Limpoak Me Poatopoat, Sohte Imwi
“Eri, kumwail kainenedahng amwail ineng kan ni kisakis keieu kesempwal akan. Ahpw met, I pahn kasalehiong kumwail ahl apwoat me siksang mehlel mepwukat koaros.”—1 KORINT 12:31.
1-3. (a) Iaduwen sukuhlki en kasalehda limpoak kin duwehte sukuhlki lokaia kapw ehu? (b) Irair dah kei me kak kahrehong sukuhlki kasalehda limpoak en wia apwal ehu?
MIE pak me ke kin song en sukuhlkihdi lokaia kapw ehu? E kin apwal, kaidehn? Ni mehlel, kisin seri men kak sukuhlkihdi lokaia kapw ehu sang ni ah pahn rongorongte. Ah mwahliel kak koledi ngihl kan oh wehwehn lokaiao, ihme karehda sohte pwand kisin serio kin samanilahr lokaia wet ni ah kin lokaiahki lokaiao, oh ele solahr kak uhdisang. Ahpw kaidehn ih met me kin wiawi rehn me laud kan. Kitail kin pwurpwurehng rapahki lokaia kapwo nan dikseneri, pwe kitail en samanihala ekei lepin lokaia mengei kan ni lokaia kapw wet. Kedekedeo oh pwehki atail kin iangehr lokolokaiahki lokaia kapw wet, kitail kin tepiadahr madamadau ni lokaia kapw wet oh kitail kin uhd mengeikihla lokaiahki.
2 Sukuhlki pwehn kasalehda limpoak kin duwehte sukuhlki lokaia kapw ehu. Mehlel, aramas ipwikihda ekis irair sarawi wet. (Senesis 1:27; pil tehk 1 Sohn 4:8.) Mendahki met, kitail anahnehte nannanti laud pwehn sukuhlki kasalehda limpoak—keieu nan rahnwet, pwehki tikitiklahn limpoak. (2 Timoty 3:1-5) Ekei pak met kin wiawi nan peneinei. Ehi, me tohto kin tikida nan wasa kan me re sohte kin kalap rong lokaia limpoak kan. (Episos 4:29-31; 6:4) Eri, iaduwen atail kak sukuhlki en kasalehda limpoak—mendahki ma sohte me kin kasalehong kitail limpoak?
3 Pwuhk Sarawi kak sawas. Nan 1 Korint 13:4-8, Pohl sohte kasalehdahte ia wehwehn limpoak, ahpw e kasalehda ni lokaia sansal ia wiewia kan en limpoak ileile wet. Atail kasawih iretikitik pwukat pahn sewese kitail en koledi mouren irair sarawi wet oh kakoahiek kitailla en kasalehda irair wet. Kitail en kasawih ekei irair kan en limpoak me Pohl kasalehda. Kitail pahn nehkpeseng irair pwukat ong ni pali siluh: atail wiewia koaros; eri, ni oaritik, atail nanpwung rehn mehteikan; oh ikmwuri, atail kanengamah.
Limpoak Sewese Kitail Powehdi Aklapalap
4. Iaduwen Paipel kin kawehwehda luwak?
4 Mwurin ah koasoia duwen limpoak, Pohl ntingihlahng mehn Korint kan: “Limpoak sohte kin luwak.” (1 Korint 13:4, New World Translation) Luwak kin sansalda sang ni en emen kin peirinki paiamwahu de pweida mwahu en mehteikan. Soahngen luwak wet me suwed—ong ni paliwar, pelien pepehm, oh pali ngehn.—Lepin Padahk 14:30; Rom 13:13; Seims 3:14-16.
5. Iaduwen limpoak kak sewese kitail en powehdi atail peirinki atail sohte alehdi pwukoahn mwomwohdiso?
5 Pwehki met, pein kalelepek rehmw, ‘I kin peirinki ma I sohte kin ale pwukoahn mwomwohdiso?’ Ma pasapengo ehi, ke dehr nsensuwedla. Sounnting en Paipel Seims katamankiohng kitail me “lamalam en peirin” kin mih rehn aramas soh unsek koaros. (Seims 4:5) Omw limpoak ong riomw Kristian kan kak sewese iuk en ahneki lamalam toupahrek. E pahn kak mengeiong uhk en iang mehteikan pereperenki arail pwais kan me kohwong irail oh e sohte pahn wia mehkot kasaroh ong uhk ma mehteikan alehdi pwukoah tohrohr de pil kapin sang mehteikan.—Pil tehk 1 Samuel 18:7-9.
6. Irair keper dahieu me pwarada nan senturi keieu nan mwomwohdisohn Korint?
6 Pohl kapataiong me limpoak “sohte kin aksuwei, de pohnmwahso.” (1 Korint 13:4, NW) Ma mie ekis atail koahiek, kitail en dehr aksuweiki met. E sansal me, met iei ehu kahpwal rehn ekei ohl aklapalap kan me iang towehla mwomwohdisohn Korint en mahsie. Ele mwein re koahiek en kawehwehda dahme re lemeleme de koahiek en wiahda soahng kan. Arail aksuweiki pein irail ele kahrehda mwomwohdiso en pwalpeseng oh wiahda soangsoangen pwihn kan. (1 Korint 3:3, 4; 2 Korint 12:20) Irair wet inenen suwedla, ihme kahrehda mwuri Pohl anahne en lipwoare mehn Korint kan pwehki ahr kin ‘kanengamahiong irail kan me pweipwei,’ me Pohl kauwe oh kahdaneki “wahnpoaron lapalap kan.”—2 Korint 11:5, 19, 20.
7, 8. Kasalehda sang nan Paipel iaduwen kitail kak doadoahngki koahiek kan me kitail ipwikihdi pwehn kekeirada minimin.
7 Soahngen irairohte kak pwarada nan rahnwet. Karasepe ehu, ekei ele pahn kin men aksuweiki dahme re wiahda nan kalohk de aksuweiki arail kapai kan nan sapwellimen Koht pwihn. Ma pil mie atail soahngen koahiek ehu me mehteikan nan mwomwohdiso sohte ahneki, met pahn kihong kitail kahrepe en pohnmwahsohkihda? Kitail en doadoahngki atail koahiek soh lipilipil me kitail ipwikihdi pwehn kekeirada minimin—kaidehn en utungada pein kitail.—Madiu 23:12; 1 Piter 5:6.
8 Pohl ntingihdi me mendahki mwomwohdiso ehu kin audaudki towe tohto, “Koht ketin koasoanehdi paliwaratail kan.” (1 Korint 12:19-26) Lepin lokaiahn Krihk me kin kawehwe lepin lokaia wet “koasoanedi” kin wehwehki doaloapene, duwehte poh kan ahr kin doalpene. Ihme kahrehda, tohnmwomwohdiso men endehr pohnmwahsohki ah koahiek kan oh song en kaunda mehteikan. Kala oh aklapalap wia irair kan me sohte konehng en mih nan sapwellimen Koht pwihn.—Lepin Padahk 16:19; 1 Korint 14:12; 1 Piter 5:2, 3.
9. Karasaras en kehkehlik dah kei me Paipel kihda ong aramas kan me kin raparapahkihte nsenerail?
9 Limpoak “sohte kin mehwo.” (1 Korint 13:5) Aramas limpoak men sohte kin kaunda mehteikan pwe nsenarailte en pweida. Paipel kin audaudki karasaras en kehkehlik kan me pid duwen ire wet. Pwehn karasahda met: Kitail wadek duwen Dilehla, Sesepel, oh Adalaia—lih kan me kin kaunda mehteikan pwehn alekihdi pein arail ineng roporop kan. (Sounkopwung 16:16; 1 Nanmwarki 21:25; 2 Kronikel 22:10-12) Pil emen iei nein Nanmwarki Depit pwutako Apsalom. E kin tuhwong irail ko me kin pwarodo Serusalem pwehn rapahki pwungen ar repenpwung kan oh e kin ni widingek koasoia me aramas me pahn wiliandi nanmwarkio sohte men rong arail kopwung. Eri e kin ni inen koasoia me dahme wiliepen nanmwarki uhdahn anahne iei emen ohl limpoak me duwehte ih! (2 Samuel 15:2-4) Ni mehlel, Apsalom sohte kin nsenohki irail kan me kin lokolok, ahpw e kin nsenohkihte pein ih. Ah wiewia nin duwen emen me kasapwilda pein ih en wiahla nanmwarki, kin kamwekidada me tohto en iangala ih. Ahpw kedekedeo, Apsalom lohdi. Ni ahnsou me e mehla, e pil sohte warohng serdi ni wahu.—2 Samuel 18:6-17.
10. Iaduwen kitail kak kasalehda me kitail kin nsenohki mehteikan?
10 Met kin wia kehkehlik ehu ong Kristian kan nan rahnwet. Mendahki ma ohl de lih, ele kitail kin ipwikihdi koahiek en iding mehteikan en kapwaiada nsenatail. Ele e pahn mengei ong kitail en wia pwe nsenatailte en pweida, ni ahnsou me kitail oh mehteikan kin koasoakoasoipene, kitail sohte kin mweidohng irail en iang koasoi de kitail kin kaluwetela irail kan me arail madamadau weksang atail ni atail kin ngidingidkihte me atail madamadau me pwung. Ahpw, ma kitail limpoak, kitail pahn nsenohki mehteikan. (Pilipai 2:2-4) Kitail sohte pahn isaneki mehteikan de kihda soahngen madamadau kan me sohte nohn dehde pwehki atail loalokongkihla mehkot de pwehki atail pwukoah nan sapwellimen Koht pwihn, mwomwen me atail madamadau kante me warohng aramas en tehk. Ahpw, kitail pahn tamataman lepin padahk en Paipel wet: “Lemei kin kahrehiong aramas paisuwed, oh aklapalap kin kahrehiong aramas en pwupwudi.”—Lepin Padahk 16:18.
Limpoak Kin Kahrehda Nanpwung Popohl
11. (a) Ni ahl dah kei kitail kak kasalehda limpoak me kadek oh sohte aklemei? (b) Iaduwen kitail kak kasalehda me kitail sohte kin perenkihda me sapwung?
11 Pohl pil ntingihdi me limpoak kin “kadek” oh me e “sohte kin aklemei.” (1 Korint 13:4, 5) Ehi, limpoak sohte pahn mweidohng atail wiewia en lemei, samin, de soh wahu. Ahpw, kitail pahn nsenohki pepehm en mehteikan. Karasepe ehu, aramas limpoak men pahn liksang wia soahng kan me pahn kauwe nsenmwakelekel en mehteikan. (Pil tehk 1 Korint 8:13.) Limpoak “sohte kin perenkihda me sapwung, pwe me mehlelete me e kin perenki.” (1 Korint 13:6) Ma kitail kin poakohng kosonned en Siohwa, kitail sohte pahn katikitikihla toutou en dipen en nenek de perenki soahng kan me Koht kin ketin kalahdeki. (Melkahka 119:97) Limpoak pahn sewese kitail en diar peren ni soahng kan me pahn kakehlailkitailla ahpw kaidehn en kaluwetekitailla.—Rom 15:2; 1 Korint 10:23, 24; 14:26.
12, 13. (a) Dahme kitail pahn wia ma emen kansensuwedihkitailla? (b) Koasoiahda karasaras en Paipel kan me kasalehda me lingeringer me pwung pil kak kahrehong kitail en wiahda mehkot me sapwung.
12 Pohl ntingihdi me limpoak “sohte kin mwadang lingeringerda” (“keh mwehl,” Phillips). (1 Korint 13:5) Mehlel, e pil pwung me kitail aramas soh unsek kan en lingeringerda de pil mwakarada ma emen kin kansensuwedihla kitail. Ahpw, e pahn sapwung en kolokolte atail lingeringer. (Melkahka 4:4; Episos 4:26) Ma kitail sohte kin koledi atail lingeringer, mendahki ma atail lingeringer pil pwung, e kak kahrehong kitail en wiahda mehkot sapwung, oh Siohwa pahn kapwukoahkin kitail met.—Senesis 34:1-31; 49:5-7; Nempe 12:3; 20:10-12; Melkahka 106:32, 33.
13 Ekei kin mweidohng soh unsek en mehteikan en kahrehong ren sohla iang mihding en Kristian kan de sohla iang kalohk. Pali laud en irail pwukat mahs kin nantiong powehdi kahpwal tohto pwe ren kak pedolong nan padahk mehlel, mwein re dadaur pahn uhwong kan sang peneinei, kapailok kan sang rehn iengerail tohndoadoahk kan, oh soahng kan me duwehte met. Re kin dadaur pahn soahngen mehn kerempwa pwukat pwehki re kin wiahki soahng pwukat kasongepen ahr loalopwoat, oh met uhdahn mehlel. Ahpw dahme kin wiawi ma emen ingerail Kristian kin ndahng irail mehkot me suwed de wiahiong irail mehkot me sohte kasalehda limpoak? Met soh kin pil wia kasongepen pwoson? Ehi uhdahn, pwe ma kitail kin kolokolte atail lingeringer, kitail kak “kihong Tepil eh ahnsou mwahu.”—Episos 4:27.
14, 15. (a) Ia wehwehn “inaptihnmwomw”? (b) Iaduwen kitail kak kahlemengih Siohwa ni atail pahn kasalehda mahk?
14 Ki kahrepe mwahu, Pohl kapataiong me limpoak “sohte kin inaptihnmwomw.” (1 Korint 13:5) Wasaht e doadoahngki lepin lokaia me kin pidada wiepen rekord en mwohni (lokaiahn wai: “love does not keep account of the injury) pwehn kasalehda duwen doadoahk en ntingihdi sapwungo nan pwuhk en rekord ehu pwehn dehr manokehla. E pahn wia elen limpoak en tamatamante lokaia kamedeko de wiawi kamedeko, mwomwen me kitail pahn anahne en pwurehng katamanda nan ehu ahnsou kohkohdo? Ia uwen atail kin perenki pwe Siohwa sohte kin kasawih kitail ni elen soh limpoak wet! (Melkahka 130:3) Ehi, ma kitail kin koluhla, e pahn ketin isirala atail sapwung kan.—Wiewia 3:19.
15 Kitail kak kahlemengih Siohwa ni ahl wet. Kitail endehr nohn kin wiahkihla mehkot laud kisin mehkot me emen wiahiong kitail. Ma kitail kin mwadang nsensuwedkihla met, kitail pahn kamedek pein kitailla laud sang aramaso me kansensuwedihkitailla. (Eklesiasdes 7:9, 22) Ahpw, kitail anahne en tamataman me limpoak kin “kamehlele mehkoaros.” (1 Korint 13:7, NW) Ahpw, ni mehlel, sohte emen kitail men wia soahngen aramas me mengeiong mehteikan en pitihdi, oh kitail en dehr pil nohn kin lemelemehk suwedki wiewiahn riatail Kristian kan. Ni ahnsou kan me kitail kakohng, kitail en medemedewe me aramas teikan sohte kin lemeleme en wiahiong kitail mehkot suwed.—Kolose 3:13.
Limpoak Sewese Kitail en Kanengamah
16. Nan irair dah kei limpoak kak sewese kitail en kanengamah?
16 Pohl eri padahkihong kitail me “limpoak me kanengamah.” (1 Korint 13:4) Limpoak kin sewese kitail en dadaurete pahn irair kan me apwal, ele erein sounpar tohto. Karasepe ehu, Kristian tohto kin koukousoan rehn peneinei kan me arail pelien lamalam wekpeseng arail. Mehteikan kin kiripw, kaidehn pwehki re pilada en mihmi nan irair wet, ahpw pwehki re sohte kak diarada emen arail pwoud “me pwoson.” (1 Korint 7:39; 2 Korint 6:14) Eri pil mie irail ko me kin peipeiong arail soumwahu en paliwar me kin kaluweteirailla. (Kalesia 4:13, 14; Pilipai 2:25-30) Mehlel, nan koasoandi soh unsek wet, aramas koaros ahneki soahngen irair ehu nan ahr mour me re anahne kanengamahiong.—Madiu 10:22; Seims 1:12.
17. Dahme pahn sewese kitail en kanengamah ni mehkoaros?
17 Pohl kamehleleiong kitail me limpoak “kin sewesei kitail en loalenohng apwal akan koaros, . . . e kin sewesei kitail en liki Koht, oh en pil kanengamah ni mehkoaros.” (1 Korint 13:7) Atail limpoak ong Siohwa pahn sewesei kitail en lokolongki irair sohte lipilipil kan pwehki me pwung. (Madiu 16:24; 1 Korint 10:13) Kitail sohte kin rapahki pwe kitail en mehkihla atail pwoson. Me weksang met, atail mehn akadei iei en mourki mour me popohl, oh meleilei. (Rom 12:18; 1 Deselonika 4:11, 12) Mendahki met, ni ahnsou kan me kasongepen atail pwoson kin pwarada, kitail kin perenki kanengamahiong irair pwukat pwehki ih kisehn pweinen mouren tohnpadahk en Kristian kan. (Luk 14:28-33) Nindoken atail kin kanengamah, kitail kin song en kolokolte lamalam pwung, oh koapworopworki me mie mehkot mwahu me pahn kohsang nan irair apwal pwukat.
18. Iaduwen kanengamah pil anahn pahn irair mwahu kan?
18 Kalokolok kaidehn irairohte me kitail anahne kanengamahiong. Ekei pak, en kanengamah kin wehwehki en wohnlahte mendahki ma mie irair apwal ehu de pil sohte. Kanengamah kin oarepene kolokolte koasoandi mwahu en pali ngehn. Karasepe ehu, komw kin iang kisehn kalohk, uwen me omw irair kin mweidohng? Komw kin wadek oh doudouloale Mahsen en Koht oh kapehsehiong Semeomw nanleng ni omw kin kapakap? Komw kin kaukaule iang towehda mihding en mwomwohdiso kan, oh komw kin paiekihda kangoang kan me komwi oh iengomw me pwoson kan kin wiahiong emenemen? Ma ehi, eri mendahki ma ahnsouwet omw irair me mwahu de suwed, komw kin kanengamahiong irair pwukat. Dehr pwangada, “pwe ahnsou pahn leledo kitail ahpw pahn dolung ma kitail sohte pahn pwangahkihda.”—Kalesia 6:9.
Limpoak—“Ahl Apwoat me Siksang Mehlel”
19. Iaduwen limpoak wia “ahl apwoat me siksang mehlel”?
19 Pohl kasalehda kesempwalpen kasalehda limpoak ni ah kahdaneki irair sarawi wet “ahl apwoat me siksang mehlel.” (1 Korint 12:31) “Siksang mehlel” ni ahl dahieu? Eri, Pohl ahpwtehn wadekada kisakis kan en ngehno, me Kristian tohto nan senturi keieu ahneki. Ekei kin kak kokohp, mehteikan kin ahneki manaman en kamwahuwiala soumwahu kan, oh me tohto ahneki koahiek en lokaiahki ehu lokaia tohrohr. Kisakis pwukat inenen kapwuriamwei! Ahpw mendahki met, Pohl padahkihong mehn Korint kan: “Ma I ese lokaiahn aramas akan oh pil mahsen en tohnleng kan—ahpw sohte limpoak rehi, nahn ei lokaia kan pahn rasehng ngilen pehl ehu me sekesek mwahl. Ma I aleier kisakis en kokohp, ma I ese mehkoaros oh dehdehkihla me rir kan koaros, ma I diren soangen pwoson kehlail me kin kamwekidada nahna kan-ahpw sohte limpoak rehi, nahn kaidehk ngehi mehkot.” (1 Korint 13:1, 2) Ehi, pil wiewia kan me kakete mie katepe pahn wiahla “wiewia kan me sohte katepe” ma kahrepen atail wiewia kan kaidehn pwehki atail poakohng Koht oh mehn mpetail kan.—Ipru 6:1.
20. Dahme kahrehda kaukaule nannanti me anahn ma kitail pahn kekeirada limpoak?
20 Sises ketikihong kitail pil ehu kahrepe kitail en kekeirada irair sarawi wet en limpoak. E mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Lepin lokaiao “ma” kin kasalehda me nsenen emenemen Kristian ma e pahn sukuhlki en kasalehda limpoak de soh. Pwe ihte koukousoan nan sapwen wai ehu sohte pahn idingkihong kitail en sukuhlki en lokaiahki lokaiahn sahpwo. Wiewia pwukat duwehte ihte towehda mihding kan nan Kingdom Hall de werekiong iengetail Kristian kan sohte pahn pein padahkihong kitail en kasalehda limpoak. Kitail anahne kaukaule nannanti suksukuhlki “lokaia” wet.
21, 22. (a) Dahme kitail pahn wia ma kitail sohte kin kapwaiada ekei irair kan en limpoak me Pohl koasoia? (b) Ni ahl dahieu kitail kak nda me “limpoak me poatopoat, sohte imwi”?
21 Mie ahnsou kan me omw kasalehda limpoak sohte kin pahrekiong ekei irair kan en limpoak me Pohl koasoia. Ahpw dehr mworuskihla met. Ni kanengamah kapwaiada ire ko me e kasalehda. Kaukaule tehk dahme Paipel mahsanih oh kapwaiada ah mouren kosonned kan nan omw wiewia ong mehteikan. Dehpa manokehla mehn kahlemeng mwahu me pein Siohwa ketikihda ong kitail. Pohl kaweidki mehn Episos kan: “A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.”—Episos 4:32.
22 Duwehte sukuhlki en kasalehda omw pepehm ni lokaia kapw ehu pahn ekis ekis mengeila, kedekedeo komw pahn pil mengeikihla kasalehda limpoak. Pohl kamehleleiong kitail me “limpoak me poatopoat, sohte imwi.” (1 Korint 13:8) Me weksang kisakis manaman kan en ngehno, limpoak pahn mihmihte, sohte imwi. Ihme kahrehda, kitail anahne kaukaule sukuhlki en kasalehda irair sarawi wet. Nin duwen Pohl koasoia, limpoak kin wia “ahl apwoat me siksang mehlel.”
Komw Kak Kawehwehda?
◻ Iaduwen limpoak kak sewese kitail en powehdi aklapalap?
◻ Ni ahl dah kei limpoak kak sewese kitail en kekeirada popohl nan mwomwohdiso?
◻ Iaduwen limpoak kak sewese kitail en kanengamah?
◻ Iaduwen limpoak kin wia “ahl apwoat me siksang mehlel”?
[Kilel nan pali 25]
Limpoak pahn sewese kitail en mendahkihla sapwung kan en irail akan me iang kitail mih nan pwoson
[Kilel kan nan pali 29]
Lelepek dadaur kin wehwehki atail kin kolokolete soahng kan me kitail kin wiewia nan doadoahk en papah Siohwa