Ia Duwen Atail Kak Kamwakid Mohngiong en Irail kan me Kitail Kin Padahki
1. Dahme sapwellimen Sises padahk kin wiahiong mohngiong en irail kan me rongorong ih?
1 Sises Krais kin kamwakidada mohngiong en irail kan me rong ih. Ehu ahnsowo, mohngiong en sapwellime tohnpadahko “mwekimwekidki peren” mwurin eh ketin kawehwehiong ira Pwuhk Sarawi ni sansal. (Luk 24:32) Pwehki peikiong Koht anahne en kohsang nan mohngiong, ia duwen atail kak kamwakid irail kan me kitail kin padahki pwe ren pehm me re anahne wiahda wekidekla kan nan arail mour?—Rom 6:17.
2. Dahme kitail kak wia ni atail kin kamantik oh dehdehki mwahu irair kan pwehn kak kamwakid mohngiong en aramas emen?
2 En Kin Kamantik oh Dehdehki Mwahu Soahng kan: Pali moron en aramas sohte kin mwekidki ar kin ihte rong emen padahkihong irail dahme pwung oh dahme sapwung. Ni mehlel, ma kitail pahn doadoahngki kidalap en iren Paipel kan pwehn kauwe padahk kan en arail pelien lamalam pahn kakete kadohwanewei irail. Pwehn kamwakid aramas emen, keieu kitail pahn anahne en dehdehki kahrepe kan ong dahme e kamehlele oh eh wiewia kan. Ni kamantik, soangen peidek kan me kitail pahn pilada ni keneinei anahne en kangoange ih en kasalehda eh madamadau loal kan. (Lep. Pad. 20:5) Mwurin atail wia met, kitail kakehr pilada ire kan sang Mahsen en Koht me ele pahn kak kamwakid eh mohngiong. Ihme kahrehda, kitail anahne kasalehda atail nsenohki mehlel aramaso oh en kin kanengamahiong. (Lep. Pad. 25:15) Tamataman me mwomwen aramas kan ar kekeirda en sukuhlki oh kapwaiada padahk mehlel kin wekpeseng. Mweidohng ahnsou ong sapwellimen Siohwa manaman en kamwakid ar madamadau oh wiewia kan.—Mark 4:26-29.
3. Ia duwen atail kak sewese irail kan me kitail kin padahki en kakairada irair mwahu kan?
3 Sewese Irail en Kakairada Irair Mwahu kan: Koasoi kan en Paipel me kasalehda sapwellimen Siohwa kamwahu oh limpoak kak sewese irail kan me kitail kin padahki en kin kakairada irair mwahu kan. Kitail kak doadoahngki soangen iren Paipel kan me duwehte Melkahka 139:1-4 de Luk 12:6, 7 pwehn kasalehda uwen Koht eh kin ketin nsenohkin emenemen kitail. Ni ahnsou me emenemen aramas kin kakairada eh kalahnganki mehlel sapwellimen Siohwa kadek sapan, arail limpoak oh lelepek ong ih pahn laudla. (Rom 5:6-8; 1 Sohn 4:19) Oh pil, ni ahnsou me re sukuhlki me Siohwa kin ketin mwekidki dahme irail kin wia, met ele pahn kamwakid irail en mwekid ni ahl ehu me pahn kaperenda oh kawauwih.—Mel. 78:40, 41; Lep. Pad. 23:15.
4. Ni ahnsou me kitail padahki emen nan doadoahk en kalohk, ia duwen atail pahn kasalehda atail wauneki ahn emen pwung en pilipil?
4 Siohwa sohte kin ketin idingkihong emen en peikihong sapwellime kaweid kan. Ahpw, e kin kamantik ni eh kin ketin kasalehiong irail kamwahupen ar pahn idawehn sapwellime kaweid. (Ais. 48:17, 18) Kitail kin kahlemengih Siohwa ni atail kin padahk ni ahl ehu me pahn sewese aramas akan en pein pilohng irail dahme re pahn wia. Ni ahnsou me aramas emen kin kamehlele me e uhdahn anahne wiahda wekidekla kan nan eh mour, e kin paiekihda imwilahn met. (Rom 12:2) E pil kin kakerenihiraillahng Siohwa “me kin sohng nan kapehd en aramas.”—Lep. Pad. 17:3.