Re Wia Kupwuren Siohwa

Nsenki Kihda Kisakis kan Pwehn Kalaudekihla Kaudok Min

MEHN Israel kan kin kadehdehki meserail kan sapwellimen Siohwa manaman en doarehla. Re kilangehr duwen pihl akan en Sehd Weitahta ni manaman pwalpeseng, mweidohng irail en kotehla pwehl madekeng oh pitsang karis en sounpein Isip kan. Sang ni ahr mih ni pali teio, re kilang ni en pihlohte kamwopwala irail kan me pwakih irail. Siohwa ketin doarehla arail mour!​—Eksodus 14:21-31.

Ahpw, e kansensuwed pwe, ekei mehn Israel kan isanekihla dahme Siohwa ketin wiahda. Nin doken ahnsou me Moses mihmihte pohn Dolen Sainai, re kihong Aaron neirail mehn kapwat kohl kan oh idingkihong ih en wiahong irail ehu dikedik pwe ren kaudokiong. Ni ahnsou me e pwuresang pohn Dohlo, Moses diarada irail pokon en me uhwong kan me wie mwengemwenge, niminim, kahkahlek, oh kin pwongih ehu dikedik en kou kohl! Sang ni kaweid en Siohwa aramas 3,000​—keieu irail ko me tepiada uhwongo—​kamakamala. Rahno, sapwellimen Koht aramas akan sukuhlkihdi mehn kasukuhl kesempwal ehu duwen anahnepen en kaudokiong Siohwa kelehpw.​—Eksodus 32:1-6, 19-29.

Mwurinte wiewia wet, Moses onopada pwehn kapwaiada kehkehlik en Koht en kauwada ehu impwal sarawi, ehu tehnpas sarawi me re kak weuwa. Re pahn anahne dipwisou pweilaud kan oh tohndoadoahk koahiek kan pwehn kauwada impwal wet. Iawasa me mepwukat pahn kohsang ie? Oh dahme kitail kak sukuhlkihsang wiewia wet nan Paipel?

Kisakis en Dipwisou kan oh Koahiek kan

Ki Moses, Siohwa kehkehlikihong mehn Israel kan: “Kumwail en wia amwail kisakis ong Kauno (“Siohwa,” New World Translation). Koaros en nsenki en patohwanohng Kauno (“Siohwa,” NW) eh kisakis.” Soangen kisakis dah kei? Nanpwungen kisakis kan me Moses kilelehdi iei kohl, silper, kapa, dereht, lepin likou kan, wunen mahn, tuhke, oh takai kesempwal kan.​—Eksodus 35:5-9.

Mehn Israel kan ahneki kepwe tohto pwe ren kak kihda soangen kisakis laud pwukat. Tamataman, ni ahnsou me re mwesel sang nan Isip, re wahiei sang nan Isip kohl oh silper kan, iangahki likou tohto. Ni mehlel, “re wahsang en mehn Isip ko ar dipwisou kan.”a (Eksodus 12:35, 36) Mwowe, mehn Israel kan nsenki kihda neirail mehn kapwat kan pwehn wiahda ehu dikedik ong kaudok likamw. Ahnsou wet re pil pahn men kihda meirong en kalaudekihla kaudok mehlel?

Tehk me Moses sohte kilelehdi ia uwen laud me emen anahne en kihda. Ahpw, e kin pekih “koaros me men kisakis sang nan mohngiongarail.” Moses ni sansal pepehm me e sohte anahne iding sapwellimen Koht aramas akan. E kin koapworopworki me emenemen pahn kihda uwen me e kakohng.​—Pil kilang 2 Korint 8:10-12.

Ahpw, re pahn anahne laud sang ihte kepwe kan me re kihda pwehn kak kauwada impwalo. Siohwa pil padahkiohng mehn Israel kan: “Tohndoadoahk saman koaros rehmwail en patohdo oh wiahda mehkoaros me Kauno (“Siohwa,” NW) ketin koasoanehdi.” Ehi, re anahne tohndoadoahk saman kan pwehn kauwada impwalo. Ni mehlel, “soangen koahiek oh saman oh dehdehki ni doadoahk koaros en kalingan”​—iangahki parada tuhke kan, mete kan, oh kapwat kaselel kan—​pahn anahn pwehn kanekehla kokouwo! Ni mehlel, Siohwa pahn kahluwa koahiek en tohndoadoahk kan, oh kaping en pweidahn doadoahko pahn ni pwung kohwong ih.​—Eksodus 35:10, 30-35; 36:1, 2.

Mehn Israel kan ngoangki peikiong luhko en kihda arail kepwe kan oh koahiek kan. Paipel mahsanih: “Oh emenemen nin duwen me e nsenki ahpw patohwanohng Kauno eh meirong mehn wiahda Impwal me Kauno pahn kin ketiket loale. Re wahdo soahng koaros me anahnepe mie ong ni kaudok oh mehn wia likoun samworo kan. Koaros me inengieng, ohl oh lih, ahpw wahpene mehn kapwat kan, mehn tiati kan, rihng kan, mwaramwar akan oh soangen kisin takai kesempwal kan me kohl wia oh kasarawihong Kauno.”​—Eksodus 35:21, 22.

Mehn Kasukuhl ong Kitail

Rahnwet doadoahk laud en kalohkiseli rongamwahu en Wehin Koht kin wiawihda sang kisakis kan me emen kin nsenkihda. Pak tohto, kisakis pwukat iei mwohni. Ni ahl teikan, Kristian brother kan oh sister kan kin doadoahngki arail koahiek kan en sewese kauwada Kingdom Hall kan, wasahn kapokon kan, oh imwen rahn ohpis kan. Eri, pil mie doadoahk me kin wiawihda ni imwen Bethel epwiki samwa me mihmi wasa koaros nan sampah, doadoahk kan me kin anahne soangsoangen koahiek kan. Irail kan koaros me sang nan mohngiongarail kihda soangen kisakis pwukat kak koapworopworki me Siohwa sohte pahn ketin manokehla arail doadoahk laud kan!​—Ipru 6:10.

Met kin pil duwehte ah kin kadoadoahkihong dahme emenemen kitail wiahda nan doadoahk en kalohk. Koaros kin ale kangoang en rapahkihda ahnsou en ngoangki iang kalohk. (Madiu 24:14; Episos 5:15-17) Ekei kin wia met nin duwen sounkalohk kaukaule kei, de pioneer kan. Pwehki irair teikan me kin kahrehda, meteikan sohte kin kak wiahda awa tohto nan kalohk nin duwen pioneer kan. Mendahki met, re kin pil kaperenda Siohwa. Duwehte kisakis kan me kin kohda ong kokoupen impwalo, Siohwa sohte kin kilelehdi uwe ieu me emenemen en kihda. Ahpw, dahme e ketin kupwurki iei me, emenemen kitail en papahkihong ih mohngiong unsek, mour unsek, lamalam unsek, oh kehl unsek. (Mark 12:30) Ma kitail kin wia met, kitail kak koapworopworki me e pahn katingih kitail pwehki kisakis kan me kitail kin nsenki kihda pwehn kalaudekihla kaudok mehlel.​—Ipru 11:6.

[Nting tikitik me mi pah]