme re kakohng. (Sohn 16:12) Mendahki ma e pil ketiket nanleng, e kin ketin kasalehda eh nsenohki emenemen irail. (2 Tim. 4:17) Nin duwen sapwellimen Krais tohnpadahk kei, kitail men kahlemengih ih. (1 Pit. 2:21; 1 Sohn 3:16, 18) Patehng met, kitail pahn pweida nan atail kalohk ma kitail pahn kasalehda nsenohki tohnihmwo oh kilelehdi soangen irair kan me pid tohnihmwo, dahme e kin perenki, oh dahme e kin nsenohki. E pahn men rong ma e pehm me kitail sohte ihte kohlahng wia atail pwukoa en wahla rohng de kihdihte pwuhk kan, ahpw me kitail nsenohki ih.
Song Wia Met Erein Sounpwongo:
Kamwomwada erein kaudok en peneinei, de ni ahnsoun kalohk, sounkalohko pahn wekidala eh koasoi pwehn tehk dahme tohnihmwo nda.
Erein ekei tuhpenehn kalohk, brother me pahn kihpeseng pwihn en kalohk pahn kak koasoia de kamwomwada ekei ahl en kasalehda nsenohki tohnihmwo.