IREN MEHN KASUKUHL 11
Irail Ntingihdi Duwen Sises
Ke kilang ohl pwukat nan kilel wet?— Irail iei Madiu, Mark, Luk, Sohn, Piter, Seims, Sud oh Pohl. Ohl pwukat kin momour ni ahnsou me Sises ketin momour. Irail ntingihdi duwen Sises. Nna, kitail pahn sukuhlki duwen irail.
Dahme ke ese duwen ohl pwukat?
Ohl silimen nanpwungarail iei wahnpoaron kei me kin ieiang Sises kalohk. Ke ese mehnia meh silimeno?— Madiu, Sohn oh Piter. Wahnpoaron Madiu oh Sohn uhdahn ese Sises oh ira koaros ntingihdi pwuhk duwen mouren Sises. Wahnpoaron Sohn pil ntingihdi pwuhk ehu me adaneki Kaudiahl oh kisinlikou siluh me adaneki Sohn Keieu, Sohn Keriau oh Sohn Kesiluh. Wahnpoaron Piter ntingihdi kisinlikou riau me mi nan Paipel. Kisinlikou pwukat adaneki Piter Keieu oh Piter Keriau. Nan keriaun nah kisinlikouo, Piter ntingihdi duwen ahnsou me Siohwa mahsanih duwen Sises sang nanleng: ‘Iet nei pwutak. I poakepoake ih oh I perenki ih.’
Pil mie ohl akan nan kilel wet me padahkihong kitail duwen Sises nan pwuhk kan me re ntingihdi. Emen iei Mark. Mwein e mihmi mwo ni ahnsou me Sises selidi oh kilang soahng koaros me wiawi. Pil emen iei Luk. Ih toahkte men oh mwein e wiahla Kristian mwurin Sises mehla.
Pil mie sounnting en Paipel riemen me ke kak kilang nan kilel wet. Ira rien Sises me pwulopwul sang ih. Ke ese adara?— Adara Seims oh Sud. Nin tapio, ira sohte kamehlele Sises. Ira pil medewe me e ekis sahliel. Ahpw mwuhr ira kamehlelehla Sises oh wiahla Kristian kei.
Pil emen sounnting en Paipel me ke kak kilang nan kilel wet iei Pohl. Mwohn e wiahla Kristian, e adaneki Sohl. E kin kailongki Kristian kan oh e kin uhdahn lemei ong irail. Ke ese dahme kahrehiong Pohl en men wiahla Kristian?— Ehu rahno, Pohl kohkohlahng nanial oh rongada emen me koasoiong ih sang nanleng. Iei ih Sises! E ketin idek rehn Pohl: ‘Dahme kahrehda ke kin lemeiong irail kan me kin kamehlele ie?’ Mwurin mwo, Pohl wekila oh wiahla emen Kristian. Pohl ntingihdi pwuhk 14 nan Paipel, pwuhken Rom lel pwuhken Ipru.
Kitail kin wadek Paipel rahn koaros, kaidehn?— Sang ni atail kin wadek Paipel, kitail kin sukuhlki soahng tohto duwen Sises. Ke men kalaudehla ahmw esehla duwen Sises?—