“Ata Lamalam (Mohngiong) Duwepenehte?”
“Komw ketido mahsanih duwen ei kin wauneki Kauno (Siohwa).”—2 NANMWARKI 10:16.
1, 2. (a) Iaduwen irair en kaudek en Israel wie susuwedla? (b) Nan pahr 905 B.C.E., wikidekla kapwuriamwei dah kei pahn wiawi nan Israel?
PAHRO 905 B.C.E. kin wia ahnsoun wekidekla laud nan Israel. Mpen sounpar 100 mwowe, Siohwa karehda wehi minimin en Israel en nehnepeseng pwehki Solomon pwupwsang kaudek mehlel. (1 Nanmwarki 11:9-13) Eri, wehio palieir, Suda, mihla pahn kaundahn nein Solomon pwutako Reopoham nin doken wehio paliepeng, Israel, mihla pahn kaundahn Seropoham, mehn Epraim. Kansensuwed pwe, wehio paliepeng tepida suwed. Seropoham sohte men tohn ah wehio en kohdihlahng wehin palieir pwehn kaudek ni tehnpaso, pwe e perki pwe re de lemehda en pwurelahng tehnpas en Depit. Ih eri wiahda kaudek en koupwul nan Israel oh eri kauwada koasoandi en pwongih dikedik me wiawi erein ahnsoukis nan poadoapoad en wehio ni paliepeng.—1 Nanmwarki 12:26-33.
2 Irairo suwedla ni ahnsou me Eihap, nein Omri pwutak nanmwarkihla. Ah pwoud mehn likio, Sesepel, kin utungada kaudek en Paal oh kemehla sapwellimen Siohwa soukohp kan. Mendahki en soukohp Elaisa peneu kan, Eihap sohte wia mehkot pwehn kauhdi liho. Ahpw, nan pahr 905 B.C.E., Eihap mehla, oh Soram, nah pwutak, uhd kaunda. Ahnsouwet iei ahnsoun kamwakelehda sahpwo. Elisa, me wiliandi Elaisa, padahkiong kaun en sounpei, Sehu, me Siohwa pahn iddiada ih pwehn uhd wiahla nanmwarki en Israel. Dahme e pahn wia? En kemehla tohnimwen Eihap me dipan oh en dupuk ntahn soukohp kan me Sesepel kemehla!—2 Nanmwarki 9:1-10.
3, 4. Iaduwen Sonadap kasalehda me mohngiongih kin ‘duwehte mohngiongen Sehu’?
3 Sehu peikiong kehkehlik en Koht, oh kemehla Sesepel, oh mwurin mwo e kohwei pwehn kamwakelehda Israel ni ah kemehla tohnimwen Eihap. (2 Nanmwarki 9:15–10:14, 17) Ih eri tuhwongada emen me kin iang utung dahme e wia. “E ahpw tuhwong Sonadap nein Rekap. Sehu eri rahnmwahuwih oh mahsanihong, ‘Ata lamalam (mohngiong) duwepenehte. Komw pahn utung ie?’ Sonadap sapeng, patohwan, ‘Ehi.’ Sehu eri mahsanihong, ‘Nna, ketikihdo limwomwien.’ Ira eri itipe, Sehu sewesedahng pohn werennansahpwo, oh mahsanihong, ‘Komw ketido mahsanih duwen ei kin wauneki Kauno (Siohwa). Ira eri pil usehla ara seiloaklahng Sameria.”—2 Nanmwarki 10:15, 16.
4 Sonadap kaidehn mehn Israel men. Mendahki met, edeo (me wehwehki “Siohwa kupwurki,” de “Siohwa me Lapalap,” de “Siohwa me Sapan”) kin kasalehda me ih emen tohnkaudek en Siohwa. (Seremaia 35:6) Ni mehlel, e nohn ngoangki kilang en Sehu “wauneki Kauno (Siohwa).” Iaduwen atail esehki met? Eri, e sohte sapwungala kasaingedi ah tuhwong Sehu me wia nanmwarki en Israel me idihada. Sonadap “kodohng tuhwong,” oh met ni ahnsou ehu me Sehu kemelahr Sesepel oh tohnimwen Eihap teikan. Sonadap eseiehr dahme wiawi ni ahnsou me e dukla pahn ahn Sehu luhk en douda nan werenansahpw. Ni sohpeikidpe e kin iang pali en Sehu—oh Siohwa—nan uhpene wet me pid kaudek likamw oh kaudek mehlel.
Sehu oh Sonadap en Rahnwet
5. (a) Wikidekla dah kei pahn ahnsou keren wiawihong tohnsampah koaros? (b) Ihs me Sehu Lapalap, oh ihs me kin mwete ih pohn sampah?
5 Rahnwet, soahng koaros pahn ahnsou keren wikila douluhl ong tohnsampah koaros duwehte me re wia ong Israel mahso nan pahr 905 B.C.E. Ahnsou me Siohwa pahn kamwekelehsang pohn sampah lipwalipw suwed kan koaros en Sehdan, iangahki kaudek likamw kerendohr ahnsouwet. Ihs me kin mwete Sehu nan rahnpwukat? Sohte emen likin Sises Krais, me mahsan en kokohp kan kohwong: “Nanmwarki roson, komw ketin kapwatahkinkomwihda sapwellimomwi kedlahs; komw meid diren roson oh lingan kowalahpie! Ni roson lapalap komw ketin wenewohng omwi lingan en powehdi, pwe komwi me kin wia soundoarepen me pwung oh mehlel!” (Melkahka 45:3, 4) “Israel en Koht,” Kristian keidi kan me kin “kapwaiada kosonned en Koht kan, oh me loalopwoatohng padahk me Sises ketin kadehdehier,” kin mwete Sises pohn sampah. (Kalesia 6:16; Kaudial 12:17) Sangete 1922 rien Sises me keidi pwukat kin ni soh masak panawihki duwen sapwellimen Siohwa wiewiahn kadeik me kohkohdo.—Aiseia 61:1, 2; Kaudial 8:7–9:21; 16:2-21.
6. Ihs me kohsang nan wehi kan pwehn utungada Kristian keidi kan, oh iaduwen re douda nan weren Sehu Lapalap werenansahpw ni karasaras?
6 Kristian me keidi kan sohte kelepw nan wiewia wet. Duwehte Sonadap me kohdohng tuhwong Sehu, me tohto sang nan wehi kan kin pidoisang loale pwehn utungada Sises, Sehu Lapalap, oh wiliepe kan nan sampah nan arail kesihnenda ong kaudek mehlel. (Sekaraia 8:23) Sises kin ekerkin irail sapwellime “sihpw teikan,” oh nan 1932 re kin sansalda me re rasehng Sonadap en mahs oh kin ale luhk en ‘douda nan werenansahpw’ en Sehu en ahnsouwet. (Sohn 10:16) Iaduwen? Ni ahr pahn ‘peikiong kosonned kan en Koht’ oh iang kisehn me keidi kan nan “doadoahk en kadehde Sises.” Nan rahnpwukat, met iei kalohki rongamwahu en Wehin Koht me kokouda pahn Sises nin duwen Nanmwarki men. (Mark 13:10) Nan pahr 1935 irail pwihn en Sonadap pwukat kin sansalda me irail iei “pokon kalaimwun” en Kaudial 7:9-17.
7. Iaduwen Kristian kan rahnwet kasalehda me ‘mohngiongarail kin duwehte’ mohngiong en Sises?
7 Sangete nan 1930 samwa, pokon kalaimwun oh riarail me keidi kan kin eimah kadehde arail utung kaudek mehlel. Nan ekei sahpw kan ni palimese oh palikapi en Iurop, oh palimesehn sampah, oh Aperika, irail me tohto me kin mehkihla arail kolokolte arail pwoson. (Luk 9:23, 24) Nan sahpw teikan, re kin seldi, kamakam rehn pwihn en aramas kan, oh kamakamla. (2 Timoty 3:12) Ia uwen ahr kin kasalehda pwoson! Oh ripoht en kalohk en pahr 1997 kasalehda me re kin nannantihte pwehn papah Koht, mendahkihla dahme pahn wiawiong irail. ‘Arail lamalam (mohngiongarail) kin duwehte’ mohngiong en Sises. Met kin sansalda erein 1997, ni en sounkalohk en Wehio 5,599,931, kereniong irail koaros pwihn en “Sonadap,” kin doadoahngkihla uwen awa 1,179,735,841 nan doadoahk en kadehde Sises.
Wie Kalokalohkte Ki Ngoang
8. Iaduwen Sounkadehde kan en Siohwa kasalehda arail ngoangki kaudek mehlel?
8 Sehu kin ndandki ah kin tangahki werenansahpw ni marahrah—kadehdepen ah ngoangki kapwaiada ah doadoahk. (2 Nanmwarki 9:20) Sises, Sehu Lapalap, kin sansalkihda ah ‘ngoang kin ngkengken loale rasehng kisiniei.’ (Melkahka 69:9) Eri, e sohte kapwuriamwei, me Kristian mehlel kan rahnwet me kin sansalkihda ahr ngoang. Nan mwomwohdiso oh ong wehi pokon, re kin “kalohkiseli mahseno. . .ni ahnsou mengei de apwal.” (2 Timoty 4:2) Arail ngoang kin keiou sansalda erein tepin pahr 1997 mwurin artikel ehu nan doarepwe Atail Doadoahk Ong Wehio kin kangoangehki uwen me tohto en iang kisehn doadoahk en auxiliary pioneer. Nan ehu ehu sahpw akadei kin wiawihda ong uwen me tohto me pahn auxiliary pioneer. Iaduwen ahr kin mwekid met? Uhdahn deila douluhl! Nan rahn ohpis tohto nempeo me re kin akadeiong kin daulihla. Ecuador wiahda mehn akadei en me 4,000 en auxiliary pioneer ahpw nan March e ripohtki me meh 6,936 me iang auxiliary pioneer. Nan United States, mehn akadeio iei meh 100,000, oh meh 116,335 me iang kisehn kapai en doadoahk wet nan March. Sapan ripohtki me auxiliary pioneer 104,215 me iang erein sounpwong siluwo. Nan Zambia, arail mehn akadei iei meh 6,000, ahpw irail meh 6,414 me iang auxiliary pioneer nan March; nan April meh 6,532; oh nan May meh 7,695.—Rom 10:10.
9. Patohngete doadoahk en kalohk sang ihmw lel ihmw, ni ahl dah teikan Sounkadehde kan en Siohwa kin rapahki aramas kan pwehn kalohkiong irail rongamwahu?
9 Wahnpoaron Pohl padahkiong elder kan sang Episos: “Kumwail ese me I sohte kin ekihsang kumwail mehkot me I dehdehki me pahn sewesei kumwail ni ei padahk oh panawih kumwail nan wasahn kapokon kan oh nan imwamwail kan.” (Wiewia 20:20) Sounkadehde kan en Siohwa rahnwet kin alasang kalimeng en Pohl oh ki ngoang kalohki rongamwahuwo sang ihmw lel ihmw. Ahpw, e sohte pahn mengei en diar aramas kan nan imwerail. Ihme karehda, “ladu lelepek oh loalokong” kin kangoangehki sounkalohk en Wehio en kohla rehn aramas kan nan arail wasahn pisnes kan, nan ahl akan, pohn pihk kan, nan wasahn mwemweit kan—wasa sohte lipilipil me aramas kak dierek ie. (Madiu 24:45-47) Imwilahn met kin inenen pweida mwahu.
10, 11. Iaduwen sounkalohk kan nan sahpw riau kasalehda arail pein tiengla mwowe pwehn rapahkihda irail kan me perenki rong ahpw sohte kin kak dierek nan imwerail?
10 Nan Copenhagen, Denmark, mie kisin pwihn en sounkalohk kan me kin kalokalohk naniahl kan likin imwen train kan. Sang nan January lau lel nan June, re kin kihla makasihn 4,733, oh kak koasoaiong aramas tohto, oh pwurehng pwurela rehn aramas tohto. Sounkalohk tohto nan sahpwo kin wiahda koasoandi en kaukaule kihla makasihn kapw sounpwong koaros (magazine route) nan sidowa kan. Ehu kahnimw kin wia netinet (lapalahn market) Ni Alem koaros, oh aramas kid kei kin pwarek wasao. Ihme mwomwohdiso koasoanehdi kalohk en wasao. Nan ehu wasa, mie koruk kan me audaudki pwuhk kan me keiou wiawihdahng sounpadahk kan en sukuhl me kin wisiklahng nan sukuhl pwukat.
11 Nan Hawaii irail kin pil nantiong kalohk ong irail ko me sohte kak dierek nan imwerail kan. Wasahn kalohk tohrohr kan kin iangahki wasa kan me pokon en aramas kan kin mie (nanial kan, nan wasahn mwemweit kan, wasahn peidi en sidosa kan, oh wasahn uhdi en poas kan), wasahn pisnes nan kahnimw kan, wasahn netinet laud kan oh wasahn sounpihr kan, oh pil ianghki kalohk nan telepohn kan, kalohk ni ahnsoun dake mehn peidaid en wehi pokon (kalohk nan poas kan), oh wasahn sukuhl laud kan (college). Mwomwohdiso kan en Hawaii kin tehk duwen me depehn sounkalohk kan kin doadoahk nan ehu ehu wasahn kalohk pwukat oh irail pwukat en ale kaiahn pwung ong pwukoah pwukat. Nannanti soandi mwahu kan me rasehng mepwukat kin pil wiawi nan sahpw tohto. Pwehki met, kalohk kin wiawihong irail kan me perenki rong ahpw sohte kak dierek nan doadoahk en kalohk sang ihmw lel ihmw.
Kesihnenda Teng
12, 13. (a) Widing dahieu Sehdan kin doadoahngki pwehn kaluwetala Sounkadehde kan en Siohwa erein 1997? (b) Ni ahl dahieu lokaia likamw kan sohte kin pweida nan ehu sahpw?
12 Nan sahpw tohto nan 1997, Sounkadehde kan en Siohwa kin mihla pahn kadip likamw kan me kin wiawihda pwehn lelekin irail mwoalen kopwung. Ahpw Sounkadehde kan kin kesihnenda teng mendahkihla met! (Melkahka 112:7, 8) Re kin tamanda en sounmelkahkao kapakap: “Aramas aklapalap akan wiadahr likamw ekei duwen ngehi, ahpw sang nan mohngiongiet unsek I kin peikiong sapwellimomwi kaweid kan.” (Melkahka 119:69) Soahngen likamw wet kin ihte wia kadehdehpen kailok me pahn kohwong Kristian mehlel kan me Sises kohpada. (Madiu 24:9) Oh likamw pwukat sohte kin pweida. Emen ohl nan Belgium wadekada duwen artikel ehu me kin kauwe Sounkadehde kan en Siohwa nan ehu nuhspehpa ndand. Pwehki e pwuriamweiki lokaia likamw pwukat, e kohla oh towehda ehu mihding ni Kingdom Hallo Rahn Sarawi en mwuri. E koasoanehdi en onopki Paipel rehn Sounkadehde kan en Siohwa oh eri kekeirada mwadang nan ah onop. Mahso, ohl menet kin iang kisehn pwihn mwersuwed ehu. Ah onop en Paipel sewese ih en kamwakelehda ah mour, mehkot me aramas kan limwa tehkada. Ni mehlel, me ntingihda lokaia likamw ko nan artikelo sohte lemeleme me e pahn imwila ni ahl wet!
13 Ekei aramas mohngiong mehlel kan nan Belgium kin pelianda soahngen lokaia likamw pwukat. Nanpwungarail iei emen me mahso wia emen prime minister me wehkada me e kin kapingahki Sounkadehde kan en Siohwa dahme re kin wiahda. Oh emen wiliepen kaun ntingihdi: “Me weksang lokaia likamw kan me kin wiawihda ekei pak, [Sounkadehde kan en Siohwa] sohte kin wiahda mehkot me pahn wia keper ong Wehi. Irail wia tohnwehi me popohl, pwerisek, oh kin wauneki me lapalap kan.” Ihme e inenen loalokong mahsan kan en wahnpoaron Piter: “Amwail tiahk kan nanpwungen me rotorot akan en mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.”—1 Piter 2:12.
Kasarawi En Kataman Ehu Me Sikla Douluhl
14. Ia ekei ripoht kaperen kan en irail kan me iang towehda Kataman nan 1997?
14 E konehng irail ko me kin kadehde duwen Sises en kilangwohng katamanpen ah matala me e wia ire kesempwal ehu nan ahr mour nan ahr pahr. Nan 1997, mie meh 14,322,226 me iang kasarawih Katamano nan March 23. (Luk 22:14-20) Nan sahpw tohto irail kan me kin iang towehda Katamano kin tohtohsang nempehn sounkalohk en Wehio, kasalehda duwen pahn tohtohla sounkalohk nan ahnsou kohkohdo. Nan Haiti, sounkalohk tohtohkihla me 10,621 nan 1997, nin doken meh 67,259 iang towehda Katamano. Sounkalohk kan me tohtohki me 96,686 nan Zambia kin perenki rong me aramas 428,697 iang towehda Katamano. Komw kak tehk ripoht ni pali 18 lel pali 21 oh kilang nan wehi tohto teikan me irail kan me iang towehda Katamano nan sahpw pwukat me tohtohsang nempehn sounkalohk kan.
15. Nan ekei sahpw, iaduwen riatail kan powehdi kahpwal toutou kan pwehn kak kasarawih Katamano?
15 Ong ekei, en iang towehda Katamano sohte kin mengei. Nan Albania mie kosonned me wiawihda me aramas sohte kak aluseli pohn ahl kan kuloak 7 ni soutuk kohla lel ni menseng pwehki pingiping nan wehio. Nan kisin pwihn kan me kohpene wasa 115 nan sahpwo, Kataman kin tepida kuloak 5:45 ni soutuk. Ketipino kin kihrla kuloak 6:08 ni soutuk, me pahn tepiada Nisan 14. Pilawao oh waino kin kohpeseng kuloak 6:15 ni soutuk. Kaimwseklahn kapakap kin wiawi kuloak 6:30 ni soutuk, oh irail ko me kin towehda kin mwadangala ni imwerail ko mwohn kuloak 7 me kosonned kin kainapwih. Mendahki met, irail me towehda Katamano kin tohtohki aramas 3,154, me tohtohsang sounkalohk 1,090. Nan ehu sapwen Aperika, pingiping nan sahpwo kin karehda apwal en pedolong nan Kingdom Hall, ihme elder riemen koasoanehdi en tuhpene nan imwen kasilimen en elder pwehn koasoanehdi pwen kasarawi Katamano ni pwihn tikitik kan. Pwehn kak lelohng ni ihmwo, elder riemeno anahne kotehla ehu warawar. Ahpw, mie mahwen me wiwiawi nan wasao, oh sounkesik akadei kan kin kasikih irail sohte lipilipil me kin song kotehla warawaro. Emen eldero tangala oh kotehla warawaro oh sohte mehkot me wiawihong. Me kariemeno tepiada kote ni ah rongada ngilen kasik. E lusdi nan pwehl oh kereplahng wasa me kasik sohte wiawi ie ni doken kenengen kasik kan kin wie pipihrseli pohn moange. Mihding me elder kan wia pweida mwahu, oh epwel kohwong anahn en mwomwohdiso.
“Sang Nan Wehi Kan Koaros oh Kadaudek Kan Koaros . . . oh Lokaia Koaros”
16. Iaduwen pwihn en ladu lelepek oh loalokong koasoanehdi pwe rongamwahuwo en lohkseli rehn kisin pwihn en aramas me irailte kin lokaiahki soahngen lokaia ehu?
16 Wahnpoaron Sohn mahsanih me pokon kalaimwun ehu pahn kohsang “nan wehi koaros oh kadaudek koaros oh aramas koaros oh lokaia koaros.” (Kaudial 7:9) Ihme karehda, Governing Body kin koasoanehdi pwe pwuhk kan en kawehwehdi ni lokaia tohto—iangahki lokaia ko me keinek doh kan oh aramas malaulaute kin lokaiahki. Karasepe ehu, nan Mozambique, tracto me adaneki Mour Nan Sampah Kapw Meleilei Ehu kin kawehwehdi ni lokaia limau. Nan Nicaragua, brochureo Paieki Mour Sampah Kohkohlahte! kin kawehwehdi ni lokaiahn Miskito—tepin pwuhk me Watch Tower Society wiahda ni lokaiao. Rahn ohpis en Watch Tower Society ripohtki me mehn Indian en Miskito tohto alehda brochureo ni peren ni arail kilang mehkot ni pein arail lokaia. Nan 1997 Society ntingihda pwuhk kan ni lokaia 25 likin met.
17. Sawas kohwong soahngen lokaia dahieu nan Korea, oh iaduwen videotape kan sewese laud soahngen aramas pwukat?
17 Nan Korea sawas pil kohwong ehu lokaia tohrohr. Tepin kapokon en lokaiahki peh ni lokaiahn Korea wiawi nan 1997. Mie mwomwohdisohn lokaiahki peh nan Korea me tohtohki sounkalohk 543, ahpw aramas 1,174 me iang towehda kapokono, oh me 21 papdaisla. Pwehn sewese me salongpon kan me sohte nohn kak wehwehki ngilen lokaia de mesen nting, pwuhk kan kin wiawihda nan videotape kan ni soahngen lokaiahki peh me 13. Ihme karehda, me salongpon kan kin ale sawas en “wadawad” oh pil onopki rongamwahuwo, me kin wiahda imwila mwahu tohto. Nan United States, mahso aramas salongpon kan kin sukuhlki Paipel erein sounpar limau pwe ren kak kekeirada lau papdaisla. Ahnsouwet, pwehki video kan kin mih ni lokaiahki peh ni lokaiahn America (American Sign Language), ong ekei me salongpon kan, arail onop kin uhd mwotomwotkihla sounpar ehute.
‘Mihmihte Nan Werenansahpw’
18. Mwurin ah tuhwong Sonadap, dahme Sehu wiahda?
18 Mahso nan pahr 905 B.C.E., mwurin Sonadap iangala ih, Sehu tepiada kauwehla kaudek likamw kan. E wiahda luhk ehu ong tohnkaudek en Paal koaros: “Kumwail kalohkihda ehu rahnen kaudek pwehn wahuneki Paal!” Ih eri kohpeseng nan sahpwo pwon pwehn tehk me sohte tohnkaudek en Paal men sohte pahn iang towehda kapokono. Nin doken pokon en aramas kan pedolong nan tehnpas lapalap en koht likamwo, Sehu tehkada mwahu pwehn kilang me sohte tohnkaudek en Siohwa men mih wasao. Ikmwuri, Sehu oh nah sounpei kan kemehla tohnkaudek kan en Paal: “Iei met duwen Sehu eh koahkoahsang tohn kaudek en Paal kan nan Israel.”—2 Nanmwarki 10:20-28.
19. Pwehki dahme mihmi mwowe ong tohnsampah, soahngen ngehn dah me kitail en kasalehda, oh pwukoah dah me kitail en pwerisek wiahda?
19 Rahnwet, kaimwsekpen kadeik en kaudek likamw koaros mihmi mwowe. Pahn kaweid en tohnleng kan Kristian kan kin kalokalohki rongamwahuwo ong tohnsampah koaros, oh kin kangoangehkin irail en lahn Koht oh katohre pein irail sang kaudek likamw. (Kaudial 14:6-8; 18:2, 4) Me opampap kan kin ale luhk en pein uhpaiong Wehin Koht pahn sapwellimen Siohwa Nanmwarkio, Sises Krais. (Kaudial 12:10) Ni ahnsou kaperen wet, kitail en dehr mweidong atail ngoang en luwetla ni atail kesihnen teng ong kaudek mehlel.
20. Dahme ke pahn nantiong wia erein pahr en kalohk en 1998?
20 Mie ahnsou ehu me, Nanmwarki Depit ni ah mihla pahn kapwunod laud, e kapakapki: “Maing Koht, ni ei koapwoaroapwoar unsek, I pahn koul oh kapinga komwi! Maing ei Kaun (Siohwa), I pahn kapingkalahngan ong komwi nanpwungen aramas kan.” (Melkahka 57:7, 9) Kitail en pil tengeteng nan atail pwoson. Erein pahr en kalohk en 1997, mendahkihla kahpwal tohto, ngilen kaping kehlail kin wiawihong kalinganpen Siohwa Koht. Ngilen kaping me duwehte, me pil pahn kehlailsang, en pil wiawi erein pahr en kalohk en ahnsouwet. Oh kitail en kaukaule kapinga Siohwa mendahki dahme Sehdan pahn wia pwehn kaluwetkitailla de uhwong kitail. Eri, kitail pahn kasalehda me mohngiongatail kin duwehte mohngiong en Sehu Lapalap, Sises Krais, oh kitail pahn peikiong ki mouretail unsek peneu sarawio: “Kumwail me pwung kan, kumwail koaros nsenamwahu oh pereperen pwehki wiepen nin limen Kauno (Siohwa). Kumwail koaros me kin peikiong, kumwail ngisingiski amwail peren!”—Melkahka 32:11.
Komw Kak Kawehwe?
◻ Wikidekla dah kei me wiawi nan Israel nan pahr 905 B.C.E.?
◻ Ihs me kin mwete Sehu rahnwet, oh iaduwen “pokon kalaimwun” kin kasalehda me ‘mohngiongarail kin duwehte’ mohngiongih?
◻ Dahme pwarada nan ripoht en pahr me kasalehda ngoang me Sounkadehde kan en Siohwa kin kasalehda erein pahr en kalohk 1997?
◻ Mendahki dahme Sehdan pahn peliankin kitail, soahngen ngehn dah me kitail en kasalehda erein pahr en kalohk en 1998?
[Kilel nan pali 18-21]
1997 RIPOHT EN PAHR EN KALOHK EN SOUNKADEHDEHN SIOHWA KAN NAN SAMPAH PWON
(Kilang pwuhk wet)
[Kilel nan pali 15]
Uwen tohtohn irail kan me iang towehda Katamano kin kasalehda me mie koapwoaroapwoar en tohtohlahn sounpapahn Siohwa kan mwuhr
[Kilel nan pali 16]
Duwehte Sonadap me utungada Sehu, “pokon kalaimwun” rahnwet kin pil utungada Sehu Lapalap, Sises Krais, oh rie me keidi kan