Wie Kekeirda nin Duwen Sounkalohk Koahiek men
1. Mehn kahlemeng dah kan sang ni mwehin tepin Kristian akan me kin kasalehda me kitail anahne wie kekeirda nin duwen sounkalohk kan?
1 Kristian kan anahne koahiekla nin duwen sounkalohk kan. Ihme kahrehda Sises ketikihong sapwellime tohnpadahk kan soangen kasukuhl me pahn kakairada arail koahiek nan doadoahk en kalohk. (Luk 9:1-5; 10:1-11) Ih pil kahrepe wet me Akwila oh Persila kasamwo Apolos oh “kawehwehiong ni oaritik duwen pwungen Ahl en Koht.” (Wiewia 18:24-26) Soangen kahrepeohte me Pohl kangoangehki sounkalohk koahiek Timoty en pousehlahte nantihong kekeirda nan eh padahk kan, pwe ‘koaros en kak kilang eh kekeirda.’ (1 Tim. 4:13-15) Sohte lipilipil ia uwen werei atail kin wia ladun Kauno men nin duwen sounkalohki rongamwahwo kan, kitail anahne pousehlahte kalaudehla atail koahiek en kalohk.
2. Ia duwen atail kak ale kasukuhl sang meteikan?
2 Ale Kasukuhl Sang Meteikan: Ehu ahl en kalaudehla atail koahiek kan iei ni atail pahn sukuhl sang meteikan. (Lep. Pad. 27:17) Ihme kahrehda, rong kanahieng ni ahnsou me iengomw sounkalohk men wia eh padahk. Peki ekei sawas kan sang irail me koahiek en koasoakoasoi nan kalohk, oh rong kanahieng dahme re pahn nda. (Lep. Pad. 1:5) Ia duwe, ke sohte nohn kin ese ia duwen omw pahn pwurehng pwurala rehn emen me men rong, tapiada ehu onop en Paipel, de wia soangen wiepen kalohk teikan? Tiengla mwowe, oh peki rehn omw sounapwalih en pwihn de emen sounkalohk koahiek men en padahkihong iuk. Pil tamataman met, me sapwellimen Siohwa manaman kak kalaudehla atail koahiek kan, eri kaukaule peki met nan omw kapakap.—Luk 11:13.
3. Ia duwen atail pahn mwekidki sawas ehu me kowohng kitail mehnda ma mwein kitail sohte peki reh sawas wet?
3 Ma ke alehdi ehu iren sawas en kamwahuiala omw koahiek, dehr mwakarkihda mehnda ma ke sohte peki reh sawas. (Ekl. 7:9) Duwehte Apolos, kasalehda aktikitik oh kalahnganki sawas me ke ale. Omw wia met kin kasalehda erpit.—Lep. Pad. 12:15.
4. Kahrepe kesempwal dahieu me Sises ketikihda ong kekeirda nin duwen sounkalohk men?
4 Kakairada Koahiek Kin Kapinga Koht: Ni eh kin ketin doadoahngki karasaras ehu, Sises ketin kangoangehki sapwellime tohnpadahk kan en kekeirda nin duwen sounkalohk koahiek kan. E ketin karasahiong ih nin duwen tuhkehn wain pwoat oh sapwellime tohnpadahk me keidi kan rah en tuhkeo. E ketin mahsanih me Sahmo kin ketin kamwakele ehuehu rah en tuhke ko me kin kapwarehda wah “pwe re en pil wa tohtohla.” (Sohn 15:2) Duwehte emen me ahneki mwetin wain ehu me men rah kan en pweida mwahu oh wa tohto, Siohwa ketin kupwurki kitail en pousehlahte kakairada atail koahiek en kapwarehda “wahn ewetail” kan. (Ipru 13:15, NW) Soangen imwila kansenamwahu dah me pahn kohsang atail kin kekeirda nin duwen sounkalohk men? Sises ketikihong kitail pasapengo: “Iet duwen lingaling en Sahmo eh pahn sansalda, ma kumwail pahn kapwarehda wa tohto.”—Sohn 15:8.