Kou Kohl

Ekek! Dahme aramas kan wiahdahr? Irail kin kapakap ong kou men! Dahme kahrehda re wiahki met?

Ni en Moses kohdahla pohn nahna ansou reirei ehu, aramas inda: ‘Se sehsehlahr dahme wiawiong Moses. Kitail wiahda emen koht pwen kahluwa kitail sang nan sahpw wet.’

‘Eri mwahu,’ rien Moses me adaneki Aaron inda. ‘Kihpene kohl koaros me kumwail kin kapwatki, oh wahdohng ie.’ Ni en aramas ko wiahda met, Aaron eri inimpene kohl pwukat koaros oh wiahkihda kou men. Oh aramas kan eri indahda: ‘Iet atail Koht, me kahluwa kitail sang Isip!’ Irail eri wiahda lapalahn kamadihpw ehu, oh kasarawi arail kou kohl.

Ni en Siohwa kilangada met, e ketin engiengda kowahlap. Ih eri padahkiong Moses: ‘Pitipit kohdihla. Aramas kan wiahdahr me suwed. Irail manokehlahr ai kosonned kan oh dairukedi ong emen kou kohl.’

Moses eri pitipit doudihdo sang ni nahnao. Oh ni ah kin kerendohng wasao, iet me e kilang. Aramas kan kin kokoul oh kahkahlek ong kou kohl men! Moses mwakarada kowahlap, ih eri koskihdi takai patapat riau iangahki kosonned ko me intingidi powe, oh takai ko pwupwedi oh pwaltikpesang. Ih eri alehda kou kohl inim oh kapilipene. Ih eri irisdi lao e wiahla pehs de pouder.

Aramas kan wiahdahr mehkot suwed. Moses eri padahkiong ekei ohl ko en alehda neirail kedlas. ‘Aramas suwed kan me kaudokiong kou kohl uhdahn pahn mehla,’ Moses inda. Ohl ko eri kohla oh kamehla aramas 3,000! Kaidehn met kin kasaleong kitail en kanahieng oh kaudokiong Siohwa kelehpw, ah kaidehn emen koht likamw?